Novembro

Ngako u di mveleki vhuna vanana vako ti to ve lulamisela xamulo yi yi tsimbitisanako ni tanga yawe. Nguko hagari ka gondo ku nga thuka kuwombwa-wombwa ngu timhaka ta hombe ngutu, to fana ni sikarato sa vatekani ni nzila yi hi fanelako ku tiñola ngu yona. Kambe ku nga thuka kuva ni paragrafu yimweyo mwendo mambidi aya vanana va nga xamulako. Vhuna vanana vako ve pfisisa ti to ngu kutxani i si nga mbimo yotshe va no ningetwa ku ve xamula hambi va txi gula diwoko. U txi va txhamusela toneto ti na va vhuna ku va si godholi ngako va txi guleta kambe ku ningetwa vamwani. (1 Tim. 6:18) Hotshethu hi nga lulamisela tixamulo ati ti no dhumisa Jehovha ni kukuzeta vanathu. (Mav. 25:11) Hambiku mbimo yimwani ti nga lavako ku hi womba txiperiyensiya txo koma, kambe hi fanete kuvayilela kuwomba-womba ngutu ngu ngathu. (Mav. 27:2; 2 Vak. 10:18) Hahanze keto hi lava kusimama hi veka mapimo ka Jehovha, ka Dipswi dakwe ni vathu vakwe ha mafuni kotshe.—Mtu. 4:11. w23.04 24 ¶17-18

Lirando ni lona nda lisima kasi ku hi zumba hi di thembekile ni ku va vo tsana. (Mat. 22:37-39) Lirando li hi ku nalo ngu Txizimu la hi vhuna kusimama hi txhumayela ku si nga ni mhaka ni sikarato asi hi wonisanako naso. (2 Tim. 1:7, 8) Akuwa lirando lathu li hokelako ni vale va si thumeliko Jehovha, ha simama hi txhumayela ni kuthuma ka teritoriyo yathu, hi txhumayela ngu telefone ni ngu mapasi. Ni ku hi ni themba ya ti to ditshiku dimwani vaakelani vathu va na txitxa ve khata kumaha ati i ku ta tinene. (Eze. 18:27, 28) Lirando ali hi li kombisako ka vaakelani hi tshumela hi li kombisa ka vanathu. Hi kombisana lirando lonelo ngu ‘ku thavelelana ni ku akisana.’ (1 Vat. 5:11) Kufana ni masotxhwa ma thumisanako, nathu ha thavelelana. Hi nge thuki hi henyisa mwanathu khakwenye mwendo kuphota ngako a di hi henyisile.—1 Vat. 5:13, 15. w23.06 10 ¶6; 11 ¶10-11

Kualakanyisisa ngu mtirulo i nzila yimwani yo tsanisa likholo lathu. Phela mtirulo txitsanisekiso txa ti to sithembiso sa Jehovha si na maheka ngu ditshuri. Kualakanyisisa ngu totshe ti nga pateka kasi ku mtirulo wu ningelwa ti nga tsanisa likholo lathu ka ti to txithembiso txa Jehovha txa wutomi wo mbi guma ka mafu a maphya txi na hetiseka. Ngu kutxani hi txi womba toneto? Ngu tihi ti ti nga pateka ka mtirulo? Jehovha a ningete mwanana wakwe wa matiwula mngana wakwe wa hombe kasiku e ta velekwa hamafuni kota wo hetiseka. Mbimo yi a nga ti ha mafuni ene a tsanisete yotshe mixowo ya sikarato. Ene a xanisekile e tshumela e fa ngu nzila yo panda ngutu. Jehovha a hakete mtengo wa hombe! Txizimu txathu txa lirando txi sa tumelela mwanana wa txona ti to e xaniseka ni ku fa ti to hi hanya ta mbimonyana. (Joh. 3:16; 1 Pedro 1:18, 19) Aku a nga hakela mtengo wa hombe ngu kuningela mwanana wakwe ene a txi hi tsanisekisa ti to hi na mana wutomi wu si gumiko ka mafu a maphya. w23.04 27 ¶8-9

Ina Jehovha a ni minavelo yo wusa vafi? Ha tsaniseka ti to xamulo, i ina. Jehovha a susumetile vabhali va Bhiblia to ve bhala ngu txithembiso txakwe txa mbimo yi yi tako, txa kuwuswa ka vafi. (Isaya 26:19; Mtu. 20:11-13) Ngako a txi thembisa to kari, ene wa ti hetisisa. (Jox. 23:14) Jehovha a ti emisete kuwusa ava va nga fa. Wona mapswi a Jobe. Ene a txi tsaniseka to hambi a txo fa Jehovha a ndi na ti tsakela kutshumela e mu wusa. (Jobe 14:14, 15) Ngu ha ku fanako Jehovha wa ti tsakela kuwusa votshe vakhozeli vakwe va va nga fa. Ene a ti emisete ku va wusa, ve va ni dihanyo da dinene ni litsako. Ku wombwa txani ngu tibhiliyoni ta vathu va va nga fa va sa na mana mkhanjo wo gonda ditshuri ngu Jehovha? Ene wa ti lava ku ta va wusa ni vona. (Mith. 24:15) Ene a lava ti to ve va ni mkhanjo wo va vangana vakwe ni kuhanya ngu ha ku si gumiko ha mafuni.—Joh. 3:16. w23.04 9 ¶5-6

