Jesu e va Mesiya

Johani a txi txhumayela ti to ku txi ta m’thu wa lisima ngutu kupinda ene. Se mbimo yi Jesu a nga ti ni 30 wa malembe, a tsute ka Mnambu wa Jordhani aha Johani a nga txi bhabhatisa kona vathu. Jesu atiya kombela Johani ti to e m’bhabhatisa. Kambe Johani a ti khene: ‘Jesu ani kha ni na ku kubhabhatisa, ngawe u nga ti fanete ku ni bhabhatisa.’ Se Jesu a ti khene: ‘Johani, Jehovha ngene a lavako ti to awe u ni bhabhatisa.’ Se vona na to bela ka mnambo wa Jordhani, Johani a to beta wotshe mmidi wa Jesu matini e m’bhabhatisa.

Mbimo yi Jesu a nga huma ngu matini ene a to maha mkombelo. Se nzuma yi to tuleka, moya wa Txizimu wu to txhika wu ta ka Jesu nga dituva. Se Jehovha a to womba tiya: ‘Awe u mwanana wangu, ani na kudhunda ngutu, na kutsakela.’

I ve ka yona mbimo yile Jesu a nga va Kristu mwendo Mesiya. Kukhukhela ka mbimo yile ene ati tiemisete kukhata mthumo wu Jehovha a nga ti mningile.

Msana ka kuva Jesu a di bhabhatisilwe, ene a tsute txitingani eya heta 40 wa masiku adi kona khe. Mbimo yi a nga wuya, Jesu a tsute eya womba-womba ni Johani. Neti Johani a nga wona Jesu a txi ta a to khene: ‘Wonani txinvutana txa Txizimu atxi txi thavisako txionho hamafuni.’ Johani a dhani Jesu ku txinvutana txa Txizimu nguku a txi lava ti to vathu ve tiziva to Jesu i di Mesiya. Kambe mbimo yi Jesu a ngadi txitingani khe, ta ho ati ti nga ya m’humelela. Ngu tihi ta kona? Hi na tiwona ka matimu a ya ma londiselako.