Tixamulo ta siwotiso sa vagondi

Mthumo wo txhumayela wu na gwita ditshiku?

JESU a wombile ti to: “Mahungu a manene a Mfumo ma na txhumayelwa hamafuni kotshe, kasiku matiko otshe me ti ziva. Ngu kona ma no hoka magwito.” (Mat. 24:14) Dipswi di di ku “magwito” ka vhersikulo yiya ni ka vhersikulo 6 kumweko ni 13, di txi hunduluxelwa ngu Txigriki i télos. Dona di kombetela magwito ka mafu yawa a Sathani ka yimbi ya Armagedhoni. (Mtu. 16:14, 16) Ngu toneto, hi na simama hi txhumayela kala hafuhi ni magwito a mafu yawa a Sathani. A yawa mapfisiselo a maphya mayelano ni mhaka yiya.

Kale hi txi pfisisa ti to hi na ema kutxhumayela mbimo yi xanisa ya hombe yi no khata, msana kova Bhabhilona wa Hombe adi lovisilwe. (Mtu. 17:3, 5, 15, 16) Hi txi kholwa ti to mbimo yi xanisa ya hombe yi no khata, Jehovha kha na mbi ngadi e ninga kambe mkhanju wo vathu ve tumela mahungu a manene. (Isaya 61:2) Hi txi tshumela hi kholwa ti to ava va no huluka ka xanisa ya hombe, ngu vale va no va va di kombisile kuthembeka kwawe ka Jehovha ku si se khata xanisa ya hombe. Hi txi pimisa ti to ava va no ta huluka ka xanisa ya hombe va txi fana ni Vajudha ava va nga huluka ka kuloviswa ka Jerusalema ngu 607 ku si se ta Kristu. Vajudha vonevo va txi khozela Jehovha ni ku va ti nyenya to biha. Ngu toneto, Jehovha se a txi ti ziva to vona va ndi na huluka ku si se loviswa Jerusalema. (Eze. 5:11; 9:4) Kambe ngu kuya ngu mapswi a Jesu ma ku ka Matewu 24:14, simahakalo siya sa simbidi sa hambana. Ti nga maha vathu va ta va ni mkhanju wo tumela mahungu a manene hafuhi ni magwito ka mafu ya wa a Sathani ka yimbi ya Armagedhoni.

Mapfisiselo a maphya a dibhuku da Matewu 24:14, ma tshumela me txitxa mapfisiselo a ya hi nga ti nawo ngu didungula da wulamuli adi di fananiswako ni maralala ka dibhuku da Mtuletelo 16:21. Wuxolisisi awu wu nga mahwa wu kombisa ti to tindimana tiya ta timbidi ta yelana. Ngu nzila muni? Xamulo hi yi mana ka nzila yi vathu va xamulako ngu yona mbimo yi hi va txhumayelako. Mpostoli Paulo a bhate ti to “ka vale va yako kuhanyiswani,” mahungu a manene i ndi nava didungula do tsakisa kufana ni “m’bhumulo wo tshamba,” kambe ka valala va Txizimu i ndi na va “m’bhumulo awu wu yisako kufani.” (2 Vak. 2:15, 16) Valala vonevo va nyenya mahungu a manene a Mfumo aya ma wombako ditshuri mayelano ni ditiko diya vona va di dhundako i ku do biha, di fumwako ngu Sathani ni di di no loviswa i singa kale.—Joh. 7:7; 1 Joh. 2:17; 5:19.

Ta tsakisa kuwona ti to dibhuku da Mtuletelo 16:21 di tshumela di womba ti to maralala ma na ta va “a hombe ngutu.” Eto ti nga maha ti txi la kuwomba ti to ka mbimo ya xanisa ya hombe, mthumo wo txhumayela wu na ta hisa ngutu aha ko vathu vavangi va na ta ziva ditina da Jehovha kupinda konku. (Eze. 39:7) Ina eto ti lava kuwomba ti to ka mbimo yoneyo ya xanisa ya hombe vathu vamwani va na ta amukela mahungu a manene ya Mfumo? Ti nga maha. Kutilava va na ta khumbula ti to kudingana malembe o tala Tifakazi ta Jehovha ti txi txhumayela ti to wukhongeli wa makuhu wu na loviswa.

Eto ti hi khumbutisa ati ti nga maheka khe Egipta msana ka 10 wa mitungu. Msana ka kuva Jehovha “a di lamute sotshe sizimu sa va Egipta, dibutho da vathu va tixaka to hambanelana,” va ti patile ni vathu va Txizimu. (Eks. 12:12, 37, 38) Ti nga maha vathu vonevo i nga ti singa Vaisrayeli va di emile ni Jehovha msana kova va di wonile ti to totshe ati Mosi a nga ti ti wombile mayelano ni 10 wa mitungu ti mahekile ngu ditshuri.

Mmwani ni mmwani awu a no ta ema ni Jehovha msana ka kuloviswa ka Bhabhilona wa Hombe, a na tava ni lungelo yo seketela vafowethu va Kristu ava va no tava va di ngadi hamafuni. (Mat. 25:34-36, 40) Ditshuri ti to mkhanju wo vathu ve lamulwa kota tinvuta wu na ta guma hafuhi ni makhato a Armagedhoni, mbimo yi vasawuleki ava va no tava va di ngadi hamafuni va no ta amukela lungelo yo tsula nzumani.

Mapfisiselo oneyo a maphya ma kombisa lirando ni wuxinji wa Jehovha. Ngu ditshuri, ene “kha ti lavi ti to ni wammweyo a txi lova, aniko a lava ti to votshe ve hunduluka.”—2 Pedro 3:9.