Outubro

Ina mbimo yimwani wa thuka u tipfa ti txi ku karatela kuengisa? Ti mahekile ka Mkoma Dhavhidha, se a kombela ka Txizimu a txi: “Wuseta ku tiemisela ka mina ko kuengisa.” (Mas. 51:12) Dhavhidha a txi mranda Jehovha. Hambiketo mbimo yimwani ti si mu hehukeli kuengisa, se ta maheka ni kwathu. Ngu kutxani? Txo khata, hi tshapetilwe moya wa kwa mba engisa. Txa wumbidi, Sathani yotshe mbimo a zama ku hi betela wumoya wo wukela Jehovha nga ha ene a mahako ngu kona. (2 Vak. 11:3) Txa wuraru, hi randetwe ngu wumoya wo wukela ka mafu yawa, “I ku moya wu ni konku wu thumako hagari ka sindaka milayo.” (Vaef. 2:2) Kha ha fanela kulwa ni ku wekelela kwathu ka txionho dwe, kambe ni kona ti lava hi tserama ka mkuzetelo wu Sathani ni ditiko dakwe va wu mahako txitimwi kwathu kasi ku hi si engise. Ti lava hi ti karatela kuengisa Jehovha ni va a nga va veka kasi ku ve hi thangela. w23.10 6 ¶1

Hi gonda txani ka txidiwukiso txa Jesu txo hindula mati me va vhinya? Hi mana gondo ya lisima ya kutiveka hahatshi. Jesu kha nga za e ti guleta ngu txidiwukiso txile mwendo ngu totshe ti a nga maha. Hahanze keto, mbimo yotshe atxi tiveka hahatshi ni ku ningela wudhumo ka Tate wakwe. (Joh. 5:19, 30; 8:28) Ngako hi txi etetela Jesu ngu kusimama hi txi ti veka hahatshi hi na mbi ti guleta ka totshe ti hi ti mahako. Hi na guleta Jehovha ngu lungelo yi hi ku nayo yo mthumela. (Jer. 9:23, 24) He simameni hi ningela wudhumo ka Jehovha nguko ti walo ti hi nga ti mahako i singa ngu kuvhunwa ngu ngene. (1 Vak. 1:26-31) Ngako hi txi ti veka hahatshi hi na mbi ti guleta ngu ti hi nga mahela vamwani. Kambe hi na tsaka ngu kuziva ti to Jehovha wa ti wona ni ku wa ti ninga lisima a ti hi ti mahako. (Fananisa Matewu 6:2-4; Vaheb. 13:16) Tsaniseka ti to Jehovha wa tsaka ngako hi txi etetela txikombiso txa Jesu txo tiveka hahatshi.—1 Pedro 5:6. w23.04 4 ¶9; 5 ¶11-12

Ngu kususumetwa ngu moya wo sawuleka, Paulo a kuzetile Makristu ti to me khatalela silaveko sa vamwani. Hi nga txi thumisisa kutxani txialakanyiso txiya ngu mbimo ya mitshangano? Ngu kukhumbula ti to vamwani va ti lava kuxamula kufana ni nathu. Alakanya ngu tiya. Ngako u txi bhula ni vangana vako, ina wo thuma kuwomba-womba wekha u si va ningi mkhanjo wo ve womba-womba ni vona? Ditshuri to ahim-him! Wa ti lava to ni vona ve pateka ka dibhulo. Ngu ha kufanako, hi di mitshanganoni hi lava kuleka vamwani ve xamula. Nzila yimwani yo tsanisa vanathu, ngu va ninga mkhanjo wo ve phofula ta likholo lawe. (1 Vak. 10:24) Se hi komisa tixamulo tathu ngu ti to hi lava kusiya mbimo yo vamwani ve xamula. Hambi u txi ningela xamulo yo koma, u nga tateli to womba. w23.04 22-23 ¶11-13

Ti lava hi khumbula lisima lo simama hi vhuna vamwani ngutu-ngutu ka mthumo wo txhumayela. Ka mthumo wathu wo txhumayela, ti lava hi ti pfananisa ni siemo. Ha mana vathu va wukhongeli, mahanyelo ni midhawuko yo hambana-hambana. Jesu a simekile Paulo kota “mpostoli wa vamatiko.” (Var. 11:13) Ka txiavelo txakwe, Paulo a txhumayete Vajudha, Vagriki, vo gonda, vo zumba ka sidhoropana ni vakoma. Ti to e kota ku gwesa timbilu ta vathu vava, ti lavile e ti maha “sotshe ka votshe.” (1 Vak. 9:19-22) Kasi ku e ti pfananisa ni siemo Paulo a txi khata ngu kuwonisisa mdhawuko, a ti vathu va kholwako ka tona kasiku e khata mabhulo navo. Nathu hi nga humelela ka mthumo wathu wo txhumayela ngu ku ti pfananisa ni siemo, hi tshukwatisa nzila yo khata mabhulo ngu kuya ngu txilaveko txa m’thu ni m’thu. w23.07 23 ¶11-12