U nga tsanisa ngu nzila muni themba yako? Ngu txikombiso, ngaku u di ni themba yo hanya ha mafuni ngu ha ku si gumiko, gonda ka Bhiblia mayelano ni ti ku na ta zumbisa tona paradhesi, u alakanyisisa ngu tona. (Isaya 25:8; 32:16-18) Alakanyisisa ngu ti wutomi wu no tava tona ka mafu ya maphya ni ku ti woni u di kona khe. Hi txi tsanisa themba ya mafu ya maphya ka mialakanyo yathu, sikarato sathu si na va ‘sa mbimo nyana ni so hehuka.’ (2 Vak. 4:17) Themba yi Jehovha a nga kuninga yi na kuvhuna kutsanisela sikarato. Ene a lulamisete ti u ti lavako kasi kuamukela mtamo wu wu tako ngu kwakwe. Ngu toneto, ngaku u txi lava txivhuno txo hetisisa txiavelo, kutsanisela sikarato, mwendo kusimama u di tsakile, tshuketa ka Jehovha ngu mkombelo u kombela ti to e ku kongomisa ngu kuthumisa gondo yako upune. Tumela txitsanisekiso txi txi tako ngu ka vanathu. Mbimo yotshe alakanyisisa ngu themba yako ngu wu mangwana. U na mana ‘kutsaniswa ngu mtamo wa hombe madingano ni mtamo wa ku pfaliswa ka txona kasiku u sikota kutimisela ta tinene ni kuhonisela ngu kutsaka.’—Vakl. 1:11. w23.10 17 ¶19-20

Hi ni sivangelo so tala so bonga Jehovha ka mkombelo. Hi nga m’bonga ngu sotshe sa sinene asi hi ku naso, nguko totshe tiningo ta tinene ti ta ngu kwakwe. (Jak. 1:17) Ngu txikombiso hi nga bonga kutshura ka mafu ya hi zumbako ka ona ni kuxamatisa ka mtumbuluko. Hi nga tshumela hi kombisa kubonga ngu wutomi wu a nga hi ninga, mwaya wathu, vangana kumweko ni themba. Hi lava kubonga Jehovha ngu ku a nga hi tumelela ku hi ti dila ngu kuva ni wungana wo sawuleka nayo. Ti nga lava hi maha mizamo yo kari kasi kualakanyisisa ngu sivangelo si hi ku naso so bonga Jehovha. Hi hanya ka mafu o biha, aha vathu va vekako mapimo ka ti va ti lavako i singa ko kombisa kubonga ka si va ku naso. Ngako hi txo tshapelwa ngu mahanyelo oneyo, mikombelo yathu yi na va lista ya sikombelo dwe, hi si bongi asi hi ku naso. Kasi kuvayilela mahanyelo oneyo, ti lava hi simama hi sakulela kukombisa kubonga ka totshe ti Jehovha a hi mahelako tona.—Luka 6:45. w23.05 4 ¶8-9

Kota Tate wathu wa lirando, Jehovha kha tsaki a txi hi wona hi txi xupheka. (Isaya 63:9) Hambiketo, ene kha tsiveli sotshe sikarato si singa hi welako, asi si nga fananiswako ni mnambo mwendo mndilo. (Isaya 43:2) Kambe Ene wa hi thembisa ku hi vhuna “kupinda” ka sikarato. Niku kha na mbi tumelela ku sikarato si hi wonisanako naso si hi tsivela ku hi mthumela. Jehovha wa hi ninga moya wakwe wo sawuleka kasi ku wu hi vhuna kutsanisela. (Luka 11:13; Vaf. 4:13) Kota wuyelo, hi nga tsaniseka ti to mbimo yotshe hi nava ni si hi si lavako kasi ku hi kota kutsanisela ni ku simama hi di thembekile kwakwe. Jehovha a emela ti to hi mthemba. (Vaheb. 11:6) Mbimo yimwani ti nga tikomba nga sikarato sathu sa karata kuwonisana naso. Ti nga maha hi khata ku kanakana to ina Jehovha a na hi vhuna. Kambe Bhiblia ya hi tsanisekisa to ngu kona ha ka mtamo wa Txizimu hi na sikota ku “ndaka tibhiyo.” (Mas. 18:29) Hahanze ko zumbela kukanakana, hi fanete kumaha mkombelo ka Jehovha ngu likholo, hi txi themba ti to Jehovha, a na xamula mikombelo yathu.—Jak. 1:6, 7. w23.11 22 ¶8-9

