Gikan sa Among mga Magbabasa

Sobra ka Aktibong mga Bata

Salamat sa pagsulat sa artikulo mahitungod sa sobra ka aktibong mga bata. (Nobyembre 8, 1984 sa Cebuano) Ako adunay 15-anyos nga anak lalaki nga sobra ka aktibo. Ako mapasalamaton nga gihisgotan kining ulohana tungod kay ang mga tawong wala magpuyo niining kahimtanga dili bug-os makasabot sa bata, ug sila nagtuo nga siya pinatumanan ug angay disiplinahon nga mas estrikto pa. Sa akong kahimtang, ako tagsaanong ginikanan ug kini nagahimong mas lisod sa pagsagubang sa suliran. Ang akong anak nakabuntog sa pipila sa mga simtoma sa pagkasobra ka aktibo apan nagapakigbisog gihapon sa uban, bisan tuod kana sila dili sama ka grabe kay sa katuigan nga miagi.

A. H., New York

Mga Anak sa Nagdiborsiyo nga mga Ginikanan

Ang akong ngalan maoy Claudia (13-14 anyos), ug akong nabasa sa Awake! (Italyanhong edisyon) nga ang mga bata kansang mga ginikanan nagdiborsiyo maoy timawa kaayo! (‘Ikaw Among Gihigugma Una pa Ikaw Matawo,’ Disyembre 8, 1984 sa Cebuano) Ang akong mga ginikanan nagdiborsiyo, apan wala ko batia nga samag “putos.” Silang duha adunay laing pamilya, ug ako nagapuyo uban sa akong inahan, apan sa Sabado ug Dominggo ako moestar sa akong amahan. Una sa tanan, gidawat ko ang ilang desisyon bahin sa diborsiyo; ikaduha, bisan pag usahay kinahanglang himoon ko ang mga sakripisyo, akong himoon kana sila tungod kay akong gihigugma ang akong mga ginikanan. Tingali adunay mga bata nga grabe pag kahimtang kay kanako, apan sa inyong hunahuna mas maayo ba ang ilang kahimtang nga magpuyo uban sa mga ginikanan nga kanunay nagaaway?

C., Italya

Gidayeg ka namo tungod kay nakaarang sa pagsagubang sa imong kahimtang. Ugaling, sumala sa imong gipaila adunay daghang kabataan sa nagdiborsiyo nga mga ginikanan nga dili maayog kahimtang sama sa imoha. Sa pagkamatuod, ang gibugaton sa ebidensiya nagapakitang ang mga anak sa nagdiborsiyong mga ginikanan dunay daghan pang kalisdanan nga pagasagubangon kay niadtong kabataan kansang mga ginikanan nagaipon. Ang among baroganan bahin sa diborsiyo gipasukad sa mga pulong ni Jesus: “Ako magaingon kaninyo nga si bisan kinsa nga mobulag sa iyang asawa, gawas sa hinungdan nga pakighilawas, ug maminyo sa lain makapanapaw.” (Mateo 19:3-9) Dili kami motuo nga ang bugtong mga kapilian alang sa usa ka pamilya mao nga ang mga ginikanan mokuhag diborsiyo o mag-ipon ug mag-away kanunay. Adunay maayong ikatulong kapilian—nga ang mga ginikanan magapadapat sa mga prinsipyo sa Pulong sa Diyos diha sa ilang kaminyoon, nga dili mahakogong mohimog pagpasibo ug mag-ipon, nga mag-antosay sa usag usa diha sa gugma ug sa ingon magtukod sa malipayon, nagkahiusang pamilya.—ED.