Mwaya wako wu nga li manisa kutxani litsako?—Txienge 2

Vanana i ningo ayi yi tako ngu ka Jehovha. Ene a lava ti to vaveleki ve yi khatalela kwati ningo yiya. Jehovha a ninga milayo vaveleki ti to yi va vhuna kukulisa kwati vanana. Milayo yoneyo yi tshumela yi vhuna ni vanana ti to ve hetisisa kwati txienge txawe kasi ku mwaya wu mana litsako.

1. Ngu sihi sialakanyiso asi Jehovha a ningako vaveleki?

Jehovha a lava ti to vaveleki ve dhunda vanana vawe ni ku ve tiha mbimo yo ve bhula navo. Ene a lava ti to vaveleki ve vhikela vanana vawe, ni kuthumisa matshina a milayo ya Bhiblia kasi ku ve va gondisa. (Mavingu 1:8) Ene a womba tiya ka vaveleki: “Va kuliseni [vanana vanu] . . . ngu sileleto ni tigondo ta Mkoma.” (Lera Vaefesu 6:4.) Jehovha wa tsaka ngako vaveleki va txi engisa mkongomiso wuwa. Ene a lava ti to vaveleki ve kulisa vanana ni ku va khatalela va pune i si nga kuningela wutixamuleli wuwa ka vamwani.

2. Ngu sihi sialakanyiso asi Jehovha a si ningelako ka vanana?

Jehovha a womba tiya ka vanana: “Engisani vaveleki vanu.” (Lera Vakolosa 3:20.) Ngako vanana va txi engisa ni kuxonipha vaveleki vawe, va tsakisa Jehovha ni vaveleki vawe. (Mavingu 23:22-25) Jesu a vite txikombiso txa txinene mbimo yi i nga ti mwanana. Hambi ku a nga ti hetisekile kha leka kuengisa vaveleki vakwe ava va nga ti sa hetiseka.—Luka 2:51, 52.

3. Motsenu ha mwayani, vanani vangana va Txizimu?

Ngaku u di tate mwendo mame ha tsaniseka ti to u lava to vanana vako ve randa Jehovha kufana ni nawe. U nga ti mahisa kutxani toneto? Ngu kumaha ati Bhiblia yi ti wombako ngu mapswi a Jehovha. Yona yi womba tiya: “U na ma gondisa ka vanana vako, kambe u na womba-womba ngu ona, u di khalahatshile mtini kwako, ni ku ngako u txi tsimbila amu mapfhumbani kwako.” (Dhewuteronome 6:7) ‘Kugondisa,’ ti nga pata kuwuyeletela to maha. Awe wa ti ziva ti to kuva vanana vako ve vekisa ati u va gondisako ti lava u va gondisa ngu kuwuyeletela. Ngu toneto, m’bhalo wuwa wu ku kuzeta ti to u lava mikhanjo yo u bhula ni vanana vako ngu Jehovha. Se ti ngava ta tinene ku divhiki ni divhiki mi ti vekela mbimo yo gonda mothsenu Bhiblia kota mwaya. Hambi i di ti to khu nga ni vanana, ndinene ku divhiki ni divhiki u tiha mbimo yo gonda ngu Jehovha.

ENGETELA WUZIVI WAKO

4. Laya mwanana wako ngu nzila ya lirando

Phela kha ti hehuki kulaya vanana. Bhiblia yi nga kuvhunisa kutxani? Lera Jakobe 1:19, 20, mi gwita mi bhula ngu siwotiso siya:

• Vaveleki va nga li kombisisa kutxani lirando mbimo yi va womba-wombako ni vanana vawe?

• Ngu kutxani vaveleki va sa fanela kukawuka vanana va di henyile?a

5. Vhikela vanana vako

Kasi ku u vhikela vanana vako, nda lisima ku u bhula navo ngu timhaka ta mataho, hambi i di ti to kha ti ku hehukeli kumaha toneto. Xalela VHIDHIYO, mi gwita mi bhula ngu siwotiso asi si londiselako.

VHIDHIYO: Vhikela vanana vako ka to biha (2:58)

• Ngu kutxani vaveleki vamwani ti txi va karatela kubhula ni vanana vawe ngu timhaka ta mataho?

• Vaveleki vamwani va bhulisa kutxani ni vanana vawe ngu timhaka ta mataho?

Nga ha Bhiblia yi nga womba ngu kona, mafu yawa a Sathani ma ya ma txi biha ngutu. Lera 2 Timoti 3:1, 13, mi gwita mi bhula ngu txiwotiso txiya:

• Vhersikulo 13 yi womba-womba ngu vathu vo biha, nga ha hi ti zivako ngu kona vathu vonevo va xakela vanana. Ti di nga eto ngu kutxani i di ta lisima ku vaveleki ve womba-womba ni vanana vawe ngu ta mataho ni ku va gondisa ku ve tivhikela ka va va lavako ku va xakela?

