Mareferensiya a txibhukwana txa mitshangano ya Mahanyelo a Wukristu
7-13 KA DEZEMBRO
TITHOMBA TA MU KA DIPSWI DA TXIZIMU | LEVHI 10-11
“Randa Jehovha kupinda mwaya wako”
it-2371¶ 3
Kwa mbi tumelelwa
Va hisile dibaselo va sa tumelelwa. A mu ka Levhi 10:1 dipswi da txi Hebheru zar (feminino, za·rahʹ; di ku: to yila) di thumiswa kukomba “kwa mbi tumelelwa kuhisa, a kuwa [Txizimu] txi nga sa va thusa ku ku maha.” Kambe Nadhabhi ni Abhiyu, vanana va Aroni va to leka mlayo wu Jehovha a nga ti va ningile. Sekoko a to va lamula ngu mndilo. (Lev 10:2; Mit 3:4, 26:61) Koneho, Jehovha a ti khene ka Aroni: “Mi nga seleni vhinya, hambi ni simwani so sela si si levisako, nguko mi nga fa. A wuwa mlayo mbwa kala kupinduka, ka sotshe situkulwana sanu. Ngu toneto, mi na sikota ku hambanisa a txi i ku txo sawuleka ni txo mbi sawuleka, ni txi i ku txo yila ni txo mbi yila, mi txi sikota kugondisa va ka Israyeli ti to ve vekisa milayo yi Mkoma a nga va ninga, ngu txisofu txa Mosi.” (Lev 10:8-11) Atiya ti komba to Nadhabhi ni Abhiyu va ti levite, eto ngu tona tinga va maha ve hisa dibaselo hambiko i nga ti si nga fanelo yawe. Ti ha kubasani to mkama, wukhalo ni maningelelo a kona, ma si pfani ni malulamiselo a ya ma nga kombiswa ka, Eksodha 30:34, 35. Txiemo txawe txa wudevi kha txa hehukisa txionho txawe.
w11 15/7 31-32 ¶16
Kuhumula ka Txizimu, ina nawe u ku mani?
Aroni mkoma wa Mosi, a tshangane ni txiemo txo karata ngutu txa vanana vakwe va vambidi. Hi nga alakanya kupanda ku a nga kupfa mbimo yi a nga ziva to vanana vakwe Nadhabhi ni Abhiyu va hisile dibaselo ka Jehovha va sa tumelelwa se Txizimu txi va daya. Ti ha ku basani to txiemo txiya i ti magwito a wuxaka wuhi ni wuhi wa majaha yawa a mambidi ni vaveleki vawe. Hambiketo, ku di ngadi ni timwani. Jehovha a leletile Aroni ni vanana vakwe vo thembeka: “Mi nga vhununguleni misungo yanu, hambi ku vharula syambalo sanu, mi txi komba ku va dila [ku zila], nguko mi nga fa, ngu ku va mi di vhutukisile dikhulo da Txizimu [Jehovha] hagari ka msengeletano wotshe.” (Lev 10:1-6) Mhaka yi ha ku basani. Lirando lathu ngu Jehovha li fanete kuva la hombe ngutu kupinda li hi randako ngu lona siro sa mwaya wathu so mbi thembeka.
Lavetela Tithomba ta Moya
w14 15/11 17 ¶18
Hi fanela kubasa ka mahanyelo athu otshe
Kasiku hi va vo basa, hi fanete ku xolisisa kha kwati Mibhalo hi maha a ti Txizimu txi hi rumako tona. Alakanya ngu Nadhabhi ni Abhiyu vanana va Aroni, a va va nga dawa ngu ku ‘hisa dibaselo,’ va di levile. (Levhi 10:1, 2) Wona a ti Txizimu txi nga gela Aroni. (Lera Levhi 10:8-11.) Ina a ti lava kuwomba to kha hi faneli kusela wusuki hi si se ya mitshanganoni ya Wukristu? Hi nga dhumm u pimisa ngu timhaka tiya: Kha hi nga hahatshi ka Mlayo. (Var. 10:4) Ka makhalo mamwani, vanathu va thumisa so sela mwendo wusuke ngu kudinganisela ngako va txi susula va si se ya mitshanganoni. Mune wa mabhikiri ya vhinya mathumisilwe ka Pasika. Mbimo yi Jesu a nga emisa Txialakanyiso, a gete vapostoli vakwe ti to ve sela vhinya yi yi nga ti emela mñoha wakwe. (Mat. 26:27) Bhiblia ya tsimba kusela wusuke kupinda mpimo ni wudevi. (1 Vak. 6:10; 1 Tim. 3:8) Vanathu va vangi, ngu kona hawa ka livhalo lawe va tipfa i di tshuku kwa mbi sela wusuki hambi wa wudotho va si se bela ka mthumo wo sawuleka. Hambiketo, siemo sa hambana ngu kuya ngu ditiko ni ditiko, aniko txa lisima ka makristu ngu “hambanisa to tshura ni to biha,” a ti ti maha txiemo txawe txi va txo sawuleka ni ku tsakisa masoni ka Txizimu.
