Vagondiswa ve amukela moya wo sawuleka

Ku di pindile 10 wa masiku msana ka kuva Jesu a di tsute nzumani, vagondiswa va amukete moya wo sawuleka. Ka dilembe da 33 ka nguva ya Kristu, vathu vavangi va di tsute Jerusalema kasiku ve ya maha fexta ayi yi nga txi dhanwa ku i Pentekoste. Ka ditshiku donedo, 120 wa vagondiswa va Jesu va di sengeletanile ka nyumba yo kari. Ngu txikuluveta, ku to humelela timhaka to xamatisa ngutu. Nyumbani mule ku to pfala diguwa da moya wa hombe, ku to humelela so nga mndilo hamsungo ka mgondiswa mmwani ni mmwani, se votshe va to khata kuwombawomba tidimi tatingi.

Vathu ava va nga di tite Jerusalema va pfite diguwa dile, se ve tshangana kasiku ve womba-womba ngu mhaka yile. Vona va to xamala ngutu mbimo yi va nga wona vagondiswa va Jesu va txi womba-womba tidimi tawe, se ve womba tiya: ‘Vathu vava va ta ngu Galileya, kambe va si kotisa kutxani kuwombawomba tidimi tathu?’

Se Pedro ni vamwani vapostoli va to ya ema masoni ka vathu. Se Pedro a to khata kutxhamusela vathu a ti Jesu a nga fisa tona ni ti Jehovha a nga m’wusisa tona. Ni ku a tshumete a txi khene: ‘Konku Jesu a nzumani didhawani ka Txizimu, ni ku wa hi ninga moya wo sawuleka awu a nga hi thembisa. Ngu wona wu mahako ti to mi wona sidiwukiso siya.’

Ati Pedro a nga ti womba ti tsakisile ngutu vathu vale, se va to m’wotisa ati va nga di fanete ku ti maha. Pedro a to va gela a txi khene: ‘Ti soleni, mi leka kumaha timhaka to biha, mi bhabhatiswa ngu ditina da Jesu. Se nanu mi na amukela moya wo sawuleka.’ Se ka dona ditshiku dile, kubhabhatisilwe 3.000 wa vathu. Kukhukhela ka dona ditshiku dile, vagondiswa va Jesu va to ya ve engeteleka ngutu khe Jerusalema. Ni ku ngu kuvhunwa ngu moya wo sawuleka, mabanza ni ona ma engetelekile ni ku vapostoli va sikoti kugondisa vathu totshe a ti Jesu a nga di va rumile.