Kapitulo 9—Pagkaluwas Ngadto sa Usa ka Bag-ong Yuta
Kinsay Nagauna sa Dalan Ngadto sa Kaluwasan?
1. (a) Sa unsa kinahanglang magpasakop kita aron pagaluwason sa “dakong kasakitan”? (b) Sa unsang paagi kini giilustrar sa paagi sa paggamit sa Diyos kang Moises?
Kon atong dawaton ang pagpangulo ni Jesu-Kristo ug mohatag ebidensiya nga kita nagapatalinghog gayod kaniya ug nagasubay sa iyang mga lakang kita maluwas gikan niining daotang kalibotan ug matipigang buhi latas sa umaabot nga “dakong kasakitan.” (Buhat 4:12) Kini giilustrar ug maayo sa mga hitabong naglibot sa pagkaluwas sa kinaiyanhong mga Israelinhon gikan sa Ehipto sa 1513 W.K.P. Sa milagrosong paagi gidala ni Jehova ang Israel ngadto sa kaluwasan agi sa Dagat nga Mapula ug gilaglag ang kasundalohan sa Ehipto. Nianang tanan, gigamit sa Diyos si Moises sa pagpanguna sa iyang katawhan.—Josue 24:5-7; Exodo 3:10.
2. (a) Kinsa ang “dako kaayong nagsagol nga panon” nga mibiya sa Ehipto uban sa Israel? (b) Unsa ang pihong nagdani kanila? (c) Bahin sa unsang butang nga sila sa wala madugay gibutang sa pagsulay?
2 Sa migawas ang mga Israelinhon gikan sa Ehipto uban ang paglaom nga mosulod sa Yutang Saad, ang uban mikuyog kanila. Sumala sa gisulat sa ulahi ni Moises: “Ang usa ka dako kaayong nagsagol nga panon mitungas usab uban kanila.” (Exodo 12:38) Kinsa ba kadto sila? Sila maoy mga Ehiptohanon o ubang dumuloong nga nakigduyog sa Israel. Ilang nakita ang makalilisang nga mga hampak nga gipahamtang ni Jehova sa malupigong nasod sa Ehipto sa pagpasundayag nga siya mao ang bugtong matuod nga Diyos ug ang mga diyos sa Ehipto maoy bakak ug dili makaluwas niadtong nagsimba kanila. Sa walay duhaduha, usab, ang ilang nadunggan gikan sa mga Israelinhon mahitungod sa kalaoman sa kinabuhi diha sa “usa ka yuta nga nagaagay sa gatas ug dugos” maayong pamatian alang kanila. (Exodo 3:7, 8; 12:12) Apan bug-os ba nilang giila si Moises ingong gibangon sa Diyos aron mahimong magmamando ug manluluwas sa lyang katawhan? Sa wala madugay sila gibutang sa pagsulay.—Buhat 7:34, 35.
3. (a) Nganong hinungdanon ang pagsunod sa mga tugon ni Moises? (b) Unsa ang kahulogan sa ‘bawtismo ngadto kang Moises’? (c) Nganong kana hinungdanon sa espirituwal nga mga Israelinhon?