it-1135 ¶4
Sihari
Kutsimbwa kuwa ka madyelo ku txi tumelelwa dwe ka va va nga ti hahatshi ka Mlayo wa Mosi a wu wu ku ka Levhi 11:8 wu khene: “Sa yila kwanu.” Mlayo wuwa wu fuvile mbimo yi Jesu a nga ningela wutomi wakwe kota digandelo, se kukhukhela koneho, vathu va ndi na ti dila ngu malulamisela aya Jehovha a nga ti gete Nowa msana ka Ndambi.—Vakl 2:13-17; Gen 9:3, 4.
14-20 KA DEZEMBRO
TITHOMBA TA MU KA DIPSWI DA TXIZIMU | LEVHI 12-13
“Hi nga gonda txani ka milayo mayelano ni tshekela?”
wp18.1 7
Ina Bhiblia yi pindetwe mwendo yi ngadi yi txi vhuna?
• Kuzumba ka valwati vokha.
Mlayo wa Mosi wu txi womba to a wu a ku ni tshekela a ti fanela kuzumba kule ni vamwane. Ka mitungo yi nga vaho ka Idade Média va dhokodhela va wu thumisile mlayo wonewo, ni nyamsi wu ngadi wu txi thuma.—Levhi 13:13, 14.
wp16.4 9 ¶1
Ina u ti tiziva?
Vajuda va kale va ti thava tixaka totshe ta tshekela a ti nga ti tiho ngu mbimo ya kubhalwa ka Bhiblia. Malwati oneyo o thisa, ma nga si kota kulwa ni misiha ya mlwati me tshumela me onha siro sakwe. Tshekela yi si nga ni mmrende. Hahanze keto, vathu va va nga ti ni tshekela va ti zumba vokha ni ku va ti fanete ku huwelela ka vamwani ngu txiemo txawe.—Levhi 13:45, 46.
it-2690 ¶11
Tshekela
Mu ka simaha ni nyumbani. Tshekela u nga yi mana ngako u txi gweswa ngu wu a ku nayo ni ku yona ya sikota kundakela mu ka simaha ni nyumbani. Mtungu wuwa, wu nga guma ngu ku kuwulwa ka simaha si tshumela si vekwa kule. Kambe ku txo woneka txibawa ka sona da amarela mwendo do bhilivila di si khuki, i ti txi kombiso txa tshekela se simaha siya si txo hiswa. (Lev 13:47-59) Loko kambe mabawa a yawa amarela ni o bhilivila me woneka ha di setani ka nyumba, mphaxeli a ti veka mlayo wo zumba kule ni nyumba yoneyo. Timwani kambe a ti ti ndi no mahwa, i ti kuhalelwa marigwi otshe a yawa mawonekako ma ti ni sibawa mndani ka nyumba, se me sengeletwa me ya tshotshwa wukhaloni wo nyenyeza hahanze ka m’ti. Loko mtungu wuwa wu txi tshumela wu wuya, nyumba yiya yi ndi nava yi sa basa yi ndi na khundumuselwa, marigwi a kona me ya tshotswa wukhaloni wo nyenyeza. Kambe ka nyumba yi va ku khona yi basile ku ndi na mahwa malulamiselo yo ya yi basisa. (Lev 14:33-57) Ku womba a ti to tshekela a yi nga txi maneka mu ka siambalo mwendo nyumbani i ti mxowo wa bolor mwendo wubovhu kambe ka tiya ku ni ku kanakana.
