Mlongiso, 4 ka Outubro
Ni maha tiya totshe ngu mhaka ya Evhangeli, kasiku ni txi mana txyavelo txangu ka yona.—1 Vak. 9:23.
Ti lava hi khumbula lisima lo simama hi vhuna vamwani ngutu-ngutu ka mthumo wo txhumayela. Ka mthumo wathu wo txhumayela, ti lava hi ti pfananisa ni siemo. Ha mana vathu va wukhongeli, mahanyelo ni midhawuko yo hambana-hambana. Jesu a simekile Paulo kota “mpostoli wa vamatiko.” (Var. 11:13) Ka txiavelo txakwe, Paulo a txhumayete Vajudha, Vagriki, vo gonda, vo zumba ka sidhoropana ni vakoma. Ti to e kota ku gwesa timbilu ta vathu vava, ti lavile e ti maha “sotshe ka votshe.” (1 Vak. 9:19-22) Kasi ku e ti pfananisa ni siemo Paulo a txi khata ngu kuwonisisa mdhawuko, a ti vathu va kholwako ka tona kasiku e khata mabhulo navo. Nathu hi nga humelela ka mthumo wathu wo txhumayela ngu ku ti pfananisa ni siemo, hi tshukwatisa nzila yo khata mabhulo ngu kuya ngu txilaveko txa m’thu ni m’thu. w23.07 23 ¶11-12
Sonto, 5 ka Outubro
Awu i ku txithumi txa Mkoma kha faneli kulwa mazunga. A fanete kuhanya ngu kuthutha ni votshe vathu.—2 Tim. 2:24.
Vathu vo thutha ngu va va ku ni mtamo, hi nga va va tandekako. Ti lava mtamo kasi ku m’thu a simama i di wo thutha mbimo si a wonisanako ni txiemo txo karata. Kuthutha yimweyo ya “mihando ya moya.” (Vag. 5:22, 23) Dipswi da txigriki di di ku “kuthutha” di txi thumiswa kasi ku txhamusela nzila yi dihanxi da txitinga di nga txi txitxwa ngu yona di va txifuyo ha mtini se di va do thutha. Alakanya dihanxi da txitinga da txizwalume di ta gondiswa ku va do thutha. Ti wombako ti to ndo thutha, kambe da simama di va ni mtamo. Kota vathu, hi nga sakulelisa kutxani ku va vo thutha ni ku va ni mtamo ngu mbimo ya yimweyo? Hi nge tikoti ngu mtamo wathu. Hi nga tikota toneto ngu kukombela moya wo sawuleka, hi kombela Jehovha ku e hi vhuna kusakulela fanelo yiya yo sawuleka. Ku ni vathu vo tala va nga gonda ku va vo thutha. Wungi va vanathu va xamute ngu nzila yo thutha mbimo si va nga txi wonisana ni vakaneti, eto ti mahile ti to vathu va va ni mawonelo a manana ngu tifakazi.—2 Tim. 2:24, 25. w23.09 14 ¶3
Mvhulo, 6 ka Outubro
Ani ni ti kombela mfana wuwa; se Mkoma a xamute mkombelo wangu wule ni nga wu maha.—1 Sam. 1:27.
Ka muwoniso wakwe wo xamatisa Johani a woni 24 wa madhota nzumani ma txi khozela Jehovha. Vona va txi dhumisa Txizimu nguko va txi tiziva to ngu txona txi ku ni fanelo yo amukela “kupfaliswa, wudhumo ni mtamo.” (Mtu. 4:10, 11) Tingelozi to thembeka ni tona ti ni sivangelo so tala so dhumisa Jehovha. Aku ti ku nzumani tona ti ni mkhanjo wo mziva kwati Jehovha. Ta wona tifanelo takwe ati ti wonekako ka ti a ti mahako. Mbimo yi Tingelozi ti wonako Jehovha a txi maha to kari, ti susumeteleka ku m’dhumisa. (Jobe 38:4-7) Nathu hi nga dhumisa Jehovha ka mikombelo yathu, ngu kuwomba ti hi ti dhundako ni ti hi ti tsakelako kwakwe. Mbimo yi u gondako Bhiblia zama kuwona tifanelo ta Jehovha ati ti ku xamatisako ngutu. (Jobe 37:23; Var. 11:33) Msana keto, mgele nzila yi u tipfako ngu yona ngu tifanelo toneto. Hi nga tshumela hi dhumisa Jehovha ngu ku a vhunako athu, ni vanathu votshe. Mbimo yotshe ene wa khatala ngu ngathu ni ku wa hi vhikela.—1 Sam. 2:1, 2. w23.05 3-4 ¶6-7