3 Samtang ang Israel, duyog sa “dako kaayong nagsagol nga panon,” nagsingabot sa baybayon sa Dagat nga Mapula, ang hari sa Ehipto ug ang iyang kasundalohan migukod kanila aron sila guyoron pagbalik sa pagkaulipon. Aron maluwas, kinahanglang sila magkahiusa ug mosunod sa mga tugon ni Moises, tungod kay gigamit ni Jehova si Moises sa pagpanguna kanila. Pinaagig labaw-kinaiyanhong panganod gipugngan ni Jehova ang kaaway samtang iyang gibulag ang katubigan sa dagat ug gipamala ang dagat. Nga iladong sukwahi sa nahitabo sa mga Ehiptohanon sa ulahi, ang tibuok Israel ug ang “dako kaayong nagsagol nga panon” nakaeskapo uban kang Moises tabok niadtong namad-ang dagat. (Exodo 14:9, 19-31) Samtang silamilatas, nga ang mga bungbong sa tubig diha sa ilang tuo ug sa ilang wala ug ang panganod sa presensiya sa Diyos ibabaw sa ulo, may butang makahuloganong nahitabo. Ang Bibliya nagahisgot niana ingong samag bawtismo—dili literal nga bawtismo sa tubig, kondili simbolikong bawtismo ngadto kang Moises ingong manalagna ni Jehova, ang usang gipadala sa Diyos aron mahimong ilang Magluluwas. (1 Corinto 10:1, 2) Sa susama, ang tanang espirituwal nga Israelinhon nga maluwas sa pagkalaglag niining daotang kalibotan kinahanglang moagi sa susamang bawtismo ngadto kang Kristo ingong manluluwas ug mohatag ug makapatuo nga ebidensiya nga sila nagasunod pag-ayo sa iyang pagpangulo. Ang modernong-adlawng “nagsagol nga panon” kinahanglang mokuyog kanila.
4. Unsa ka dako ang pagbulot-ang gihatag ni Jehova kang Kristo?
4 Gihatag ni Jehova ang dakong pagbulot-an sa iyang Anak, si Jesu-Kristo. Pinaagi kaniya gipaposible sa Diyos nga kita ‘maluwas gikan sa daotang sistema karon sa mga butang,’ aron dili kita makaambit sa makapasubong dulnganan niini. (Galacia 1:3-5; 1 Tesalonica 1:9, 10) Pinaagi kang Moises, gihatag ni Jehova sa Israel ang mga kasugoang nag-apektar sa kalaoman sa kinabuhi sa katawhan. Sa ilang gisugot ang maong mga kasugoan nabatonan nila ang dakong kaayohan. Apan ang pila ka kasugoan nagdala usab sa silot nga kamatayon tungod sa pagsupak. Sa ulahi, si Jesus nahimong manalagna nga labaw kay kang Moises. Ang iyang gitudlo maoy “mga pulong sa kinabuhing walay kataposan,” ug ang tinuyong pagkapakyas sa pagsugot sa maong mga pulong motultol sa kamatayon nga gikan niana wala ing kaluwasan. Busa, pagkahinungdanong atong ibutang sa kasingkasing ang iyang ginasulti!—Juan 6:66-69; 3:36; Buhat 3:19-23.
5. Unsay mohimo sa pagpasakop kang Jesus nga madanihon kaayo?
5 Alang sa pila ka tawo, ang ideya sa pagpasakop ngadto sa usa ka pangulo daw dili tilinguhaon. Ilang nakita ang hilabihang pag-abusar sa awtoridad. Apan ang kaugalingong mga pulong ni Jesus nagapasibaw sa espiritu nga mapasaligon. Siya mainitong nagadapit kanato: “Umari kamo, kamong tanang nabudlayan ug nabug-atan, ug akong papahulayon kamo. Isangon ninyo ang akong yugo ug makakat-on gikan kanako, kay ako malumo ug mapaubsanon sa kasingkasing, ug kamo makakaplag ug pahulay alang sa inyong mga kalag. Kay ang akong yugo maayo ug ang akong lulan magaan.” (Mateo 11:28-30) Pagkanindot nga kalaoman! Kadtong mamati nianang mainitong pagdapit, nga magabutang sa ilang bug-os nga pagsalig diha kaniya, dili mahiubos. (Roma 10:11) Ilang maagoman ang kasegurohan sama sa iya sa mga karnero diha sa panon sa usa ka mahigugmaong magbalantay.
Ang Tinuod nga Maayong Magbalantay
6. (a) Sa unsang paagi ang nasod sa Israel nahisamag mga karnero sa usa ka toril? (b) Unsay gisaad ni Jehova mahitungod sa magbalantay alang niining maong “mga karnero,” ug sa unsang paagi kini natuman?