Hi nga wona txhamuselo ya yinene ya lirando la ditshuri. Kha ti kana kanisi ti to mapswi yawa ma ni txitsaniso txa ditshuri ka va va nga tekana. Kasi ku lirando la va va nga tekana li si gumi, ti naya ngu vona. Ti to mndilo wu simama wu tura wu lava kuhembenyetelwa, se ngako u si wu hembenyeteli wu nga timeka. Ngu ha ku fanako, lirando la mwamna ni msikati li nga simama ngako va txi tsanisa wungana wawe. Mbimo yimwani vatekani va nga ti pfa nga lirando lawe la hola ngutu-ngutu ngako va txi wonisana ni sikarato sa timale, malwati mwendo txikarato ko kulisa vanana. Kasi ku “titshatsha mwendo kutura ka MKOMA” ku simama, mwamna ni msikati va fanete kumaha mizamo yo tsanisa wuxaka wawe ni Jehovha. w23.05 20-21 ¶1-3

Hi nga maha txani kasiku hi sakulela txibindi? Vaveleki vathu va nga hi kuzeta ku hi va ni txibindi, kambe va nge hi ningi txibindi hambi va di natxo. Ku va ni txibindi ti fana ni kugondela wusikoti wo kari. Ti to u kulisa wusikoti wako ti lava u wona nzila yi m’gondisi a mahako ngu yona se u etetela txikombiso txakwe. Ngu ha kufanako, hi gondela ku va ni txibindi ngu kuwonisisa khakwati nzila yi vamwani va kombisako ngu yona fanelo yoneyo se hi etetela txikombiso txawe. Kufana ni Dhaniyeli ti lava hi ziva kwati Dipswi da Txizimu. Hi fanete kutsanisa wuxaka wathu ni Jehovha ngu ku hi womba-womba nayo mbimo yotshe hi di thusekile. Ti lava hi themba Jehovha, hi tsaniseka ti to mbimo yotshe a na hi vhuna nguko a ni nathu. Se ngako likholo lathu li txi dukwa, hi na va ni txibindi. Vathu va va ku ni txibindi va xoniphwa ngu vamwani mbimo yotshe. Ti nga maha ve vhuna vamwani ku ve gonda ngu Jehovha. Ngu toneto hi ni txivangelo txa hombe txo sakulela txibindi. w23.08 2 ¶2; 4 ¶8-9

Dipswi da Txigriki adi di ku “kuwonisisa sotshe” di txi thumiswa ngu va va nga txi textara nzalama ni prata kasi kuwona to nja yinene mwendo nem. Ngu toneto, nathu ti lava hi wonisisa kha kwati a ti hi ti lerako ni ti hi ti pfako kasi kuziva ti to nda tinene mwendo nda lisima kwathu, ngutu-ngutu aku xanisa ya hombe yi tshuketelako. Hahanze ko tumela totshe ati vathu va ti wombako, hi na thumisa wusikoti wathu wo pimisa ka ti hi ti lerako ni ku ti pfa kumweko ni ti Bhiblia ni sengeletano ya Jehovha si wombako tona. Hi txi maha toneto, hi na mbi pengiswa mwendo kukanganyiswa ngu makuhu aya ma no hangalaswa ngu madhimoni. (Mav. 14:15; 1 Tim. 4:1) Malanda a Jehovha ma na ta huluka kota mtxawa ka xanisa ya hombe. Kambe kha hi ti zivi ati ti no humelela mmweyo ni mmweyo wathu mbimo yi yi tako. (Jak. 4:14) Ti si nga ni mhaka ni ti to hi na ta maneka ka xanisa ya hombe mwendo hi na fa yi si se hoka, hi na ta hakelwa ngu wutomi awu wu si gumiko ngako hi txi simama hi di thembekile. Nga hotshethu hi nga veka mapimo ka themba yiya yo tsakisa ni kuzumba hi di ti lulamisete ditshiku diya da Jehovha! w23.06 13 ¶15-16

Kha hi tizivi ti to wuprofeti wumwani wa Bhiblia wu na hetiseka ngu nzila muni. (Dhan. 12:8, 9) Kambe kwambi ziva to wuprofeti wo kari wu na hetiseka ngu nzila muni kha ti wombi ti to wu nambi hetiseka. Kha ti kanakanisi ti to Jehovha a na hi vhuna kupfisisa ati hi fanelako ku tiziva ngu mbimo ya kona ngu ha a nga maha ngu kona ka timbimo ta kale. Va na womba to “ka ho kudikha ni kukhaliseka”. (1 Vat. 5:3) Vafumeli va mafu va na hoxota wukhozeli wa makuhu. (Mtu. 17:16, 17) Msana keto va na wukela vathu va Txizimu. (Eze. 38:18, 19) Simahakalo siya si na hi yisa ka yimbi ya Armagedhoni. (Mtu. 16:14, 16) Hi nga themba ti to simahakalo soneso si na maheka i si nga kale. Se yi si se kuhoka mbimo yoneyo, he simameni hi kombisa kubonga ka Tate wathu wa nzumani wo randeka, Jehovha, ngu kuveka mapimo ka wuprofeti wa Bhiblia ni kuvhuna vamwani va maha ati ti fanako. w23.08 13 ¶19-20

