GONDO 40
NDANDO 111 Txivangelo txa litsako lathu
Jehovha ‘litsako lathu’
“ Ni nata kwako . . . awe Txizimu, awe u ku litsako langu.”—MAS. 43:4, NM.
TXIKONGOMELO TXA GONDO
Ngu wona ati ti nga hi pelako litsako ni ku wona ati hi nga ti mahako kasiku hi tshumela hi va ni litsako la ditshuri.
1-2. a) Vathu vo tala va tipfisa kutxani nyamsi? b) Hi na bhula ngu txani ka gondo yiya?
VATHU va vangi ka masiku athu va zama kumaha totshe ti va nga tikotako kasiku veva ni litsako. Hambiketo, va tandeka ku li mana. Vona va zumba va di karatekile ngutu ni ku va pimisa ti to txiemo txi na mbi tshukwala. Phela hambi malanda a Jehovha mbimo yimwani ma tipfa ngu nzila yiya. Aku hi hanyako ka masiku “aku gwitisa,” hi na wonisana ni sikarato asi si no hi maha hi vilela.—2 Tim. 3:1.
2 Ka gondo yiya, hi na wona ati ti nga hi pelako litsako ni ti hi nga ti mahako kasiku hi tshumela hi va vathu vo tsaka. Kukhata, hi na ziva ti to i mani Txisima txa litsako la ditshuri.
TXISIMA TXA LITSAKO LATHU
3. Mtumbuluko wu hi gondisa txani ngu Jehovha? (Wona ni mifota.)
3 Jehovha mbimo yotshe a zumba adi tsakile, ni ku ene a lava ti to nathu hi tsaka. Ngu toneto, Jehovha a hi ningile silo so tala asi si hi mahako hi tsaka. Ngu txikombiso, ha tsaka ngutu mbimo yi hi wonako planeta yathu yo tshura, mbimo yi hi wonako tikori to hambana-hambana mwendo mbimo yi hi dyako sakudya so tshamba asi hi si dhundako. Ngu ditshuri, Jehovha wa hi dhunda ni ku a lava to hi va ni litsako ka wutomi!
Txinzofwana: Image © Romi Gamit/Shutterstock; vanana va mapinguim: Vladimir Seliverstov/500px via Getty Images; Sihongwana: Rita Kochmarjova/stock.adobe.com; Sihaka simbidi: georgeclerk/E+ via Getty Images
Kusakana ka sihari kukombisa litsako la Jehovha (Wona paragrafu 3)
4. a) Ngu kutxani Jehovha atxi simama adi tsakile hambiku a wonako kuxaniseka ka vathu? b) Ngu wuhi wusikoti awu Jehovha a nga hi ninga? (Masalmo 16:11)
4 Jehovha wa kuwona kuxaniseka aku vathu va wonisanako nako. Ene wa karateka ngutu mbimo yi a wonako vathu va txi xaniseka. Hambiketo, Bhiblia yi dhana Jehovha kota “Txizimu atxi txi nga tsaka.” (1 Tim. 1:11, NM) Ngu kutxani Jehovha atxi simama adi tsakile? Nguku ene se a langile ditshiku adi a no ta gumisa kotshe kuxaniseka. Kambe hi txi nga txi emela ditshiku donedo, Jehovha wa simama e khatala ngu ngathu. Mbimo yi hi wonisanako ni kuxaniseka, ene wa hi khatalela ni ku hi vhuna. A mahisa kutxani toneto? Jehovha a hi ningile wusikoti wo hi va vathu vo tsaka. (Lera Masalmo 16:11.) Konku, he woneni ti to ngu kutxani ku ziva Jehovha ti di mahile Jesu e va ni litsako.
5-6. Ngu kutxani Jesu i di m’thu wo tsaka?
