Sivangwa simwane sa moya si ti maha vakaneti

Sivangwa sotshe sa moya asi Jehovha a nga si vanga i ti sa sasinene. Kambe ngelozi yimwane yi ti mahile yo biha. Yona i Sathane Dhiabhulosi. Sathane a lavile ti to vathu ve khozela ene i singa Jehovha. Ngu toneto ti nga maheka:

Mndani ka jaradhi ya Edheni, ku ti ni mindonga ya yingi ayi yi nga ti veleka mihando yo tshamba. Jehovha a gete Adhamu ni msikati wakwe Evha ti to va nga dya mihando. Kambe ku ni mndonga wumwewo awu Txizimu txi nga va gela ti to va nga dyi mihando ya wona. Ene a ti khene va txo yi dya, ngu ditshuri va na fa.—Genesa 2:9, 16, 17.

Dimwane ditshiku Evha a ti ekha mbimo yi mnyoka wu nga wombawomba nayo. Ngu ditshuri da kona, i singa mnyoka wa wunene awu wu nga ti wombawomba; i ti Sathane Dhiabhulosi awu a nga ti maha nga mnyoka wu wombawombako. Sathane a gete Evha ti to a txo dya m’hando awu wu nga yiliswa, a ndina txhariha e fana ni Txizimu. A tshumete e womba ti to va na mbi fa. Totsheleleto i ti makuhu. Hambiketo, Evha a tumete makuhu oneyo e dya m’hando. Ngu msana ka mbimo ene a ningile wumwane mwamna wakwe, se nene edya.—Genesa 3:1-6.

Matimu awa a ditshuri ma hi gondisa ti to Sathane i mkaneti ni m’hembi. Ene a gete Evha ti to a si engisi Txizimu, kha na mbi fa. Eyo i ti makuhu. Evha ni Adhamu va fite. Kambe Sathane kha fa, hambiketo, nene ngu magwito a na fa nguko a wonhile. Kambe konkuwa wa hanya futshi aya masoni e xengetela vathu. I ngadi m’hembi, futshi a zama ti to vathu ve ndaka milawu ya Txizimu.—Joh 8:44.

Tingelozi timwane ti ti mahile vakaneti

Ngu kutsimbila ka mbimo, timwane tingelozi ti ti mahile to biha. Tingelozi eto ti woni vavasikati vo tshura ha mafuni se ti va navela ti to ti otela navo. Tona ti to ta ha mafuni se ti ambala mimidi ya nyama. Se tona ti tekile vavasikati. Atiya i ti kulwisana ni txikongomelo txa Txizimu.—Genesa 6:1, 2; Judha 6.

Totsheleleto ti vangete vathu kuxaniseka. Vasikati va tingelozi toneto va velekile vanana vo thisa ngutu. Vona va kute idi sigevenga ni ku va ni tshofu. Ngu magwito, mafu ma tate ngu wugevenga , se Jehovha e sunga kulovisa vathu vo biha ngu ndambi ya hombe. Ava va nga huluka ka ndambi yoneyo ngu va vo lulama i ku Nowa ni mwaya wakwe basi.—Genesa 6:4, 11; 7:23.

Tingelozi to biha, ti tshumelete ka txiemo txa moya; tona kha ta fa. Kambe tona ti mani txitsayiso. Tona kha ta tumelelwa kutshumelela ka mwaya wa Txizimu wa tingelozi to lulama. I si ngeto basi, Jehovha kha ti tumelela ti to ti ambala mimidi ya nyama. Kambe ngu magwito tona ti na fa ka ditshiku da wulamuli wa hombe.—2 Pedro 2:4; Judha 6.

Ku hingwa ka Sathane nzumani

Ka makhato a dilembe da va 1.900, ku ve ni yimbi nzumani. Dibhuku da diBhibhele da Mtuletelo di txhamusela ati ti nga humelela: “Se ku to wuka yimbi nzumani: Migeli [Jesu Kristu awu a nga wuswa ka vakufa] ni tingelozi takwe va lwite ni dragoni [Sathane], se dragoni yi lwite yi di ni tingelozi ta yona [to biha] hambiketo yi xutwe, se ku singa ngadi ku maneka wukhalo wa yona nzumani. Ngukonaho yi to vinzwa hahatshi dragoni ya hombe, mnyoka wa kale, awule wu dhanwako ku i Dhiabhulosi mwendo Sathane, mxengeteli wa dotshe ditiko, a vinzilwe hahatshi ha mafuni, yona ni tingelozi ta yona [to biha].”

Ngu yihi wuyelo ya kona? Dibhuku di ya masoni di txi khene: “Tsaka awe nzuma, ni motshenu mi zumbako ka yona!” Tingelozi ta tinene ti ndina tsaka nguko Sathane ni tingelozi to biha, iku mimoya, kha va nga nga di ho kambe nzumani. Kambe ku wombwa txani ngu ha mafuni? DiBhibhele di womba ti to: “Aniko mina ni dikhombo, awe mafu ni nawe linene, nguko Dhiabhulosi a txhikile kwanu a di ni txiviti ngutu, ngu kuziva ti to mbimo yakwe nja yidotho.”—Mtuletelo 12:7-9, 12.

Inna, Sathane ni vaseketeli vakwe vo biha va xengetela vathu ni ku va tisela makhombo ha mafuni. Tingelozi toneto to biha ti dhanwa ku madhimoni. Tona mbalala va Txizimu. Totshelele ti bihile.