“Schulangst”—Ang Ganti sa Kalamposan?

Sinulat sa koresponsal sa “Pagmata!” sa Alemanya

SCHULANGST—ang pulong gimugna aron sa pagbatbat sa usa ka suliran nga kalit nga mikaylap sa tibuok yuta. Ug bisan pa dili kaayo mohaom ang bug-os nga ipasabot sa maong pulong, kini kapin-kun-kulang nagkahulogang “kabalaka sa tunghaan.”

Napulo ka tuig kanhi ang Alemang doktor sa mga bata si Dr. Eckhard Schrickel miingon: “Ang dos-tersiya sa mga bata nga akong gitambalan dili gayod masakiton sa ordinaryong diwa sa pulong. Sila masakiton sa tunghaan.” Ang medikal nga basahong Deutsche Ärzteblatt nag-ingon nga sukad niadto ang gidaghanon sa mga bata nga ginatambalan sa nalangkit sa tunghaan nga mga suliran miuswag sa napulo ka pilo!

Sa pagkatinuod, kon tuohan ang German Association of Young Teachers, nameligro ang sistema sa publikong tunghaan sa Pederal nga Republika. Nagpunting kini sa 280,000 ka estudyante sa usa ka tuig nga dili makapasar—halos usa gikan sa matag 30—maingon man sa 18,000 kinsa tungod sa nalangkit sa tunghaan nga mga katarongan misulay sa paghikog. Matag tuig, ginatos ang milampos sa paghikog.

Mga Hinungdan Niini

Tingali ang labing dakong hinungdan sa schulangst mao ang tinguha nga molampos. Ang kabataan sa Alemanya gisultihan sa mga ginikanan ug mga magtutudlo nga kon buot nilang makasulod sa unibersidad o makakitag makahuloganong trabaho, kinahanglang aduna silay tagsaong rekord sa tunghaan. Apan, alang sa kadaghanang bata, ang kahadlok sa posibilidad nga dili makapasar nakahatag kapit-osan nga maoy kasagarang hinungdan sa ilang pagkakuhag dili pasadong grado! Mipasidaan ang Alemang Propesor si Walter Leibrecht: “Kinahanglang masayran natong mga ginikanan nga ang sobrang ambisyon sa atong bahin makadaot lamang sa atong mga anak.”

Tinuod, makapukaw ang mga grado sa mga estudyante sa paghimog maayo ug makatudlo sa mga dapit nga kinahanglang pauswagon. Ug kon walay kaikag ang ginikanan sa edukasyon sa iyang anak, mawad-an ug kaikag ang bata sa pagkakat-on. Bisan pa, gihukman ni Leibrecht “ang pagbutang ug dakong importansiya sa mga grado.” Ang paghatag dakong pasiugda sa mga grado mopabati sa kabataan nga may kasarangan o labaw sa kasarangang kaalam nga ubos. “Kon himoong basehanan ang mga grado,” miingon ang Alemang magasing Eltern, “mawala ang kagawasan sa personal nga kauswagan, kon sila makadaot pagkatimbang sa kabataan, nan may diperensiya ang atong sistema. Ang atong mga anak ang mag-antos.”

Ang mga pamilya nga kanunayng mag-away o nabungkag tungod sa diborsiyo o panagbulag makadugang usab sa schulangst. Ang mga anak niining mga pamilyaha mobatig kalibog, dili mahimutang, o wala higugmaa. Makaikag, si Dr. Gerhardt Nissen, direktor sa Clinic for Juvenile Psychiatry of Würzburg Julius-Maximilians University, mibatbat: “Mamatikdan nga mosulay sa paghikog ang mga estudyante kon dili maayo ang relasyon sa ginikanan ug anak o pagkaumol sa kinaiya sa bata.”—Italiko amoa.

Apan laing butang nga mopahinabo sa schulangst gipadayag sa usa ka 11-anyos: “Segurado ako nga makasulbad ako sa problema nga ihatag sa magtutudlo, kon masabtan lang nako kana.” Ilabina sa ulahing katuigan sa 1960 dugang nga gipulihan ang pagkayano diha sa mga lawak-tunghaan sa Alemanya ug malisod siyentipikanhon ug teknikal nga mga pulong. Ang resulta nga kapakyasan makadugang sa schulangst.

Mahimong hinungdan usab ang taas nga panahong pagtan-awg telebisyon. Miingon ang usa ka edukador nga ang mga tumatan-aw sa TV daw daling malimot sa ilang makita aron ilang matagad pag-ayo ang sunod nga ipasundayag. Ang resulta? Daw dali usab silang malimot sa buluhaton sa tunghaan!

Usahay, maagom ang mga estudyante sa “mga panghulga, panghukhuk ug pagdagmal.” Busa ang Hamburger Abendblatt dugang mipahayag: “Sa kasagaran ang kahadlok sa tunghaan maoy kahadlok usab sa kabangisan sa kaubang mga estudyante . . . Kabangisan ang reaksiyon sa estudyante sa kalisod.”

Dako ra Kaayo nga Bili?

Bisag Aleman ang pulong, dili tagsaon ang schulangst sa Alemanya. Kini maoy laing makapabalakang timailhan nga daghang tunghaan ang wala makapasar sa eksamin. Maayo ang akademikong kalamposan. Apan kon makabaton ang mga bata ug daotang kahadlok sa tunghaan, kinahanglang pangutan-on sa mga ginikanan ang ilang kaugalingon kon dili ba dako ra kaayo ang bili sa kalamposan.

Hinunoa, alang sa kadaghanan sa kalibotan, ang mga tunghaan nanlimbasog sa pagtudlo bisan sa labing simpleng mga katakos, sama sa pagbasa ug pagsulat. Sa unsa nga sukod ginaatubang sa Ikatulong Kalibotan, pagaingnon pa, ang kahugpongan sa nagakaugmad nga kanasoran sa kalibotan, ang hagit?

[Blurb sa panid 7]

Ang pagpiit sa mga magtutudlo ug mga ginikanan nga molampos nakapukaw sa daghang batan-on ug daotang kahadlok sa tunghaan