5 Jesu m’thu wu a nga tsaka ngutu kupinda votshe vathu ava Jehovha a nga va vanga. Ngu kutxani? He woneni sivangelo simbidi. Txo khata, Jesu “txifaniso txa Txizimu atxi txi si wonwiko” ni ku ene wa kombisa tifanelo ta Jehovha ngu nzila yo hetiseka. (Vakl. 1:15) Txa wumbidi, Jesu a hetile mbimo yo lapha ni Tate wakwe Jehovha, txisima txa litsako.
6 Mbimo yotshe Jesu a zumba adi tsakile nguku wa maha totshe ati Tate wakwe a mrumako. (Mav. 8:30, 31; Joh. 8:29) Ngu mhaka ya kuthembeka kwakwe, Jehovha wa tiguleta ngu ngene.—Mat. 3:17.
7. Hi nga li manisa kutxani litsako la ditshuri?
7 Nathu hi nga mana litsako ngako hi txi tshuketa hafuhi ka Jehovha txisima txa litsako. Ngako hi txi heta mbimo yo lapha hi txi gonda ngu Jehovha ni ku zama ku m’etetela, litsako lathu li naya li engeteleka. Phela kumaha kudhunda ka Jehovha ni ku ziva to wa hi amukela, eto ta hi maha hi tsaka.a (Mas. 33:12) Ditshuri ti to mbimo yimwani hi na manana ni sikarato asi si nga tekako mbimo yo koma mwendo yo lapha. Ngako u di ka txiemo txonetxo, u nga pimisi ti to Jehovha kha ngadi e ku amukela. Khumbula ti to Jehovha wa ti ziva to kha ha hetiseka, ni ku mbimo yimwani hi na wonisana ni siemo asi si no hi maha hi karateka. (Mas. 103:14) Konku, he bhuleni ngu siemo asi si nga hi pelako litsako ni ti hi nga ti mahako kasiku hi tshumela hi va ni litsako.
U NGA TUMELELI TXILO TXI KUPELA LITSAKO
8. Hi tipfisa kutxani mbimo yi hi wonisanako ni sikarato?
8 Mbimo yi hi wonisanako ni sikarato. Ina awe u wonisana ni ku wukelwa ngu mhaka ya likholo lako, tiphango ta mtumbunuko, wusiwana, malwati mwendo kukumba? Sikarato siya si nga hi maha hi karateka, si hi pela litsako lathu ngutu-ngutu ngako hi si ti zivi to hi nga maha txani kasiku hi si xula. Bhiblia yi womba ti to athu hi nga karateka hi pimisa ti to kha hi na mbi thuka hi va ni litsako kambe. (Mav. 15:13) Babis, didhota adi di nga felwa ngu mkoma wa dona kumweko ni vaveleki va dona mndani ka 4 wa malembe di womba tiya: “Ni txi tipfa ni di nokha ni kupimisa ti to kha ngaho wu a nga sikotako ku ni vhuna. Mbimo yimwani na karateka ngutu ngu kupimisa ti to mbimo yi vaveleki vangu ni mkoma wangu va nga si se fa, ani ni ti zumba ni di ñolekile aha ko ni si nga ni mbimo ya yingi yo va pfuxela.” Ngu ditshuri, sikarato sa wutomi si nga hi maha hi zumba hi di karatekile ngutu.
9. Nji txani txi no hi vhuna ku hi tshumela hi va ni litsako? (Jeremiya 29:4-7, 10)
9 Hi nga maha txani kasiku hi tshumela hi mana litsako? Hi nga tshumela hi mana litsako ngu kutumela txiemo txi hi ku ka txona ni kubonga si hi ku naso konku. Vathu vo tala va womba ti to hi ngo va ni litsako dwe ngaku hi si nga ni sikarato. Kambe eto makuhu. Ngu txikombiso, Jehovha a gete vathu vakwe ava va nga ti tekilwe ve yiswa wukhumbini akhe Bhabhilona ti to ve maha totshe ti va nga tikotako kasiku ve londola wutomi va di kona kheya Bhabhilona hambi va txi wonisana ni sikarato. (Lera Jeremiya 29:4-7, 10.) Hi gonda txani? Zama kuwona ta tinene ka wutomi wako ni ku kombisa kubonga ngu si u ku naso. Khumbula ti to Jehovha kha na mbi kuleka wekha ene a na kuvhuna. (Mas. 63:7; 146:5) Wona txikombiso txa mwanathu Effie. Ene wa bonga ngu txivhuno txi Jehovha a nga mninga. Ene a dawisilwe ka asidhenti aha koza a si tikoti kutsimbila. Ene a womba tiya: “Jehovha, mwaya wangu ni vanathu dibanzani va ni vhuni ni ku ni tsanisa. Ani ni lava kukombisa kubonga ngu totshe ati va nga ni mahela. Se ni maha totshe ati ni nga ti kotako kasiku ni zumba ni di tsakile.”