Mbimo yi mpostoli Paulo a nga txi womba-womba ngu likholo, txithembo ni lirando, ngu magwito a wombile tiya: “Txa hombe ka sona ngu lirando.” (1 Vak. 13:13) Ngu kutxani Paulo a di wombile tiya? Ka timbimo ti ti tako, kha ti na mbi lava hi va ni likholo ka sithembiso sa Txizimu mayelano ni mafu a maphya mwendo kuemela ku si txi hetiseka nguko si nava si di hetisekile. Kambe ti na lava ku hi simama hi kombisa lirando ngu Jehovha ni vathu. Ngu ditshuri, lirando lathu ngu vona li na simama li kula. Hi txi kombisana lirando, hi na kombisa ti to hi Makristu a ditshuri. Jesu a gete tiya vapostoli vakwe: “Ngu toneto, va no mi zivisa tona ti taku mi vagondiswa vangu: Ngako mi txi randana.” (Joh. 13:35) Kuengetela keto, ku kombisana lirando ti hi maha hi simama hi va ni wumwewo. Paulo a dhani lirando kota “txitsaniso txo hetiseka.” (Vakl. 3:14) Mpostoli Johani a bhalete Makristu kulowe a txi: “Awu a randako Txizimu, a na rande ni mwanawe.” (1 Joh. 4:21) Hi txi kombisana lirando, hi kombisa lirando ngu Txizimu txathu. w23.11 8 ¶1, 3

Bhiblia yi fananisa wutomi wathu kota Makristu ni mnava. Vatutumi ava va kotako kuheta mnava va mana wutomi wo mbi guma. (2 Tim. 4:7, 8) Ti to hi simama hi tutuma ti lava hi maha yotshe mizamo ngutu-ngutu a ku hi ku magwito ka mnava. Mpostoli Paulo a kombisa ti ti nga hi vhunako nathu ku hi heta mnava wathu wo tutuma. Ene a wombile to “hi fanela kutshotsha kule sotshe si si hi nemelako hi txi tutuma ngu kutsanisela mnava wu hi nga sikelwa wona.” Ina Paulo a txi la kuwomba to kha yi ngaho thundu ayi Mkristu a fanelako ku yi rwala? Ahim him. Ene a txi la kuwomba to hi tshotsha kule yotshe thundu ayi ti si sungiko ku yi rwala. Thundu yoneyo yi nga hi khulumeta ni ku hi karalisa. Kasi ku hi tsanisela hi fanete ku kuluveta hi tumbula thundu ayi ti si sungiko ku yi rwala yi nga hi mahako hi nonoka. Hambiketo thundu ya lisima hi fanete ku simama hi yi rwala. Nguku hi si mahi toneto ti nga maha hi leka kututuma.—2 Tim. 2:5. w23.08 26 ¶1-2

Ku alakanyela ka hi vhuna kuxonipha mawonelo a vamwani. Vanathu vamwani va txisikati va ti dhunda ku ti penda-penda ka makhalo ya vamwani va si ti dhundiko. Vanathu vamwani va ti dhunda kusela wusuke va txi pimela kasi vamwani nem kha va ti lavi ni ku duketa. Otshe Makristu ma ti lava kuva ni dihanyo da dinene ma si lwali, se ma sawula tinzila to hambana-hambana ta mathumelo. Kambe kha ha fanela ku kuzetela vamwani ti to ve thumisa nzila yi hi nga yi sawula nguko eto ti nga va khuvekisa ni ku ti nga vanga mibhando dibanzani. (1 Vak. 8:9; 10:23, 24) Ngu txikombiso, Jehovha kha hi geli ngu kukongoma asi hi fanelako ku ambala, kambe wa hi ninga matshina a mlayo aya hi fanelako ku ma londisa. Hi fanete hi ambala ngu nzila yi yi fanelako kota vathumeli va Txizimu, hi kombisa ku dinganisela, txithavo ni “kutiñola.” (1 Tim. 2:9, 10) Kha hi lavi ku ambala ngu nzila yi yi no khuvekisa vamwani. Matshina a milayo a Bhiblia ma vhuna madhota ti to me vayilela kuveka milayo yawe vapune ka timhaka to ambala ni ka sitayela sa misisi. w23.07 23-24 ¶13-14

Jehovha a hi komba nzila yo mana wumangwana wo tsakisa. Avale va tumelako txirambo txa “wamsikati wule wa txiphukuphuku” va zama kumana “kulombela” ngu kumaha wugango. Wuyelo yawe yi pfala ka vale “vo fa.” (Mav. 9:13, 17, 18) Wona kuhambana ka vale va tumelako txirambo txa “wutxhari wa ditshuri.” (Mav. 9:1) Ha gonda kuranda ati Jehovha a ti randako ni kunyenya ati a ti nyenyako. (Mas. 97:10) Ha tsaka ngu kuramba vamwani ti to ve ta wuyelwa ngu “wutxhari wa ditshuri.” Atiya ti fana ni ku nga ho “ramba kukhukhela mimangoni ka didhoropa: ‘Awule i ku txiphukuphuku a na rendekele kheno.’” Wuyelo yi hi no yi mana athu ni va va tumelako txirambo txiya hi nga ya konku dwe, kambe nja mbimo yo lapha aha hi no ta “hanya” ngu ha ku si gumiko hi txi ‘tsimbila ngu nzila ya kupfisisa.’—Mav. 9:3, 4, 6. w23.06 24 ¶17-18

