Txihunja txi hi tsakelako ku txi ziva

Ina u ta nga gelwa mhaka yi i ku txihunja?—a Bhiblia yi wombawomba ngu txihunja txo sawuleka. Njo sawuleka nguko txi ta ngu ka Txizimu. Ni ku njihunja, nguko txi si ziwi ngu vathu. Hambi tingelozi ti si zivi to tala ngu txona. Ina nawe wa ti lava ku txi ziva?—

Kale ka kale, Txizimu txi mahile wamwamna wo khata ni wamsikati. Vona va dhanwa ku i Adhamu ni Evha. Txizimu txi ti va ningile m’ti wo tshura ngutu wu wu dhanwako ku i jaradhi ya Edheni. I ti ku Adhamu ni Evha va ti ko engisa Txizimu, vona ni vanana vawe va di mahile mafu otshe me va wukhalo wo tshura kufana ni jaradhi yile. Ni ku va di zumbile kona mbimo yotshe. Kambe wa ti khumbula ati Adhamu ni Evha va nga maha?—

Nyamsi mafu awa hi nga wukhalo wo tshura nguko Adhamu ni Evha kha va engisa Txizimu. Kambe Txizimu txi wombile ti to txi na maha mafu otshe me tshura ni ku vathu va na hanya ka ona mbimo yotshe va di tsakile. Txi na ti mahisa kutxani toneto? Kukhukhela kale vathu va si ti zivi, nguko i ti txihunja.

Mbimo yi Jesu a nga ti ha mafuni, a gondisile vathu mayelano ni txihunja txonetxo. Ene a wombile ti to i ti txihunja mayelano ni Mfumo wa Txizimu. Jesu a gete vathu ti to ve khongelela kuta ka Mfumo wonewo. Wona wu na ta maha mafu me va wukhalo wo tshura.

Ina ti ku tsakisile kuziva txihunja txonetxo?— Khumbula ti to ava va no ta hanya ka wukhalo wo tshura ngu va va engisako Txizimu basi. Bhiblia yi wombawomba ngu matimu a vavamna ni vavasikati va va nga engisa Jehovha. Ina khu tsakeli kugonda ngu vathu vonevo?— Konkuwa he wone ti to mba mani ni ku hi nga va etetelisa kutxani.