Lavetela tithomba ta moya
w04 15/5 23 ¶2
Timhaka ta hombe ta dibhuku da Levhi
12:2, 5—Ngu kutxani wa msikati a sa “basa” a ti ngadi kuveleka? Siro sa liveleko simahetwe kupindisela wutomi wa mthu wo hetiseka. Kambe ngu mhaka ya txionho, wutomi wombi hetiseka wu tshapete vathu votshe. Mbimo yo mbi basa yi pata mbimo yi aku ngadi kuveleka, ni kuva ka mbimo ya mitxima ni kuhumisa mbewu ya liveleko, ti dhanwa to txionho txi hi nga txi mana ka vaveleki vathu vo khata. (Levhi 15:16-24; Masalmo 51:5; Varoma 5:12) Sileleto sa ku basiswa a si si nga txi laveka, si txi vhuna va Israyeli ku tsakela txilaveko txa mtirulo wo fenengeta sionho sa vathu votshe, ni ku wusetwa kuhetiseka ka vathu. Ngu nzila yoneyo mlayo wu vi te “m’gondisi kala kuhoka ka Kristu.”—Vagalatiya 3:24.
wp18.1 7
Ngu tshumelela msana mwendo i masoni ka mbimo?
• Mbimo ya Wukwera.
Mlayo wa Txizimu wu wombile to mwanana wa mfana a ti fanela kuya wukwerani msana ka 8 wa masiku a ti velekilwe. (Levhi 12:3) Ka vanana a va va ku ngadi ku hefemulwa, mtamo wa kuoma ka mnoha ku maheka msana ka divhiki di londiselako. Mbimo yoneyo ya kale, ku si se vaho mathumela a va dhokodhela ma si se tshukwatiswa, ku rinzela koneko ka divhiki a si se ya wukwerani, ti si na nguze ni ku i di ta wutxharhi.
21-27 KA DEZEMBRO
TITHOMBA TA MU KA DIPSWI DA TXIZIMU | LEVHI 14-15
“Ti to hi khozela Jehovha ti lava hi basa”
it-1305 ¶5
Kusamba
Kusamba i ti txienge txa Vaisrayeli ngako ti txi laveka ngu sivangelo sa singi. A wu a nga kalamuka ka tshekela, mwendo a nga gwesa wamsikati awu a ku ka mbimo ya mitxima, wamwamna a nga humesa mbewu ya liveleko, awu a nga maha ta mataho, a sa “basa” a ti fanela kusamba. (Lev 14:8, 9; 15:4-27) ngako m’thu a ti mu ditendani se e gwesa txirumbi a sa “basa” a ti fanete e samba ngu mati to e basa. M’thu wu a lambako kuengisa mlayo wuwa a ti fanete “kuthaviswa hagari ka dibanza nguko a nyenyezisile wukhalo wo sawuleka wa Jehovha.” (Mit 19:20) A hawa kusamba ku ti fanekisela kubasa masoni ka Jehovha. (Mas 26:6; 73:13; Isa 1:16; Eze 16:9) Ku ti basisa ngu mati, ti fananiswa ni kusamba ngu dipswi da Jehovha da ditshuri.—Vaef 5:26.
it-2805 ¶5
Wamsikati a di ka mbimo ya mitxima yakwe
Wamsikati nene a txi wonwa a sa basa ngako a di ka mbimo yakwe ya mitxima mwendo ngako a txi thuka e teka mbimo yo lapha a txi humisa mnoha, a mu a nga ti khalahatshile kona, a nga ti otete kona kumweko ni vathu va va nga gwesa siya a si a nga si thumisa, ni vona kha va basa. Msana kova mbimo yakwe yo mbi toloveleka yi di emile a fanete kubala 7 wa masiku, msana keto se a na va a ti basile. Ka ditshiku da wu 8, a ti fanete kuteka mavhondo mambidi a situvana e ma ningela ka mphaxeli ti to me fenengeta sionho sakwe. Ku ningela situvana soneso sa simbidi ka Jehovha i ti mningelo wo divalelwa sionho, wumwani i ti mningelo wo hiswa.—Lev 15:19-30 wona txienge txi ku LIMPO, LIMPEZA.
it-2724 ¶8
Wukhalo wo Sawuleka
8. Ditenda da mtshangano ni Dithepele. Otshe malulamiselo kupata ni mtendelani ka di tabernakela ni madhawani ka dithepele i ti wukhalo wo sawuleka. (Eks 38:24; 2 Mak 29:5; Mith 21:28) Simaha si nga ti ha mthandani ka dithepele i ti altari ni di bhaziya da koporo . A siya i ti siya so sawuleka.Vathu va va nga ti basile ngu vona va nga ti bela mthandani ka tabernakela, kha ngaho wu a nga ti tumelelwa kubela mu dithephelani a mu va nga ti xuxa kona mahungu a sa basa. Wamsikati a wu nga sa basa a si faneli kugwesa tximaha txihi ni txihi txo sawuleka hambi ku bela ka wukhalo wo sawuleka. (Lev 12:2-4) Atxi txi nga ti woneka txi sa basa ka Vaisrayeli, txi ti nyenyeza masoni ka Jehovha. (Lev 15:31) Ava va nga ti neha miningelo yawe ti to ve ta basiswa tshekela va txi neha kala ha ditimbani da mthanda. (Lev 14:11) Kha ngaho m’thu ni wammweyo wo mbi basa a ndi no tumelelwa kuningela mhamba yo sengela mu ka ditabhernakela mwendo mu dithepelani, nguko a ndi na fa.—Lev 7:20, 21.
