Jesu e ninga sakudya vathu vavangi

Dikhambi dimwani, vapostoli va wile ngu kutxhumayelani va di karate. Se Jesu ava tekile e tsula navo ka didhoropa da Bhetsayidha kasiku veya humulanyana. Vona va to bela ka ngalava ve tsula. Mbimo yi va nga di hafuhi ni kuhoka tikasani ka linene, Jesu a woni vathu vavangi ava va nga txi va londisa. Kambe Jesu a txi lava kuya humula ni vapostoli vakwe, hambiketo a vhuni vathu vale. Ene a hanyisile valwati e gwita e zumba ditshiku dotshe a txi va gondisa mahungu a manene a Mfumo wa Txizimu. Mbimo yi di nga swa, vapostoli va tsute veya gela tiya Jesu: ‘Vathu vava va pfa nzala. I tshuko u va leka ve tsula kasiku veya mana txo dya.’

Kambe, Jesu a to gela vapostoli vakwe atxi khene: ‘Mi nga va lekeni ve tsula. Va ningeni sakudya. Vapostoli va to xamala se ve wotisa Jesu va txi khona: ‘Mkoma, u lava ti to hi tsula hi ya va xavela mapawa?’ Filipi, mmweyo wa vapostoli, a to khene: ‘Hambi hi di kova ni male yayingi, hi si na kusikota kuxava mapawa o ta dyisa votshe vathu vava.’

Jesu a to va wotisa tiya: ‘Mo va ni sakudya sa mpimo muni?’ Andreya a to khene: ‘Ho va ni 5 wa mapawa ni sihakana simbidi. Se kha hi na kueneta m’thu.’ Jesu a to gela vagondiswa vakwe ti to ve m’ningeta mapawa ni sihaka sile. Ene a to gela votshe vathu ti to ve khalahatsha hahatshi, eva abanisela ngu mitxawa ya 50 ni 100. Jesu a to teka mapawa ni sihaka sile e wonetela nzumani e maha mkombelo. Ngu msana, a to ningela sakudya sile ka vapostoli kasiku ve phakisela vathu. Otshe majaha aya ma nga ti hale i ti 5.000, ku si kontwi vavasikati ni vanana. Kambe votshe va dyite ve khura. Se kasiku, sakudya si si theketwi, vapostoli va teketete sotshe asi si nga ti sate. Ku ti sate sakudya so tata 12 wa tithavangu! Txidhiwukiso txiya txi xamalisile ngutu, hi nga tona?

Vathu va tsakile ngutu aha koza ve lava ni kusawula Jesu kasiku eva mkoma wawe. Kambe, Jesu a txi tiziva to Jehovha a si se ti lava ti to ene eva mkoma. Se a to gela vathu vale ti to ve tsula. E gwita e gela vapostoli vakwe ti to ve tshawunyeta Linene la Galileya. Vapostoli va to bela amu ka ngalava, se Jesu a to kwela ekha mmangoni. Ngu kutxani? Nguku, ene a txi lava kuya maha mkombelo ka Jehovha. Hambi mbimo yi Jesu a nga di bhisi, ene atxi ti ninga mbimo yo maha mkombelo.