Va tsaka ava va thumelako Txizimu txa litsako

1. Ngu kutxani Tifakazi ta Jehovha i di vathu vo tsaka? (Wona mfota wu wu ku makhatoni.)

TIFAKAZI TA JEHOVHA mbathu vo tsaka. Hani ni hani ti ku kona, mwendo mitshanganoni ya dibanza mwendo ya hombe, ti txi sakana, ta bhula ni kusekelela. Ngu kutxani ti txi tsaka? Nguko ti zivako Jehovha, “Txizimu . . . txa makatekwa.” Tona ta mthumela ni kuzama ku mu etetela. (1 Timoti 1:11; Masalmo 16:11) Jehovha njisima txa makatekwa mwendo litsako, se a lava ti to hi tsaka, ni ku wa hi ninga sivangelo so tsaka.​—Dhewuteronome 12:7; Ekleziyaste 3:12, 13.

2, 3. a) Nji txani kutsaka? b) Ngu kutxani ti nga karatako kutsaka?

² Awe ko? Ina u tsakile? Kutsaka ti womba kutipfa kwati, kuenelelwa ngu wutomi. Bhiblia yi kombisa ti to ava va tsakako ngu ditshuri ngu va va nga katekiswa ngu Jehovha. Kambe ka masiku awa a ngweno, ngu kutxani ti nga karatako kutsaka?

³ Kambe hi txi manana ni siemo so nemela, ti nga karata kutsaka. Ngu txikombiso, ngako hi txi felwa mwendo dixaka dathu di txi thaviswa dibanzani, wukati wu txi onheka, mwendo hi txi gumelwa ngu mthumo. Ti nga tshumela ti karata kutsaka ngako mtini ku di ni diguwa, hi txi poyilwa mthumoni mwendo txikolwani, mwendo hi txi xaniswa mwendo kubetwa jele nguko hi thumelako Jehovha. Ti nga maha hi txi ñolwa ngu malwati a hombe mwendo hi lwalwa ngu kupimisa ngutu. Kambe khumbula ti to Jesu Kristu, ‘[i ku wo tsaka, NM] ni wo dhumiseka,’ mwendo Mfumeli, wa ti dhunda kutsanisa vathu ni ku va tsakisa. (1 Timoti 6:15; Matewu 11:28-30) Ka Gondo ya Mmangoni, Jesu a wombile tifanelo to kari ati ti nga hi vhunako ku va vo tsaka hambi hi di ni sikarato ngu mhaka ya ku hi hanyako ka mafu a Sathani.

ATHU HI NGE TSAKI HI SI NGA NI JEHOVHA

4, 5. Hi nga maha txani ti to hi zumba hi di tsakile?

⁴ Mhaka yo khata ayi Jesu a nga yi womba nja lisima ngutu. A ti khene: “Va katekile ava i ku sisiwana moyani, nguko Mfumo wa nzumani mbwawe!” (Matewu 5:3) Ngako hi txi tiziva ti to hi ni nzala ya moya, ha ti pfisisa ti to hi fanete hi ziva Txizimu ni ku hi lava txivhuno ni mkongomiso wa txona. Hi ti kombisisa kutxani toneto? Ngu kugonda Bhiblia, ni ku txiengisa, ni ku hi teka wukhozeli wa txona i di wa lisima ngutu ka wutomi wathu. Eto ti na hi vhuna kumana litsako. Likholo lathu la ti to sithembiso sa Txizimu si na maheka li na tiya. Ni ku “txithembo txathu” txa mu ka Bhiblia txi na hi tsanisa.​—Titosi 2:13.

⁵ Hi txi lava kutsaka hambi hi txi manana ni sikarato ka wutomi wathu, hi fanete hi simama hi tsanisa wungana wathu ni Jehovha. Mpostoli Paulo a ti khene: “Tsakani ka Mkoma yotshe mbimo! Na engeta ni mi gela: Tsakani!” (Vafilipiya 4:4) Hi fanete hi va ni wutxhari wo ta ngu txitimwi kasiku hi va vangana va hombe va Jehovha. Bhiblia yi khene: “A katekile m’thu wule a manako wutxhari, ni m’thu wule a manako wuzivi. Wutxhari mndonga wa wutomi ka vale va wu ñolisisako, kambe va katekile votshe vale va wu veketako.”​—Mavingu 3:13, 18.