Ina u ti ti ziva?

Tifakazi ta Jehovha ti humisile mavhidhiyo ni mabhuku o tala aya ma vhunako vaveleki ti to ve bhula ni vanana vawe ngu timhaka ta mataho ni ku va vhikela ka va va lavako ku va xakela. Ngu txikombiso, wona timhaka tiya:

• Vhikela vanana vako (vhidhiyo)

• Gonda ka Mgondisi wa hombe, gondo 10 ni 32

• “Gondisa vanana vako mayelano ni timhaka ta mataho” (Khenjemuka! No. 5 2016)

6. Xonipha vaveleki vako

VHIDHIYO:Ni nga womba-wombisa kutxani ni vaveleki vangu? (2:19)

• Ngu kutxani i di tatinene ku majovhem me tikaratela kubhula ni vaveleki va ona?

• Majovhem ma nga womba-wombisa kutxani ni vaveleki va ona ngu nzila ya txithavo?

Lera Mavingu 1:8, mi gwita mi bhula ngu txiwotiso txiya:

• Dijovhem di nga maha txani ngako vaveleki va dona va txi di gela ati di fanelako ku ti maha?

7. Khozelani Jehovha kota mwaya

Timwaya ta Tifakazi ta Jehovha ti tiha mbimo divhiki ni divhiki ti to ti gonda Bhiblia kumweko. Eto ti dhanwa ku wukhozeli wa mwaya. Yi mahiswa kutxani gondo yoneyo? Xalela VHIDHIYO, mi gwita mi bhula ngu siwotiso asi si londiselako.

VHIDHIYO: Wukhozeli wa mwaya—Sikarato ni wuyelo (8:04)

• Mwaya wu nga txi mahisa kutxani txiemiso txa wukhozeli wa mwaya?

• Vaveleki va nga mahisa kutxani ti to wukhozeli wa mwaya wu tsakisa ni kuvhuna vanana?—Wona mfota awu wu ku makhatoni ka gondo.

• Ngu kuya ngu mawonelo ako, ngu kutxani ti nga mi karatelako ti to mi va ni wukhozeli wa mwaya?

Ka Israyeli wa kale Jehovha a ti lava ti to timwaya ti bhula mbimo yotshe ngu Mibhalo. Lera Dhewuteronome 6:6, 7, mi gwita mi bhula ngu txiwotiso txiya:

• U nga di thumisisa kutxani ditshina diya da mlayo?

Tinzila ati mi nga ti thumisako ka wukhozeli wa mwaya:

• Kulungiselela mitshangano ya dibanza.

• Kugonda ngu matimu a Bhiblia mi gwita mi bhula ngu ona.

• Ngako u di ni vanana va vadotho, bhaxara mwendo ku imprimira timhaka ati ti womba-wombako ngu vanana ka site yathu ya jw.org.

• Ngako vanana vako se i di vafana ni mahorana, bhulani ngu misungo ya timhaka ayi yi ku ka site ya jw.org.

• Mahani drama yo kari ayi yi womba-wombako ngu matimu amu ka Bhiblia ni vanana vano.

• Xalelani vhidhiyo ka site ya jw.org mi gwita mi bhula ngu yona.

ATI HI NGA TI WONA

Jehovha a lava ti to vaveleki ve dhunda vanana vawe, ve va laya ni ku va vhikela. Vanana ve engisa ni kuxonipha vaveleki vawe. Mwaya wu khozela Jehovha ngu wumwewo.

Ngu tihi ti u nga ti gonda

• Vaveleki va nga laya ni kuvhikela vanana vawe ngu nzila yihi?

• Vanana va nga txi kombisisa kutxani txixonipho ka vaveleki vawe?

• Ngu kutxani i di ta lisima kuva ni wukhozeli wa mwaya divhiki ni divhiki?

XOTA TIMWANI

Ngu tihi tigondo ati u nga ti thumisako kasi kugondisa mwanana wako ati ti no m’vhuna mbimo yi a no kula?

“6 wa tigondo ati u nga ti thumisako kasi kugondisa mwanana wako” (Khenjemuka! No. 2 2019)

Wona sialakanyiso asi Bhiblia yi si ningelako ka vale va khatalelako vaveleki ava va nga kumba.

“Bhiblia yi womba txani ngu kukhatalela vaveleki ava va nga kumba?” (Msungo mhaka wu ku ka site)

Wona ati ti nga vhuna wamwamna wo kari awu a nga si ti zivi ti to a na va wunjisa kutxani vanana vakwe.

Jehovha a hi gondisile kuwunja vanana vathu (5:58)

Wona nzila yi tate a nga tsanisako ngu yona wungana ni mwanana wakwe.

“I ngu nzila yihi tate a nga vako ni wungana wa hombe ni mwanana wakwe?” (Muwoneleli wa 1 ka Novembro wa 2011)