Kapitulo 2—Pagkaluwas Ngadto sa Usa ka Bag-ong Yuta
Ang mga Isyu nga Nagatino sa Atong Umaabot
1. (a) Unsang bag-ong mga isyu ang nangibabaw sa hunahuna sa daghang tawo, ug diin sila midangop alang sa kasulbaran? (b) Unsa ang wala nila tagda?
SA NANGAGING katuigan ang mainit nga mga isyu nga nalangkit sa atong kaugmaon masubsob nga gipaatubang kanato. Ang mga kahimtang mao nga ang mga tawo sa tanang dapit dakog panginahanglan ug kahupayan. Tingali nagtuo sila ug Diyos, apan daw alang kanila kon mouswag man ang kahimtang dinhi sa yuta, mga tawo ang mopahinabo niini. Gihimo kini sa uban pinaagi sa naglungtad nga mga kagamhanan o pinaagi sa pagprotesta sa masa batok sa mga desisyon niining mga kagamhanana. Nagtuo ang uban nga ang rebolusyon lamang ang paagi. Ilang gibati nga ang pagbag-o sa mga balaod, pagpuli sa mga magmamando o sa bug-os nga kagamhanan mopaarang-arang sa mga kahimtang. Apan unsay gipakita sa mga kamatuoran? Human nga nakasulay sa libolibong katuigan, ang mga tawo wala makapatunghag bisan usa lamang ka kagamhanan nga nakahatag walay pagpinig nga hustisya, tinuod nga kasegurohan ug dumalayong kalipay sa tanang mga sakop niini. Unsay nakaingon niini?
2. Nganong daotan kaayo ang mga kahimtang sa kalibotan?
2 Bisan unsa pa ka halangdon sa mga tumong sa mga tawo nga nagamando, ang tanang tawhanong mga kagamhanan gimaniobra sa mga puwersa nga dili makontrolar sa mga tawo nga anaa sa katungdanan. Pinaagi ni kinsa? Pinaagi sa labaw-tawhanong mga espiritu, si Satanas nga Yawa ug ang iyang mga demonyo. Tinuod, daghang tawo ang nagayubit sa pagtuo sa espiritu nga mga persona. Apan si Jesu-Kristo wala. Siya mismo nakaila sa gigikanan ni Satanas ug naghisgot kaniya nga “mao ang magmamando niining kalibotana.” (Juan 12:31) Sa simbolikong pinulongan, gilarawan sa Bibliya ang politikal nga sistema sa tibuok yuta nga mapintas nga mananap ug nagbutyag nga “ang dragon [Satanas] mihatag sa mananap sa iyang gahom ug sa iyang trono ug ang dakong pagbulot-an.” (Pinadayag 13:1, 2; itandi sa Daniel 7:2-8, 12, 23-26.) Ug ang Bibliya nagtagna nga sa atong adlaw mosamot sa “pagkaalaut ang yuta . . . tungod kay ang Yawa nanaog diha kaninyo.” (Pinadayag 12:12) Wala nay lain pang hinungdan sa kagubot nga ginaatubang sa katilingban. Apan sa unsang paagi kini mitungha? Unsay atong himoon aron makabaton ug kahupayan?
ANG ISYU SA PAGKASOBERANO
3. Unsay gipakita sa Genesis 2:16, 17 mahitungod sa tukmang relasyon sa tawo ngadto sa Diyos?
3 Ang unang mga kapitulo sa Bibliya nagpahibalo kanato dihang gilalang ni Jehova nga Diyos ang unang tawhanong paris, si Adan ug Eva, ug gibutang sila sa tanaman sa Eden iyang gipatin-aw kanila ang ilang relasyon kaniya. Siya mao ang ilang Amahan, ang dakong Magtatagana, nga mao usab ang Soberano sa Uniberso. Alang sa ilang kaugalingong kaayohan, kinahanglan masabtan nila nga ang padayong paglungtad sa ilang kinabuhi nasandig sa ilang pagsunod sa Diyos.—Genesis 2:16, 17; itandi sa Buhat 17:24, 25.
4. (a) Diin gikan si Satanas? (b) Unsang daotang tinguha nga iyang gipasagdang milambo?