Vathu vo thutha ngu va va ku ni mtamo, hi nga va va tandekako. Ti lava mtamo kasi ku m’thu a simama i di wo thutha mbimo si a wonisanako ni txiemo txo karata. Kuthutha yimweyo ya “mihando ya moya.” (Vag. 5:22, 23) Dipswi da txigriki di di ku “kuthutha” di txi thumiswa kasi ku txhamusela nzila yi dihanxi da txitinga di nga txi txitxwa ngu yona di va txifuyo ha mtini se di va do thutha. Alakanya dihanxi da txitinga da txizwalume di ta gondiswa ku va do thutha. Ti wombako ti to ndo thutha, kambe da simama di va ni mtamo. Kota vathu, hi nga sakulelisa kutxani ku va vo thutha ni ku va ni mtamo ngu mbimo ya yimweyo? Hi nge tikoti ngu mtamo wathu. Hi nga tikota toneto ngu kukombela moya wo sawuleka, hi kombela Jehovha ku e hi vhuna kusakulela fanelo yiya yo sawuleka. Ku ni vathu vo tala va nga gonda ku va vo thutha. Wungi va vanathu va xamute ngu nzila yo thutha mbimo si va nga txi wonisana ni vakaneti, eto ti mahile ti to vathu va va ni mawonelo a manana ngu tifakazi.—2 Tim. 2:24, 25. w23.09 14 ¶3

Ka muwoniso wakwe wo xamatisa Johani a woni 24 wa madhota nzumani ma txi khozela Jehovha. Vona va txi dhumisa Txizimu nguko va txi tiziva to ngu txona txi ku ni fanelo yo amukela “kupfaliswa, wudhumo ni mtamo.” (Mtu. 4:10, 11) Tingelozi to thembeka ni tona ti ni sivangelo so tala so dhumisa Jehovha. Aku ti ku nzumani tona ti ni mkhanjo wo mziva kwati Jehovha. Ta wona tifanelo takwe ati ti wonekako ka ti a ti mahako. Mbimo yi Tingelozi ti wonako Jehovha a txi maha to kari, ti susumeteleka ku m’dhumisa. (Jobe 38:4-7) Nathu hi nga dhumisa Jehovha ka mikombelo yathu, ngu kuwomba ti hi ti dhundako ni ti hi ti tsakelako kwakwe. Mbimo yi u gondako Bhiblia zama kuwona tifanelo ta Jehovha ati ti ku xamatisako ngutu. (Jobe 37:23; Var. 11:33) Msana keto, mgele nzila yi u tipfako ngu yona ngu tifanelo toneto. Hi nga tshumela hi dhumisa Jehovha ngu ku a vhunako athu, ni vanathu votshe. Mbimo yotshe ene wa khatala ngu ngathu ni ku wa hi vhikela.—1 Sam. 2:1, 2. w23.05 3-4 ¶6-7

Ngu 1919 vathu va Txizimu va humile ka Bhabhilona wa Hombe, i ku wona mzinda wa wukhongeli wa makuhu. Ngu dilembe donedo, “txithumi txo thembeka na txi di ni wutxhari” txi thumile ngutu kasiku ava va timbilu ta tinene ve khata kutsimbila ka “Nzila yo Sawuleka.” (Mat. 24:45-47; Isaya 35:8) Mthumo awu wu nga mahwa ngu vamwani wo lulamisela nzila wu vhuni ava va nga khata kutsimbila ka nzila yiya ti to ve gonda to tala ngu Jehovha ni sikongomelo sakwe. (Mav. 4:18) Se vona va ndi na hanya ngu kuya ngu ti Jehovha a ti lavako. Jehovha a si emeli ti to vathu vakwe va maha kutxitxa aku ku lavekako ngu dikhambi dimwedo. Kuhambana ni eto, ene a basisile vathu vakwe kudotho-kudotho. Hi nga wona litsako ali hi no ta va nalo mbimo yi hi no ta ti kota kutsakisa Txizimu ka totshe ati hi ti mahako! Totshe tinzila ti lava kukhatalelwa mbimo yotshe. Kukhukhela ngu 1919, “Nzila yo Sawuleka” yi simamile yi maha ti to vathu vo tala ve kota kuhuma ka Bhabhilona wa Hombe. w23.05 17 ¶15; 19 ¶16

Mmidi wu wu Fumako wa pateka ko trenara vavhuneteli va makomisawu o hambana-hambana a Mmidi wu wu Fumako. Va vhuneteli vonevo se va ni wutixamuleli kukhukhela konku. Ni ku, va tiemisete kusimama ni mthumo wo khatalela tinvuta ta Kristu. Mbimo yi votshe vasawuleki va no tsula nzumani, hafuhi ni magwito ka xanisa ya hombe, malanda ya Jehovha ma na simama me mu khozela na ma di thembekile. Ngu kona hawa ka wuthangeli wa Jesu Kristu, athu kha hi na mbi leka kukhozela Jehovha. Ha ti ziva ti to ka mbimo yoneyo mtxawa wa matiko awu Bhiblia yi wu dhanako ti to i Goge wa Magoge, wu na xasela vathu va Txizimu. (Eze. 38:18-20) Kambe kuxaselwa koneko ku na va ka mbimonyana ni ku, ku na feyila. Ku na va ka mbimo ya yidotho aha ko ti nambi koteka kutsivela vathu va Jehovha ku ve m’khozela. Jehovha ngu ditshuri a na hi hulukisa! Mpostoli Johani ka m’woniso a woni “dibutho da hombe” da timwani tinvuta ta Kristu. Johani a ti zivile ti to “dibutho da hombe” i ti vathu ava va nga txi huma ngu mu ka “xanisa ya hombe.” (Mtu. 7:9, 14, NM) Kha ti kanakanisi ti to Jehovha a na hi hulukisa! w24.02 5-6 ¶13-14