6. Nji txani tximwani hi fanelako ku txi maha ti to hi zumba hi di tsakile?

⁶ Phela ti to hi zumba hi di tsakile, ti ni lisima ngutu kusimama hi thumisa ati hi ti gondako mu ka Bhiblia. Jesu a junyatisile lisima la kona mbimo yi a nga khene: “Ngako mi txi ti ziva tiya ni ku ti thuma, mi katekile.” (Johani 13:17; lera Jakobe 1:25.) Atiya ti ni lisima ngako hi txi lava kuenelisa nzala yathu ya moya ni kuzumba hi di tsakile. Kambe hi nga tsakisa kutxani mbimo yi hi mananako ni ta tingi ati ti nga hi tekelako litsako? He woni ati Jesu a nga gwita e womba ka Gondo ya Mmangoni.

TIFANELO ATI TI HI MAHAKO HI TSAKA

7. Ti mahisa kutxani to ava va dilako ve tsaka?

⁷ “Va katekile ava va dilako, nguko va na thavelelwa!” (Matewu 5:4) Hi nga thuka hi ti wotisa hi txi khathu: ‘M’thu wu a dilako a nga tsakisa kutxani?’ Jesu a si womba-wombi ngu vathu votshe va va dilako. Ka masiku awa “o gwitisa” o “karata” vathu vo tala vo biha va dila mwendo va si tsaki ngu mhaka ya sikarato asi va mananako naso. (2 Timoti 3:1) Kambe vona vo alakanya ngu tawe dwe i si nga ta Jehovha, kha va tilavi kumaha wungana nayo, se kha va na kutsaka. Jesu a ti womba ava va zivako nzala yawe ya moya. Vona va dila nguko va wona ti to vathu vo tala kha va engisi Txizimu ni ku kha va hanyi nga ti txi ti lavisako tona. Vona va ti ziva ti to va maha sionho ni ku va wu wona wubihi wo thisa awu wu mahekako ha mafuni hawa. Jehovha wa va wona ava ngu ditshuri va dilako, se wa va thavelela ngu Bhiblia, e va ninga litsako ni wutomi.​—Lera Ezekhiyele 5:11; 9:4.

8. Kuthutha ku nga kuvhunisa kutxani kumana litsako?

⁸ “Va katekile ava vo thutha, nguko va na mana thomba ya mafu.” (Matewu 5:5) Ti mahisa kutxani ti to kuthutha ku hi vhuna hi va ni litsako? Vathu vo tala va karata futhi va dhunda mazunga, se eto ti maha ve va ni sikarato. Mbimo yi va gondako ditshuri, va txitxa ve ambala “m’thu wamphya.” Konkuwa va kombisa “moya wa wumbilu, wa wunene, wa ku ti veka hahatshi, wa kuthutha ni wa kutimisela.” (Vakolosa 3:9-12) Se wuyelo ya toneto va mana kudikha, ve hanyisana kwati ni vamwani, ni ku va tsaka. Txizimu txi tshumela txi va thembisa ti to va na “dya thomba ya mafu.”​—Masalmo 37:8-10, 29.

9. a) Jesu a ti womba txani mbimo yi a nga khene vo thutha va na “dya thomba ya mafu”? b) Ava va “ku ni nzala ni ditora da wululami” va nga tsakisa kutxani?

⁹ Jesu a txi womba txani mbimo yi a nga khene vo thutha va na “dya thomba ya mafu”? Vasawuleki va na mana thomba ya mafu mbimo yi va no ma fuma kota vakoma ni vaphaxeli. (Mtuletelo 20:6) Se vathu vo tala va va singako ni themba yo ya nzumani, va na mana thomba ya mafu mbimo yi va no tumelelwa kuhanya ka ona kala kupinduka. Va na va vo hetiseka ni kuva ni kudikha ni litsako. Vathu vonevo ngu va Jesu a nga tshumela a txi khene: “Va katekile ava va ku ni nzala ni ditora da wululami.” (Matewu 5:6) Ditora dawe do lava wululami di na eneliswa mbimo yi Jehovha a no thavisa wotshe wubihi. (2 Pedro 3:13) Ka mafu a maphya, vathu vo lulama va na mana litsako ni ku va na mbi ngadi ve dila ngu mhaka ya wubihi awu vathu vo biha va wu mahako.​—Masalmo 37:17.

10. Kuva ni wumbilu ti womba txani?

¹⁰ “Va katekile ava va ku ni wumbilu, nguko va na mahelwa wumbilu ni vona!” (Matewu 5:7) Ku va ni wumbilu ti womba ku va wo amukela, kutsakela, kupfela, i ku ti to, kupfela wusiwana va va xanisekako. Kambe kuva ni wumbilu hi nga kuwomba ngu txisofu dwe. Bhiblia yi gondisa ti to ku va ni wumbilu ti pata kumaha to kari ti to hi vhuna vamwani.

