Tiveke hahatshi kufana ni Jehovha

1. Ngu kutxani kutiveka hahatshi ka Jehovha ku txi xamatisa?

NGAKU u txi wona vakoma, vathangeli ni vathu va ku ni wutixamuleli ka mafu yawa, ina u nga womba ti to vathu vo tiveka hahatshi? Nadha! Kambe, kuhambana ni vathu vonevo, Jehovha hambiku i ku nyamitamo, ene Txizimu txo tiveka hahatshi. (Mas. 113:5-8) Kha ngaho wu a tivekako hahatshi kufana ni Jehovha, ene kha thuki e tiguleta. Ka gondo yiya, hi na wona mune wa timhaka ati ti kombisako to Jehovha wa tiveka hahatshi. Hi na tshumela hi wona nzila yi Jesu Kristu a etetelako ngu yona kutiveka hahatshi ka Tate wakwe. Kugonda ngu tifanelo tiya, ti na hi vhuna ku hi va vangana va Jehovha, ni ku hi vhuna ku hi etetela kutiveka hahatshi kwakwe.

JEHOVHA A TIEMISETE KU HI ENGISA

2. Dibhuku da Masalmo 62:8 di hi gela txani ngu Jehovha? (Wona ni mfota wa kapa.)

² Ta karata kubhula ni m’thu wo tiguleta, nguku ene mbimo yotshe a pimisa ti to mbwa lisima kupinda votshe. Phela Jehovha wa hambana ni vathu vonevo. Aku tate wathu wa nzumani i ku wo tiveka hahatshi, ene wa hi ramba ti to hi tshuketa kwakwe hi ya m’gela totshe ati ti hi karatako. (Lera Masalmo 62:8.) Kufana ni tate wa lirando a engiselako mwanana wakwe ngaku a txi m’gela ati ti m’karatako, Jehovha wa khatala ni kuengisela kha kwati mikombelo ya malanda akwe. Ngu ditshuri, ene a mahile ti to mikombelo ya malanda akwe yi bhalwa amu ka Bhiblia. Eto ti kombisa ti to Jehovha a lava ku hi tshuketa kwakwe. (Jox. 10:12-14; 1 Sam. 1:10-18) Kambe, mbimo yimwani hi nga thava kumaha mkombelo ka Jehovha ngu mhaka ya sionho asi hi nga si maha. Se, hi nga maha txani ka txiemo txonetxo?

3. Ngu kutxani u nga tsanisekako ti to Jehovha a lava ti to mbimo yotshe u tshuketa kwakwe ngu mkombelo?

³ Athu hi nga tshuketa ka Jehovha ngu mkombelo, hambi hi txi tipfa hi si fanelwi ngu lirando lakwe. Ngu kutxani hi txi womba toneto? Ka txidinganiso atxi Jesu a nga womba-womba ngu mwanana wo mwalala, ene a fananisile Jehovha ni tate wa wumbilu awu a nga amukela mwanana wakwe a nga tisola ni kutipfa a si fanelwi ngu lirando la mwaya wakwe. Nji txani atxi tate wule a nga txi maha mbimo yi a nga wona mwanana wakwe a txi wuya mtini? Jesu a wombile ti to, mbimo yi tate wule a nga wona mwanana wakwe a di ngadi kule, a to “tutuma e ta m’wukarela e m’nyuta.” (Luka 15:17-20) Jehovha a fana ni tate eneyo. Kutiveka hahatshi kwakwe ka mmaha e engisela kwati mikombelo ya vale va tipfako mnando ngu mhaka ya sionho sawe. (Sid. 3:19, 20) Aku Jehovha a ku ni mpfela wusiwana, wa tutuma ngu nzila yo fanekisela, e ta hi thavelela ni ku hi tsanisekisa to wa hi dhunda. (Isaya 57:15) Ati mahisa kutxani toneto? Makhambi o tala a thumisa madhota, va hamwayani kwathu ni vanathu. (Jak. 5:14, 15) Jehovha a maha tiya nguko a lava ti to hi va vangana vakwe.

