Nzila yo vhuna ava va lavako kugonda ngu Jehovha

1. Vathu va nga angulisa kutxani ngako hi txi va txhumayela mahungu a manene? (Mithumo 13:47, 48; 16:14, 15)

VATHU vavangi va tsakile ngutu mbimo yi Makristu o khata ma nga va bhulela ditshuri mayelano ni Jesu ngu dikhambi do khata ni ku va tekete kuva Makristu. (Lera Mithumo 13:47, 48; 16:14, 15.) Ngu ha kufanako, ka timbimo tathu vamwani va tsaka mbimo yi va pfako mahungu a manene ngu dikhambi do khata. Hambi vale makhatoni va si tumeliko didungula da Mfumo adi hi va txhumayelako, ngu kutsimbila ka mbimo va nga di tumela. Se hi na maha txani ngako hi txi mana vathu ava va tsakelako kugonda Bhiblia?

2. Mthumo wathu wo txhumayela wu fanisa kutxani ni mthumo wa m’dimi?

² Hi nga fananisa mthumo wathu wo txhumayela ni mthumo wa m’dimi. Ngako siyalo si di vitute, mdimi wa si elula hambi i di ti to ku ni simwani so kha si se vitwa. Ngu mbimo yoneyo ya yimweyo, wa simama e khatalela asile si se kuvitwa. Ngu ha kufanako, ngako hi txi mana m’thu awu a nga tiemisela kutumela didungula dathu, ngu txikuluveta hi lava ku m’vhuna ti to e va mgondiswa wa Kristu. Se ka vale va si se ku tiemisela kutumela didungula dathu, hi na simama hi va vhuna kasiku ve wona ti to nda tinene kugonda mayelano ni Jehovha. (Joh. 4:35, 36) Ngako u txi zama kupfisisa ti to m’thu a ti emisete kuengisela didungula dathu mwendo nem, eto ti na hi hehukela kuziva nzila ya yinene yo m’vhuna. Ka gondo yiya, hi na wona ti hi nga ti mahako kasi kuvhuna m’thu awu a tsakelako ditshuri ka dikhambi do khata. Hi na tshumela hi wona ti hi nga ti mahako kasiku hi vhuna m’thu eneyo ku e simama e kula ngu didhawa da moya.

NGAKO M’THU A TXI TSAKELA KUGONDA BHIBLIA

3. Hi nga maha txani ngako hi txi mana m’thu awu a amukelako didungula adi hi di txhumayelako? (1 Vakorinto 9:26)

³ Mbimo yi hi manako m’thu a tsakelako didungula di hi di txhumayelako, ngu txikuluveta hi lava ku m’vhuna ti to e gonda ngu Jehovha ni ku va ni wungana nayo. Ka siemo soneso, hi lava kuningela gondo ya Bhiblia ka m’thu eneyo ni ku mramba ti to eta mitshanganoni.—Lera 1 Vakorinto 9:26.

4. Kontarela txiperiyensiya txa m’thu wu a nga tsakela kugonda Bhiblia ngu txikuluveta.

⁴ Ningela gondo ya Bhiblia. Vamwani ava hi va txhumayelako va tekela kutumela gondo ya Bhiblia. Ngu txikombiso, ngu wazina wo kari dihorana do kari da khe Canadá di tshuketete txikarinyana txa mabhuku di kombela dibroxura adi di ku Hanya wutomi wo tsakisa kala kupinduka! Mwanathu wa txisikati awu a nga ti ka txikarinyana txonetxo a txhamusete dihorana dile ti to di nga va ni gondo ya Bhiblia ya mahala ngu ku thumisa dibroxura dile. Dihorana donedo di tsakete, ni ku va ningani ti numero ta telefone. Ngu minova ya kona, dihorana dile di bhalete mesaji mwanathu wule wa txisikati di txi kombela gondo ya Bhiblia. Mbimo yi mwanathu wule wa txisikati a nga womba ti to a ndi na tsula ngu magwito ka divhiki, dihorana dile di m’wotisile tiya: “Ngu kutxani u si ti mangwana? Phela ni ni mbimo.” Ngu wazixanu wa kona va khatile kugonda. Ka divhiki donedo dihorana dile di khatile kuxalela mitshangano ni ku di simamile di kula ngu didhawa da moya.

5. Nji txani txi no hi vhuna kuziva nzila ya yinene yo khata sigondo sa Bhiblia? (Wona ni mifota.)

⁵ Ti hakubasani ti to hi nga votshe va hi va txhumayelako va no kuluveta kukhata kugonda Bhiblia kufana ni dihorana diya. Vamwani va lava mbimo yo lapha kasiku ve khata kugonda Bhiblia. Hi nga khata mabhulo ni m’thu ngu mhaka ayi yi m’tsakisako. Ngako hi di ni mawonelo a manene ngu vathu ni kukombisa kukhatala ngu vona, ngu mbimo ya yidotho hi nga sikota kukhata gondo ya Bhiblia. Ngu tihi ti hi nga ti wombako mbimo yi hi ningelako gondo Bhiblia? A hi woneni ati vanathu ava va ku ni wusikoti wo khata sigondo sa Bhiblia va ti wombako.