U ti pfisa kutxani ngako kolega wako wa mthumoni mwendo wa txikolwani a txi kuwotisa ngu ti u ti kholwako? Ina wa karateka? Kutala kwathu ha karateka. Kambe siwotiso soneso si nga hi vhuna kupfisisa ti m’thu a ti kholwako ni ti ati pimisako, ti tshumela ti hi ninga mkhanjo wo txhumayela. Mbimo yimwani m’thu a nga maha txiwotiso kasi ku hi vhuka. Se toneto kha ti hi xamatisi. Nguko vathu vamwani va gelwa makuho mayelano ni wukhozeli wathu. (Mith. 28:22) I si nga eto dwe, hi hanya “ka masiku a kugwitisa” i ku timbimo ti vathu va kona ni vona i ku “vo mbina kutsetselela” ni ku va ni “tshofu.” (2 Tim. 3:1, 3) Awe u nga ti wotisa tiya: ‘Ni nga ti kotisa kutxani kuva wo thutha ngako m’thu a txi ni wotisela ngu ti ni ti kholwako mayelano ni Bhiblia?’ Nji txani txi nga kuvhunako? Kuthutha ku nga kuvhuna. M’thu wo thutha wa simama e va wo rula ngako a txi vhukwa mwendo a si ti zivi to a na xamulisa kutxani. w23.09 14 ¶1-2

Mbimo yimwani, ha amukela sileletelo sa Sengeletano a si si hi vhikelako. Ngu txikombiso ha mana sialakanyiso mayelano ni phango ya ku dhunda ngutu tithomba ni ku maha to kari ati ti nga vekako phangoni kuengisa kwathu milayo ya Txizimu. Mbimo yi hi engisako sileletelo soneso, ha wona nzila yi i ku tatinene ngu yona kuengisa mkongomiso wa Jehovha. (Isaya 48:17, 18; 1 Tim. 6:9, 10) Ti hakubasani ti to Jehovha ana simama e thumisa vathu kasi ku ve ningela mkongomiso ka mbimo ya xanisa ya hombe ni ka mbimo ya Mfumo wa Kristu wa 1000 wa malembe. Ina hi na simama hi engisa mkongomiso wonewo. Ti na hi hehukela kuengisa mkongomiso wumwani ni wumwani awu wu tako ngu ka Jehovha ngako kukhukhela konku hi txi engisa sileletelo asi a hi ningako. Ngu toneto, mbimo yotshe hi lava kuengisa mkongomiso wa Jehovha, ti patako kuengisa sotshe sileletelo asi a hi ningako ngu ku thumisa vavamna ava a nga va veka kasi ku ve hi khatalela. (Isaya 32:1, 2; Vaheb. 13:17) Ngako hi txi londisa Jehovha i ku mkongomisi wathu wo pelela, athu hi nga themba ka ti to ene a na hi hulukisa ka totshe tiphango, ni ku hi na simama hi va vangana vakwe ngu ha ku si gumiko ka mafu a maphya. w24.02 25 ¶17-18

Mpostoli Paulo a vite ni wutomi wo tsakisa ka mthumo wa Jehovha, kambe a wonisanile ni sikarato so tala asi a ngadi fanete ku si xula. Paulo a txi tolovela ku tsimbila minava yo lapha ni ku maendo oneyo ma si hehuki ka timbimo tile. Ka maendo akwe, mbimo yimwani Paulo a txi manana ni “tiphango ta tingi ta mnambo” ni “tiphango ta sigevenga.” Maho makhambi ya a nga xaniswa ngu vakaneti. (2 Vak. 11:23-27) Ni ku hi nga mbimo yotshe Makristu mamwani ma nga txi ninga lisima yotshe mizamo yi Paulo a nga txi yi maha kasi ku va vhuna. (2 Vak. 10:10; Vaf. 4:15) Nji txani txi nga vhuna Paulo ku e simama ka mthumo wa Jehovha? Paulo a gondile to tala ngu tifanelo ta Jehovha amu ka Bhiblia ni ka ma experiyensiya ya a nga ma mana. Paulo a tsanisekile to Jehovha Txizimu a txi mranda. (Var. 8:38, 39; Vaef. 2:4, 5) Se eto ti mu mahile e randa ngutu Jehovha. Paulo a kombisile lirando lakwe ngu Jehovha nguku “thumela vasawuleki va txona a vava ni konkuwa mi va thumelako.”—Vaheb. 6:10. w23.07 9 ¶5-6

