GONDO 8

Kugondisa ngu kuthumisa sikombiso

Matewu 13:34, 35

ATI HI NO BHULA NGU TONA: Tshambisela magondiselo ako ngu kuthumisa sikombiso so hehuka asi si no pfala ka vaengiseli vako ni kusiya gondo ya lisima.

U NGA MAHISA KUTXANI:

Sawula sikombiso so hehuka. Kufana ni Jesu, thumisa silo sa sidotho ti to u txhamusela timhaka ta hombe, ni kuthumisa silo so hehuka ti to u txhamusela timhaka to karata. U nga tatele mapswi, ha ko za u timeta vaengiseli. Tsaniseka ti to silo si u si thumisako ka txikombiso txako sa yelana ni gondo yi u ningelako ti to u si mwalati vaengiseli vako ngu kutshunganisela timhaka.

Wona ni kugonda. Alakanyisisa ngu ti ti mahekako amu u zumbako kona, gonda mabhuku a Wukristu, ni kuwona vale va ku ni wusikoti wo gondisa. Se u bhala sikombiso si u nga si thumisako ti to u tshambisela magondiselo ako. Veketa sikombiso soneso ka wukhalo.
Alakanyisisa ngu vaengiseli vako. Sawula sikombiso asi vaengiseli va nga si tolovela mwendo va nga si tsakelako. Ti wonele kuthumisa sikombiso si si nga va thelako tingana mwendo ku va henyisa.
Siya gondo ya lisima. U nga tatele to womba, thumisa sikombiso ti to u junyatisa tigondo ta lisima. Maha totshe u nga ti kotako ti to muengiseli wako e sala a di ni gondo i si nga kukhumbula txikombiso dwe.