Samuwele a kute a txi maha ati i ku ta tinene

Kukhukhela i ti ngadi mwanana, Samuwele a ti thuma ni kuzumba ditendani. I ku wukhalo wu vathu va nga ti thumela ka wona Txizimu. Wa ti ziva ti to ti mahisile kutxani to Samuwele e ya maneka ditendani? He khati ngu kugonda ngu Ana, mame wa Samuwele.

Ana a zumbile malembe o tala a txi lava mwanana kambe a si veleki. Ene a kombete ka Jehovha ngu kuwuyeletela ti to e m’vhuna. Ana a thembisile ti to ngako a txo mana mwanana, a ndina mu ningela ka Jehovha e mu thumela a di ditendani. Jehovha a xamute mkombelo wakwe. Se Ana a to veleka mwanana. Ene a mu rayile ditina do i Samuwele. Ngako Ana a nga ti mahile txithembiso, mbimo yi Samuwele a nga ti ni 3 wa malembe a mu tekile e mu heleketa ditendani ti to e ya thumela Txizimu.

Eli i ti mphaxeli wa hombe. I ku wu a nga ti emela vathu masoni ka Txizimu. Ene ni vanana vakwe va vambidi ni vona va ti thuma ditendani. Khumbula ti to ditenda i ti nyumba yo thumela ka yona Txizimu. Ni ku vathu va ti fanete kumaha ti i ku ta tinene kona mule. Kambe vanana va Eli va ti mahetela to biha. Samuwele a ti woni ti va nga ti ti maha. Ina Samuwele a mahile to biha kufana ni vanana va Eli?— Ahim-him, ene a mahile a ti i ku ta tinene a ti a nga ti gondisilwe ngu vaveleki vakwe.

U pimisa ti to Eli a di va mahile txani vanana vakwe?— Ene a ti fanete ku va tsayisa. A sa fanela ku va tumelela ve thuma kambe nyumbani ka Txizimu. Kambe ene a to va leka, se Jehovha a to mu henyela ene ni vanana vakwe. Ene a lavile ku va tsayisa.

Ditshiku dimwani Samuwele a di otete ni wusiku, a pfite m’thu a txi mu dhana a txi: ‘Samuwele!’ Ene a to wuka e tsula ka Eli, kambe Eli a to khene: ‘Kha na kudhana.’ Eto ti mahekile makhambi mambidi. Ka dikhambi da wuraru, Eli a to gela Samuwele ti to ngako a txi pfa kambe dipswi, a ti fanete kuxamula a txi khene: ‘Ni kombela u womba-womba Jehovha, na engisela.’ Se Samuwele a to maha ti a nga gelwa. Jehovha a to khene ka Samuwele: ‘Gela Eli ti to aku va mahetelako to biha ni na tsayisa mwaya wakwe.’ U pimisa ti to Samuwele a si thavi ku ya gela Eli a ti a nga rumwa ngu Jehovha?— A ti thava. Kambe hambiku a nga ti thava, a mahile ti a nga gelwa ngu Jehovha. Se Jehovha a mahile ti a nga ti womba. Vanana va Eli va datwe, se Eli nene a fite.

Samuwele njikombiso txa txinene kwathu. Ene a mahile ti i ku ta tinene hambiku a nga wona vamwani va txi maha to biha. Awe ko? Ina khu ti lavi kufana ni Samuwele ngu kumaha ti i ku ta tinene? U txi maha eto, u na tsakisa Jehovha ni vaveleki vako.