Lavetela tithomba ta moya
it-3150 ¶1
Nzeve
Kuvekwa ka mphaxeli ka Vaisrayeli, Mosi a leletilwe to e teka mnoha wa mvuta e tota ka nzeve ya txinene ya Aroni ni ka vanana vakwe, e tota ni ka nyagotwe wa mkondoni ni nyagotwe wa manzani sotshe sa txinene, a tiya ti txi txhamusela to a ti va nga txi tipfa, mthumo va nga ti wu maha ni nzila yi va nga ti hanya ngu yona va ndi na tshangana ni mkuzetelo wa ti ti nga txi maheka a hawa va nga ti kona. (Lev 8:22-24) Ngu nzila yoneyo, m’thu wa tshekela awu a nga basiswa, mlayo wu txi khene mphaxeli a fanete kuveka txienge txa mnoha wa mvuta awu wu ni ngelwako kota mningelo wa txionho, ni txienge txa mtona, ka nzeve ya txinene ya m’thu wa tshekela. (Lev 14:14, 17, 25, 28) Malulamiselo a awa ma fanako, ma txi maneka ka malungiselelo a yawa ma nga mahelwa m’thu wu a nga ti tsakela kusimama e va khumbi ya nyamne wakwe. Ngu toneto khumbi yoneyo nyamne wa yona a ndi na yi yisa ha txikeni ka misasimu ya ha di timbani atxi ya yi dola tinzeve ngu linyunzi. Txikombiso txiya txo dolwa nzeve, txi ti txhamusela kunavela ka khumbi kusimama yi engisa ni kumaha kudhunda ka nyamne wa yona.—Eks 21:5, 6.
g 1/06 14, ka dibhokiso
Mazumbelo, mngana ni mlala!
I ti yahi mazumbelo a mbimo ya kale?
Bhiblia yi womba-womba ngu mtungu wa tshekela mu nyumbani, ati ti lavako kuwomba nyumba yi u nga aka upune. (Levhi 14:34-48) Txiemo txiya, txi txi dhanwa kambe ku, “tshekela yo biha,” yona i ti ya silonda sa wubovhu, hambiko ku si tsanisekiko ngu mhaka yiyi. Hambiketo, Mlayo wa Txizimu wu txi kongomisa va nyamne va tinyumba ti to ve thavisa marigwi ya ma nga ndakelwa ngu tshekela, ngu kurwembela mndani ka nyumba, ve thavisa txiya txihi ni txihi va kanakanako to ti txi tshapetwe ngu tshekela ve si wunga veya si tshotsha hahanze ka mti “ka wukhalo wo nyenyeza.” Loko mtungu wu txi tshumela wu vaho, yotshe nyumba yi ndi nava yo mbi basa, yi ti na dhilizwa ni kuhangalaswa. Wukongomisi ni wuxokoxoko wa Jehovha wu komba lirando lakwe lo tshima ngu vathu vakwe ni si va ku naso.
28 KA DEZEMBRO-03 KA JANEIRO
TITHOMBA TA MU KA DIPSWI DA TXIZIMU | LEVHI 16-17
“Mhamba yo divalela ni Nawe”
Tigondo ti hi nga ti manako ka dibhuku da Levhi
Lera Levhi 16:12, 13. Zama kuwona ati ti nga txi maheka ka Ditshiku do Kombela Kudivalelwa: Mphaxeli wa Hombe e bela ditendani. Ndo khata kubela ka Wukhalo wo Sawuleka kasi ku e gwita e bela makhambi mambidi kambe ditshiku donedo. Ka dianza dimwedo a ñote dibaselo do bhumula, se ka dimwani a ni txiya txi ku ni makala a mndilo. E bwaka hale ka dikortina do vhalela khe ko Sawuleka Ngutu e ema. E gwita e bela ngu txixonipho txa hombe, e ema hafuhi ni areka ya txitumelelano. Phela o nga a to ema masoni ka Jehovha apuni! Se kha kwati, mphaxeli e khata kutheletela dibaselo ha ka makala, se wotshe wukhalo wule wu tala ngu mbhumulo wo tshamba ngutu. Msana keto a na tshumela e wuya kambe ka wukhalo wule wo Sawuleka Ngutu ni mnoha wa sihari. Wona to a hisile dibaselo na a si se ningela mnoha wa sihari.