4. Nji txani txi kombisako ti to Jesu ati tiemisete ku engisela vamwani?

⁴ Jesu wa etetela Tate wakwe. Kufana ni Jehovha, Jesu wa ti veka hahatshi. Kota wuyelo, mbimo yi a nga ti hamafuni, vathu va si thavi kubhula nayo ni ku mmaha siwotiso. (Marku 4:10, 11) Mbimo yi a nga txi va kombela ti to ve womba mawonelo awe ka mhaka yo kari, va si thavi ku m’gela ati va nga txi tipfisa tona. (Mat. 16:13-16) Va txi thuka ve maha txionho, va si thavi ti to Jesu a nga thuka e va henyela, nguku va txi ti ziva ti to ene i ti m’thu wa wunene ni kulaphisa mbilu. (Mat. 17:24-27) Aku Jesu a nga ti etetela kwati tifanelo ta Tate wakwe, vagondiswa vakwe va txi mziva kwati Jehovha. (Joh. 14:9) Vona va gondile ti to Jehovha atxi hambana ni vathangeli va wukhongeli wa timbimo tile, ava i nga ti vathu vo tiguleta. Kuhambana ni vona, Jesu i ti m’thu wo tiveka hahatshi ni ku ti txi hehuka kubhula nayo.

5. Ngu yihi wuyelo hi yi manako ngako hi di vathu vo tiveka hahatshi?

⁵ Hi nga m’etetelisa kutxani Jehovha? Ngako hi di vathu vo tiveka hahatshi, vathu kha va mbi thava kubhula ni nathu. Kutiveka hahatshi ti na hi vhuna ku hi vayilela kubavela sa vamwani, hi vayilela kutiguleta ni ku ti na hi vhuna kudivalela vamwani ngako va txi hi onhela. Se eto ti na maha ti to vathu vamwani ve hi tolovela ni ku hi tsakela. (Vakl. 3:12-14) Madhota ma fanete kutsaniseka ti to vanathu kha va thavi kubhula navo. Kasiku vanathu ve tolovela madhota, ona ma fanete ku mbimo yotshe me va ni vanathu mitshanganoni, i si nga kuxalela mitshangano ngu vhidhiyo konferensiya ti si sungi. Ngako siemo sawe si txi va tumelela, vona va fanete kuthuma ni vanathu ka mthumo wo txhumayela ngu mti ni mti. Ngaku madhota ma txi maha toneto, vanathu va na mbi thava kuva gela sikarato sawe.

JEHOVHA WA PFISISA

6-7. Ningela sikombiso asi si kombisako ti to Jehovha Txizimu txo pfisisa.

⁶ Vathu vo tiguleta va pimisa ti to va ziva ngutu kupala vamwani, ni ku va omelela ka mawonelo awe. Kambe, aku Jehovha i ku wo tiveka hahatshi, ene wa pfisisa hambiku i ku Txizimu txa mtamo wotshe. Wona ti Jehovha a nga ti maha ka Miriyamu ndiya ya Mosi. Ene ni Aroni va wukete Mosi, awu i nga ti muemeli wa Jehovha. Phela Miriyamu a ti ko wukela Jehovha ngu kukongoma. Ngu mhaka ya toneto, Jehovha a henyete Miriyamu e mtsayisa ngu ku m‘tisela malwati a tshekela. Se, Jehovha a mahile txani mbimo yi Mosi ni Aroni va nga kombela ti to Jehovha e hanyisa ndiyawe? Jehovha kha tiguleta e lamba kuengisa txikombelo txawe. Aku Jehovha i ku Txizimu txo tiveka hahatshi, a hanyisile Miriyamu.—Mit. 12:1-15.

⁷ Jehovha a tshumete e kombisa kutiveka hahatshi mbimo yi a nga txi thumisana ni Mkoma Ezekhiya. Ngu kuthumisa mprofeti wakwe, Jehovha a gete Ezekhiya ti to a ndi na fa. Ezekhiya a dilete Jehovha ti to e m’hanyisa. Ngu wumbilu, Jehovha a engisile mkombelo wa Ezekhiya e mu engetela 15 wa malembe a wutomi wakwe. (2 Vafu. 20:1, 5, 6) Ngu ditshuri, kutiveka hahatshi ka maha Jehovha e va wo pfisisa ni ku va ni wunene.