Vathu va vangi va tumela ti to ta laveka kuva ni vakoma ni ku milayo yimwani ayi yi vekwako “ngu wukoma” ya laveka ku yi engisa.” Kambe vathu vonevo va nga kanakana kuengisa mlayo awu va wu wonako i si nga wa wunene mwendo wu txi karata. Bhiblia ya tumela ti to vakoma va mafu va vanga kuxaniseka, va thangelwa ngu Sathani ni ku, i si nga kale va na loviswa. (Mas. 110:5, 6; Ekl. 8:9; Luka 4:5, 6) Bhiblia yi tshumela yi hi gela to: “Ava va engisako wukoma, va engisa mlayo wu wu nga vekwa ngu Txizimu.” Konku Jehovha a tumelela ti to vakoma ve fuma kasiku, kuva ni mthetho, ngu toneto Jehovha a lava hi va engisa. Ngu toneto hi fanela ‘kuninga votshe asi si va fanelako’ eto ti pata resa, txixonipho ni kuengisa. (Var. 13:1-7) Hi nga wona mlayo wo kari nga kha wu faneli ni ku ta karata ku wu londisa. Kambe athu hi engisa Jehovha se ene a hi gela ku hi engisa vakoma vonevo ngaku va si hi kombeli kundaka milayo yakwe.—Mith. 5:29. w23.10 8 ¶9-10

Mbimo yi Samsoni a nga velekwa Vaisrayeli va txi fumwa ngu Vafilista ava va nga txi va xanisa ngutu. (Val. 13:1) Mafumelo awe o karata ma ti dyiseta ngutu Vaisrayeli. Jehovha a sawute Samsoni kasi ku e “khata kutxhatxhisa va ka Israyeli, manzani ka Vafilista.” (Val. 13:5) Kasi ku Samsoni e hetisisa txiavelo txonetxo ti txi lava e themba ngutu Jehovha. Ka dikhambi dimwani, masotxhwa a Vafilista, ma tile Leki ka Judha kasi ku ta ñola Samsoni. Vavamna va Judha va txi thava, ha ko za ve maha txisungo txo ningela Samsoni ka Vafilista. Vathu va ka kwawe vapune va m’sungile ngu majoke a maphya ve mningela ka Vafilista. (Val. 15:9-13) Hambiketo “moya wa MKOMA wo to ta kwakwe ngu mtamo” Samsoni a to ti khulula ka majoke ale. Msana keto “a to mana lixaya lo nakana la mbongola,” e li teka a ya daya ngu lona 1000 wa Vafilista!—Val. 15:14-16. w23.09 2-3 ¶3-4

Jehovha a nga sawula tinzila to hambana kasi ku hetisisa makungo akwe, ni ku ene “a maha totshe kasi ku ti tsimbitisana ni makungo akwe.” (Mav. 16:4) Ni ku, wuyelo ya ti Jehovha a ti mahako nja kala kupinduka. Ngu yahi makungo ya Jehovha ni ku ngu tihi tinzila a nga ti thumisa kasi ku e ma hetisisa? Txizimu txi gete Adhamu ni Evha ti to i ti yahi makungo ya txona kwawe. Ene a va gete to: “Velekanani mi txi anda mi tala ha mafuni mi txi ma fuma . . . ni sotshe sihari si si tsimbilako ha mafuni.” (Gen. 1:28) Mbimo yi Adhamu ni Evha va nga wukela Jehovha, ve maha ti to txionho txi bela ka votshe vathu, eto kha ta tsivela ku Jehovha e hetisisa makungo akwe. A to txitxa nzila yi a ndi no ma hetisisa ngu yona. Kukhukhela koneho, Jehovha a tiemisete kusimeka Mfumo nzumani awu wu ndi no hetisisa txikongomelo txakwe txo khata mayelano ni vathu ni mafu. —Mat. 25:34. w23.10 19-20 ¶6-7

Jehovha a nga hi vhuna kutimisela. Hi nga mbimo yotshe ti hehukako kutimisela ngutu-ngutu u txi lwisana ni kutandeka koneko ka kumweko ngu mbimo yo lapha. Mbimo yimwani kutandeka kwathu ku nga woneka ku di ka hombe ngutu kupinda ku mpostoli Pedro a nga wonisana nako. Kambe Jehovha a nga hi ninga mtamo wo hi si godholi. (Mas. 94:18, 19) Ngu txikombiso, mwanathu mmwani a khatile kumaha ta mataho ni vathu va limbewu limwelo kudingana malembe o tala a si se ziva ditshuri. Ngu msana a lekile mikhuva yoneyo yo biha, e txitxa wutomi wakwe e hanya ngu ti Bhiblia yi ti gondisako. Mbimo yimwani yi txi thuka yi m’tela minavelo yoneyo. Nji txani txi nga mvhuna? Ene a womba tiya: “Jehovha wa hi tsanisa ngu kuthumisa moya wakwe wo sawuleka . . . , Ni gondile to ta koteka ku ni simama ni di ka nzila ya ditshuri . . . Hambiku ni nga mbi pelela Jehovha wa ni thumisa ni ku wa simama e ni tsanisa.” w23.09 23 ¶12

