Jesu e tsula nzumani

Jesu a ti ya manana ni vagondiswa vakwe khe Galileya. Ene a va rumile kumaha mthumo wa lisima ngutu, atxi khene: ‘Tsulani mi ya vhuna vathu va matiko otshe ti to veva vagondiswa vangu. Vagondiseni totshe ati ni nga mi gondisa, mi tshumela mi va bhabhatisa. Ani na mi thembisa ti to ni nava ni nanu mbimo yotshe.’

Mndani ka 40 wa masiku msana ka kuva Jesu a di wusilwe, ene a humelete ka vagondiswa vavangi, Galileya ni khe Jerusalema. A gondisile vagondiswa vakwe timhaka ta lisima ngutu e tshumela e maha sidiwukiso. Jesu a gete tiya vapostoli vakwe: ‘Mi nga khukheni Jerusalema. Simamani mi emela ati Txizimu txi nga thembisa ku ti maha.’

Vapostoli kha va ti pfisisa kwati ati Jesu a nga txi lava ku ti womba. Msana keto, Jesu a ti ya manana ni vapostoli vakwe ngu dikhambi do gwita ka Mmango wa Miolivha. Vona va m’wotisile tiya: ‘Mkoma, ina awe u nava mkoma wa Israyeli?’ Kambe, Jesu ava gete tiya: ‘Ka Jehovha, kha yi se hoka mbimo ya ti to ni va Mkoma. I singa kale, anu mi na amukela moya wo sawuleka ni ku mi nava tifakazi tangu. Txhumayelani Jerusalema, Judheya ni Samariya kala ka makhalo a kule a mafu.’

Se Jesu a to khata kuguleka e kwela eya nzumani. A to fenengetwa ngu direfu, se vagondiswa vakwe va si nga di ve sikota ku m’wona.

Vagondiswa va to khukha ka Mmango wa Miolivha ve tsula Jerusalema. Mbimo yotshe, vona va txi tshangana khe Jerusalema va txi maha mikombelo ni kuemela ti to Jesu eva gela ati va nga ti fanete ku ti maha.