8. Ngu tihi ti ti kombisako ti to Jesu m’thu wo pfisisa? (Marku 3:1-6)

⁸ Jesu wa etetela Tate wakwe. Mbimo yi Jesu a nga ti hamafuni, ene a txi vhuna vamwani. Ngu txikombiso, a hanyisile vathu ngu Sabata hambiku vathangeli va wukhongeli va nga si ti lavi to e maha toneto. (Lera Marku 3:1-6.) Jesu wa simama e va m’thu wo pfisisa kota msungo wa dibanza. Ngu txikombiso, ngaku m’thu wo kari dibanzani a txi maha txionho txa hombe, Jesu wa laphisela mbilu m’thu eneyo e m’ninga mkhanjo wo e txitxa mahanyelo akwe.—Mtu. 2:2-5.

9. Ngu tihi ti hi nga ti mahako kasi kukombisa ti to hi vathu vo pfisisa? (Wona ni mifota.)

⁹ Hi nga mu etetelisa kutxani Jehovha? Hi txi tiveka hahatshi hi na va vathu vo pfisisa kufana ni Jehovha. (Jak. 3:17) Ngu txikombiso, vaveleki vo pfisisa va na mbi emela ti to vanana vawe ve maha ati va no mbi sikota kumaha, nem kufananisela wusikoti wa vanana vawe. Vaveleki va nga gonda ka txikombiso txa Jakobe ngu kulera ati ti ku ka Genesisi 33:12-14. Madhota ni ona ma fanete kuva vathu vo pfisisa. Ngu txikombiso, didhota do pfisisa kha di sinzisi mawonelo a dona, hahanze keto, da seketela mawonelo a madhota mamwani ngaku mawonelo onewo ma si lwisani ni milayo ya Bhiblia. (1 Tim. 3:2, 3) Hotshethu hi lava kuva vo ti veka hahatshi ngu kuzama kupfisisa mawonelo a vamwani hambi hi si tumelelani nawo. (Var. 14:1) Hotshethu dibanzani hi nga zama kumaha ti to ‘wunene wathu wu ziwa ngu votshe vathu.’—Vaf. 4:5.

JEHOVHA A NI PASIYENSIYA

10. Ka timbimo ta kale Jehovha a ti kombisisile kutxani ti to m’thu wa pasiyensiya?

¹⁰ Vathu vo tiguleta kha va nga ni pasiyensiya. Kuhambana ni vathu vonevo, Jehovha ani pasiyensiya kupinda votshe. Ngu txikombiso, ka masiku a Nowa, Jehovha a wombile ti to a ndi lovisa mafu ale o biha ku di pindile 120 wa malembe. (Gen. 6:3) Eto ti ningile mbimo Nowa yo e wunja vanana, e aka ngalava ngu kuvhunwa ngu mwaya wakwe. Ku di pindile malembe o tala, ngilozi ya Jehovha yi engisete Abrahamu mbimo yi a nga txi maha siwotiso mayelano ni kuloviswa ka Sodhoma ni Gomora. I ti ku ngelozi yoneyo i ti yo ti guleta, ti nga maha yi di wombile tiya: ‘Ngawe mani wo u nga ni wotisa toneto?’ Kambe, ngilozi yoneyo yi etetete Jehovha yi engisela Abrahamu ngu pasiyensiya.—Gen. 18:20-33.

11. Ngu kuya ngu 2 Pedro 3:9, ngu kutxani Jehovha a txi kombisa pasiyensiya ka timbimo tathu?

¹¹ Ngu kutiveka hahatshi, Jehovha wa simama eva ni pasiyensiya ka masiku athu. Ene wa emela ngu pasiyensiya ditshiku di a nga di veka kasi kulovisa vabihi. Ngu kutxani a txi maha toneto? Nguku ene “kha ti lavi ti to ni wa mmweyo a txi lova, aniko a lava ti to votshe ve hunduluka.” (Lera 2 Pedro 3:9.) Ina Jehovha o ti hetela txhukela ngu kubwela ngu kukombisa pasiyensiya? Nadha! Nguku ngu mhaka ya pasiyensiya yakwe, timiliyoni ta vathu ta gonda ngu ngene ni ku va vangana vakwe. Phela hi emela ti to vamwani ni vona ve gonda ngu Jehovha ni ku va vangana vakwe. Kambe pasiyensiya ya Jehovha ya guma. Ene wa va dhunda vathu, kambe kha mahi ma tumela totshe. Ene kha na mbi tumelela ti to vathu vo biha ve simama ngu ha ku si gumiko.—Hab. 2:3.

