Ecclesiastes
3 Dunay gitakdang panahon alang sa tanang butang,
Panahon alang sa matag kalihokan ilalom sa kalangitan:
2 Panahon sa pagkatawo ug panahon sa pagkamatay;
Panahon sa pagtanom ug panahon sa pag-ibot sa gitanom;
3 Panahon sa pagpatay ug panahon sa pag-ayo;
Panahon sa paglumpag ug panahon sa pagtukod;
4 Panahon sa paghilak ug panahon sa pagkatawa;
Panahon sa pagminatay ug panahon sa pagsayaw;*
5 Panahon sa paglabay ug mga bato ug panahon sa pagtigom ug mga bato;
Panahon sa paggakos ug panahon nga molikay sa paggakos;
6 Panahon sa pagpangita ug panahon nga mohunong sa pagpangita;
Panahon sa pagtipig ug panahon sa paglabay;
7 Panahon sa paggisi+ ug panahon sa pagtahi;
Panahon sa paghilom+ ug panahon sa pagsulti;+
8 Panahon sa paghigugma ug panahon sa pagdumot;+
Panahon sa gubat ug panahon sa pakigdait.
9 Unsa may makuha sa usa nga nagtrabaho gikan sa tanan niyang paghago?+ 10 Nakita nako ang buluhaton nga gihatag sa Diyos ngadto sa mga anak sa mga tawo aron sila mapuliki. 11 Gihimo niyang matahom* ang tanang butang sa hustong panahon niini.+ Gibutang pa gani niya ang walay kataposan diha sa ilang kasingkasing; apan dili gayod matugkad sa tawo ang mga buhat sa matuod nga Diyos sukad sa sinugdan hangtod sa kataposan.
12 Nakahinapos ko nga wala nay mas maayo alang kanila kay sa paglipay ug pagbuhat ug maayo samtang buhi pa sila,+ 13 ug nga ang matag usa mokaon ug moinom ug malipay sa tanan niyang paghago. Kini ang gasa sa Diyos.+
14 Nasayran nako nga ang tanang buhaton sa matuod nga Diyos magpabilin hangtod sa hangtod. Wala nay idugang niini o kuhaon gikan niini. Ingon niini ang gihimo sa matuod nga Diyos, aron ang katawhan mahadlok kaniya.+
15 Kon unsay nagakahitabo, nahitabo na kaniadto, ug kon unsay moabot, miabot na;+ apan ginapangita sa matuod nga Diyos ang ginapangagpas.*
16 Nakita usab nako kini ilalom sa adlaw: Sa dapit sa hustisya dihay pagkadaotan, ug sa dapit sa pagkamatarong dihay pagkadaotan.+ 17 Busa miingon ko sa akong kasingkasing: “Ang matuod nga Diyos maghukom sa matarong ug sa daotan,+ kay dunay panahon alang sa matag buluhaton ug sa matag kalihokan.”
18 Miingon usab ko sa akong kasingkasing labot sa mga anak sa mga tawo nga sila sulayan sa matuod nga Diyos ug iyang ipakita kanila nga sila samag mga mananap, 19 kay managsama ang dangatan sa mga tawo ug sa mga mananap.+ Ingon nga ang mananap mamatay, mamatay usab ang tawo; ug silang tanan dunay usa lang ka espiritu.*+ Busa ang tawo dili labaw sa mga mananap, kay ang tanan kawang. 20 Ang tanan mangadto sa samang dapit.+ Silang tanan gikan sa abog,+ ug silang tanan mobalik sa abog.+ 21 Kinsa ba gyoy nasayod kon ang espiritu sa mga tawo mosaka ug kon ang espiritu sa mga mananap manaog?+ 22 Ug nakita nako nga wala nay mas maayo alang sa tawo kay sa malipay sa iyang buluhaton,+ kay kana ang iyang ganti;* kay kinsay makapakita kaniya sa kon unsay mahitabo dihang mawala na siya?+