Hi nga maha txani kasi ku hi va ni moya wo sawuleka? Hi nga kombela moya wonewo wo sawuleka ngu kumaha mkombelo, hi gonda Bhiblia ni kutipata ni sengeletano ayi yi kongomiswako ngu moya wakwe. Kumaha tiya ti na hi vhuna kusakulela “mihando ya moya.” (Vag. 5:22, 23) Jehovha a ningela moya wakwe ka vale va simamako ni mahanyelo ni mapimiselo o sawuleka dwe. Ene kha nge hi ningi moya wakwe ngako hi di ni mahanyelo mwendo mapimiselo a nzambwa. (1 Vat. 4:7, 8) Ti to hi simama hi va ni moya wo sawuleka hi fanete kwa mbi ‘kanyisa siprofeto.’ (1 Vat. 5:20) Ka vhersikulo yiya, “siprofeto” ku wombwa madungula aya Jehovha a hi ningako ngu kuthumisa moya wakwe wo sawuleka, ona ma pata kukuluveta ka timbimo tathu ni kuta ka ditshiku da Jehovha. Kha ha fanela kupimisa to ditshiku da Jehovha ni Armagedhoni kha si na mbi hoka ka masiku athu. Hi nga kombisa ti to ha emela ditshiku da Jehovha ngu kusimama hi kombisa “mahanyelo o sawuleka” ditshiku ni ditshiku.—2 Pedro 3:11, 12. w23.06 12 ¶13-14

Athu hi ku Makristu hi nga maha txani ngako txithombe txa pornografia txi txi thuka txi humelela ka txithumiswa txathu txa eletroniko? Hi fanete kuhuma ngu txikuluveta ka wukhalo wule. Atxi txi nga hi vhunako kumaha toneto ngu khumbula ti to thomba yathu ya lisima ngutu wuxaka wathu ni Jehovha. Sithombe asi ku pimiswako ti to hi nga pornografiya ni sona sa wusa minavelo ya ta mataho. Ngu kutxani hi di fanete ku si vayilela? Nguko kha hi lavi kumaha wugango ni ka kudotho mbiluni kwathu. (Mat. 5:28, 29) Didhota do kari da khe Tailândia di dhanwako ku i David di womba tiya: “Ani ni ti wotisa tiya: ‘Hambiku sithombe siya i si ngako pornografiya, ina Jehovha a nga tsaka ngako ni txi simama ni si wonetela?’ Ku alakanyisisa ngu tiya, ti ni vhuni kumaha txisungo txa wutxhari.” Ati ti nga hi vhunako kumaha sisungo sa wutxhari ngu sakulela kuthava kuhenyisa Jehovha. Kuthava Mkoma ngu ona “makhato,” a “wutxhari.” w23.06 23 ¶12-13

Tinyumbani kwanu” ti nga maha ku txi wombwa mabanzani kwathu. Ka mbimo ya xanisa ya hombe hi na ta mana ku vhikelwa ngu Jehovha ngako hi txi simama hi ti pata ni vanathu. Ngu nzila yoneyo ti lava hi ti karatela ku timiselelana ni ku kombisa lirando ka vanathu konku. Ti nga maha kuhuluka kwathu ku txi dhependerwa ngu toneto. “Ditshiku da hombe da MKOMA” di na tisa xomulo ya hombe ka vathu. (Zef. 1:14, 15) Vathu va Jehovha ni vona va na ta wonisana ni sikarato. Kambe hi txi ti lulamisela konku hi na ta sikota kuva vathu vo thutha ni ku vhuna vamwani. Hi na tsanisela txikarato tximwani ni tximwani atxi hi no ta wonisana natxo. Ngako Makristu kulothi ma txi xaniseka hi na maha totshe ti hi no ti kota kasi kuva vhuna, ngu kukombisa wumbilu ni ku va vhuna ka silaveko sawe. Hi na zumba hafuhi ni vanathu ava se hi nga gondela ku va randa, se Jehovha a na hi ninga wutomi wombi guma ka mafu a maphya aya o mbi na tiphango ni ti xanisa.—Isaya 65:17. w23.07 7 ¶16-17

Dipswi da Txizimu makhambi o tala di dhana malanda o thembeka kota vathu va va ku ni mtamo. Hambi va va ngadi ni mtamo kupinda votshe, hi nga mbimo yotshe va nga tipfa va di ni mtamo. Dhavhidha dikhambi dimwani a ti pfite a ti ni txibindi ‘a di tsani,’ kambe ka makhambi mamwani a ti pfite ‘a di tate ngu dizowa.’ (Mas. 30:7) Hambiku Samsoni, i ngadi nyamitamo ngu kuvhunwa ngu moya wa Txizimu, ene a txi tiziva ti to, i si nga ngu mtamo wa Txizimu ‘mtamo wakwe wu ndina khukha kwakwe e fana ni vamwani vathu.’ (Val. 14:5, 6; 16:17) Vavamna vawa va ti ni mtamo nguku va txi vunwa ngu Jehovha. Mpostoli Paulo nene a txi tiziva ti to wa wu lava mtamo wa kuta ngu ka Txizimu. (2 Vak. 12:9, 10) Ene a wonisanile ni malwati. (Vag. 4:13, 14) Mbimo yimwani ti txi mkaratela kumaha ti i ku ta tinene. (Var. 7:18, 19) Mbimo yimwani a txi karateka a txi thava ti ti ndi no thuka ti mu humelela. (2 Vak. 1:8, 9) Mbimo yi Paulo a nga txi tipfa a txi tandeka ngu kona a ngati ni mtamo. Ngu nzila muni? Nguku Jehovha a ningile Paulo mtamo wu a nga txi wu lava kasi kutsanisela sikarato. w23.10 12 ¶1-2