4 Niadtong panahona ang tanang kalalangan hingpit. Dili sama sa mga hayop, ang mga manulonda ug mga tawo may kagawasan sa pagbuot. Apan human nga gilalang ang tawo ang usa sa mga manulonda, miabuso sa katingalahang katakos sa paghimog personal nga mga desisyon, mirebelde batok sa pagkasoberano ni Jehova. Iyang gihimo ang iyang kaugalingon nga kaaway, o magsusupak, nga maoy literal nga kahulogan sa ngalang Satanas. (Itandi sa Santiago 1:14, 15; Pinadayag 12:9.) Gipalihok sa ambisyon, gidaldal ni Satanas ang unang tawhanong paris palayo gikan kang Jehova nga Diyos ug giagak sila ilalom sa iyang impluwensiya. Iyang nakita diha kanila ang posibilidad nga ang yuta mapuno sa mga tawo nga magpasidungog kaniya ingong ilang diyos. (Itandi sa Isaias 14:12-14; Lucas 4:5-7.) Ang asoy sa nahitabo sa Eden dili usa lamang ka sugilanon. Gipunting ni Jesu-Kristo kini ingong makasaysayanhong kamatuoran.—Mateo 19:4, 5.
5. (a) Unsang mga isyu ang gibangon sa Eden? (b) Kinsa ang naapektohan kanila?
5 Si Jesus miingon mahitungod sa Yawa: “Ang kamatuoran wala diha kaniya . . . Siya bakakon ug ang amahan sa bakak.” (Juan 8:44) Ang unang narekord nga bakak mao ang kang Eva dihang iyang gidudahan ang pagkamaminatud-on sa Diyos. Nanulsol siya sa pagsalikway sa kasugoan sa Diyos ug nangatarongan nga makaayo alang sa usag usa kanila ang paghimog iyang kaugalingong mga sukdanan sa kinabuhi. (Genesis 3:1-5; itandi sa Jeremias 10:23.) Busa gihagit ang pagkasoberano ni Jehova didto sa Eden. Sumala sa gipakita sa ulahi nga mga hitabo, ang pagkamaunongon ngadto sa Diyos sa tanang intelihenteng mga linalang gidudahan usab. Nag-alagad ba sila sa Diyos tungod kay tinuod silang nahigugma kaniya, o madaldal ba sila sa pagtalikod gikan kaniya? (Job 1:7-12; 2:3-5; Lucas 22:31) Kining mga isyuha nagaapektar sa tanang anaa sa langit ug sa yuta. Unsang aksiyon ang himoon sa Soberano sa Uniberso?
6. Nganong wala dayon laglaga ni Jehova nga mga rebelde?
6 Imbes laglagon dayon ang mga rebelde, maalamong gitugotan ni Jehova ang usa ka yugto sa panahon aron mahusay ang mga isyu. Gihimo kini sa Diyos, dili sa pagpamatuod sa iyang kaugalingon, kondili nagtugot sa mga linalang nga may kagawasan sa pagbuot sa pagtan-aw sa ilang kaugalingon sa daotang bunga nga gipamunga sa pag-alsa batok sa iyang pagkasoberano, ug sa paghatag usab kanila ug higayon sa pagpakita kon asa sila mobarog niining hinungdanong mga butang. Sa mahusay na ang mga isyu, wala na gayoy tugotan pa sa pagbalda sa kalinaw.
7. (a) Sa unsang paagi misugod ang tawhanong kagamhanan? (b) Unsang matang sa rekord ang ilang nahimo?
7 Si Jehova nga Diyos, sanglit Maglalalang sa katawhan, mao ang ilang tukmang Magmamando. (Pinadayag 4:11) Apan, sa ulahi, si Satanas ug ang iyang mga demonyo misugod sa pagpukaw sa tinguha sa mga tawo dili lang sa paghimog ilang kaugalingong mga sukdanan kon unsay maayo ug daotan kondili sa pagmando sa ilang isigkatawo. Si Nimrod mao ang una nga mituboy sa iyang kaugalingon ingong hari, nga nagmando sa mga siyudad sa Mesopotamia. Siya maoy “usa ka gamhanang mangangayam [sa mga hayop ug mga tawo] batok kang Jehova.” (Genesis 10:8-12) Sa mga adlaw ni Nimrod hangtod karon, ang tanang matang sa tawhanong kagamhanan gisulayan. Apan ang katibuk-ang rekord, sumala sa nahibaloan sa tanang estudyante sa kasaysayan, maoy usa nga daotan ug pag-ulag dugo.—Ecclesiastes 8:9.