Tigondo ti hi nga ti manako ka dibhuku da Levhi
Hi nga gonda txani ka kuthumiswa dibaselo ngu Ditshiku do Kombela Kudivalelwa? Bhiblia yi kombisa ti to mikombelo ya malanda o thembeka a Jehovha, yi fana ni dibaselo. (Mas. 141:2; Mtu. 5:8) U nga divale ti to mphaxeli wa hombe a ti heleketa dibaselo ka Jehovha ngu txixonipho txa hombe. Ngu kufana, mbimo yi hi mahako mkombelo ka Jehovha, hi maha ngu txixonipho txa hombe. Phela ha bonga aku Mvangi wa nzuma ni mafu a hi tumelelako ku mtshuketela kota vanana vakwe. (Jak. 4:8) Phela ene a hi teka hi di vangana vakwe! (Mas. 25:14) Ha yi bonga ngutu lungelo yiya, se kha hi lavi kuthuka hi dhanisa Jehovha.
Tigondo ti hi nga ti manako ka dibhuku da Levhi
U nga divale ti to mphaxeli wa hombe a ti hisa dibaselo a si se ningela magandelo. Kuhisa kwakwe dibaselo a ti mahela kutsaniseka to a ngadi a txi tsakelwa ngu Jehovha. Hi nga gonda txani ka mhaka yoneyo? Mbimo yi Jesu a nga ti mafuni, ti txi lava e maha mhaka ya lisima ngutu na asi se ningela wutomi wakwe kota digandelo, i ku mhaka ya lisima ngutu kupinda kuhulukisa vathu. Ngu yihi? Ene ti txi lava e engisa Jehovha ngu kuthembeka wutomi wakwe wotshe ha mafuni kasi ku Jehovha e amukela digandelo dakwe. Ngu nzila yoneyo, Jesu a ndi na kombisa ti to kutsakisa Jehovha ngu tona i ku ta lisima ka wutomi. Jesu a ndi na kombisa wunene wa nzila yi Jehovha a fumako ngu yona.
Lavetela tithomba ta moya
it-1-T 284 ¶2
Azazeli
Nga ha mpostoli Paulo a nga txhamusela ngu kona, Jesu’ a ningete wutomi wakwe wo hetiseka kota mhamba ngu kona hawa ka sionho, ene a mahile to pinda mnoha wa “tiphongo ni madhuna.” (Vaheb 10:4, 11, 12) Ene koko a vite “mhamba ya kudivalela sionho,” a ‘rwate malwati athu,’ “a pekilwe ngu sihambunyeto sathu.” (Isa 53:4, 5; Mat 8:17; 1 Ped 2:24) A ‘rwate sionho sa votshe’ vale va kombisako likholo ka mhamba yakwe ya lisima. Ene kambe, a kombisile to malulamiselo awa a Txizimu ma pfhuta sionho kala kupinduka. Sekoko, mabhongwe wa Azazeli a ti fanekisela mhamba ya Jesu Kristu.
w14 15/11 10 ¶10
Ngu kutxani hi di fanete kuzumba hi di basile
Lera Levhi 17:10. Jehovha a leletile Vaisrayeli to va si dyi “mnoha wa ni lihi lixaka.” Kwa mbi dya mnoha—wa txihari mwendo wa m’thu—njirumo ka Makristu. (Mith. 15:28, 29) Kha hi ti lavi kuhenyisa Jehovha mwendo kuthaviswa dibanzani. Ha mdhunda Jehovha ni ku hi lava ku mu engisa. Hambi hi txo va ka txiemo a txi txi lavako kuheta wutomi wathu, hi ti emisete kwa mbi tumela sikombelo mwendo ku kurumetwa ngu va va si thaviko Jehovha ni kwa mbi lava ku mu engisa. Ina, hi ti emisete kusekwa ngu kulamba kudya mnoha, aniko hi sawula kuengisa Txizimu. (Judha 17, 18) Ka mhaka yiya, ngu yahi mapfisiselo ya ma no tsanisa ku tiemisela kwathu, ko mbi dya mwendo kuthelwa mnoha?—Dhewut. 12:23.