Ngaku u txi thuka u tipfa u si vhuni txilo, khumbula ti to Jehovha ngene a nga kusawula to u mthumela. (Joh. 6:44) Jehovha wa tiwona ti i ku ta tinene ka mmweyo ni mmweyo wathu ni ku wa yi ziva kwati mbilu yathu ni ku nzila yi a hi wonako ngu yona hi nga yona yi athu hi ti wonako ngu yona. (2 Mak. 6:30) Se u nga tsaniseka ti to Jehovha ati tiwombako to u wa lisima ngutu kwakwe ditshuri. (1 Joh. 3:19, 20) Na hi si se gonda ditshuri, vamwani kwathu ti nga maha hi di mahile to kari ati ti ku ngadi ti txi hi maha hi tipfa mnando. (1 Pedro 4:3) Hambi ni vamwani va i ku kale va txi thumela Jehovha ngu kuthembeka ti nga maha va txi lwisana ni ku tipfa mnando ngu tiphazamo ti va nga ti maha. Se awe ko, ina wa tipfa nga Jehovha kha ku divalela? Ka txiemo txonetxo ndinene kukhumbula ti to hambi malanda a Jehovha o thembeka a timbimo ti ti nga pinda ma wonisanile ni matipfelo o fana. Ngu txikombiso, mpostoli Paulo, mbimo si a nga txi khumbula ngu tiphazamo takwe ti txi mmaha e guma mtamo. (Var. 7:24) Ti hakubasani ti to Paulo a di tisote ka sionho sakwe ni ku se a di bhabhatisilwe. Hambiketo, ene a txi ti dhana kota “wa m’dotho ka votshe vapostoli” ni “wo thanga” ka vaonhi.—1 Vak. 15:9; 1 Tim. 1:15. w24.03 27 ¶5-6

Gondo yi hi nga yi thavisako ka txisungo txo biha txa Mkoma Jowasi ngu yi yo hi fanete kusawula vangana va va ku ni m’kuzeto wa wunene i ku vangana va va lavako kutsakisa Jehovha. Kha hi lavi kusawula vangana va i ku va tanga yimweyo ni nathu dwe. Khumbula to, Jowasi i ti m’dotho ngutu ka mngana wakwe Joyadha. Mbimo yi u lavako kusawula vangana, ti wotise tiya: ‘Ina va ni vhuna kutsanisa likholo langu ka Jehovha? Ina va ni kuzeta kuhanya ngu milayo ya Txizimu? Ina va bhula ngu Jehovha ni ditshuri di hi di gondako mu ka Dipswi dakwe? Va yi xonipha milayo ya Jehovha? Ina va ni txibindi txo ni kawuka, mwendo vo ni gela dwe ti ni nga tsakelako ku ti pfa?’ (Mav. 27:5, 6, 17) Ngu ditshuri, ngako vangana vako va si m’randi Jehovha, huma kwawe. Kambe ngako vangana vako va txi m’randa Jehovha, va namarele va na va vavanene kwako!—Mav. 13:20. w23.09 9-10 ¶6-7

Alfa i letra yo khata ka abhesedhariyo ya Txigriki, ni ku Omega i letra yo gwita. Jehovha a thumisile mapswi “Alfa ni Omega” kasiku hi vhuna ku pfisisa to, ngaku a txi khata to maha a na ti hetisisa. Msana ko Jehovha a di wumbile Adhamu ni Eva, a va gete tiya: “‘Velekanani mi txi anda, mi tala ha mafuni mi txi ma fuma.’” (Gen. 1:28) Ngu mbimo yoneyo, Jehovha a wombile to “Alfa.” A ti vekile ha kubasani to a txo khata makungo akwe: Ku ndina hoka mbimo yo lihunzu lo pelela lo engisa la Adhamu ni Eva li tata mafu, li ma hundula me va Paradhise. Ka mbimo yoneyo ya Paradhise, Jehovha a na womba to “Omega.” Msana ko hetisisa kumaha “nzuma ni mafu ni sotshe si si nga tumbulukiswa,” Jehovha a txi tsanisekisa ti to a na hetisisa makungo akwe mayelano ni vathu ni mafu. Ti ndi na hetiseka magwito ka ditshiku da wutxhanu ni mambidi.—Gen. 2:1-3. w23.11 5 ¶13-14