Majovhem, ti lava mi maha mizamo kasi ku mi va Makristu o vitwa. Ti lava mi etetela sikombiso sa sinene, mi sakulela wusikoti wo pfisisa, mi thembeka, mi gondela wusikoti awu wu nga mi vhunako ka wutomi, ni ku ti lulamisela ka wutixamuleli a wu mi nga wu manako mbimo yi tako. Ti nga maha u karateka ngu mthumo a wu u ku na wo masoni, kambe u na wu kota. Khumbula ti to Jehovha wa ti lava ngutu ku kuvhuna. (Isaya 41:10, 13) Ni ku ti hakubasani ti to vanathu ni vona dibanzani va na kuvhuna mbimo yi u no va wamwamna awu Jehovha a lavako ku u va ene, wutomi wako wu na tsakisa ngutu. Athu ha mi dhunda ngutu vanathu va txi wamwamna mi ku nga di majovhem, Jehovha a na mi katekise mbimo yi mi ti lulamiselako konku kasi ku mi va Makristu o vitwa. w23.12 29 ¶19-20

A hi nge u ka mtshangano ni mtxawa wo kari wa vanathu. U ka mbimo yo tsakisa se u thavisa mfota kota mtxawa. Ditshuri ti to u na tshumela u thavisa yimwani kambe kasi kusawula awu wu nova u di humile kwati. Konku u ni mifota yo tshangana. Kambe ka wumwewo u wona to mwanathu a sungile mbanza. U nga pfuta nguko u ni yimwani ayi a nga huma a di tsakile. Ngu mtolovelo ha veka ka mialakanyo yathu timbimo ta tinene ti hi ti hetako hi di ni vanathu. Se ti nga maha ka makhambi oneyo mwanathu wo kari a di mahile to mbi tsakisa. Hi nga ti thavisa ka mialakanyo yathu ati a nga ti maha mwanathu wule kufana ni mfota wu hi nga wu timako wo mba tsakisa. (Vaef. 4:32) Hi nga kukhumbula timbimo to tala to tsakisa ati hi nga ti heta hi di navo. Timbimo tiya ta tinene ngu ti hi fanelako ku ti veka ka mialakanyo yathu. w23.11 12-13 ¶16-17

Mapswi a Txigriki ma nga thumiswa hawa ma kombisa ti to wamsikati mbimo yotshe ati fanete kuambala ngu nzila ya yinene ni kukombisa kukhatala ngu mawonelo ni matipfelo a vamwani ngu mhaka yiya. Athu ha ti guleta ngutu ngu vanathu vatxisikati ava va londisako txileleto txiya, ngu kuambala ngu nzila ya txithavo! Kupfisisa i fanelo yimwani ya lisima ngutu. Kambe nji txani kupfisisa? Wusikoti wo ziva kuhambanisa ta tinene ni to biha koneho u sawula ta tinene. Wona txikombiso txa Abhigayeli. Mwamna wakwe a mahile txisungo txo biha ngutu atxi txi nga veka phangoni wutomi wakwe ni va a nga txi thuma ni kuzumba navo. Kambe Abhigayeli a angute ngu txikuluveta. Ngu txikuluveta a ti zivile ta tinene ati a nga ti fanete kumaha ni ku ngu toneto a hulukisile wutomi wa vathu vo tala. (1 Sam. 25:14-23, 32-35) Kupfisisa ni kona ku nga hi vhuna kuziva mbimo yo womba-womba ni mbimo yo malala. Ni kutshumela ku hi vhuna kukhatala ngu vamwani, kambe hi si ti beteli ka wutomi wawe.—1 Vat. 4:11. w23.12 20 ¶8-9

Mpostoli Paulo a bhate mapswi yawa atxi bhalela dibanza da Roma. Vanathu va dibanza diya va di gondile ditshuri mayelano ni Jehovha ni Jesu, va ti kulisile likholo lawe niku se i ti Makristu. Ngu toneto Txizimu txi va ‘amukete kota vo lulama ngu kukholwa kwawe’ ni ku va tota ngu moya wo sawuleka. (Var. 5:1) Se va ndi na emela ku amukela hakelo yo tsakisa, se va txi themba ti to ti na maheka ngu ditshuri. Paulo ngu msana a bhalete Makristu o sawuleka a khe Efesu mayelano ni themba yi va nga ti yi amukete. Themba yoneyo yi txi pata ku amukela “thomba ya vasawuleki.” (Vaef. 1:18) Mbimo yi a nga txi bhalela Vakolosa, Paulo a kombisile a mu Makristu o sawuleka ma ndi no amukela kona hakelo. Paulo a wombile ti to ‘kuthemba kwawe va ti veketwe kona nzumani.’ (Vakl. 1:4, 5) Ngu toneto, themba ya vasawuleki ngu ti to mbimo yi va no wuswa va na hanya ngu ha ku si gumiko nzumani, a ha va no ya fuma kumweko ni Kristu.—1 Vat. 4:13-17; Mtu. 20:6. w23.12 9 ¶4-5