6. Ngu tihi ati hi nga ti wombako kasiku hi vhuna m’thu e pfisisa ti to nda tinene ku e gonda Bhiblia?

⁶ Vahuweleli ni vanyaphandule va hi nga bhula navo mayelano ni kukhata sigondo sa Bhiblia va wombile ti to ka matiko mamwani ndatinene kwa mbi womba tiya: “Gondo ya Bhiblia,” mwendo ku “ni lava ku kugondisa” mbimo yi hi bhulako ni vathu mayelano ni gondo ya Bhiblia. Vona va womba ti to ndatinene kuthumisa mapswi o fana ni yawa “mabhulo,” ni “kuziva to tala mayelano ni Bhiblia.” Awe u nga simama ni mabhulo ngu kuwomba tiya: “Ta xamalisa ku wona ti to Bhiblia ya xamula siwotiso sa lisima sa wutomi,” mwendo u womba tiya, “Bhiblia hi nga dibhuku da wukhongeli basi, dona di nga hi vhuna ngu tinzila to tala.” U nga tshumela u womba tiya: “Hi na mbi swela, 10 mwendo 15 wa timeneti ta enela kasiku hi gonda timhaka to tala ta lisima.” Ndatinene kwambi kugela nyamne wa m’ti ti to ta sunga kugonda divhiki ni divhiki nguku eto ti nga mmaha e godhola.

7. I ngu mbimo muni vamwani va khatako kupfisisa ditshuri da mu ka Bhiblia? (1 Vakorinto 14:23-25)

⁷ Va rambe ti to veta mitshanganoni. Ti ti komba nga ka timbimo ta Paulo vamwani va khotwe ti to va ti mani ditshuri mbimo yi va nga xalela mitshangano ngu dikhambi do khata. (Lera 1 Vakorinto 14:23-25.) Eto ta maheka ni nyamsi. Vathu va vangi va kuluveta ve kula ngu didhawa da moya mbimo yi va khatako kuxalela mitshangano. Ngu yihi mbimo ya yinene yo hi va ramba? Dibhuku adi di ku Hanya wutomi wo tsakisa kala kupinduka! di womba-womba ngu kuramba m’thu ka gondo 10, kambe kha ha fanela ku emela ti to hi hoka ka gondo yiya kasiku hi ramba m’thu ti to e ta mitshanganoni. Ka dibhulo do khata, awe u nga ramba m’thu ku eta xalela mitshangano ngu magwito ka divhiki. I nga va ta tinene kugela m’thu eneyo msungo mhaka wa dhixkursu mwendo pontu yo kari ya lisima ayi yi no gondwa ka gondo ya Muwoneleli.

8. Ngu tihi ati hi nga gelako m’thu mbimo yi hi mrambako ti to eta mitshanganoni? (Isaya 54:13)

⁸ Mbimo yi u rambako m’thu awu a nga tsakela, mtxhamusele nzila yi mitshangano yathu yi hambanako ngu yona ni ya titxhetxhe timwani. Mbimo yi txigondiana tximwani txi nga khata kuxalela Gondo ya Muwoneleli, txi wotisile tiya mgondisi wa txona: “Ti kotekisa kutxani ku mtsimbitisi wa Muwoneleli e ziva matina a votshe?” Mgondisi a txi txhamusete ti to hotshethu dibanzani ha zama kuziva matina a votshe nga ti hi zivisako tona matina a maxaka athu. Txigondiana txi xamate ngutu nguku ka txhetxhe ya txona vathu va vangi kha va zivani ngu matina a vona. Hi nga tshumela hi txhamusela m’thu nzila yimwani ayi yi mahako mitshangano yathu yi hambana ni ya titxhetxhe timwani. (Lera Isaya 54:13.) Ka mitshangano yathu ha khozela Jehovha, ha gonda ngu ngene ni ku kuzetana. (Vaheb. 2:12; 10:24, 25) Mitshangano yathu hi yi maha ngu nzila ya organizadhu kasi ku hi vhuna ku hi gonda ni ku kha ku na sihena. (1 Vak. 14:40) A ha hi ñolelako kona mitshangano wukhalo wo ta hi hehukela ku hi gonda. Ka mitshangano yathu kha hi bhuli ngu timhaka ta politika, nguku kha hi ti beteli ka timhaka ta ditiko diya nem kha hi gondiswi mawonelo a vathu. Mbimo yi u rambako txigondiana txako ti to txi ta mitshanganoni, i nga va tatinene kukhata ngu ku txi komba vhidhiyo ayi yi ku Ku mahwa txani Nyumbani ya Mfumo? kasiku txi ziva ati ti mahwako ka mitshangano yathu.