Liendo lo khukhela Bhabhilona kala Israyeli li ndi na teka kona mu ka 4 wa mitxima, kambe Jehovha a ti va thembisile ti to a ndi na thavisa sitsha asi si ndi no va vhalela nzila. Vajudha vo thembeka va txi ti ziva to i wuyelo ya hombe ngutu kutshumela ve tsula Israyeli kupinda kuzumba Bhabhilona. Wukhozeli wawe i ti ona makatekwa a hombe aya va ndi no ma mana. Bhabhilona ku si nga ni dithepele da Jehovha. Ku si nga ni txiluvelo atxi Vaisrayeli va ndi no ningela ka txona magandelo awe nga ha Mlayo wa Mosi wu nga txi womba ngu kona ni ku ku si nga ni vaphaxeli ava va ndi no hisa magandelo oneyo. Kuengetela keto, ava va nga txi khozela sizimu sa walo i ti vangi ngutu kupinda Vaisrayeli ni ku va si xoniphi milayo ya Jehovha. Vajudha vo tala ava va nga txi randa Jehovha, va ti ti emisete kutshumela ve ya mtini kasiku ve ya wuseta wukhozeli wa ditshuri. w23.05 14-15 ¶3-4

Ngako hi txi lava kusimama hi tsimbila kota “vanana va liwoningo.” Ti lava hi va ni txivhuno txa moya wo sawuleka. Ngu kutxani? Nguko ta karata kusimama hi di basile ka mahanyelo a nzambwa ka mafu yawa hi hanyako ka ona. (1 Vat. 4:3-5, 7, 8) Moya wo sawuleka wu na hi vhuna kusimama hi lwisana ni mapimiselo a mafu yawa ma patako Tifilozofiya ni mawonelo aya ma si tsimbitisaniko ni ti Jehovha a ti pimisako. Moya wo sawuleka wu na tshumela wu hi vhuna “kumaha wunene ni kululama.” (Vaef. 5:9) Nzila yimwani yo hi amukela moya wo sawuleka ngu maha mkombelo. Jesu a wombile ti to Jehovha a ndi na ninga “moya wakwe wo sawuleka ka vale va m’kombelako.” (Luka 11:13) Hahanze keto mbimo yi hi dhumisako Jehovha mitshanganoni ha amukela moya wo sawuleka. (Vaef. 5:19, 20) Moya wo sawuleka wu na hi vhuna kusimama hi hanya ngu nzila yi yi tsakisako Txizimu. w24.03 23-24 ¶13-15

Maha mkombelo mbimo yotshe, u kombela ku va wo laphisa mbilu. Kulaphisa mbilu wumwewo wa mihando ya moya. (Vag. 5:22, 23) Ngu toneto, hi nga kombela moya wo sawuleka ka Jehovha ku wu hi vhuna kusakulela m’hando wuwa. Ngako hi txi wonisana ni txiemo txi txi dukako kulaphisa kwathu mbilu, hi nga simama hi “kombela” ti to moya wo sawuleka wu hi vhuna ku hi laphisa mbilu. (Luka 11:13) Hi nga tshumela hi kombela Jehovha ti to e hi vhuna kuwona timhaka ngu nzila yi a ti wonako ngu yona. Msana ko maha mkombelo, hi fanete kumaha totshe ti hi nga ti kotako kasi ku hi va vo laphisa mbilu ditshiku dimwani ni dimwani. Mbimo yi hi yako hi kombela kuva vo laphisa mbilu, ni ku ti karatela kumaha toneto, fanelo yiya yi na zima mikoloti timbiluni kwathu se yi va txienge txa wuthu wathu. Niku hinga vhuneka ngaku hi txi alakanyisisa ngu sikombiso sa mu ka Bhiblia. Bhiblia yi ni sikombiso sa singi sa vathu va va nga kombisa kulaphisa mbilu. Ngaku hi txi alakanyisisa ngu sikombiso soneso, hi nga gonda tinzila to kombisa kulaphisa mbilu. w23.08 22 ¶10-11

Jesu a vhuni mpostoli Pedro ku e pfisisa ti to Jehovha a ndina khatalela silaveko sakwe. Msana ko Jesu a di wusilwe a mahile txidiwukiso tximwani txa sihaka masoni ka Pedro ni vamwani vapostoli. (Joh. 21:4-6) Ti ha kubasani ti to txidiwukiso txonetxo txi tsanisile Pedro to Jehovha a ndina khatalela silaveko sakwe sa nyama. Ti nga maha Pedro a di khumbute mapswi ya Jesu aya yo: “kukhata lavani Mfumo wa Txizimu.” (Mat. 6:33) Ngu mhaka yeto Pedro a to thangetisa mthumo wo txhumayela hahanze ka mabhindu akwe. Ene a txhumayete ngu txibindi ngu ditshiku da Pentekoste 33 E.C., aha a nga vhuna vathu vo tala ku ve tumela mahungu a manene a Mfumo. (Mith. 2:14, 37-41) Msana keto, ene a vhuni va Samariya ku ve gonda ni kulondisa Kristu. (Mith. 8:14-17; 10:44-48) Jehovha a thumisile Pedro ngu nzila yo xamatisa ku e vhuna vathu va tixaka totshe ku ve va Makristu a ditshuri. w23.09 20 ¶1; 23 ¶11

