GONDO 34
Hi nga li kombisisa kutxani lirando lathu ngu Jehovha?
Kukhukhela u nga khata kugonda Bhiblia ina u tipfa u di m’ngana wa Txizimu? Ina wa ti tsakela kusimama u kulisa wungana wako ni Txizimu? Ti di ngeto khumbula ti to mbimo yi lirando lako ngu Jehovha li kulako ene a na kuranda ngutu ni ku kukhatalela. Se awe u nga ti kombisisa kutxani ti to wa m’randa Jehovha?
1. Hi nga ti kombisisa kutxani ti to ha m’randa Jehovha?
Hi nga kombisa ti to ha m’randa Jehovha ngu ku muengisa. (Lera 1 Johani 5:3.) Ene kha sinzisi m’thu ti to e muengisa. Kambe a ninga mkhanjo mmwani ni mmwani wathu ti to e kombisa to wa muengisa mwendo nem. Ngu kutxani? Nguko Jehovha a lava ti to hi muengisa “ngu yotshe mbilu.” (Varoma 6:17) Ngu mapswi mamwani ene a lava ti to u muengisa ngu mbilu yako yotshe i singa ngu ku kurumetwa. Sienge 3 ni 4 sa dibhuku diya si na kuvhuna ti to u kombisa lirando lako ngu Jehovha ngu kuvengela ati a ti vengako ni ku maha ati a ti dhundako.
2. Ngu kutxani ti nga karatako kukombisa lirando lathu ngu Jehovha?
“Vathu vo lulama va dukwa ngu sixaniso so tala.” (Masalmo 34:19) Hotshethu hi lwa ni kwa mbi hetiseka kwathu, ni ku ti nga maha hi txi wonisana ni sikarato sa timale, wubihi ni simwani. Ngaku hi txi wonisana ni sikarato ti nga hi karatela kumaha ati Jehovha a ti lavako. Eto ti maheka nguko kumaha to biha ti nga woneka nga ngu tona ti hehukako. Kambe mbimo yi u thembekako kwakwe ni ku muengisa u kombisa ti to wa m’randa ngutu kupinda sotshe. U txi maha toneto u na kombisa ti to wa thembeka se Jehovha nene a na thembeka kwako. Ene kha na mbi thuka a di kulekile.—Lera Masalmo 4:3.
ENGETELA WUZIVI WAKO
Wona to ngu kutxani Jehovha a txi ninga lisima ku muengisa kwako, ni ku nji txani txi nga kuvhunako ti to u simama u di thembekile kwakwe.
3. Mhaka ayi nawe u patekako ka yona
Dibhuku da Jobe di kombisa ti to Sathani a lumbetile Jobe ni votshe ava va thumelako Jehovha. Lera Jobe 1:1, 6–2:10, mi gwita mi bhula ngu siwotiso siya:
Ngu kuya ngu mapswi a Sathani, ngu kutxani Jobe a nga ti engisa Jehovha?—Wona Jobe 1:9-11.
Ngu tihi ati Sathani a ti wombako ngu votshe vathu kupata ni nawe?—Wona Jobe 2:4.
Lera Jobe 27:5b, mi gwita mi bhula ngu txiwotiso txiya:
Jobe a ti kombisisile kutxani ti to a txi m’randa Jehovha ngu ditshuri?
Jobe a kombisile ti to wa m’randa Jehovha ngu kusimama a di thembekile kwakwe
Nanathu hi nga kombisa ti to ha m’randa Jehovha ngu kuthembeka kwakwe
4. Tsakisa mbilu ya Jehovha
Lera Mavingu 27:11, mi gwita mi bhula ngu siwotiso siya:
Jehovha a tipfisa kutxani ngako awe u txi maha tatinene ni ku muengisa? Ngu kutxani?
5. Awe u nga thembeka ka Jehovha
Lirando lathu ngu Jehovha li hi maha hi bhulela vamwani ngu ngene. Kuthembeka ka Jehovha ti womba ku muengisa hambi ti txi karata. Xalela VHIDHIYO, mi gwita mi bhula ngu siwotiso asi si londiselako.
Ina u alakanya ti to ta karata kubhulela vamwani ngu Jehovha?
Nga ha hi nga tiwona ka vhidhiyo, nji txani txi nga vhuna Cláudio ti to e xula kuthava aku a nga ti nako?
Ta hehuka kuva vo thembeka ka Jehovha ngako hi txi vengela ati a ti vengako ni kudhunda ati a ti dhundako. Lera Masalmo 97:10, mi gwita mi bhula ngu siwotiso siya:
U txi pimisa ngu ti u nga ti gonda, ngu tihi ati Jehovha a ti dhundako? Ngu tihi ati a ti nyenyako?
U nga gondisa kutxani kudhunda ati i ku tatinene u nyenya ati i ku to biha?
6. Kuengisa Jehovha ngu tona i ku tatinene
Kuengisa Jehovha ngu tona i ku tatinene kupinda totshe. Lera Isaya 48:17, 18, mi gwita mi bhula ngu siwotiso siya:
Ina u pimisa ti to hi nga themba ti to mbimo yotshe Jehovha wa tiziva ati i ku tatinene kwathu? Ngu kutxani?
Ati u ti gondako amu ka Bhiblia ni ngu Jehovha, ti kuvhunisile kutxani kala nyamsi?
NGAKO VATHU VA TXI KHONA: “Txizimu kha txi na mhaka ni ti ani ni ti mahako mwendo ni si ti mahiko.”
Ngu yihi ndimana ya Bhiblia ayi u nga yi thumisako kasi kukombisa ti to simaho sathu si nga tsakisa mwendo kuhenyisa Jehovha?
ATI HI NGA TI WONA
U nga kombisa ti to wa m’randa Jehovha ngu ku muengisa ni kuthembeka hambi u txi wonisana ni sikarato.
Ngu tihi ti u nga ti gonda
U gondile txani ka txikombiso txa Jobe?
U nga kombisa ngu nzila yihi ti to wa m’randa Jehovha?
Nji txani txi nga kuvhunako ti to u va wo thembeka ka Jehovha?
XOTA TIMWANI
Wona nzila yi u nga vako ngu yona wo thembeka ka Jehovha ni ka dibanza.
‘Jehovha a thembekile ka wule i ku wo thembeka kwakwe’ (16:49)
Gonda to tala ka makuhu aya Sathani a nga lumbeta vathu.
“Jobe a simamile a di thembekile” (Bhiblia—Ngu dihi didungula da yona? txienge 6)
Wona nzila yi hambi vanana va kombisako ngu yona ti to va m’randa Jehovha.
Mphya wu a kuzetelwako ngu titanga kulowe txikolwani a nga simamisa kutxani a di thembekile ka Jehovha?