Dipswi da Txigriki adi di nga hunduluxelwa di txi “kuveketa” di txi thumiswa wusotxhwani di txi womba masotxhwa aya ma nga txi vhikela didhoropa kasiku di si xaselwi. Vahanyi va didhoropa donedo va txi otela ngu kurula va txi ziva ti to ku ni masotxhwa aya ma nga ti vekilwe kasi kuwonelela matimbani. Ngu ha kufanako, ngako kuthutha ka Txizimu ku txi veketa timbilu tathu ni mialakanyo yathu, athu hi pfa kurula hi txi ziva ti to hi xayisekile. (Mas. 4:8) Ngu toneto ti nga maheka ni Ana, hambiku txiemo txakwe txi nga mbi tekela kutxitxa, ene a simamile e pfa kurula. (1 Sam. 1:16-18) Mbimo yi hi pfako kurula ta hi hehukela kupimisa kwati ni kumaha sisungo sa sinene. Ngu tihi ti hi fanelako ku ti maha. Ngako u txi wonisana ni txiemo txo karata ngutu, dhana disotxhwa do fanekisela. Maha mkombelo ka Jehovha kala u pfa kuthutha aku ku tako ngu kwakwe. (Luka 11:9; 1 Vat. 5:17) Se ngako u txi pinda ngu ka txiemo txo karata ngutu ka wutomi wako, simama u maha mkombelo se u na pfa kuthutha ka Jehovha aku ku no veketa mbilu yako ni mialakanyo.—Var. 12:12. w24.01 21-22 ¶5-6

Kasi kusawulekisa ditina da Tate wakwe, Jesu a wonisanile ni kuxaniswa ngutu, kuruketelwa ni ku lumbetwa makuhu. Ene a txi tiziva ti to ati engisile Tate wakwe ka totshe, ku ti si nga ni txi txi nga mthelako tingana. (Vaheb. 12:2) Ene a txi tiziva kambe ti to Sathani a ti ko m’xasela ngu kukongoma ka timbimo tile to karata. (Luka 22:2-4; 23:33, 34) Sathani atxi lava kumaha totshe ati a nga tikotako kasi ku Jesu a si thembeki, kambe mizamo yakwe yi ve mnyuko wa yimbwa! Jesu a ti vekile hakubasani ti to Sathani m’hembi wa hombe ngutu ni ku Jehovha a ni malanda o thembeka aya ma simamako ma di thembekile hambi ma txi wonisana ni sikarato! Ina awe wa ti lava ku tsakisa Mkoma wako Jesu? Simama u dhumisa ditina da Jehovha, u vhuna vamwani ku ve gonda ngu tifanelo to tsakisa ta Txizimu txathu. (1 Pedro 2:21) Kufana ni Jesu, u maha ti to Jehovha e tsaka u tshumela u veka hakubasani ti to mlala wakwe Sathani, mgodhi wa makuho! w24.02 11-12 ¶11-13

Ka mtxhanu wa malembe aya ma nga pinda, kona mu ka 1.000.000 wa vathu va tiningetete ku ve bhabhatiswa ve va Tifakazi ta Jehovha. Mbimo yi u tiningetelako ka Jehovha, u sawula kuva mgondiswa wa Kristu ni ku kumaha kudhunda ka Txizimu nda lisima ngutu ka wutomi wako. Kambe nji txani txi txi patekako ka ku tiningetela koneko? Jesu a wombile tiya: “Ngako mthu a txi lava ku ni londisa a na ti leke.” (Mat. 16:24) Dipswi da Txigriki di hunduluxelwako di txi “ku ti leka” di tshumela kambe di hunduluxelwa di txi womba “ku ti lamba.” Ngako u txi tiningetela ka Jehovha, u fanete kulamba totshe ati ti nga m’henyisako. (2 Vak. 5:14, 15) Eto ti pata kulamba “mithumo ya mtumbuluko wa nyama,” kufana ni ku ti ñola ko biha ngu ta mataho. (Vag. 5:19-21; 1 Vak. 6:18) Ina kuengisa Jehovha ti na nemetisa wutomi wako? Kha ti na mba nemetisa wutomi wako ngako u txi randa Jehovha ni kutsaniseka ti to milayo yakwe yi wuyelisa awe.—Mas. 119:97; Isaya 48:17, 18. w24.03 2 ¶1; 3 ¶4

Jehovha a ninga moya wakwe wo sawuleka avale ava tsakelako. (Mat. 12:18) Tiwotise tiya: ‘Ina na sikota ku kombisa fanelo yimweyo ya mihando ya moya ka wutomi wangu?’ Ina wa timisela ngutu kupinda mbimo yi u ngadi ngadi kugonda ditshuri? Mbimo yi u yako masoni u kombisa tifanelo ta Jehovha, u naya masoni u tsaniseka ti to ene wa ku tsakela! Jehovha a ningete mterulo kasi kuvhuna avale ava tsakelako. (1 Tim. 2:5, 6) Se i di ti to mbilu yako kha yi tsaniseki to Jehovha wa ku tsakela hambi u di ni likholo ka mterulo ni ku u di bhabhatisilwe, khumbula ti to kha ha fanela ku themba mapimiselo athu hi pune, kambe hi fanete ku themba Jehovha. Kwakwe, avale va ku ni likholo ka mterulo va dhanwa to valulami ni ku a thembisa ku va katekisa.—Mas. 5:12; Var. 3:26. w24.03 30 ¶15; 31 ¶17