6 Ang nasod sa Israel nahisamag usa ka panon sa mga karnero nga iya ni Jehova. Iyang gitagana ang tugon sa Kasugoan, nga nagsilbing mapanaliporong mga paril sa usa ka panon sa karnero, nga nagbulag kanila pinaagi sa koral gikan sa dalan sa kinabuhi sa dili-diyosnong Hentil nga kanasoran. Kadto nagtudlo usab sa mga mosanong ngadto sa Mesiyas. (Efeso 2:14-16; Galacia 3:24) Mahitungod sa maong Mesiyanikong Magbalantay-Hari, si Jehova mitagna: “Akong pagabangonon ibabaw sa [akong mga karnero] ang usa ka magbalantay, ug siya magapakaon kanila, bisan ang akong alagad si David.” (Ezekiel 34:23, 31) Kini wala magpasabot nga si David, si kinsa niadto patay na, sa personal magamando na usab ingong hari sa katawhan sa Diyos. Hinunoa, gikan sa harianong banay ni David bangonon ni Jehova ang usa ka magbalantay-hari nga pinaagi kaniya itagana sa Diyos ang kasegurohan. (Jeremias 23:5, 6) Sa nagkalainlaing panahon ang mga tawo bakakong nangangkong sila mao ang Mesiyanikong manluluwas, apan sa tuig 29 K.P., gigamit ni Jehova si Juan Bawtista sa pagpailaila kang Jesu-Kristo ngadto sa “mga karnero” sa Israel ingong ang usa nga tinuod gipadala sa Diyos, ang Mesiyas nga may tinuod nga kredensiyal. Kadto mao ang langitnong Anak sa Diyos, kansang prinsipyo sa kinabuhi gibalhin gikan sa tagoangkan sa usa ka Hudiyong ulay aron siya matawo ngadto sa harianong banay ni David. Ang ngalang David nagkahulogang “hinigugma,” busa, sa tukma, tapos sa bawtismo ni Jesus sa tubig, gipahayag nga madungog ni Jehova gikan sa langit: “Ikaw mao ang akong Anak, ang hinigugma; ikaw akong giuyonan.”—Marcos 1:11.
7. (a) Ingon “maayong magbalantay,” giunsa pagpasundayag ni Jesus ang giladmon sa iyang mahigugmaong paghunahuna sa “mga karnero”? (b) Sa unsang paagi kana lahi sa kagawian sa unauna, bakak nga mga mesiyas?
7 Walay upat ka bulan una siya mamatay, si Jesus miingon: “Ako mao ang maayong magbalantay; ang maayong magbalantay nagatugyan sa iyang kalag alang sa mga karnero.” (Juan 10:11) Iyang gipalahi ang iyang papel sa iya sa bakak nga mga mesiyas nga nangabot nga unauna, nga miingon: “Siya nga dili mosulod ngadto sa toril sa karnero agi sa pultahan kondili mokatkat sa laing dapit, kana siya maoy kawatan ug tulisan. Apan siya nga mosulod agi sa pultahan mao ang magbalantay sa mga karnero. Ang magbalantay sa pultahan magaabli alang kaniya, ug ang mga karnero magapatalinghog sa iyang tingog, ug siya magatawag sa iyang kaugalingong mga karnero pinaagi sa ngalan ug magatultol kanila ngadto sa gawas. Sa dihang iyang mabatonan ang tanang iya, siya magauna kanila, ug ang mga karnero mosunod kaniya, tungod kay sila nakaila sa iyang tingog. Ang usa ka estranghero dili gayod mosunod kondili mokalagiw gikan kaniya, tungod kay sila dili makaila sa tingog sa mga estranghero.”—Juan 10:1-5, 8.
8. (a) Ngadto sa unsang bag-ong “toril” gitultolan ni Jesus ang mga Hudiyo nga nagsunod kaniya? (b) Pila ang iyang gidala ngadto sa maong toril?
