Deuteronomio

1 Kini ang giingon ni Moises sa tibuok Israel sa rehiyon sa Jordan didto sa kamingawan, sa desyertong kapatagan atbang sa Sup, taliwala sa Paran, Topel, Laban, Hazerot, ug Dizahab. 2 (Onse ka adlaw ang panaw gikan sa Horeb paingon sa Kades-barnea+ agi sa Bukid sa Seir.) 3 Sa ika-40 ka tuig,+ sa ika-11 nga bulan, sa unang adlaw niini, gisulti ni Moises ang tanang gisugo ni Jehova kaniya nga isulti ngadto sa mga Israelinhon.* 4 Gisulti niya kini human niya mapildi si Sihon+ nga hari sa mga Amorihanon, nga nagpuyo sa Hesbon, ug si Og+ nga hari sa Basan, nga nagpuyo sa Astarot, sa Edrei.+ 5 Gipatin-aw ni Moises ang Balaod+ didto sa rehiyon sa Jordan sa yuta sa Moab, nga nag-ingon:

6 “Didto sa Horeb giingnan ta ni Jehova nga atong Diyos, ‘Dugaydugay na mong nagpuyo niini nga kabukiran.+ 7 Pangadto mo sa kabukiran sa mga Amorihanon+ ug sa tanang silingang rehiyon niini: ang Araba,+ ang kabukiran, ang Sepela, ang Negeb, ug ang rehiyon nga duol sa baybayon.+ Pangadto mo niining mga lugara nga iya sa mga Canaanhon, hangtod sa Lebanon*+ ug sa dakong suba, ang suba sa Euprates.+ 8 Ania, akong gihatag kaninyo kining yutaa. Sudla ug panag-iyaha ang yuta nga gisaad ni Jehova sa inyong mga amahan, kang Abraham, Isaac,+ ug Jacob,+ nga ihatag kanila ug sa ilang mga kaliwat.’*+

9 “Ug giingnan ta mo niadtong panahona, ‘Dili nako kaya nga ako ray manguna ninyo.+ 10 Gipadaghan mo ni Jehova nga inyong Diyos, ug karon parehas na mo ka daghan sa mga bituon sa langit.+ 11 Hinaot si Jehova, ang Diyos sa inyong katigulangan, magpadaghan kaninyo+ ug usa ka libo ka pilo kay sa inyong gidaghanon karon, ug hinaot nga panalanginan mo niya sumala sa iyang gisaad kaninyo.+ 12 Kon ako ra, unsaon man nako pag-abaga sa kabug-at sa inyong mga problema ug mga reklamo?+ 13 Pagpilig maalamon, maayog pagsabot, ug eksperyensiyadong mga lalaki sa inyong mga tribo kay himoon nako silang mga pangulo ninyo.’+ 14 Miingon mo nako, ‘Maayo ang imong giingon nga buhaton namo.’ 15 Busa gikuha nako ang mga pangulo sa inyong mga tribo, mga maalamon ug eksperyensiyado, ug gihimo silang mga pangulo sa kada 1,000, pangulo sa kada 100, pangulo sa kada 50, pangulo sa kada 10, ug mga opisyal sa inyong mga tribo.+

16 “Niadtong panahona gisugo nako ang inyong mga maghuhukom, ‘Kon naa moy husayon nga kaso sa inyong mga igsoon, kinahanglang matarong ang inyong paghukom+ tali sa usa ka tawo ug sa iyang igsoon o sa langyaw nga nagpuyo uban ninyo.+ 17 Kinahanglang walay paborpabor ang inyong paghukom.+ Paminawa ang mga ordinaryong tawo parehas sa mga prominente.+ Ayawg kahadlok sa tawo+ kay ang paghukom iya sa Diyos.+ Kon lisod ang kaso para ninyo, dad-a kini kanako, ug akong paminawon kini.’+ 18 Niadtong panahona gisultihan ta mo sa tanang butang nga angay ninyong buhaton.

19 “Unya mibiya ta sa Horeb ug mitabok sa dako ug makahadlok nga kamingawan+ nga inyong nakita paingon sa kabukiran sa mga Amorihanon,+ sumala sa gisugo ni Jehova nga atong Diyos, ug sa ulahi nakaabot ta sa Kades-barnea.+ 20 Dayon giingnan ta mo, ‘Nakaabot na mo sa kabukiran sa mga Amorihanon, nga gihatag kanato ni Jehova nga atong Diyos. 21 Ania, gihatag ni Jehova nga inyong Diyos ang yuta kaninyo. Tungas ug panag-iyaha kini, sumala sa gisulti ni Jehova, ang Diyos sa inyong katigulangan.+ Ayawg kahadlok o kalisang.’

