Siro simbidi sa siphya sa Mmidi wu wu Fumako

NGU 5 ka Outubro wa 2024, ka mtshangano wa dilembe, ku ningetwe txiziviso txo sawuleka txa ti to: Mwanathu Jody Jedele ni Mwanathu Jacob Rumph, va sawutwe kota siro sa Mmidi wu wu Fumako wa Tifakazi ta Jehovha. Vanathu vava va vambidi se va ni malembe a mangi va txi thumela Jehovha ngu kuthembeka.

Mwanathu Jedele a velekilwe Missouri, Estados Unidos ni ku a kulisilwe ka mwaya wa Tifakazi ta Jehovha. Mwaya wakwe wu ti zumba aha ku nga ti si nga ni vanathu va vangi. Ngu toneto, a zivile vanathu vo ta ngu ka makhalo o hambana-hambana ava va nga txi ta vhuneta ka mthumo wo txhumayela. Ene a gwesilwe ngutu ngu lirando ni wumwewo wa vanathu vonevo. A bhabhatisilwe i di ngadi jovhem, ngu 15 ka Outubro wa 1983. Mwanathu Jedele a txi wu dhunda mthumo wo txhumayela, se mbimo yi a nga heta txikolwa, a vile nyaphandule wa mbimo yotshe ngu Setembro wa 1989.

I di ngadi jovhem, vaveleki vakwe va txi m’teka kumweko ni ndiyakwe ve endela Bhetele. Maendo awa ma kuzeta vanana ti to ve ti vekela makungo o ya thumela Bhetele. Se eto ti mahekile ka mwanathu Jedele ni ndiyakwe. Mwanathu Jedele a khatile ngu ku ya thuma ka Bhetele ya Wallkill ngu Setembro wa 1990. Ene a khatile ngu kuthuma ka Dhepartamentu ya limpeza. Se ngu kutsimbila ka mbimo, e thuma ka Dhepartamentu yo tendera malwati.

Ka mbimo yoneyo, mabanza ya ma nga ti maneka hafuhi a lidimi la Txipanyola ma ti ya me kula ni ku ma ti lava txivhuno txa vanathu. Ngu toneto, mwanathu Jedele a khatile kusengemela ka dimwedo da mabanza oneyo ni ku a khatile kugonda Txipanyola. Ku di pindile mbimonyana, ene a zivanile ni mwanathu Damaris awu i nga ti nyaphandule ni ku va txhadhile, ve gwita ve ya thuma votshe Bhetele.

Ngu 2005, vona va humile Bhetele kasiku ve ya khatalela vaveleki vawe. Ka mbimo yoneyo, vona va thumile kota vanyaphandule va mbimo yotshe. Mwanathu Jedele a vhunetile ko gondisa ka txikolwa txa vanyaphandule ni ku a thumile ka komisawu yo womba-womba ni sibhejela kumweko ni ka komisawu ya ta wuaki.

Ngu 2013, mwanathu Jedele kumweko ni msikati wakwe va rambilwe ti to ve tshumela ve ya Bhetele kasiku ve ta vhuneta ka projeto ya wuaki ya Warwick. Vona va tshumete ve thuma khe Patterson ni Wallkill. Mwanathu Jedele a thumile ka Dhepartamentu ya wuaki ni ya Sibhejela. Ngu Março wa 2023, ene a sawutwe kota m’vhuneteli wa Komisawu ya Mthumo. A txi pimisa ngu siavelo asi a nga va ka sona, ene a womba tiya: “Ngako u txi ningwa siavelo sa siphya, mbimo yimwani u nga thuka u pimisa ti to khu na ku sikota ku si hetisisa. Kambe ka mbimo yoneyo, ndatinene kuthemba Jehovha nguku ngene a hi ningako siavelo soneso.”

Mwanathu Rumph a veleketwe Califórnia, akhe Estados Unidos. Mbimo yi i ngati ngadi mwanana, mame wakwe a ti hote ngu didhawa da moya. Hambiketo, a mahile totshe ti to e gondisa mwanana wakwe ditshuri da mu ka Bhiblia. I singeto dwe, mwanathu Rumph dilembe ni dilembe a ti hamba e ya pfuxela vhovho wakwe awu i nga ti Fakazi ya Jehovha. Vhovho wakwe a mvhuni ti to e tsakela ditshuri da mu ka Bhiblia ni ku mbimo yi a nga ti ni 13 wa malembe a kombete kugondelwa Bhiblia. Se ngu 27 ka Setembro wa 1992, a bhabhatisilwe. Mame wakwe a tsakile, e khata kuhiseka ngu didhawa da moya ni ku sotshe siro sa mwaya wakwe si bhabhatisilwe.

I di ngadi jovhem, mwanathu Rumph a woni litsako ali vanyaphandule va nga ti nalo. Se mbimo yi a nga heta txikolwa, ene a khatile kuthuma kota nyaphandule ngu Setembro wa 1995. Ngu 2000, a rurile eya Equador e ya thuma amu ku nga ti ni txilaveko. Adi kona kheya, a zivile mwanathu Inga awu i nga ti nyaphandule a nga txi ta ngu Canadá ni ku va txhadhile. Msana ko txhadha, vona va ti ya thuma ka didhoropa do kari da khe Equador aha ku nga ti kova ni txigrupwana txa vahuweleli. Konku, txigrupwana txonetxo se dibanza adi di yako di kula.

Ngu kutsimbila ka mbimo, mwanathu Rumph ni msikati wakwe va avetwe kuthuma kota vanyaphandule vo sawuleka ni ku ngu msana va thumile kota vawoneleli va txigava. Ngu 2011, vona va rambilwe ti to ve ya kursara txikolwa txa Giliyadhi ka turma ya wu 132. Msana ko gradhuwara, va thumile ka makhalo o hambana-hambana hamafuni kotshe ni ku va tidite ngu mithumo yo hambana-hambana ka sengeletano ya Jehova, yo fana ni kuthuma Bhetele, kuva varumiwa ni kuva vawoneleli va sigava. Mwanathu Rumph a tsumete eva ni lungelo yo va m’gondisi ka Txikolwa txa Vatxhumayeli va Mfumo.

Ngu mhaka ya mtungu wa korona, mwanathu Rumph ni msikati wakwe va tshumete ve ya Estados Unidos. Vona va rambilwe ku ya thuma ka Bhetele ya Wallkill aha mwanathu Rumph a nga mana treinamentu ka Dhepartamentu ya Mthumo. Ka mbimo yoneyo, vona va ningilwe txiavelo txo tshumela veya ka Bhetele ya Equador aha mwanathu Rumph a nga ya thuma kota txiro txa Komisawu ya Bhetele. Ngu 2023, va avetwe ku ya thuma Warwick. Se ngu Janeiro wa 2024, mwanathu Rumph a sawutwe ti to eva m’vhuneteli wa Komisawu ya Mthumo. A txi pimisa ngu otshe makhalo aya a nga thuma ka ona, ene a womba tiya: “Ati ti mahako ti to txiavelo txi va txa lisima, hi nga wukhalo awu hi ku ka wona, kambe vathu ava hi va thumelako.”

Ha wu bonga ngutu mthumo wa vanathu vava, ni ku athu ‘ha va vekela txithavo vanathu vo fana ni vonevo.’—Vaf. 2:29.