10. Ngu kutxani hi nga simamako hi di tsakile hambi hi txi wonisana ni sikarato?
10 Hambi i di ti to athu mwendo mwaya wathu hi wonisana ni sikarato so tala, hi nga sikota kusimama hi di tsakile.b (Mas. 126:5) Ngu kutxani? Nguku litsako lathu kha li dhependerwi ngu siemo si hi tshanganako naso. Mwanathu Maria, awu i ku nyaphandule a womba tiya: “Mbimo yi hi wonisanako ni sikarato hi nga simama hi di tsakile ngu kukhumbula totshe ati Jehovha a hi thembisako tona. Kambe eto kha ti lavi kuwomba ti to hi na mbi karateka mwendo kudila ngu mhaka ya sikarato sathu. Kambe, Tate wathu Jehovha a nga hi vhuna ti to hi simama hi di tsakile ti si nga ni mhaka ni sikarato si hi wonisanako naso.” Khumbula tiya, hambi i di ti to sikarato sako nza hombe ngutu, ditshiku dimwani si na pinda. I si nga kale Jehovha a na ta fuvisa kotshe kuxaniseka aku hi wonisanako nako.
11. Txikombiso txa mpostoli Paulo txi hi tsanisa ngu nzila muni?
11 Mbimo yimwani hi nga khata kupimisa ti to hi humelelwa ngu sikarato nguku Jehovha asi hi amukeliko. Ngako u txi tipfa ngu nzila yiya, ndatinene kupimisa ngu malanda o thembeka a Jehovha aya ni wona ma nga wonisana ni siemo so karata. Wona txikombiso txa mpostoli Paulo. Ene a sawutwe ngu Jesu ti to eya gondisa ditshuri “ka vamatiko, ka vakoma ni ka vanana va Israyeli.” (Mith. 9:15) Phela eyo i ti lungelo ya hombe. Hambiketo, Paulo a wonisanile ni sikarato so tala ka wutomi wakwe. (2 Vak. 11:23-27) Ina Paulo a khatile kupimisa ti to Jehovha kha nga ngadi e mu amukela ngu mhaka ya sikarato soneso? Ahim-him! Phela Paulo a sikoti kutsanisela sikarato soneso nguku katekiswa ngu Jehovha. (Var. 5:3-5) Konku, pimisa ngu sikarato si u wonisanako naso. Awe wa simama u di thembekile ka Jehovha ti si nga ni mhaka ni sikarato soneso. Ngu toneto, tsaniseka to Jehovha wa ku amukela.
12. Ku nga maheka txani ngako hi txo tandeka kumaha ati hi nga txi ti lava ka mthumo wa Jehovha?
12 Ngaku hi txi tandeka kumaha ati hi nga txi tilava ka mthumo wa Jehovha. (Mav. 13:12) Athu ha m’dhunda Jehovha ni ku ha m’bonga ngu totshe ati a hi mahelako. Ngu toneto, hi maha ti hi nga tikotako kasiku hi maha to engeteleka ka mthumo wakwe. Kambe ngaku hi txi tandeka kumaha ati hi nga ti ti navela ka mthumo wa Jehovha, hi nga godhola. (Mav. 17:22) Mwanathu Holly awu i ku nyaphandule a womba tiya: “Na ti navela kuya ka txikolwa txa vatxhumayeli va Mfumo, kuya thuma ka ditiko dimwani mwendo kuvhuneta ko aka Bhetele ya Ramapo khe Estados Unidos. Kambe siemo sangu si txitxile ni ku na mbi sikota kuhokelela makungo oneyo. Eto ti ni mahile ni pandiseka. Phela ta panda kutandeka kumaha ati u nga ti ti navela.” Malanda a mangi a Jehovha ni ona ma tipfa ngu nzila yiya mbimo yi ma tandekako kumaha ati ma nga ti ti navela.