8. Nganong wala mangilabot si Jesus sa politikal nga sistema sa kalibotan?
8 Samtang dinhi pa si Jesus sa yuta, misulay pa gayod si Satanas sa pagdala kaniya ilalom sa iyang impluwensiya. Iyang gitanyagan si Jesus sa “tanang mga gingharian sa ginapuy-ang yuta” baylo sa usa ka lihok sa pagsimba. Midumili si Jesus. (Lucas 4:1-13) Sa ulahi gusto ang mga tawo sa paghimo kaniyang hari, apan milakaw si Jesus. (Juan 6:15) Siya nasayod kon unsa ang politikal nga sistema sa kalibotan, ug siya nahibalo nga dili kabubut-on sa Diyos nga iyang sulayan ang pagpauswag niini.
9. (a) Aron masulbad ang suliran sa katawhan, unsay kinahanglang buhaton nga mahimo lamang sa Gingharian sa Diyos? (b) Unsa kanang Ginghariana?
9 Nakapasundayag si Jesus sa bug-os nga pagkamaunongon kang Jehova, nga iyang Diyos ug Amahan. Iyang gimahal ang mga dalan ni Jehova ug sa tanang panahon mihimog mga butang nga nakapahimuot kaniya. (Juan 8:29) Siya nahibalo nga ang kasulbaran sa mga suliran sa katawhan motungha pinaagi sa Gingharian sa Diyos, usa ka tinuod nga kagamhanan nga momando gikan sa langit ug motaganag matarong ug mahigugmaong pagtultol nga gikinahanglan sa katawhan. Kanang Ginghariana lamang ang makawala sa impluwensiya ni Satanas ug sa iyang mga demonyo. Kini lamang ang makapahiusa sa katawhan sa tanang mga rasa ug mga nasod sa usa ka pamilya sa tibuok yuta nga magpuyo diha sa kalinaw. Kini lamang ang makapagawas sa katawhan sa pagkaulipon sa sala ug kamatayon. Kini lamang ang makapatunghag walay kataposang kalipay sa katawhan. Kining Ginghariana dili maoy usa ka kahikayan nga minugna sa mga politiko ug gipanalanginan sa klero. Ang tinuod nga mga Kristohanon dili mogamit sa mga hinagiban sa pisikal nga pagpakiggubat sa pagpalambo sa mga intereses niini. Kini maoy kaugalingong kagamhanan sa Diyos, uban sa hingpit langitnong Hari nga gientrono sa Diyos mismo. Mao kini ang Gingharian nga giwali ni Jesus ug nga iyang gitudlo sa iyang mga sumusunod nga iampo.—Daniel 2:44; Pinadayag 20:1, 2; 21:3, 4.
HAING KILIRA ANG IMONG PILION?
10. (a) Unsa ang dakong isyu nga kinahanglang atubangon sa matag usa kanato? (b) Unsay atong kinahanglang buhaton bahin niana?
10 Ang isyu nga kinahanglang imong atubangon mao kini: Imong bang giila nga si Jehova nga Diyos, ang Maglalalang sa uniberso, mao usab ang may katungod nga Soberano, ang Supremong Magmamando niini? Nakagahin ka bag panahon sa pagtuon sa iyang katuyoan ug sa iyang mga kinahanglanon nga gipakita diha sa Bibliya? Agig pagtahod sa iyang katungdanan ug sa pagpabili sa iyang mga dalan, nagapamatuod ka ba sa imong kaugalingon nga mahigugmaong nagasunod kaniya?—Salmo 24:1, 10; Juan 17:3; 1 Juan 5:3.
