Salmo

99 Si Jehova nahimong hari.+ Papanguroga ang mga katawhan.+

Siya nagalingkod ibabaw sa mga kerubin.+ Pakuroga ang yuta.+

 2 Si Jehova maoy dako sa Zion,+

Ug siya maoy hataas sa tanang mga katawhan.+

 3 Ipadayeg kanila ang imong ngalan.+

Kini dako ug makalilisang, kini balaan.+

 4 Ug uban sa kusog sa usa ka hari ang paghukom iyang gihigugma.+

Ikaw lig-on nga nagtukod sa katul-id.+

Ikaw nagpatuman sa paghukom ug sa pagkamatarong diha kang Jacob.+

 5 Bayawa si Jehova nga atong Diyos+ ug yukbo kamo didto sa tumbanan sa iyang tiil;+

Siya maoy balaan.+

 6 Si Moises ug si Aaron maoy lakip sa iyang mga saserdote,+

Ug si Samuel usa sa mga nagatawag sa iyang ngalan.+

Sila nagtawag kang Jehova, ug siya kanunayng nagtubag kanila.+

 7 Diha sa haligi nga panganod siya nagpadayon sa pagpakigsulti kanila.+

Sila nagtuman sa iyang mga pahinumdom ug sa regulasyon nga iyang gihatag kanila.+

 8 Oh Jehova nga among Diyos, ikaw mitubag kanila.+

Ikaw maoy usa ka Diyos nga nagpasaylo kanila,+

Ug nagpahamtang ug panimalos batok sa ilang makauulaw nga mga buhat.+

 9 Bayawa si Jehova nga atong Diyos+

Ug yukbo kamo sa iyang balaang bukid.+

Kay balaan si Jehova nga atong Diyos.+