Malembe mambidi msana ko Bhabhilona a di hoxotile Jerusalema, Mkoma Nebhukodhonosori wa khe Bhabhilona a ve ni mloro wu wu nga m’xanisa ngutu, wa txithombe txa hombe. Ene a thembisile kudaya titxhari tile ta Bhabhilona, kumweko ni Dhaniyeli, ngako va si m’geli txhamuselo ya mloro wakwe. (Dhan. 2:3-5) Ti lavile ti to Dhaniyeli e teka dizambo ngu txikuluveta; kasi ku vathu vavangi va si dawi. Se Dhaniyeli “a to wulela e kombela ka mfumeli ku e mninga mbimo yo ta txhamusela mloro.” (Dhan. 2:16) Eto ti lavile txibindi ni likholo. Bhiblia kha yi wombi ti to msana kheya Dhaniyeli a ti nga txhamusela miloro. Se Dhaniyeli a to kombela vangana vakwe kasi ku “ve kombela wumbilu ka Txizimu txa nzumani madingano ni txihunja txiya.” (Dhan. 2:18) Jehovha a xamute mikombelo yoneyo. Se ngu kuvhunwa ngu Jehovha, Dhaniyeli a txhamusete mloro wa Nebhukodhonosori. Se ene ni vangana vakwe va hulukile. w23.08 3 ¶4

Wona wuyelo yi u nga yi manako ngu kulaphisa mbilu. Hi txi laphisa mbilu, hi va vo tsaka ni vo rula. Ngu toneto kulaphisa mbilu ti nga hi vhuna kuva ni dihanyo ni mialakanyo ya yinene. Hi txi laphisela mbilu vamwani, hi na va ni wuxaka wa wunene navo. Ni ku dibanza dathu di nga simama di va ni wumwewo. Ngako m’thu a txi hi vhuka, kha hi nambi kuluveta kuhenya ni kuteka mhaka yi va ya hombe. (Mas. 37:8; Mav. 14:29) Kambe txa lisima ngutu ngako hi di vo laphisa mbilu, hi etetela Tate wathu wa nzumani ni ku hi ya hi txi tshuketa ngutu hafuhi kwakwe. Kulaphisa mbilu i fanelo ya yinene ayi yi wuyelisako hotshethu. Hambiku mbimo yimwani ti si hehukiko kuva vo laphisa mbilu, ngu kuvhunwa ngu Jehovha hi nga sikota kusakulela fanelo yoneyo. Aku hi rinzelako ngu kulaphisa mbilu mafu a maphya, hi nga tsaniseka ti to “Mkoma ngene a xayisako ava va mthavako, avale va thembako wunene wakwe.” (Mas. 33:18) Nga hotshethu hi nga tiemisela kusimama hi ambala fanelo yiya yo laphisa mbilu. w23.08 22 ¶7; 25 ¶16-17

Jakobe a ti vekile ha kubasani to m’thu a nga womba to a ni likholo, kambe ati a nga txi ti maha ti ti si tsimbitisani ni ti a nga txi ti womba. (Jak. 2:1-5, 9) Jakobe a wombawombile ngu m’thu wo kari awu a nga wona mwanathu ‘a txi pwatekelwa ngu so ambala ni sakudya sa ditshiku’ kambe a si mahi txilo kasi ku m’vhuna. Hambi a txi womba to a ni likholo, mithumo yakwe yi komba to kha nga nalo likholo. (Jak. 2:14-16) Jakobe a wombawombile ngu Rahabhi kota txikombiso txa txinene txa m’thu wu a ku ni likholo ni kutshumela e li kombisa ngu simaho. (Jak. 2:25, 26) Rahabhi a ti khala kupfa ku txi womba wombwa ngu Jehovha, ni ku a txi ti ziva to Jehovha a txi seketela Vaisrayeli. (Jox. 2:9-11) Ngu toneto ene a kombisile likholo ngu simaho ngu kuvhikela sipiyawu sa Vaisrayeli asi wutomi wa sona wu nga ti phangoni. Ngu toneto, wamsikati wuwa wa kwa mba pelela, ni ku i ti singa Muisrayeli, a dhanwi ku mbwo lulama kufana ni Abrahamu a nga dhanwa ku mbwo lulama. Txikombiso txa Rahabhi txi hi gondisa to likholo lathu, li fanete li seketelwa ngu mithumo. w23.12 5-6 ¶12-13

Kota Makristu kha hi lavi kugonda makhato ya Dipswi da Txizimu dwe. Ngu kuvhunwa ngu moya wa Txizimu hi tikaratela kugonda “hambi tile i ku ta wutumbu wa kueta wa Txizimu.” (1 Vak. 2:9, 10) Khata gondo yako upune ayi yi no kuvhuna kutshuketa ka Jehovha. Ngu txikombiso, u nga gonda ngu nzila yi Jehovha a nga kombisa ngu yona lirando ka malanda akwe a kale ni ku ti ti komba ngu nzila muni to wa kuranda. U nga gonda ngu nzila yi Jehovha a nga ti lava to Vaisrayeli ve mkhozela ngu yona ni kufananisa toneto ni nzila yi a lavako to hi mkhozela ngu yona nyamsi. U nga tshumela u gonda ngu wuprofeti wo tshima awu Jesu a nga wu hetisisa ka wutomi wakwe ni ka mthumo wakwe wo txhumayela ha mafuni. U nga mana litsako la hombe ngu kugonda misungo mhaka yiya ngu kuvhunwa ngu Índice das Publicações mwendo Mkongomiso wa Tifakazi ta Jehovha wo Maha Wuxolisisi. Ku maha gondo yo tshima ya Bhiblia ti na tsanisa likholo lako ni ku kuvhuna ku u “mana kuziva Txizimu.”—Mav. 2:4, 5. w23.10 18-19 ¶3-5

