Kon Unsaon Nimo sa Pagpanalipod sa Imong Kaugalingon Gikan sa AIDS
Una, likayi ang mga tuboran sa impeksiyon. Sa unsang paagi imong mahimo kana? Pinaagi sa pagkinabuhi nga nahiuyon sa mga sukdanan sa batasan nga gihatag sa Labing Makagagahom nga Diyos. Tagda kon sa unsang paagi mapanalipdan unta ang libolibo karon nga himalatyon sa AIDS.
Ang Labing Daling Matakdang Grupo
Ang aktibo sa sekso nga mga homoseksuwal, ilabina niadtong magsigeg pulig bag-ong mga paris. Ang Bibliya nag-ingon:
“Dili ka maghigda tipon sa lalaki sama sa imong paghigda tipon sa babaye. Dulumtanang butang kini.”—Levitico 18:22.
“Ang mga lalaki nanagbiya sa kinaiyanhong paggamit sa babaye ug nangaut-ot sa ilang mga pangibog alang sa usag usa, mga lalaki sa masigkalalaki, nanag-unay sa pagbuhat sa makauulaw ug nanagpakaagom diha sa ilang kaugalingon sa balos nga angay sa ilang kalapasan.”—Roma 1:27.
“Ayaw kamo pagpakasala: walay mga makihilawason o mga mananapaw o homoseksuwal nga kahiwian . . . ang makapanunod sa gingharian sa Diyos.”—1 Corinto 6:9, 10, The New English Bible.
Kinsa pa ang Lagmit Matakdan?
Ang mga tawo nga makigsekso sa tanang nataptan ug kagaw sa AIDS, lalaki man siya o babaye. Ang Bibliya nag-ingon bahin niini:
“Pasagding dungganon sa tanan ang kaminyoon, kay hukman sa Diyos ang mga makihilawason ug mga mananapaw.”—Hebreohanon 13:4.
“Busa, patya ang inyong sangkap sa lawas nga anaa sa yuta may labot sa pakighilawas, kahugaw, seksuwal nga pangibog . . . Tungod niining mga butanga ang kapungot sa Diyos magaabot.”—Colosas 3:5, 6.
Ang Ubang Dakog Kapeligrohan
Ang mga tig-abuso sa droga nga naghugaw sa ilang mga lawas pinaagi sa mga droga, sa pag-indyeksiyon sa ilang kaugalingon sa hugawng mga dagom. Ang paghukom sa Bibliya sa paghuboghubog dayag nga aplikado sa pag-abuso sa modernong mga droga diin ang makagahi kun makapabaliko sa hunahunang mga epekto mas kusganon kay sa epekto sa alkohol.
“Hinloan ta ang atong kaugalingon sa tanang kahugaw sa lawas ug espiritu, ug hingpiton ta ang pagkabalaan diha sa atong pagkahadlok sa Diyos.”—2 Corinto 7:1.
“Ayaw pagpahisalaag. Walay makihilawason . . . o mga palahubog . . . ang makapanunod sa gingharian sa Diyos.”—1 Corinto 6:9, 10.
Laing Dakog Kapeligrohang Grupo
Ang mga tawong makadawat ug nataptag kagawng dugo pinaagi sa pag-abuno sa dugo. Ang Bibliya nagdili sa mga tawo sa pagkaon ug dugo. Kini nag-ingon:
“Dili gayod kamo magkaon sa dugo sa bisan unsa nga unod, kay ang kinabuhi sa tanan nga unod mao ang dugo niini. Ang bisan kinsa nga magakaon niini pagalaglagon.”—Levitico 17:14.
“Kay gipakamaayo sa balaang espiritu ug namo ang dili pagdat-og kaninyo sa bisan unsang luwan gawas lamang sa pipila ka kinahanglanong butang, sa pagpahilayo sa tanang panahon . . . gikan sa dugo.”—Buhat 15:28, 29.
Dili andam ang tanan sa pagpadapat sa mga prinsipyo sa Bibliya mahitungod niining mga butanga o sa pagdawat sa kamatuoran nga may katungod ang Diyos sa pagsulti kanato kon unsay buhaton. Apan ang mga tawo nga nakahimo niini malipayon nga gihimo nila kini.