12. Jesu a yi etetelisa kutxani pasiyensiya ya Jehovha?

¹² Jesu wa etetela Tate wakwe. Kudingana malembe o tala, Jesu wa etetela pasiyensiya ya Jehovha. Ene a woni Sathani a txi lumbeta Jehovha kumweko ni vathu vo thembeka. (Gen. 3:4, 5; Jobe 1:11; Mtu. 12:10) Jesu a tshumete e wona vathu vavangi va txi xaniseka ngutu. Hi nga pimisa nzila Jesu a ti navelako ngu yona “kufuvisa mithumo ya Sathani”! (1 Joh. 3:8) Kambe, ngu pasiyensiya wa emela ti to Jehovha e mtumelela kasiku e fuvisa mithumo ya Sathani. Ene wa tiziva ti to i Jehovha a fanelako kumaha txisungo txa mbimo a yi a no fuvisa wotshe wubihi.—Mith. 1:7.

13. Ngu kutxani Jesu a di kombisile pasiyensiya ka vapostoli vakwe?

¹³ Mbimo yi Jesu a nga ti hamafuni a kombisile pasiyensiya ka vapostoli vakwe. Ngu txikombiso, mbimo yi va nga txi dhokadhokisana ngu ti to i mani a nova wa hombe, Jesu kha pimisa ti to vona sindaka milayo so si na mbi txitxa. Hahanze keto, ene a simamile e kombisa pasiyensiya. (Luka 9:46; 22:24-27) Ene a txi themba ti to ngu kutsimbila ka mbimo va ndi na maha kutxitxa a ku kulavekako. Ina awe u khala kumaha phazamo yona yi ya yimweyo makhambi a mangi? I di toneto, awe wa tsaka ngu kuva ni mkoma awu a tivekako hahatshi ni ku va ni pasiyensiya.

14. Hi nga yi sakulelisa kutxani pasiyensiya?

¹⁴ Hi nga mu etetelisa kutxani Jehovha? Ngako hi txo sakulela ku va ni “mapimiselo a Kristu,” ti na hi hehukela kupimisa ni ku maha timhaka kufana ni Jehovha. (1 Vak. 2:16) Hi nga ma zivisa kutxani mapimiselo a Kristu? Ngu kugonda ngu matimu a Jesu ka dibhuku da Matewu, Marku, Luka ni Johani. Ngu msana, hi fanete ku tiha mbimo yo alakanyisisa ngu ti hi nga tigonda ni ku wona nzila yi matimu oneyo ma kombisako mapimiselo a Jesu. Hi fanete kutshumela hi maha mkombelo ka Jehovha kasiku e hi vhuna ku hi va vathu vo tiveka hahatshi ni kuva ni pasiyensiya kufana ni Jesu. Ngaku hi txi sakulela kuva ni mapimiselo a Kristu, ti na hi hehukela kuetetela Jehovha hi va ni pasiyensiya ni vanathu.—Mat. 18:26-30, 35.