11. Txidinganiso txa Msamariya txi hi gondisa txani?

¹¹ Lera Luka 10:30-37. Txidinganiso txa Jesu txa Msamariya, txi kombisa kwati ati ti wombako tona kuva ni wumbilu. Msamariya a ve ni wumbilu ni kupfela wusiwana wamwamna wu a nga ti xaniseka, se eto ti mmahile e m’vhuna. Msana ko womba txidinganiso txonetxo, Jesu a ti khene: “Tsula, mahisa toneto nawe.” Se hi nga tiwotisa: ‘Ina na maha ati Msamariya a nga maha? Ngako vamwani va txi xaniseka, ina ku ni ti ni nga va mahelako kasi ku va vhuna? Ngu txikombiso, ina ni nga vhuna ava va nga kumba dibanzani, tinoni, vanana ava vaveleki vawe va si thumeliko Jehovha? Ina ni nga ‘vhuna ava va ku ni dikhodho’ ti to ni va tsanisa?’​—1 Vatesalonika 5:14; Jakobe 1:27.

12. Ngu kutxani hi txi tsaka hi txi va ni wumbilu?

¹² Ngu kutxani hi tsaka hi txi va ni wumbilu? Hi txi kombisa wumbilu vamwani eto wuha, ni ku Jesu a ti khene ku va ni wuha ti dhana litsako. Timwani ngu ti taku ha tiziva ti to hi tsakisa Jehovha. (Mithumo 20:35; lera Vahebheru 13:16.) Dhavhidha a womblile tiya ngu wu a kombisako wumbilu: “MKOMA a na mxayisa e mninga kuhanya. A na mninga kuzumbiseka ha mafuni.” (Masalmo 41:1, 2) Ngako hi txi kombisa wumbilu ni kupfela wusiwana vamwani, Jehovha nene a na hi pfela wusiwana ni ku hi nga tsaka ngu ha ku si gumiko.​—Jakobe 2:13.

NGU KUTXANI “AVA VA NGA BASA TIMBILU” VA TXI TSAKA?

13, 14. Ngu kutxani i di ta lisima ku va vo “basa timbilu”?

¹³ Jesu a ti khene: “Va katekile ava va nga basa timbilu, nguko va na wona Txizimu!” (Matewu 5:8) Ti to hi va ni mbilu yo basa ti lava hi basisa mapimo ni mixuvo yathu. Eto nda lisima ngutu ngako hi txi lava to Jehovha e amukela wukhozeli wathu.​—Lera 2 Vakorinto 4:2; 1 Timoti 1:5.

¹⁴ Ava va nga basa mbilu va nga si kota kuva ni wuxaka wa hombe ni Jehovha, awu a nga khene: “Va katekile avale va kuwulako tinguwo tawe.” (Mtuletelo 22:14) Ti womba txani ku vona va ‘kuwula tinguwo tawe’? Ka Vasawuleki ti womba ti to Jehovha a va wona va di basile, ni ku va na mbi fa, vona va nava ni litsako lo mbi guma. Se ka va va tinvuta timwani va ku ni themba yo hanya ha mafuni, ti womba ti to va nga sikota ku va vangana va Jehovha ni ku a va wona i di vo lulama. Bhiblia yi khene: ‘Va kuwute syambalo sawe, ve si basisa ngu mnoha wa Txinvutana.’​—Mtuletelo 7:9, 13, 14.

15, 16. Ava va vo basa timbilu va nga “wona Txizimu” ngu nzila yihi?

¹⁵ Jehovha a ti khene: “Kha ku nga ni m’thu a ni wonako, e zumba a txi hanya.” (Eksodha 33:20) Sekoko, ava va vo basa timbilu va nga “wona Txizimu” ngu nzila yihi? Ngu Txigriki dipswi “wona” di nga womba ku ti pimisa, kupfisisa mwendo kutiziva. Se ‘kuwona Txizimu’ ti womba kupfisisa wuthu wa txona ni kuranda tifanelo ta txona. (Vaefesu 1:18) Jesu a etetete tifanelo ta Txizimu ngu kuhetiseka, se a ti khene: “Awule a ni wonako, a woni Tate.”​—Johani 14:7-9.

¹⁶ Ngu kuengetela, hi “wona Txizimu” mbimo yi hi wonako ati txi hi vhunisako tona ka wutomi wathu. (Jobe 42:5) Hi nga tshumela hi “wona” mwendo hi veka mapimo athu ka timhaka to tshura ati Jehovha a nga thembisa kumahela ava va zumbako va di basile ni ku mthumela ngu kuthembeka. Se vasawuleki ngu ditshuri va na maha ngu ku mu wona Jehovha mbimo yi va wuswako ve tsula nzumani.​—1 Johani 3:2.

