Miwoniso ya Johani

Mbimo yi mpostoli Johani a nga ti jele ka txitondolo txa Patmosi, ene a ve ni 16 wa miwoniso ya timhaka ati ti ndi no maheka mbimo yi yi tako. Ka miwoniso yoneyo, Jesu a kombile Johani nzila yi ditina da Jehovha di ndi no basiswa ngu yona, ati Mfumo wakwe wu ndi no tisa tona, ni ti kuranda ka Txizimu ku ndi no mahekisa tona hamafuni ni nzumani.

Ka m’woniso wo kari, Johani a woni Jehovha adi khalatshile ka txitulo txakwe txa wukoma txo phatima khe nzumani, adi randetwe ngu 24 wa madhota ma di ambate simaha so basa ni sigoko sa wukoma sa ouro. Madhota yale a 24 ma khizama me khozela Jehovha. Ka m’woniso wumwani, Johani a wona dibuthu da hombe da vathu va hamafuni kotshe va txi khozela Jehovha. Se Txinvutana txi teka vathu vonevo txi va yisa ka txisima txa mati a wutomi. Txinvutana txonetxo i Jesu. Ka m’woniso wumwani, Jesu a khata kufuma ni 24 wa madhota. Ka m’woniso wumwani, Johani a wona Jesu a txi lwa ni Dragoni ni madhimoni akwe. Dragoni eneyo i Sathani. Jesu a hinga Sathani ni madhimoni akwe nzumani eva rinza hamafuni.

Msana keto, Johani a woni m’woniso wumwani wo tshura ngutu. Ene a woni Txinvutana txi di ni ava va 144.000 va di emile ka Mmango wa Siyoni. Johani a tshumela e wona ngilozi yi txi puruma hamafuni kotshe. Ngilozi yoneyo yi gela vathu yi txi kha yona: ‘Khozelani Txizimu, txi dhumiseni.’

Ka wumwani m’woniso, Johani a wona yimbi ya Armagedhoni. Ka yimbi yoneyo, Jesu ni masotxhwa akwe valwa kumweko ni Sathani ni mifumo yakwe yotshe. Ka m’woniso wo gwita, Johani a woni kurula ni wumwewo nzumani ni hamafuni. Sathani ni votshe ava va m’seketelako va txi loviswa. Ngu magwito, votshe nzumani ni hamafuni va xonipha ditina da Jehovha ni ku mkhozela.