8 Kadtong diha sa Hudiyonhong toril sa karnero nga misanong sa pagtultol sa tugon sa Kasugoan nagdawat kang Jesus ingong Mesiyas dihang si Juan Bawtismo ingong “magbalantay sa pultahan” nagpailaila kaniya. Sila mao ang “kaugalingong mga karnero” ni Jesus, ug iyang gitultolan sila ngadto sa usa ka bag-ong masambingayong toril sa karnero, o koral, nga iya ni Jehova. Ang maong toril naghawas sa pinaborang relasyon uban kang Jehova pinasukad sa bag-ong tugon, nga gihimo uban sa espirituwal nga Israel ug gibalido sa kaugalingong dugo ni Jesus. Pinaagi sa maong tugon naposibleng sila makabaton ug langitnong kinabuhi uban kang Kristo ingong mao ang “binhi” ni Abraham nga pinaagi kaniya ang mga panalangin moabot sa katawhan sa tanang nasod. (Hebreohanon 8:6; 9:24; 10:19-22; Genesis 22:18) Si Jesu-Kristo, si kinsa gibanhaw sa Diyos gikan sa patay ug gipasig-uli ngadto sa langitnong kinabuhi, mao ang “pultahan” niining bag-ong-tugong toril. Nahiuyon sa katuyoan sa iyang Amahan, iyang gidala ngadto sa maong toril ang limitado lamang gidaghanon—144,000 lamang—una gikan sa taliwala sa mga Hudiyo, ugsa ulahi gikan sa taliwala sa mga Samarianhon ug mga Hentil. Ingong Maayong Magbalantay, si Jesus nakaila sa matag usa sa iyang mga karnero sa ngalan ug nagahatag kanilag mahigugmaong personal nga pag-atiman ug pagtagad.—Juan 10:7, 9; Pinadayag 14:1-3.
9. Kinsa ang “ubang mga karnero” nga ginatumong ni Jesus, ug kanus-a sila tigoma?
9 Bisan pa niana, si Jesus wala maglimite sa iyang pagkamagbalantay sa maong “gamay nga panon” nga magbaton sa langitnong Gingharian. (Lucas 12:32) Siya miingon usab: “Ako adunay ubang mga karnero, nga wala niining torila; sila usab akong pagadad-on, ug sila magapatalinghog sa akong tingog, ug sila mahimong usa ka panon, usa ka magbalantay.” (Juan 10:16) Kinsa ba kini sila? Sila maoy mga tawong wala sa bag-ong tugon; sila dili espirituwal nga mga Israelinhon. Sila maoy mga tawong natigom sulod sa tagana ni Jehova alang sa kinabuhing dayon sa yuta pinasukad sa ilang pagtuo sa bili sa halad sa dugo ni Jesus. Daghan kanila suod nga nakig-uban sa mga membro sa espirituwal nga Israel karon samtang kini sila ania pa sa yuta, ug uban kanila, sila nagasalig kang Kristo ingong Maayong Magbalantay. Kadtong sakop sa “ubang mga karnero” nga buhi pa sa yuta ug karon napadayag na mao ang “dakong panon” sa Pinadayag 7:9, 10, 14, kinsa adunay kalaomang maluwas sa umaabot nga dakong kasakitan.
10. Unsay gikinahanglan aron mahimong usa nianang “ubang mga karnero”?
10 Aron mohaom sa kabatbatan sa Bibliya sa maong “ubang mga karnero” nga panalipdan ug luwason sa Maayong Magbalantay, ang usa ka tawo kinahanglang “magapatalinghog” sa Iyang tingog ug mohatag ug ebidensiya nga tinuod siyang bahin sa “usa ka panon” nga nagaapil sa tinuod nga mga manununod sa langitnong Gingharian. Ginabuhat ba nimo kana? Unsa ka maampingon ang imong pagpatalinghog sa iyang tingog?