9-10. Mbimo yi hi rambako m’thu ku e ta mitshanganoni, hi nga maha txani kasiku e tsaniseka ti to hi mbi msinzisa ku e va Fakazi ya Jehovha? (Wona ni mfota.)

⁹ Vamwani va kana-kana kuta ka mitshangano yathu ngu kuthava to hi na va sinzisa ti to veva Tifakazi ta Jehovha. Tsanisekisa m’thu ti to athu ha ti dhunda kuamukela vapfumba ni ku kha hi va sinzise ti to ve va Tifakazi ta Jehovha. Ka mitshangano yathu votshe va amukelwa, kupata ni vanana. Kha ku na mitshangano ya vanana ni ya vathu va hombe, vaveleki va khalahatsha kumweko ni vanana vawe. Ngu nzila yoneyo, vaveleki va nga tsaniseka ti to vanana vawe va ni mani ni ku va gondiswa txani. (Dhewut. 31:12) Ka mitshangano yathu kha ku mahwi misengo. Hahanze keto, hi londisela ati Jesu a nga ti womba mbimo yi a nga khene: “Ningelani mahala nguko nanu mi si mani mahala”. (Mat. 10:8) U nga tshumela u gela txigondiana txako ti to kha ti sungi ku txi ambala simaha so dhula ngutu kasiku txi ta xalela mitshangano. Txizimu txi wona mbilu i si nga ti m’thu a nga zumbisa tona ngu hahanze.—1 Sam. 16:7.

¹⁰ Ngako m’thu a txi ta mitshanganoni mmahe e tipfa a txi amukelwa. Mu aprezentari ka madhota ni ka vahuweleli vamwani. Ngako atxi tipfa a di m’tini, eto ti na mmaha e tsakela kuwiya kambe. Ngako asi nga ni Bhiblia, mlombe yako niku mvhuni e pfisisa ati ti gondiswako.

NGAKO M’THU A TXI KHATA KUGONDA BHIBLIA

11. Hi nga ti kombisa ngu nzila muni ti to ha xonipha mbimo ya wu hi gondako nayo Bhiblia?

¹¹ Ngu tihi ati hi fanelako ku veka mapimo ka tona mbimo yi hi gondelako m’thu? Xonipha mbimo yi mi nga langana yona ni m’thu. U nga txhelwe, hoka ngu mbimo yi mi nga langana yona. Ka dikhambi do khata, mi nga sweleni mi txi gonda. Vahuweleli vamwani ava va ku ni txiperiyensiya va womba ti to ndatinene kuvhala gondo awu u m’gondelako adi ngadi ni ditora do lava kupfa timwani. U nga wombawombi ngutu, leka txigondiana txako txi ti phofula.—Mav. 10:19.

12. Ku fanete kuva txihi txikongomelo txathu mbimo yi hi khatako kugonda Bhiblia ni m’thu?

¹² Mbimo yi hi khatako kugonda ni m’thu hi lava ku m’vhuna ti to e m’ziva kwati Jehovha ni Jesu ni ku e va ni wungana wo tsana navo. Kasiku hi hokelela txikongomelo txonetxo, hi lava ku thumisa Dipswi da Txizimu hahanze ko thumisa mawonelo athu mwendo wuzivi wu hi ku nawo ngu Bhiblia. (Mith. 10:25, 26) Mpostoli Paulo a hi siyete txikombiso txa txinene ka mhaka yiya. Mbimo yi a nga ti gondisa vathu a ti veka mapimo ka Jesu awu a nga ta hamafuni kasiku ta hi vhuna hi ziva kwati Jehovha ni ku hi m’dhunda. (1 Vak. 2:1, 2) Ngu kutsimbila ka mbimo, Paulo a vhuni vanawe ti to ve wona lisima lo sakulela tifanelo ati ti fananiswako ni oru, prata ni marigwi mamwani a lisima. (1 Vak. 3:11-15) Tifanelo toneto ta tinene ti pata likholo, wutxhari, kupfisisa ni kuthava Jehovha. (Mas. 19:9, 10; Mav. 3:13-15; 1 Pedro 1:7) Etetela nzila yi Paulo a nga ti gondisa ngu yona ngu kuvhuna sigondiana sako ti to si sakulela kuva ni likholo lo tsana ni ku va ni wungana ni Jehovha.—2 Vak. 1:24.

13. Hi nga ti kombisisa kutxani ti to hi ni pasiyensiya mbimo yi hi gondisako txigondiana txathu? (2 Vakorinto 10:4, 5) (Wona ni mfota.)