Dipswi di nga thumiswa ngu mpostoli Pedro, di ku “khatalelani” di txhamusela “kugwimba.” Txienge txa wumbidi txa vhersikulo yiya, txi womba-womba ngu ti hi nga ti mahako ngaku hi di ni lirando lo khutala ngu vamwani. Lirando lo khutala ngu vamwani, li vhuna ku fenengeta sionho sawe. Hi nga alakanyisisa ngu tiya: Hi ñola lirando lathu ngu manza mambidi nga ho gwimba panu yi fenengeta i si nga tximwetxo mwendo simbidi, kambe “mtalo wa sionho.” “Kufenengeta” i nzila yimwani yo womba kudivalela. Kufana ni panu ayi yi nga fenengetako dinodwa do kari, lirando li nga fenengeta tiphazamo mwendo kwambi pelela ka vamwani. Lirando li hi fanelako kuva nalo ngu vamwani, li fanete kuva lo tsana, kasi ku hi sikota kudivalela tiphazamo ta vanathu—hambi i di ti to eto mbimo yimwani ti woneka nga ta karata. (Vakl. 3:13) Hi txi divalela vamwani, hi kombisa to lirando lathu li tsani ni ku hi lava kutsakisa Jehovha. w23.11 11-12 ¶13-15

Mbimo yi Josiya a nga ti ni 26 wa malembe a khatile kuwuseta nyumba ya Txizimu. Se ka mbimo yoneyo ku to manwa, “dibhuku da mlayo wa MKOMA awu wu nga ningwa ngu Mosi.” Mbimo yi a nga pfa mlayo wu txi gondwa, mkoma Josiya a to teka dizambo do hetisisa ati wu nga txi womba. (2 Mak. 34:14, 19-21) Ina u nga ti tsakela kugonda Bhiblia ditshiku ni ditshiku? I di ku wa zama, ti tsimbitisa kutxani? Ina wa veketa tindimana ti ti nga kuvhunako? Mbimo yi Josiya a nga ti ni 39 wa malembe, a mahile phazamo ayi yi nga gumisa wutomi wakwe. Ene a txi themba wusikoti wakwe hahanze ko kombela mkongomiso wa Jehovha. (2 Mak. 35:20-25) Ku ni gondo ya lisima hawa. Ti si nga ni mhaka ni tanga yathu mwendo malembe ya hi ku nawo hi txi gonda Bhiblia, ti lava hi simama hi tshuketa ka Jehovha. Eto ti pata kumaha mkombelo yotshe mbimo hi lava mkongomiso wakwe, kugonda Bhiblia, ni kugonda ka Makristu ya ma nga vitwa ngu didhawa da moya. Hi na vayilela kumaha tiphazamo ta hombe ni ku hi na va ni litsako.—Jak. 1:25. w23.09 12 ¶15-16

Bhiblia yi womba-womba ngu vavasikati va vangi vo xamalisa va nga randa Jehovha ni ku mthumela. Vona “i di vo ti ñola” ni “vo thembeka ka totshe tinzila.” (1 Tim. 3:11) Nyamsi wa ditshiku mabanzani, ku ni sikombiso sa singi sa vanathu va txisikati ava va nga vitwa, a va vanathu vatxisikati va i ku ngadi majovhem va nga va etetelako. Majovhem a txisikati, ti ngo txani mi lava txikombiso txa mwanathu wa txisikati a wu a nga vitwa ngu didhawa da moya kasi ku mi mu etetela? Wonisisa tifanelo ti a ku nato. Se, u wona ti to u nga mahisa kutxani ti to u tekelela tifanelo toneto. Fanelo yimwani ya lisima a yi Mkristu a fanelako kuva nayo ngu ti veka hahatshi. Ngako wamsikati a txi ti veka hahatshi, a nga va ni wuxaka wo tsana ni Jehovha ni vamwani. Wamsikati wu a randako Jehovha, ngu kutiveka hahatshi a sawula kuengisa a ti ti ku ka 1 Vakorinto 11:3 aha Jehovha a txhamuselako awu a nga m’veka kasi ku e va ni wutixamuleli wo thangela mwaya ni kuthangela dibanza. w23.12 18-19 ¶3-5

Jehovha a lava ti to wamwamna e randa msikati wakwe ni ku m’khatalela ngu didhawa da nyama, matipfelo ni da moya. Totshe tifanelo to fana ni kupfisisa, kuxonipha vavasikati, ni kuva wo thembeka, ti na kuvhuna ku u va wamwamna wamnene. Msana ko txhadha, u ngava tate. Ngu tihi ti u nga ti gondako ka Jehovha mayelano ni kuva tate wamnene? (Vaef. 6:4) Jehovha a si na tingana to gela mwanana wakwe Jesu Kristu ti to a txi mu m’randa ni ku mu amukela. (Mat. 3:17) Ngako u txi va tate, u nga divale ku mbimo yotshe u gela mwanana wako ti to wa m’dhunda. Niku mbimo yotshe ndunduzela mwanana wako mbimo yi a mahako tatinene. Vaveleki ava va etetelako txikombiso txa Jehovha ni vona va vhuna vanana vawe ti to ve va Makristu o vitwa. U nga ti lulamisela konku kasi kuva tate wamnene ngu ku khatalela kwati vamwayani kwako, ni vanathu va dibanzani, ni ku va gela ti to wa va dhunda ngutu ni wa ti guleta ngu vona.—Joh. 15:9. w23.12 29 ¶17-18