JEHOVHA WA VA WONA AVA VO TIVEKA HAHATSHI

15. Ningela sikombiso asi si kombisako ti to Jehovha wa va dhunda vathu va va tivekako hahatshi. (Masalmo 138:6, NM.)

¹⁵ Lera Masalmo 138:6. Hi nga kutsakisa ka tona kuziva ti to avale vo tiveka hahatshi va wonwa ngu Mvangi wa silo sotshe. Wona sikombiso so kari sa vathu va Jehovha a nga va ninga lisima ka timbimo ta kale. Vamwani kwawe kha hi va zivi kwati, kambe Jehovha a mahile ti to matimu awe me bhalwa amu ka Bhiblia. Jehovha a huhutete Mosi ti to e bhala ditina da Dhebhora awu i nga ti infermera ka timbimo ta Izaki ni Jakobe. Ene a thumete ngu kuthembeka mwaya wa Izaki ni Jakobe kudingana 125 wa malembe. Hambiku hi si ziviko ta tingi mayelano ni wamsikati wuwa wo thembeka, Jehovha a mahile ti to ditina dakwe di bhalwa amu ka Bhiblia kasiku hi mziva. (Gen. 24:59; 35:8) Ngu kutsimbila ka malembe, Jehovha a khatalete Dhavhidha, txifanyana txi i nga ti m’dyisi ni kutshumela e mmaha mkoma wa Israyeli. (2 Sam. 22:1, 36) Msananyana kova Jesu a di velekilwe, Txizimu txi rumete tingilozi kasiku tiya gela vadyisi ti to hafuhi ni Bhetlehema ku ti velekilwe Mesiya. (Luka 2:8-11) Se mbimo yi Josefa ni Mariya va nga teka Jesu ve mu yisa dithepeleni, Jehovha a ningile lungelo Simiyoni ni Ana ava se va nga ti kumbile ti to ve wona Jesu i di ngadi mwanana. (Luka 2:25-30, 36-38) Ngu ditshuri, “Jehovha wa va wona avale va tivekako hahatshi”!

16. Ngu tihi ti Jesu a nga ti maha a ti ti kombisako ti to a ti ninga lisima vamwani kufana ni Tate wakwe?

¹⁶ Jesu wa etetela Tate wakwe. Kufana ni tate wakwe, Jesu wa ninga lisima ava vo tiveka hahatshi. Jesu a gondisile vathu vo tiveka hahatshi mayelano ni mfumo wa Txizimu. (Mith. 4:13; Mat. 11:25) Ene a tshumete e hanyisa valwati ni ku va ñola ngu nzila ya yinene aha koza ve tipfa i di va lisima. (Luka 5:13) Ka wusiku wo gwita asi si kudawa, Jesu a sambisile mikondo ya vapostoli vakwe, i ku mthumo wu ngu mtolovelo wu nga ti mahwa ngu txithumi. (Joh. 13:5) Asi se tshumela eya nzumani, Jesu a kombisile ti to wa va ninga lisima valondeteli vakwe ngu ku va ninga mthumo wa lisima ngutu kupinda yotshe hamafuni, i ku wo vhuna vamwani ti to ve ta mana wutomi wo mbi guma.—Mat. 28:19, 20.

17. Hi nga kombisisa kutxani ti to ha ninga lisima vamwani? (Wona ni mfota.)

¹⁷ Hi nga mu etetelisa kutxani Jehovha? Hi ninga lisima vathu ngaku hi txi va gela mahungu a manene ti si nga ni mhaka ni mu va tako ngu kona, lixaka lawe ni ti to va gondile mwendo nem. Hi tshumela hi kombisa ti to ha ninga lisima vanathu nguku va teka i di va lisima ku hi pinda ti si nga ni mhaka ni wusikoti wathu mwendo malungelo ya hi ku nawo. (Vaf. 2:3) Jehovha wa tsaka ngutu mbimo yi hi tivekako hahatshi, hi va “vo khata ku kombisa” txithavo ka vamwani.—Var. 12:10; Zef. 3:12.

18. Ngu kutxani awe u txi lava kuetetela kutiveka hahatshi ka Jehovha?

¹⁸ Ngako hi txi tikaratela kuva vo tiveka hahatshi kufana ni Tate wathu wa nzumani, hi naya masoni hi va vathu va pasiyensiya, vo pfisisa ni ku vamwani va na mbi thava kubhula ni nathu. Hi lava kutshumela hi ninga lisima vathu vamwani kufana ni Tate wathu Jehovha. Ngako hi txi maha totshe ti hi nga tikotako kasiku hi tiveka hahatshi kufana ni Jehovha, ene a na hi teka hi di va lisima masoni kwakwe!—Isaya 43:4.