13. Hi nga maha txani ngako hi txo tandeka kumaha ati hi nga txi ti lava ka mthumo wa Jehovha?
13 Hi nga maha txani kasiku hi tshumela hi mana litsako? Khumbula ti to Jehovha kha hi sinzisi kumaha to kari nem kha hi kombeli kumaha ati hi no mbi sikota ku ti maha. Ene wa hi ninga lisima ka ti hi tikotako ku mmahela. Jehovha a lava ti to hi va vathu vo tiveka hahatshi ni vo thembeka. (Mik. 6:8; 1 Vak. 4:2) Ene wa khatala ngutu ngu matipfelo athu, tifanelo tathu ni mapimiselo athu kupinda ati hi kotako ku ti maha. Ngu toneto, kha ha fanela kukarateka ngako hi txi tandeka kumaha ati hi nga txi ti navela.c Hahanze ko zumbela kukarateka ngu ti u tandekako ku ti maha, zama kuveka mapimo ka ti u kotako kumaha. Ngu txikombiso, zama kutrenara majovhem mwendo kutsanisa vanathu ava va nga kumba. U nga tshumela u ti vekela makungo o tsanisa vanathu vamwani ngu ku va endela, ku va fonela mwendo ku va bhalela mensaji. Jehovha wa tsaka ngutu ngaku u txi maha ati u tikotako ni ku a na kuhakela. A na kuvhuna, e kukatekisa ni ku kuninga litsako! Ni ku u nga divali kambe ti to ka mafu a maphya hi na ta maha ti hi no ti lava ka mthumo wa Jehovha. Mwanathu Holly, awu se hi nga womba-womba ngu ngene a womba tiya: “Mbimo yi ni khatako kukarateka na ema ni pimisa ngu ku ta hanya ngu ha ku si gumiko, ni txi maha totshe ati ni no ta ti tsakela ka mthumo wa Jehovha.”
14. Nji txani tximwani atxi txi nga hi pelako litsako?
14 Ngaku hi txi themba ti to male yi nga hi ninga litsako. Ka ma redes sociais ha wona vathu va ti kombako nga va tsakile ngu ku va ku ni tithomba ta tingi. Hi nga khata kupimisa ti to kumaha ti hi ti lavako, hi xava si hi si lavako, hi enda hi ya mu hi ku lavako, ngu tona ti nga hi ti selako litsako la ditshuri. Ditshuri ti to kha ta biha kumaha ti hi ti dhundako. Jehovha a lava ti to hi tidila ngu silo so tshura asi a nga si vanga. Kambe vathu va vangi ava va nga zama kumaha totshe ati va nga ti kotako kasiku ve ti tsakisa, ngu kutsimbila ka mbimo va ti pfisisile ti to kumaha toneto kha ta va ninga litsako la ditshuri. Mwanathu Eva awu i ku nyaphandule a womba tiya: “Phela u txo zumbela kupimisa dwe ngu ti u nga ti mahako kasiku u ti tsakisa, awe khu na mbi eneliseka.” Kuzumbela kukarateka ngu kulava male ni tithomba ti nga hi pela litsako lathu.