Hambi hi di malanda o thembeka a Jehovha, ha manana ni siduko ni sikarato sa wutomi asi si humelelako vathu votshe hamafuni. Hahanze keto, mbimo yimwani ti nga lava hi wonisana ni kuwukelwa ni kuxaniswa ngu vale va nyenyako vathu va Txizimu. Jehovha kha hi vhikeli ka sotshe siduko soneso, kambe ene, mbimo yotshe a thembisa ti to a na hi vhuna. (Isaya 41:10) Ngu kuvhunwa ngu ngene, hi nga simama hi di tsakile, hi maha sisungo sa sinene ni kusimama hi di thembekile hambi ka timbimo to karata ngutu. Jehovha a thembisa ku hi ninga ati Bhiblia yi ti dhanako ku “kuthutha ka Txizimu.” (Vaf. 4:6, 7) Kuthutha koneko ngu rula, ni kuzenga aku ku nga manwako ngu va i ku vangana va Jehovha dwe. Kuthutha koneko “kupinda wotshe wuzivi” ni ku kutshumela ku va mtamo ngutu kupinda totshe ti hi nga ti pimisako. Ina u ti nga maha mkombelo wo hiseka ka Jehovha msana keto u pfa kurula ka hombe moyani kwako? I di eto, awe wa kuziva “kuthutha ka Txizimu.” w24.01 20 ¶2; 21 ¶4

Lirando ngu Jehovha li maha ti to vathu vo thembeka ve lava kudhumisa ditina dakwe. Mkoma Dhavhidha a bhate tiya: “Ni na dhumisa Jehovha, ni na dhumisa ditina da Jehovha do lulama ngu mbilu ya mina yotshe.” (Mas. 103:1, NM) Dhavhidha a ti pfisisile ti to kudhumisa ditina da Jehovha i ti kudhumisa Jehovha apune. Ditina da Jehovha di pata nduma yakwe, se eto ti hi khumbutisa tifanelo takwe to tshura ni simaha sa sinene asi a nga si maha. Dhavhidha a txi lava kudhumisa ditina da dinene da Tate wakwe ngu ku dona ndo sawuleka. Dhavhidha a txi lava kumaha toneto ngu ‘mbilu yakwe yotshe.’ Ngu ha kufanako, Valevhi va txi thangela ko dhumisa ditina da Jehovha. Vona ngu kutiveka hahatshi va tumete to mapswi awe ma si na wusikoti wo ninga wudhumo awu wu fanelako ditina da Jehovha. (Neh. 9:5) Ti hakubasani ti to kutiveka hahatshi koneko ku tisile litsako ka mbilu ya Jehovha. w24.02 9 ¶6

Jehovha kha na mbi womba to u do tandeka aku u nga mbi si kota kuhokelela dikungo donedo. (2 Vak. 8:12) Gonda ka makhambi aya u nga humelelwa ngu sikarato so mbi si rinzela asi si nga kutsivela kuhokelela makungo ako. Veka mapimo ka ti u nga ti hokelela. Bhiblia yi womba ti to “Txizimu kha txi nga ni tshofu. Kha txi na kudivala mthumo wanu.” (Vaheb. 6:10) Se nawe u nga ti divali eto. Alakanyisisa ngu ti se u nga ti hokelela to fana ni kukulisa wuxaka wako ni Jehovha, kubhulela vamwani ngu ngene mwendo kubhabhatiswa. Aku u nga ti kota kuhokelela makungo ako mbimo yi yi nga pinda, u nga simama u hokelela makungo ako a maphya. Ngu kuvhunwa ngu Jehovha, u nga si kota kuhokelela makungo ako. Ngako u txi simama u lwela kuhokelela makungo ako a moya, nawe u na tsaka u txi wona nzila ayi Jehovha a ku vhunako ni ku ku katekisa ngu yona. (2 Vak. 4:7) Se ngako u si godholi, u nga amukela makatekwa o tala.—Vag. 6:9. w23.05 31 ¶16-18

Jehovha a lava tinzila to kombisa vathu vakwe ti to wa va randa ni ku wa tsaka ngu ti va ti mahako. Bhiblia yi womba-womba ngu makhambi mambidi aya Jehovha a nga gela Jesu ti to i ti mwanana wakwe wo randeka ngutu awu a nga txi mtsakela. (Mat. 3:17; 17:5) Ina u ndina ti tsakela kupfa Jehovha a txi womba mapswi yawa ngu ngawe? Nyamsi, Jehovha kha womba-wombi ni nathu ngu ku kongoma, kambe ngu kuthumisa Bhiblia. Hi nga “pfa” dipswi da Jehovha di txi hi tsakela mbimo yi hi gondako muni wa ti evhangeli ta Jesu. Jesu a etetede ngu kupelela wuthu wa Tate wakwe Jehovha. Se mbimo yi hi gondako mapswi o tsakisa aya Jesu a nga gela vagondiswa vakwe, hi nga alakanya i di Jehovha a hi gelako apune mapswi oneyo. (Joh. 15:9, 15) Kuwonisana ni sikarato kha ti lavi kuwomba to kha hi ngadi hi tsakelwa ngu Jehovha. Kuhambana nito, mkhanjo wo kombisa lirando lathu ngu Txizimu ni ti to ha txi themba.—Jak. 1:12. w24.03 28 ¶10-11