Jesu i di ngadi mfana

Josefa ni Mariya va txi zumba Nazareta ni Jesu kumweko ni vamwani vanana vawe va vafana ni sihoranana. Josefa a txi thuma ko vata mapulango ni ku a txi gondisa mwaya wakwe kuziva Jehovha ni milayo yakwe. Mwaya wa Josefa mbimo yotshe wu txi tsula disinagogani kasi kuya khozela Txizimu ni ku dilembe ni dilembe va txi tsimbila mpfhuka wo lapha kasiku veya dya Paxkwa khe Jerusalema.

Mbimo yi Jesu a nga ti ni 12 wa malembe, ene ni mwaya wakwe va tsute Jerusalema. Didhoropani mule ku ti tate ngu vathu ava ni vona va nga txi ya dya Paxkwa. Mbimo yi Paxkwa yi nga guma, Josefa ni Mariya va tshumete veya mtini, va di kumweko ni maxaka awe. Vona va txi pimisa to Jesu a di ho ka mtxawa wule. Kambe mbimo yi va nga m’xoletela kha va nga mmana.

Se, Josefa ni Mariya va tshumete ve tsula Jerusalema, veya xoletela Jesu kudingana masiku mararu, kambe kha va nga mmana. Se, va to tsula veya m’xola dithempeleni. Se va tiya mmana kona mule. Ene a ti ni vagondisi, atxi va engisela va txi gondisa mayelano ni Jehovha a txi va maha ni siwotiso. Vagondisi va xamatisilwe ngu Jesu, ve khata kumaha siwotiso. Phela, va txi ti tsakela ati Jesu a nga txi va xamulisa tona. Va tiwoni ti to Jesu a txi yi pfisisa kwati Milayo ya Jehovha.

Josefa ni Mariya va ti karatekile ngutu. Mbimo yi va nga hoka mule, Mariya a m’wotisile tiya: ‘Mwanangu, athu hi ku xoletete kotshe. U ti kova hayi?’ Jesu a to xamula a txi khene: ‘Ni ti kona muwa nyumbani ka Tate wangu.’

Jesu a tshumete ni vaveleki vakwe ve tsula Nazareta. Akheya, Josefa a ti ya m’gondisa mthumo wo vata mapulango. Jesu a yite masoni e kula ni ku wuzivi wakwe wu yite wu engeteleka. Vathu va txi m’dhunda ngutu ni ku Jehovha a ti tsaka ngutu ngu ti Jesu a nga txi timaha.