Deuteronomio
8 “Paneguroa nga matuman ninyo ang matag sugo nga akong gihatag kaninyo karon, aron kamo magpadayong buhi,+ modaghan, ug makasulod ug makapanag-iya sa yuta nga gipanumpa ni Jehova sa inyong mga katigulangan.+ 2 Hinumdomi ang taas nga dalan nga gipasubay ni Jehova nga inyong Diyos kaninyo sulod sa 40 ka tuig sa kamingawan,+ aron sa pagpaubos kaninyo ug sa pagsulay+ kon unsay naa sa inyong kasingkasing,+ kon motuman ba mo sa iyang mga sugo o dili. 3 Busa gipaubos mo niya ug gipagutman+ ug gipakaog mana,+ pagkaon nga wala ninyo mailhi o sa inyong mga amahan, aron mahibalo mo nga ang tawo dili mabuhi sa tinapay lang kondili sa matag pulong nga mogula sa baba ni Jehova.+ 4 Wala madunot ang inyong gisul-ob nga mga besti, ug wala pod manghubag ang inyong mga tiil sulod niining 40 ka tuig.+ 5 Nahibalo gyod mo nga parehas sa amahan nga nagdisiplina sa iyang anak, gidisiplina pod mo ni Jehova nga inyong Diyos.+
6 “Karon tumana gyod ang mga sugo ni Jehova nga inyong Diyos pinaagi sa pagsubay sa iyang mga dalan ug sa pagkahadlok kaniya. 7 Kay dad-on mo ni Jehova nga inyong Diyos sa maayong yuta,+ usa ka yuta nga daghag sapa,* mga tubod nga nagaagos sa kapatagan ug sa kabukiran, 8 usa ka yuta nga daghag trigo ug sebada, ubasan, igos, granada,+ lana nga olibo, ug dugos,+ 9 usa ka yuta nga abundag pagkaon ug dili mo makulangan ug bisan unsa, usa ka yuta diin ang mga bato naay puthaw ug magmina mog tumbaga* sa mga bukid niini.
10 “Dihang makakaon na mo ug mabusog, dayega si Jehova nga inyong Diyos tungod sa maayong yuta nga iyang gihatag ninyo.+ 11 Pagbantay kay basig malimot mo kang Jehova nga inyong Diyos pinaagi sa dili pagtuman sa iyang mga sugo, hudisyal nga mga hukom, ug mga lagda nga akong gihatag kaninyo karon. 12 Dihang mokaon mo ug mabusog ug magtukod ug nindot nga mga balay ug mopuyo niana,+ 13 dihang ang inyong mga baka, karnero, plata, ug bulawan modaghan ug ang tanan ninyong gipanag-iya managhan, 14 ayawg pasagdi nga mahimong mapahitas-on ang inyong kasingkasing+ nga tungod niini malimot mo kang Jehova nga inyong Diyos, nga nagpagawas ninyo sa Ehipto diin mo giulipon,+ 15 kinsa nagpalakaw ninyo sa dako ug makalilisang nga kamingawan,+ diin naay lala nga mga bitin, mga tanga, ug uga kaayong yuta nga walay tubig. Nagpagawas siyag tubig gikan sa bato+ 16 ug gipakaon mog mana+ sa kamingawan, pagkaon nga wala mailhi sa inyong mga amahan, aron ipaubos mo+ ug sulayan aron makabenepisyo mo sa umaabot.+ 17 Kon moingon mo sa inyong kasingkasing, ‘Nakabaton ko ani nga bahandi tungod sa akong gahom ug kusog,’+ 18 hinumdomi nga si Jehova nga inyong Diyos ang naghatag ninyog gahom aron makabatog bahandi,+ aron tumanon ang iyang pakigsaad nga iyang gipanumpa sa inyong mga katigulangan, parehas sa iyang gibuhat karon.+
19 “Kon kalimtan gyod ninyo si Jehova nga inyong Diyos ug mosunod mo sa ubang mga diyos ug moalagad ug moyukbo nila, pasidan-an ta mo nga malaglag gyod mo.+ 20 Kon giunsa paglaglag ni Jehova sa inyong atubangan ang mga nasod, ingon ana pod ang iyang buhaton kaninyo, kay wala mo maminaw sa tingog ni Jehova nga inyong Diyos.+