Jesu e hanyisa dibhofu ngu ditshiku da Sabata

Vafarisi va txi m’nyenya Jesu ni ku va txi lava tinzila to m’ñola. Vona va wombile ti to Jesu a sa fanela kuhanyisa vathu ngu ditshiku da Sabata. Kambe ngu ditshiku do kari da Sabata, Jesu a woni dijaha adi i nga ti dibhofu di txi kombela mali. Se a gete vapostoli vakwe ti to a ndi na hanyisa dijaha dile ngu kuthumisa mtamo wa Txizimu. Jesu a to teka luri lakwe e li pata ni mafu nyana a madotho e tota ka maso a dijaha dile, e gwita e di gela tiya: ‘Tsula u ya samba maso ako ka mati a Silowame.’ Dijaha dile di to maha ati Jesu a nga di gela, se di to khata kuwona.

Vathu va si kholwi ti to i ti dona dijaha dile di nga ti velekilwe i di dibhofu. Dijaha dile di to va gela tiya: ‘Ngani ni nga velekwa ni ti dibhofu.’ Se vathu va to m’wotisa ti to ti mahisile kutxani kuza e wona. Mbimo yi Dijaha dile di nga txhamusela ati ti nga di mahekile, vathu va to di teka ve tsula nado ka Vafarisi.

Dijaha dile di tiya txhamusela Vafarisi nzila yi di nga hanyiswa ngu yona ngu ditshiku dile da Sabata. Mlayo wa Txizimu wu txi womba ti to kha ngaho wu a nga ti fanete kuthuma ngu ditshiku da Sabata. Ngu toneto, Vafarisi vo kari va to khona: ‘Ngu kutxani Jesu atxi hanyisa vathu ngu ditshiku da Sabata, eto ti kombisa ti to hi nga Txizimu txi m’ningako mtamo.’ Kambe, vamwani Vafarisi va wombile ti to, Jesu a txi sikota kuhanyisa vathu ngu ku Txizimu txi nga txi m’ninga mtamo.

Se Vafarisi va to dhana vaveleki va dijaha dile, ve ta va wotisa tiya: ‘Ti mahisile kutxani kuza mwanana wanu e wona?’ Vaveleki va dijaha dile va to thava, nguku va si ti lavi kuhingwa disinagogani. Ngu toneto, vona va to khona: ‘Kha hi ti zivi. M’wotiseni mipune.’ Se Vafarisi va to tshumela ve di wotisa kambe dijaha dile ti to ngu kutxani di nga txi wona. Dijaha dile di to va xamula di txi kha dona: ‘Ani se ni mi gete ati ni nga hanyisiswa tona, kambe anu kha mi kholwi.’ Vafarisi vale va to henya ngutu ve hinga dijaha dile disinagogani.

Jesu a ti zivile totshe ati ti nga maheka, se a tsute eya womba-womba ni dijaha dile atxi khene: ‘Ina wa kholwa ka Mesiya?’ Dijaha dile di to wotisa Jesu di txi: ‘Mkoma, i mani Mesiya?’ Jesu a to khene: ‘Ani ngani Mesiya.’ Msana ko pfa tile, dijaha dile di ve ni likholo. Phela Jesu i ti m’thu wamnene, ene kha ngo hanyisa dijaha dile basi, kambe adi vhuni ti to di va ni likholo ka Mesiya.