15. Hi gonda txani ka txikombiso txa mkoma Solomoni?
15 Hi nga gonda txo kari ka Mkoma Solomoni. Ene a mahile timhaka ta tingi atxi pimisa ti to ti na mninga litsako. Ngu txikombiso, ene a dyite sakudya so hambana-hambana, a engisete wutxenje wo tshamba, a xavile silo sa singi so dhula, kambe toneto kha ta mninga litsako la ditshuri. Solomoni a wombile tiya: “Maso kha ma kolwi ngu kuwona, hambi tinzeve kha ti kolwi ngu kuengisa.” (Ekl. 1:8; 2:1-11) Vathu va vangi va pimisa ti to kuva ni male yo tala ni ku maha ti va ti lavako, ti na va ninga litsako. Kambe vo ti dyela dikanju ha mmidi, kuva ni male yo tala ni ku maha ti hi ti lavako ti nge hi tiseli litsako la ditshuri.
16. I ngu nzila muni kuvhuna vamwani ti no hi maha hi tsaka? (Wona ni mifota.)
16 Hi nga maha txani kasiku hi tshumela hi mana litsako? Jesu a hi gondisile ti to “kuha ka ninga ngutu litsako kupinda kuhiwa.” (Mith. 20:35) Didhota adi di dhanwako ku i Alekos di womba tiya: “Na zama kuvhuna vanathu ngu ku va mahela timhaka ta tidotho. Kuvhuna vamwani ta ni vhuna kuvayilela kuzumbela kupimisa ngu ti ani ni ti lavako, se eto ta ni maha ni va ni litsako.” Ngu tihi ti u nga ti mahelako vamwani? Ngako u txi wona m’thu wu a nga karateka, zama ku m’tsanisa. Ti nga maha u si tikoti kululamisa txikarato txa m’thu eneyo, kambe awe u nga m’tsanisa ngu kubhula nayo, u mkomba wumbilu ni ku mkhumbutisa ti to e gela Jehovha sotshe sikarato sakwe. (Mas. 55:22; 68:19) Tshumela u m’vhuna e pfisisa to Jehovha kha mleka. (Mas. 37:28; Isaya 59:1) Ku ni timwani ati u nga ti mahako. Ngu txikombiso, u nga ya m’bhikela mndiwo ni ku m’teka mi pasiyara. Mrambe ti to mi ya kutxhumayelani kumweko. Phela kugela vamwani mahungu a manene ta hi tisela litsako. Tumelela Jehovha ti to e kuthumisa kasi kutsanisa vamwani. Kuheta mbimo yo tala hi txi zama kuvhuna vamwani ti na hi tisela litsako la ditshuri!—Mav. 11:25.
Hahanze ko veka mapimo ka silaveko sako, veka mapimo ko vhuna vamwani (Wona paragrafu 16)d
17. Nji txani txi hi fanelako ku txi maha ngako hi txi lava kuva ni litsako la ditshuri? (Masalmo 43:4)
17 Hi nga va ni litsako ngaku hi txo simama hi tshuketa hafuhi ni Tate wathu wa nzumani Jehovha. Bhiblia ya hi tsanisekisa ti to Jehovha “litsako lathu.” (Lera Masalmo 43:4.) Ngu toneto, ti si nga ni mhaka ni sikarato asi hi tshanganako naso, athu hi nga tipfa hi di vhikelekile. Ngako Jehovha i di mngana wathu wa hombe, ene a na hi vhuna ku mbimo yotshe hi va ni litsako.—Mas. 144:15.
NDANDO 155 Litsako lo mbi guma
a Wona dikwadru adi di ku “Themba Jehovha kasiku u va ni litsako.”
b Ngu txikombiso, wona entrevhixta ya mwanathu Dennis ni Irina Christensen ka Madungula a Mmidi wu wu Fumako a 2023 #5 ka site ya jw.org.
c Kasiku u mana to engeteleta, wona msungo mhaka awu wu ku “Tivekele Tipakani Leti U Nga Ta Ti Fikelela U Tlhela U Tsaka” ka Muwoneleli wa 15 ka Julho wa 2008 ngu txitsonga.
d TXHAMUSELO YA MFOTA: Mwanathu wa txisikati a tsula txitolo e ya xava asi a nga txi si lava, kambe a mana litsako ngu kuva a di xavete mafilori mwanathu wa txisikati awu a nga kumba, awu a lavako kuthavelelwa.