GONDO 22
Nzila yi u nga txhumayelako ngu yona vamwani mahungu a manene
Aku u nga gonda ditshuri da mu ka Bhiblia, ti nga maha u txi pimisa tiya: ‘Votshe va fanete ve ti ziva atiya!’ Ngu ditshuri, votshe vathu ta laveka ku ve ti ziva tiya! Kambe ti nga maha u txi thava kugela vamwani ngu ti u nga ti gonda. Se, he wone nzila yi u nga xulako ngu yona kuthava koneko u txhumayela mahungu a manene ngu litsako.
1. Vathu va u va zivako u nga va bhulelisa kutxani timhaka ti se u nga ti gonda?
Vagondiswa va Jesu va wombile tiya: “Athu kha hi na kusikota kumalala ni ti hi nga ti wona, ni ti hi nga tiengisa.” (Mithumo 4:20) Vona va ti ninga ngutu lisima ditshuri, toneto ti va mahile ve lava kugela vathu vavangi ngu ha va nga kotako ngu kona. Ina nanawe u tipfisa toneto? Idi eto, ngu txixonipho lavetela mikhanjo yo bhula ni maxaka a wena ni vangana, ngu ti u nga tigonda.—Lera Vakolosa 4:6.
Tinzila timwani to khata mabhulo
Ngako u txi khata mabhulo ni dixaka da wena, u nga khata mabhulo a Bhiblia ngu kuwomba tiya: “Ku ni mhaka yo kari yo tsakisa ayi ni nga yi gonda mu ka Bhiblia divhiki diya.”
Mngana wa wena awu a lwalako mwendo a ku kukaratekani u nga m’lerela m’bhalo awu wu no mtsanisa.
Ngako vathumi kuloni va txi kuwotisa ngu ti di nga tsimbilisa tona divhiki da wena, va gele ngu ti u nga ti gonda ka gondo ya wena ya Bhiblia ni ti u nga tipfa mitshanganoni.
Komba vangana va wena site ya jw.org.
Ramba vamwani ka gondo ya wena ya Bhiblia, mwendo ku va komba nzila yo kombela gondo ya Bhiblia ka site ya jw.org.
2. Ngu kutxani i di ta tinene kutxhumayela ni dibanza?
Vagondiswa va Jesu kha va gwitela ko bhulela vathu ava va nga txi va ziva mahungu a manene dwe. Jesu ‘a va rumete ngu vambidi-vambidi, a txi va thangetisa masoni kwakwe, kuya ka yotshe miti’, ve ya txhumayela. (Luka 10:1) Malulamiselo oneyo ma ningile mkhanjo vathu vavangi wa ku, ve engisa mahungu a manene. I singa eto dwe, kutxhumayela kumweko ni vamwani, ti mahile vagondiswa ve mana litsako la hombe. (Luka 10:17) Ina nawe u nga tiemisela kutxhumayela kumweko ni dibanza?
ENGETELA WUZIVI WAKO
Wona nzila yi u nga xulako ngu yona kuthava kutxhumayela, u tshumela u mana litsako ngu kupateka ka mthumo wuwa.
3. Jehovha a na va ni nawe
Vamwani ava va lavako kutxhumayela va kanakana ngu ti to vathu va na pimisa txani ni ku va na ti amukelisa kutxani.
Ina wa thava mbimo yi u lavako kugela m’thu ngu ti u nga ti gonda? Ngu kutxani?
Xalela VHIDHIYO, mi gwita mi bhula ngu txiwotiso txi txi londiselako.
Majovhem aya u nga ma wona ka vhidhiyo, ma xulisile kutxani kuthava ka wona?
Lera Isaya 41:10, mi gwita mi bhula ngu txiwotiso txiya:
Ngako u txi thava, mkombelo wu nga kuvhunisa kutxani?
Ina u ti ti ziva?