22 “Apan miduol mong tanan nako ug miingon, ‘Magpadala tag mga tawo aron susihon ang yuta para kanato, unya sultihan ta nila kon asang dalana ta moagi ug kon unsang klaseha sa mga siyudad ang atong adtoan.’+ 23 Maayo ang inyong gisugyot mao nga mipili kog 12 ka lalaki, usa kada tribo.+ 24 Nanglakaw sila ug nanungas sa kabukiran+ ug nakaabot sa Walog* sa Escol ug nangespiya sa yuta. 25 Nanguha silag mga bunga sa yuta ug gidala kini kanato, ug ila tang giingnan, ‘Maayo ang yuta nga gihatag kanato ni Jehova nga atong Diyos.’+ 26 Apan dili mo gustong motungas, ug misupak mo sa sugo ni Jehova nga inyong Diyos.+ 27 Nagsige mog bagulbol sulod sa inyong mga tolda nga nag-ingon, ‘Gidumtan ta ni Jehova maong gipagawas ta niya sa Ehipto aron pamatyon ta sa mga Amorihanon. 28 Unsang klaseha sa lugar ang atong adtoan? Gipaluya ta* sa atong mga igsoon,+ kay miingon sila, “Dagko ug tag-as sila kay kanato, dagko sab ang ilang mga siyudad, ug sangko sa langit ang ilang mga paril.+ Nakita pod namo didto ang mga Anakim.”’+

29 “Busa giingnan ta mo, ‘Ayaw mog kalisang o kahadlok tungod nila.+ 30 Si Jehova nga inyong Diyos ang mag-una kaninyo ug makig-away para ninyo,+ parehas sa inyong nakita nga iyang gibuhat didto sa Ehipto.+ 31 Ug nakita ninyo sa kamingawan kon giunsa mo pagdala ni Jehova nga inyong Diyos, parehas sa amahan nga nagkugos sa iyang anak. Gibuhat niya kini sa tanang lugar nga inyong giadtoan hangtod nga nakaabot mo dinhi.’ 32 Apan bisan pa niining tanan, wala mo magpakitag pagtuo kang Jehova nga inyong Diyos,+ 33 nga nag-una kaninyo diha sa dalan aron mangitag lugar nga inyong kampohan. Nagpakita siya kaninyo pinaagig kalayo sa magabii ug pinaagig panganod sa maadlaw aron tultolan mo sa dalan nga inyong agian.+

34 “Nadungog ni Jehova ang tanan ninyong gisulti, ug siya nasuko ug nanumpa,+ 35 ‘Walay bisag usa niining daotang henerasyon ang makakita sa maayong yuta nga akong gisaad sa inyong mga amahan,+ 36 gawas kang Caleb nga anak ni Jepune. Makita niya kini, ug akong ihatag kaniya ug sa iyang mga anak ang yuta nga iyang giadtoan kay kinasingkasing* siyang misunod kang Jehova.+ 37 (Nasuko gani si Jehova nako tungod ninyo, ug miingon, “Dili sab ka makasulod didto.+ 38 Si Josue nga anak ni Nun, nga imong alagad,*+ mao ang mosulod sa yuta.+ Palig-ona siya,*+ kay siyay manguna sa Israel aron panag-iyahon kini.”) 39 Ang inyong mga anak nga matod ninyo mahimong mga binihag+ ug ang inyong mga anak nga wala mahibalo sa maayo o daotan, kini sila ang makasulod, ug akong ihatag kini kanila.+ 40 Apan kamo, pamalik mo sa kamingawan agi sa dalan nga paingon sa Pulang Dagat.’+

41 “Busa inyo kong giingnan, ‘Nakasala mi kang Jehova. Motungas mi ug makig-away sumala sa gisugo kanamo ni Jehova nga among Diyos!’ Maong giandam ninyo ang inyong mga hinagiban sa gubat ug nagtuo mo nga sayon ang pagtungas sa bukid ug ang pagsakop niini.+ 42 Apan giingnan ko ni Jehova, ‘Sultihi sila: “Ayaw mog tungas aron makig-away kay dili ko mouban ninyo.+ Kon motungas mo, mapildi mo sa inyong mga kaaway.”’ 43 Busa nakigsulti ko ninyo, pero wala mo maminaw. Misupak hinuon mo sa sugo ni Jehova ug nanungas sa bukid. 44 Dayon gisugat mo sa mga Amorihanon nga nagpuyo adtong bukira. Mora silag mga putyokan nga migukod ninyo, ug gipatibulaag mo nila sa Seir hangtod sa Horma. 45 Busa namalik mo ug nanghilak sa atubangan ni Jehova, apan wala mo paminawa o tagda ni Jehova. 46 Mao nga ingon ato mo ka dugay nagpuyo sa Kades.