11. Nganong ang pagpili ug lahi nga dalan dili makahatag kalipay?
11 Ang mga tawo ba nga mipili ug laing dalan mas malipayon? Unsay miresulta sa argumento ni Satanas nga makabaton ug kaayohan ang katawhan pinaagi sa pagpangayo sa ilang kagawasan imbes sa pagpamati sa Diyos? Ang pagdumili sa pag-ila nga ang Diyos mao ang tag-iya sa yuta ug nga ang tanang katawhan, ingong mga anak sa orihinal nga paris, gilaraw nga mahimong mga igsoon miresulta sa pagpamatay sa labing menos 99 milyones ka lalaki, mga babaye ug mga bata sa mga gubat ning sigloha lamang. Ang kapakyasan sa pagpadapat sa mga sukdanan sa Diyos sa paggawi nakapatunghag bungkag nga mga panimalay, mga epidemiya sa mga sakit nga napasa sa sekso, sa makadaot sa panglawas nga pagkagiyan sa droga, ug sa mabangis nga krimen. Bisan pag makaikyas ang tawo sa mapintas nga kataposan makaatubang ug kamatayon tungod sa sala nga napanunod kang Adan. Ang tanang ebidensiya nagpakita nga gisakit lamang sa mga tawo ang ilang kaugalingon ug kanang anaa sa ilang palibot kon dili nila tagdon ang maalamon ug mahigugmaong mga kinahanglanon sa Maglalalang. (Roma 5:12; itandi sa Isaias 48:17, 18) Siyempre dili kana mao ang matang sa kinabuhi nga imong gusto. Makapili ka pag mas maayo.
12. (a) Unsang mainit nga pagdapit ang gitanyag sa Bibliya kanato? (b) Samtang anam-anam natong ipadapat ang Pulong sa Diyos diha sa atong mga kinabuhi, unsay atong maeksperyensiyahan?
12 Uban ang mainitong hangyo, ang Bibliya naghatag imbitasyon: “Tilawi ug tan-awa ninyo nga si Jehova maayo, Oh kamo nga katawhan; malipayon ang tawo nga modangop kaniya.” (Salmo 34:8) Aron makahimo niana, kinahanglan modangat ka sa pagkaila kang Jehova ug dayon ipadapat ang tambag. Samtang imong buhaton kini, ang imong kinabuhi mahimong makahuloganon. Imbes magpangapkap sa lakbit nga mga gutlo sa kalipay nga temporaryong makatabang kanimo sa pagkalimot sa problema apan sa kasagaran sakit sa dughan lamang ang mahatag niana sa ulahi, ikaw makakat-on kon unsaon sa pagbuntog nga madaogon sa mga suliran sa kinabuhi ug kon unsaon sa pagbaton ug kalipay nga dayon. (Proverbio 3:5, 6; 4:10-13; 1:30-33) Ikaw may palaabuton usab nga makabahin sa katingalahang mga panalangin nga ipatungha pinaagi sa Gingharian sa Diyos. Kon mao kini ang matang sa kinabuhi nga imong ginapangandoy, hinungdanon ang paglihok karon. Ngano?
ANG TANANG KANASORAN NAGAPADULONG SA ARMAGEDDON
13. Nganong importanteng magbarog nga malig-on sa kiliran ni Jehova karon?
13 Dili tugotan ni Jehova sa walay kataposan nga pasagdan ang mga tawo ug mga organisasyon nga sa tinuyo o dili-tinuyo mosunod sa pagtultol ni Satanas. Dili sila tugotan sa pagpadayon sa paglapas sa kasugoan sa Diyos, sa pag-abuso sa yuta ug sa pagdaot sa kinabuhi sa uban. Atubangon nila ang adlaw sa panudya nianang gitawag sa Bibliya nga “dakong adlaw ni Jehova.”—Sofonias 1:2, 3, 14-18.
14. Alang sa unsa nga ginatigom karon ang tanang kanasoran?
14 Sa pagpahayag sa mga hitabo nga mahitabo sa panahon sa kataposang mga adlaw sa presenteng sistema sa mga butang, mibutyag si Jesu-Kristo nga ang “mga pulong nga dinasig sa mga demonyo” “managpangadto sa mga hari sa tibuok ginapuy-ang yuta, sa pagtigom kanila sa gubat sa dakong adlaw sa Diyos nga Makagagahom.” Sumala sa gipakita niana nga pinadayag, “sila pagatigomon ngadto sa dapit nga gitawag sa Hebreohanon nga Har-Magedon [kun, Armageddon].” Nagsugod na kanang maong pagtigom!—Pinadayag 16:14, 16; Authorized Version.
