Tixamulo ta siwotiso sa vagondi
Mba mani “tingilozi to sawuleka” ati ti nga wombwa ka 1 Timoti 5:21?
Mpostoli Paulo a bhalete Timoti awu nene i nga ti didhota, e m’gela tiya: “Na kulaya masoni ka Txizimu ni ka Jesu Kristu, kumweko ni ka tingelozi to sawuleka, ti to u veketa sileleto siya, u nga lamule ngu kuwona khohe ya m’thu, u nga mahe txilo ngu kulondisela wuxaka.”—1 Tim. 5:21.
Kukhata hi na bhula ngu ti to mba mani ava i si nga ku tingilozi tiya. Tona hi nga va va 144.000. Mbimo yi mpostoli Paulo a nga bhalela Timoti, ku si se khata kuwuswa ka Makristu a vasawuleki kasiku me ya hanya nzumani. Vapostoli ni vasawuleki vamwani va si se kuva sivangwa sa moya, ngu toneto ti si na kumaheka ti to ve va “tingilozi to sawuleka.”—1 Vak. 15:50-54; 1 Vat. 4:13-17; 1 Joh. 3:2.
Hahanze keto, “tingilozi to sawuleka” hi nga tingilozi ati ti nga mbi engisa ngu mbimo ya Ndambi ya Nowa. Tingilozi toneto ti seketete Sathani, ti va madhimoni ni ku valala va Jesu. (Gen. 6:2; Luka 8:30, 31; 2 Pedro 2:4) Ka mbimo ayi yi tako, tona ti na ta sungwa ti betwa ka diphala do hokoma kudingana 1000 wa malembe ni ku ngu msana ti na loviswa kumweko ni Sathani.—Judha 6; Mtu. 20:1-3, 10.
Ngu toneto, “tingilozi to sawuleka” ati Paulo a nga ti womba ti fanete kuva tingilozi ati ti thumako kumweko ni “[Jehovha] ni Jesu Kristu” nzumani ati ti nga tshumela ti wombwa ka yona vhersikulo yiya.
Ku ni magidhigidhi a tingilozi to thembeka. (Vaheb. 12:22, 23) Eto ti womba ti to Jehovha kha ti ningi siavelo asi si fanako. (Mtu. 14:17, 18) Ngu txikombiso, ka dikhambi dimwani, Jehovha a avete ngilozi yimweyo kasi ku yi lovisa 185.000 wa masotxhwa a Vasiriya. (2 Vafu. 19:35) Timwani tingilozi ti nga maha ti di amukete txiavelo txo “thavisa Mfumoni ka [Jesu] sotshe asi si mahako vathu ve onha ni va va mahako to biha.” (Mat. 13:39-41) Timwani ti nga maha ti di avetwe ku ti “sengeleta ava va nga langwa” kasi ku ve ya hanya nzumani. (Mat. 24:31) Ni ku timwani ti nga maha ti di avetwe ‘ku ti hi wonelela ka totshe tinzila tathu.’—Mas. 91:11; Mat. 18:10; wona ni Matewu 4:11; Luka 22:43.
“Tingilozi to sawuleka” ati ti nga wombwa ka 1 Timoti 5:21, ti nga maha i di tingilozi ati ti nga ti avetwe ku ya vhuna ni kukhatalela mabanza. Hi txi wonisisa kwati vhersikulo yiya, hi wona ti to Paulo a ningete sialakanyiso ka madhota mayelano ni nzila yi ma ngadi fanete kukhatalela ngu yona dibanza ni ti to dibanza di ti fanete ku va ñola ngu nzila ya txixonipho. Madhota ni ona ma fanete kukhatalela wutixamuleli wa ona, ‘ma si lamule ngu kuwona khohe, hambi kumaha txilo ngu kulondisela wuxaka,’ ni ku kha ma fanela kumaha txisungo ngu magwava. Txivangelo txa txinene atxi txi mahako ti to madhota me londisa txialakanyiso txa Paulo, ngu ti to ona ma thuma “masoni ka Txizimu ni ka Jesu Kristu, kumweko ni ka tingelozi to sawuleka.” Se ti hakubasani ti to tingilozi timwani ti avetwe kukhatalela mabanza. Timwani ati ti ti mahako ngu vhikela malanda a Txizimu, kuwonelela mthumo wo txhumayela ni kugela Jehovha ati ti ti wonako.—Mat. 18:10; Mtu. 14:6.