11. Unsay mohatag ebidensiya nga kita tinuod “nagapatalinghog” sa giingon ni Jesus sa Juan 15:12?
11 Pihong ikaw nasayod sa giingon ni Jesus: “Kini mao ang akong sugo, nga kamo maghigugmaay sa usag usa sama nga ako nahigugma kaninyo.” (Juan 15:12) Sa unsang paagi ang imong kinabuhi apektado sa maong sugo? Ang gugma ba nga imong ginapakita mao ang matang nga gihatagan ni Jesus ug panig-ingnan? Kana ba tinuod masakripisyohon-sa-kaugalingon? Ang imong mga buhat ug mga pagbati ba nagahatag ebidensiya sa maong gugma ngadto sa tanan diha sa Kristohanong kongregasyon ug ngadto sa mga sakop sa imong kaugalingong panimalay?
12. (a) Kon kita tinuod ‘gitudloan pinaagi ni Jesus,’ unsa ka dakong kausaban ang atong pagahimoon sa atong kaugalingon? (b) Busa, unsay angay natong pagabuhaton sa mga butang atong nakat-onan gikan sa Bibliya?
12 Si apostol Pablo miingong kon tinuod kitang ‘nagapamati’ kang Jesus ug “gitudloan niya,” ang tibuok natong pagkatawo mausab. Atong ihiklin ang pagkatawo nga nahiuyon sa atong kanhing dalan sa kinabuhi ug isul-ob ang “bag-ong pagkatawo,” nga nagapabanaag sa maayong mga hiyas ni Jehova. (Efeso 4:17-24; Colosas 3:8-14) Samtang magtuon ka sa Bibliya, nagapalandong ka bang seryoso sa mga bahin nga kinahanglang pagahimoon nimo ang mga pagpasibo aron sa pagpahimuot sa Diyos? Imong bang ginahimo ang maong kausaban nga binuotan? Imo bang gitagad ang hinungdanong buluhatong gisugo ni Jesus alang sa atong adlaw—ang pagwali sa maayong balita sa natukod nga Gingharian sa Diyos—ug ikaw nagapangita bag mga paagi sa pag-apil niana? Ang pagpabili ba sa dili-takos nga kalulot sa Diyos nganha kanimo nagapukaw diha kanimo sa kinasingkasing nga tinguha sa pagbuhat niana?—Mateo 24:14.
13. (a) Kon kita dili mag-amping, sa unsang paagi kita malimbongan sa atong mga kasingkasing? (b) Nan, sa unsang gidak-on kita magasunod sa mga lakang ni Kristo?
13 Magbantay kitang dili kita limbongan sa atong mga kasingkasing. Ang minilyong tawo nagaangkong nagtuo kang Jesu-Kristo, ug tingali sila makakutlog pila ka butang iyang gitudlo, apan ilang ipadapat lamang kon unsay ilang makaplagang sayon. Ang pipila tingali molikay sa pagbuhat sa kagawiang ilang giisip nga daotan kaayo. Ang kalaoman sa kinabuhi sa Paraisong yuta ilalom sa Gingharian sa Diyos daw maayong pamation alang kanila, ug sila tingali nagakalipay sa pagpakig-uban karon niadtong sinserong naningkamot sa pagpadapat sa Kristohanong mga prinsipyo diha sa ilang mga kinabuhi. Apan kon buot natong maapil niadtong maluwas ngadto sa “bag-ong yuta,” kinahanglang magpatalinghog kita sa tanang butang ginasulti ni Jesus. Hinungdanong atong pabilhang kita dili malamposong makatultol sa atong kaugalingong mga lakang. Kinahanglang kita mamati sa Anak sa Diyos, ang usang gisugo ni Jehova ingong Manluluwas sa Iyang katawhan, ug maampingong magasunod sa iyang mga lakang.—Jeremias 10:23; Mateo 7:21-27; 1 Pedro 2:21.