Kuwuswa ka Jesu

Msana ka kuva Jesu a di fite, dijaha do kari do ganya ngutu adi di nga txi dhanwa ku i Josefa di tsute di ya kombela Pilato ku e di tumelela kuthavisa mmidi wa Jesu a ha ka phande. Msana ko tumelelwa, Josefa a tekile mmidi wa Jesu e wu thela mafura o bhumula e gwita e wu tombetela ngu tinguwo. Se, ene a ti ya veka mmidi wa Jesu a ha ka dithitha, e vhala ngu dirigwi da hombe. Msana keto, vathangeli va vaprista va tsute ve ya womba-womba ni Pilato va txi kha vona: ‘Athu ha thava ti to vagondiswa va Jesu veya teka mmidi wakwe dithithani ve gwita ve womba ti to a to wuswa.’ Pilato a to va gela tiya: ‘Ngu tona, tsulani mi ya vhala bhem dithithani mi gwita mi veka masotxhwa o kari me wonelela.’

Ku di pindile masiku mararu, Mariya ni vamwani vavasikati va tsute ni mixo hale ka dithitha da Jesu. Vona va ti ya wona ti to ku ti ni m’thu awu a nga di thavisile dirigwi adi di nga ti vhate dithitha dile. Mbimo yi va nga bela dithithani mule, va woni ngilozi. Ngilozi yi to kha yona: ‘Mi nga thaveni, Jesu a wusilwe. Tsulani mi ya gela vagondiswa ve tsula Galileya va na ya manana nayo kona kheya.’

Mariya Magdhala, a tutumile e ya lavetela Pedro ni Johani e va gela tiya: ‘Ku ni wu a nga teka mmidi wa Jesu dithithani.’ Pedro ni Johani va to tsula ngu kukuluveta dithithani, mbimo yi va nga hoka kheya, va ti ya wona ti to dithithani ku si nga ni txilo, ve tshumela ve tsula mtini.

Mbimo yi Mariya a nga tshumela e wuya dithithani, a ti ta wona tingilozi timbidi ti di mndani ka dithitha. Ene a ti gete ti to a si ku zivi amu mmidi wa Jesu wu nga ti kona. Se ene a to wona dijaha do kari, a njo kupimisa ti to ku ti lava i ti dijaha adi di nga txi khatalela wukhalo wule wu nga ti ni mathitha. Mariya a to di gela tiya: ‘No kombela, ni gele amu u nga veka kona mmidi wa Jesu.’ Dijaha dile di to dhana Mariya ngu ditina dakwe, se a to tekela ku ti tumbula ti to i ti Jesu, e gwita e m’bharasara.’ Jesu a rumile Mariya ku e ya gela vagondiswa ati ti nga di mahekile. Se, ene a to tsula ngu kututuma e ya gela vagondiswa ti to a woni Jesu.

Ku di pindile mbimo, vagondiswa vambidi va txiya ka wukhalo awu wu nga txi dhanwa ku i Emawusi. Se va to wona dijaha di txi va londisela ngu msana. Di gwita di va wotisa ti to va txi bhula ngu txani. Vona va to kha vona: ‘Khu tizivi? Ku pinda 3 wa masiku vathangeli va vaprista va di rumisile ti to kudawa Jesu. Konku, vamwani vavasikati va hi gete ti to Jesu wa hanya.’ Se dijaha dile di to khene: ‘Anu kha mi kholwi ka vaprofeti? Vona va wombile ti to Jesu a ndi na fa e tshumela e wuswa.’ Dijaha dile di simamile di txhamusela dipswi da Txizimu ka vagondiswa vale. Se va to tsula ve ya dya kumweko nado. Se va si se khata kudya, dijaha dile di to maha mkombelo. Ka yona mbimo yile, vagondiswa va to ti tumbula ti to i ti Jesu. Kambe a to gwita e nyamalala.

Vagondiswa vale vavambidi va to tutuma ve tsula Jerusalema ve ya kontarela ati ti nga di mahekile. Koneho, Jesu a to humelela ka nyumba ayi va nga di ka yona. Phela, kha va kholwa ti to va txo wona Jesu ngu ditshuri. Kambe Jesu a va gete tiya: ‘Wonani manza angu. Podhi mi ma gwesa. Dipswi da Txizimu se di ti wombile ti to Kristu a na fa e tshumela e wuswa.’