Wungi wa va i ku Tifakazi ta Jehovha nyamsi va ti womba to kha va na mbi sikota kutxhumayela mahungu a manene. Wona txikombiso txa mwanathu wu a dhanwako ku i Sergey wa Rússia, ene a txi tipfa a si vhuni txilo, se kuwomba-womba ni vathu vamwani i ti txikarato kwakwe. Kambe ene a gwitile e khata kugonda Bhiblia. Ene a womba tiya: “Hambiku ni nga ti thava, ni khatile kubhula ni vamwani ngu ti ni nga ti ti gonda. Kambe atxi txi nga ni xamalisa ngutu, ngu ti to kuwomba-womba ni vathu vamwani ngu Bhiblia ti mahile to nanani ni tipfa ni di wa lisima. Ni ku ti tsanisile ngutu likholo la mina ka ti ni nga ti ti gonda.”
4. Vana ni txixonipho
Mbimo yi u gelako vamwani mahungu a manene, u nga pimise ngu ti u no womba dwe, kambe pimisa ni ti u no tiwombisa tona. Lera 2 Timoti 2:24 ni 1 Pedro 3:15, mi gwita mi bhula ngu siwotiso siya:
U nga ti thumisisa kutxani tindimana tiya, mbimo yi u womba-wombako ni vamwani ngu Bhiblia?
Ti nga maha maxaka ni vangana va si tumelelani ni nawe. Se u nga maha txani? Ngu tihi u si faneliko ku timaha?
Ngu tihi ati ti ndi no va tshuko, kuwomba-womba navo ngu wunene mwendo kuduketa ku va kurumeta to ve tumelelana ni nawe? Ngu kutxani?
5. Kugela vamwani mahungu a manene ta tisa litsako
Jehovha a ningile Jesu mthumo wo txhumayela mahungu a manene. Jesu a ti wu wonisa kutxani mthumo wonewo? Lera Johani 4:34, mi gwita mi bhula ngu siwotiso siya:
Kudya sakudya sa sinene si hi ninga dihanyo da dinene ni ku hi maha hi tsaka. Ngu kutxani Jesu a di wombile ti to kumaha kuranda ka Txizimu ku patako kutxhumayela mahungu a manene ti txi fana ni kudya sakudya?
Ngu lihi litsako ali u wonako to u nga li mana ngu kutxhumayela mahungu a manene?
Duketa tiya:
Ka mitshangano ya hagari ka divhiki, zama kuwona tinzila ti ti no kombiswa to khata ngu tona mabhulo.
Pimisa ku ti bhalisa kota txigondiana ka mitshangano ya hagari ka divhiki. Siavelo sa sigondiana si na kuvhuna ti to u tsaniseka mbimo yi u gelako vamwani ati u nga ti gonda.
Thumisa txienge atxi txi ku “Ngako vathu va txi khona” mwendo atxi txi ku “Ngako vamwani va txi wotisa va txi,” kasiku u trenara kuxamula vathu vale va si tumelelaniko ni ti u va gelako.
NGAKO VATHU VA TXI KHONA: “U ni gela txani?”
U nga wu thumisisa kutxani mkhanjo wuwa, kasi ku u gela m’thu mmwani ati u ti gondako ka gondo ya wena ya Bhiblia?
ATI HI NGA TI WONA
Kugela vamwani mahungu a manene ta ninga litsako, ni ku ta hehuka kupinda ti u ti pimisako.
Ngu tihi ti u nga ti gonda
Ngu kutxani hi txi gela vamwani mahungu a manene?
U nga ti mahisa kutxani toneto ngu nzila ya txithavo?
U nga kuxulisa kutxani kuthava kutxhumayela?
XOTA TIMWANI
Wona mune wa tinzila to khata ngu tona mabhulo o txhumayela mahungu a manene ngu kuthumisa dikartawu da site ya jw.org.
Txikombiso txa mabhulo o ningela Dikartawu da site ya JW.ORG (1:43)
Gonda mune wa tifanelo ati ti nga kuvhunako kutxhumayela mahungu a manene.
“Ina awe u ti emisete kuva mkukuti wa vathu?” (Muwoneleli wa Setembro wa 2020)
Wona txikombiso txa mu ka Bhiblia atxi txi kombisako to hambi hi di majovhem hi nga va ni txibindi txo txhumayela mahungu a manene.
Gonda nzila yi u nga bhulako ngu yona ngu Bhiblia ni maxaka aya ma si ziviko Jehovha.
“Nzila yo gwesa mbilu ya maxaka aya ma si ziviko Jehovha” (Muwoneleli wa 15 ka Março wa 2014)