1 Samuel
11 Ug si Nahas nga Ammonhanon+ mitungas ug nagkampo batok sa Jabes+ didto sa Gilead. Niana ang tanang taga-Jabes miingon kang Nahas: “Paghimo ug pakigsaad uban kanamo aron kami mag-alagad kanimo.”+ 2 Unya si Nahas nga Ammonhanon miingon kanila: “Niini nga kondisyon maghimo ako ug pakigsaad uban kaninyo, sa kondisyon nga luskon+ ang tanan ninyong tuo nga mata, ug ibutang ko kini nga kaulawan ibabaw sa tibuok Israel.”+ 3 Sa baylo ang mga ansiyano sa Jabes miingon kaniya: “Hatagi kamig pito ka adlaw, ug magpadala kamig mga mensahero ngadto sa tibuok teritoryo sa Israel ug, kon walay manluluwas+ kanamo, manganhi kami kanimo.” 4 Unya ang mga mensahero miabot sa Gibea+ ni Saul ug misulti sa mga pulong diha sa mga igdulungog sa katawhan, ug ang tibuok katawhan nagpatugbaw sa ilang tingog ug nanghilak.+
5 Apan ania, si Saul nahiabot nga nagsunod sa mga baka gikan sa uma, ug si Saul miingon: “Unsay nahitabo sa katawhan, nga sila nanghilak man?” Ug ilang gisugid kaniya ang mga pulong sa mga taga-Jabes. 6 Ug ang espiritu+ ni Jehova milihok diha kang Saul sa pagkadungog niya niining mga pulonga, ug misilaob ang iyang kasuko.+ 7 Busa mikuha siyag usa ka parisan sa torong baka ug gihiwahiwa kini ug gipadala ngadto sa tibuok teritoryo sa Israel+ pinaagi sa kamot sa mga mensahero, nga nag-ingon: “Bisan kinsa kanato nga dili mogula ingong sumusunod ni Saul ug ni Samuel, ingon niini ang buhaton ngadto sa iyang baka!”+ Ug ang kalisang+ kang Jehova+ miabot sa katawhan mao nga migula sila ingon sa usa ka tawo.+ 8 Unya iyang giihap+ sila didto sa Bezek, ug ang mga anak sa Israel mikabat ug tulo ka gatos ka libo, ug ang mga tawo sa Juda katloan ka libo. 9 Karon sila miingon sa nangabot nga mga mensahero: “Kini ang inyong isulti sa mga taga-Jabes didto sa Gilead, ‘Ugma moabot ang kaluwasan alang kaninyo inig-init sa adlaw.’”+ Ug ang mga mensahero nangabot ug gisultihan ang mga taga-Jabes, ug sila nagmaya pag-ayo. 10 Busa ang mga taga-Jabes miingon: “Ugma mogula kami nganha kaninyo, ug buhaton ninyo kanamo ang sumala sa tanan nga maayo sa inyong mga mata.”+
11 Ug nahitabo sa pagkasunod adlaw nga gibahin ni Saul+ ang katawhan sa tulo ka pundok;+ ug sila miadto sa taliwala sa kampo sa panahon sa pagbantay sa kabuntagon+ ug ilang gipamatay ang mga Ammonhanon+ hangtod sa pag-init sa adlaw. Sa dihang may pipila nga nahibilin, sila gipatibulaag ug walay nahibilin kanila nga duruha nga nagkuyog.+ 12 Ug ang katawhan miingon kang Samuel: “Kinsa ba ang nag-ingon, ‘Si Saul—maghari ba diay siya kanato?’+ Itugyan ang maong mga tawo, aron sila among patyon.”+ 13 Apan, si Saul miingon: “Walay tawo nga patyon niining adlawa,+ tungod kay niining adlawa si Jehova naghimo ug kaluwasan sa Israel.”+
14 Sa ulahi si Samuel miingon sa katawhan: “Umari kamo ug mangadto kita sa Gilgal+ aron didto atong bag-ohon ang pagkahari.”+ 15 Busa ang tibuok katawhan miadto sa Gilgal, ug didto ilang gihimong hari si Saul sa atubangan ni Jehova sa Gilgal. Unya gihalad nila didto ang mga halad-sa-panag-ambit sa atubangan ni Jehova,+ ug didto si Saul ug ang tanang katawhan sa Israel nagpadayon sa pagmaya sa hilabihan.+