HAMBI HI DI NI SIKARATO HI NGA VA NI LITSAKO

17. Ngu kutxani ava va lwelako kudikha va txi tsaka?

¹⁷ Jesu a gwitile a txi khene: “Va katekile ava va thumelako kudikha.” (Matewu 5:9) Ngako hi txi va vo khata kulava kudikha ni vamwani, hi nga tsaka. Dibhuku da Jakobe 3:18 di womba tiya: “Mihando ya kululama yi phaywa kudikhani ngu va va hanyako ngu kudikha.” Se, ngako u txi karatana ni mwanathu mwendo ni wa ha mwayani kwako, kombela Jehovha e kuvhuna kumaha kudikha. Jehovha a na kuninga moya wo sawuleka, se wona wu na kuvhuna kukombisa tifanelo ta Wukristu, eto ti na kuninga litsako. Jesu a kombisile kha kwati lisima lo hi va vo khata kulava kudikha mbimo yi a nga khene: “Ngako u txi phaxa mhamba yako ha txiluveloni, se u txi khumbuka konaho ti to mkwanu a na ni mhaka ni nawe, yi leke konaho mhamba yako txitimwi ka txiluvelo, u thanga ngu kuya khongotelana ni mkwanu; se ngu msana, wuya u ta ningela mhamba yako.”​—Matewu 5:23, 24.

18, 19. Ngu kutxani Makristu ma txi tsaka hambi ma txi xaniswa?

¹⁸ “Mi katekile, ngako va txi mi ruketela ni ku mi xanisa, ni ku mi hembela, ve mi lumbeta makuhu ngu mhaka yangu.” Jesu a ti la kuwomba txani? A gwitile a txi khene: “Tsakani ta tinene mi txi nengela, nguko nja hombe hakhelo yanu nzumani. Nguko va va xanisisile toneto vaprofeti va va nga mi thangela.” (Matewu 5:11, 12) Mbimo yi vapostoli va nga pekwa ve gelwa ti to va nga txhumayeli, “vona va to huma ngu dibanzani ka wukoma, na va txi tsaka.” Phela hi nga ti to va txo tsaka kule va nga pekwa. Kambe va txi tsaka ‘ngu kumaneka va di ha mtengoni ka vale va ku ni fanelo yo xuphekela’ ditina da Jesu.​—Mithumo 5:41.

¹⁹ Nyamsi wa ditshiku, vathu va Jehovha ni vona va tsanisela ngu kutsaka mbimo yi va xaniswako ngu mhaka ya ditina da Jesu. (Lera Jakobe 1:2-4.) Kufana ni vapostoli, kha hi tsaki ngu kuxaniswa. Kambe ngako hi txi zumba hi di thembekile ka Jehovha, ene a na hi ninga txibindi txo hi tsanisela. Alakanya ngu ti ti nga humelela ka Henryk Dornik ni mkoma wakwe. Ngu Agosto wa 1944, va rumetwe ka makhalo o zumba sibotxhwa. Ava va nga ti vaxanisa va ti khene: “Ta karata ku va kuzetela kumaha to kari. Kuxaniswa kwawe ngu mhaka ya likholo ti va tisela litsako.” Henryk a ti khene: “Hambiku ni nga si ti naveli kuxaniswa, se kuxaniswa ngu mhaka ya kuthembeka kwangu ka Jehovha ti ni ha litsako.” A tshumete a txi khene: “Mikombelo ya mbilu yotshe yi ni tshuketisile ka Jehovha, ni ku a ti kombisile ti to ene M’vhuni wo thembeka.”

20. Ngu kutxani hi txi tsaka ngu kuthumela Txizimu txa litsako?

²⁰ Mbimo yi Jehovha, “Txizimu txa makatekwa,” a tsakiswako ngu ngathu, hi nga mana litsako hambi hi txi xaniswa, hi txi kanetwa ngu maxaka, hi txi lwala mwendo hi txi kumba. (1 Timoti 1:11) Hi nga tshumela hi tsaka nguko Txizimu txathu, “atxi txi si wombiko makuhu,” txi hi thembisile silo so tala so tshura. (Titosi 1:2) Mbimo yi Jehovha a no hetisisa sithembiso sakwe, nem kha hi na mbi thuka hi khumbula sikarato si hi ku naso konkuwa. Phela kha hi na kusikota kualakanya ati hi no ta hanyisa tona ka Paradhise ni litsako li hi no ta va nalo! Ngu ditshuri, hi na ta ‘tsaka hi hanya ngu kudikha.’​—Masalmo 37:11.