¹³ Etetela nzila yi Jesu a nga ti gondisa ngu yona ngu kuva ni pasiyensiya u tshumela u pfisisa txigondiana txako. U nga txi mahi siwotiso asi si nga txi dhanisako. Ngako ku di ni mhaka yo kari ayi a zamako kumaha kutxitxa, u nga zumbeli kuwombawomba ngu yona. Hahanze ko sinzisa m’thu ti to e maha kutxitxa, mu he mbimo yo ditshuri di mila mikoloti mbiluni kwakwe. Bhiblia yi womba ti to tigondo ta makuhu ta karata ku ti dula ka timbilu ta vathu. (Joh. 16:12; Vakl. 2:6, 7) Ti nga maha ti txi karatela txigondiana txako ku txi leka kukholwa ka timhaka ti se i ku kale txi txi ti kholwa. (Lera 2 Vakorinto 10:4, 5.) Ngu toneto, zama ku txi vhuna ti to txi ziva ditshuri ni kuthemba Jehovha.—Mas. 91:9.

NZILA YO VHUNA AVA VA KHATAKO KUXALELA MITSHANGANO

14. Hi fanete kuva ñolisa kutxani avale va khatako kuxalela mitshangano?

¹⁴ Jehovha a lava ti to hi nõla votshe vathu ngu nzila ayi yi fanako ti si nga ni mhaka ni ti to va ta ngu hayi, sisiwana mwendo va ganyile. (Jak. 2:1-4, 9) Se hi nga li kombisisa kutxani lirando ka vale va khatako kuta mitshanganoni?

15-16. Hi nga va vhunisa kutxani ava va hi endelako ngu dikhambi do khata ku ve tipfa va di mtini?

¹⁵ Vamwani va ta ka mitshangano yathu ngu kulava ku wona ti to kumaheka txani mwendo ngu kuva va to rambwa ngu mwanathu mmwani. Ngako u txi wona m’thu wu a nga rambwa mitshanganoni, m’hoyozele ni kubhula nayo. Kambe mabhulo ako ma nga mmahe ti to e theleka tingana. Khalahatsha nayo, mi gonda motshe Bhiblia ni mabhuku ya hi gondako wona mitshanganoni mwendo ku mlavela dakwe dibhuku. Hahanze keto zama kupfisisa matipfelo akwe. Wamwamna mmwani awu a nga ta mitshanganoni a gete mwanathu wu a nga m’amukela ti to a txi tipfa tingana ngu nzila yi a nga ti ambate ngu yona. Mwanathu wule a gete wamwamna wule ti to athu Tifakazi ta Jehovha ha fana ni vathu vamwani. Ngu kutsimbila ka mbimo, wamwamna wule a bhabhatisilwe ni ku kha yi divali xamulo yi a nga ningwa ngu mwanathu wule. Se mbimo yi hi wombawombako ni m’thu wu a khatako kuta mitshanganoni, hi fanete kukhumbula tiya: Ha khatala ngu ngene kambe kha hi ti beteli ka wutomi wakwe.—1 Pedro 4:15.

¹⁶ Ku ni nzila yimwani ayi hi nga yi thumisako kasi kuvhuna ava va hi endelako ku ve tipfa kwati mbimo yi va ku ta xalela mitshangano. Ka mabhulo ako, makomentariyo ni madhixkursu ti lava u kombisa txixonipho mbimo yi u wombawombako ni vathu ava va si thumeliko Jehovha. Vayilela timhaka ati ti nga va khuvekisako mwendo kwa mba lava ku ta kambe mitshanganoni. (Tit. 2:8; 3:2) Ngu txikombiso, kha hi lavi kusolasola mwendo kuwombawomba kubiha ngu wukhongeli wa vamwani. (2 Vak. 6:3) Vanathu ava va vekako madhixkursu a hakubasani va fanete ku yi tekela hamsungo mhaka yiya. Vanathu vonevo, va fanete kukombisa kualakanyela mbimo yi va txhamuselako mapswi aya vathu ava va nga hi endela va si ma pfisisiko.

17. Hi nga maha txani ngako hi txi mana vathu ava va lavako kugonda ngu Jehovha?

¹⁷ Ditshiku ni ditshiku mthumo wo txhumayela ni kumaha vagondiswa wuya masoni u va wa txikuluveta ngutu. A hi simameni hi lavetela vathu ava va lavako kugonda ngu Jehovha. (Mith. 13:48) Mbimo yi hi manako vathu ava va tsakelako, hi fanete kukhata navo gondo ya Bhiblia ni ku va ramba ku ta mitshanganoni. Hi txi maha eto hi na va vhuna ku ve tsimbila ngu “nzila yi yisako wutomini.”—Mat. 7:14.