15, 16. (a) Unsa ang Armageddon? (b) Nganong kinahanglanon kini?
15 Ang Armageddon nga gihisgotan sa Bibliya dili usa ka hitabo nga malikayan pinaagi sa nukleyar nga pagpugong. Ang internasyonal nga mga kasabotan dili makasanta niini. Ang ngalan gikuha gikan sa karaang siyudad sa Megiddo, apan labaw pa ang nalangkit kay sa lokasyon niini diha sa Tungang Silangan. Nasulsolan sa dili-makitang “magmamando niining kalibotana,” ang tanang mga nasod, bisan pa sa ilang nagkalainlaing politikal nga ideolohiya, ginatigom ngadto sa tibuok-kalibotang situwasyon nga nagapakita sa ilang pagsupak kang Jehova nga Diyos. “Ang mga hari sa tibuok ginapuy-ang yuta,” duyog sa tanan nilang mga sumusunod, ginapapili kon asa sila mobarog. Sa dili pa ang Armageddon ang ilang pagbatok sa Gingharian sa Diyos ug sa tanan nga nagawali niini mosamot sa tibuok yuta. Kon modawat man sila ug dili nga naglungtad si Satanas, “ang tibuok kalibotan anaa sa gahom sa usa nga daotan,” sumala sa gipahayag sa Pulong sa Diyos. Ang enterong daotang kalibotan ug ang tanang nagasalig niini, oo, ang tanan nga mosundog sa mga paagi niini, laglagon.—1 Juan 5:19; 2:15-17.
16 Gikan sa itaas ug sa ubos, kining kalibotana napuno sa kadaotan. Dili lamang banggiitang mga kriminal kondili kasagarang mga lungsoranon nagpakitag matig-ang pagsalikway sa balaod ug sa kakulang sa pagtagad sa tawo ug kabtangan sa ilang isigkatawo. Apan labaw sa tanan, midumili sila sa pagpaminaw sa gipamulong sa Diyos mismo diha sa iyang Pulong, ang Bibliya. Wala nila tahora ang iyang pagkasoberano. Kinahanglang molihok gayod ang Diyos aron mahinloan ang iyang ngalan sa pasipala nga nahimo diha niini, ug sa pag-andam usab sa yuta nga usa ka Paraiso diin ang mga mahigugmaon sa pagkamatarong makapahimulos sa tinuod nga kalinaw ug kasegurohan.
17. (a) Unsa kadako unya sa kalaglagan? (b) Kinsa ang motultol sa resulta niini?
17 Kon moabot na ang kalaglagan, dili kaduhaduhaan nga gikan kana kang Jehova. Mosilhig ang kalumpagan sa tibuok yuta. Ang mga nasod mahibalo nga nagalihok na si Jehova dihang iyang kasundalohan nagalihok sa pagpahamtang sa silot. Sa mangapukan ang pangagamhanan nga awtoridad, ang tanang kamot sa tawo mobakyaw batok sa iyang kauban. Gikan sa mga langit, ang anak sa Diyos maoy motultol sa resulta.—Pinadayag 6:16, 17; 19:11-13; Sofonias 14:13.
18. Kinsa ang maluwas?
18 Dili sama sa mga resulta sa nukleyar nga gubat sa tawo, pinili kining maong kalaglagan. Apan kinsa ang maluwas? Sila bang tanang nagapangangkong may relihiyon, o kaha ang tanang nagapangangkong mga Kristohanon? Gitawag ni Jesus nga “daghan” kanila “mga mamumuhat ug daotan.” (Mateo 7:21-23) Ang maluwas ngadto sa “bag-ong yuta” mao lamang kadtong nakapalambo sa suod nga relasyon kang Jehova nga Diyos ug sa iyang harianong Anak, si Jesu-Kristo. Pinaagi sa ilang paagi sa kinabuhi ug sa ilang pagwali mahitungod sa Gingharian, sila nakapasundayag nga sila tinuod nga “nakaila sa Diyos” ug nga sila “nagamasinugtanon sa maayong balita mahitungod sa atong Ginoong Jesus.” Gipamatud-an ba nimo ang imong kaugalingon nga ingon ka niini?—2 Tesalonica 1:8; Juan 17:3; Sofonias 2:2, 3.