Mga Batan-on Nangutana . . .

Sa Unsang Paagi Makaalagad Ako sa Diyos kon Supak ang Akong mga Ginikanan?

SILA gibunalan, gipailalom sa mga pagbahad ug mga paghikaw, ug sa kataposan gipugos sa pagpalayas sa balay. Ang tinubdan sa maong pagdaugdaog? Mga sakop sa ilang kaugalingong pamilya. Kana ang kasinatian ni Kamal, Chani, ug Jaswinder, tulo ka babayeng managsoon nga taga-India nga nagapuyo sa Inglaterra. Buot nilang mahimong mga Kristohanon, pero ang ilang mga ginikanan—sa pagkamatuod ang tibuok nilang pamilya—mapait nga nagsupak sa ilang pagbiya sa tradisyonal relihiyosong mga pagtuo.

Tingali ikaw anaa sa susamang kahimtang. Pinaagi sa pagtuon sa Bibliya, ikaw nakaugmad sa tinguha nga mahimong usa nga ‘nagasimba sa Amahan uban sa espiritu ug kamatuoran.’ (Juan 4:23) Hinuon, tingali ang imong mga ginikanan nawad-ag kasibot sa relihiyon ug ang imong bag-ong-kaplag nga pagtuo nagasupak sa ilang dugay-nang-gituohang relihiyosong mga pagtuo. Bisan kon unsa man ang kahimtang, angay dili ka matingala nga nagalungtad ang pagsupak sa pamilya. Si Jesus mismo nagtagna nga ang matuod nga Kristiyanidad kadaghanan magabahin sa mga pamilya. (Mateo 10:34-37) Ang pangutana mao, Unsaon man nimo pag-atubang ang kahimtang?

Si Kamal, Chani, ug Jaswinder mibarog nga malig-on dapig sa Kasulatanhong mga prinsipyo nga ilang nakat-onan. Sila nakaarang sa pagsimba nga libre tapos sila mobalhin sa ilang kaugalingon gikan sa industriyal nga Midlands ngadto sa habagatang bahin sa Inglaterra. Hinunoa, kalagmitan ikaw sa legal sakop pa sa imong mga ginikanan. Nan, unsay imong mahimo, samtang nagapuyo sa balay, sa pagbuntog sa pagsupak gikan niadtong imong gihigugma? Ang Bibliya nagahatag ug pila ka giyang mga prinsipyo.

Hupti ang Matinahorong Tinamdan

Sa 1 Pedro 3:15 ang Bibliya nagadasig kanato nga ipakig-ambit ang atong pagtuo “uban ang kalumo ug halalom nga pagtahod.” Apan tingali ikaw nadasig kaayo sa bag-ong-nakat-onang mga kamatuoran sa Bibliya nga lagmit ikaw dominante o pugoso bahin sa imong mga pagtuo, tingali nagahimo pa sa imong mga ginikanan nga buangbuang tan-awon. Walay mausa ang gustong mopatim-aw nga ignorante. Busa kon kanunay kang magtul-id sa imong mga ginikanan ingong sangpotanan sa mga butang nga imong natun-an, dahoma ang negatibong reaksiyon sa ilang bahin.

Si Rita, usa ka tin-edyer nga nagpuyo sa Alemanya niadto, misugid: “Ang tanan nga akong natun-an ako dayong gisugilon sa akong mga ginikanan, sa pagkamatuod nagsulti kanila nga ang ilang gituohan dili husto.” Ang mga ginikanan dunay katungod sa pagbaton ug personal nga mga opinyon ug mga pagtuo nga dili sawayon—ilabina sa ilang kaugalingong mga anak. Miangkon si Rita: “Angay untang ako matinahoron kanila ug mag-ila sa ilang kaugalingong pagtuo sa Diyos.”

Giingnan ni Pablo ang batan-ong si Timoteo nga siya angay “dili magsaway nga grabe sa usa ka tigulang.” Dili ba usab kana mapadapat sa balay, uban sa imong mga ginikanan nga nahigugma kanimo?—1 Timoteo 5:1.

Sugta ang Imong mga Ginikanan

“Mga anak, magmasinugtanon kamo sa inyong mga ginikanan,” nagasugo ang Bibliya. (Efeso 6:1) Gisunod ni Kay ang maong prinsipyo. Siya nakahibalag sa mga Saksi ni Jehova sa dihang siya otso anyos pa lang. “Ang akong mga ginikanan nagmatuto kanamo nga mahimong matinugoton sa uban,” matud ni Kay, “mao nga ako ilang gitugotan sa pagtuon sa Bibliya ug pagtambong sa mga tigom.” Bisan pag ingon, si Kay kinahanglang manlimbasog sa pagtino nga ang tanang iyang gisulti ug gibuhat mibanaag nga maayo sa iyang pagtuo.

“Samtang ako misugod sa pagpakig-uban sa katawhan ni Jehova,” si Kay mipatin-aw, “akong naamgohan nga kon ako magmasukihon, dili lamang nga dili kana magustohan sa akong mga ginikanan kondili dili nila makita ang kamatuoran ingon nga maayong impluwensiya kanako. Busa kon ako sugoon sa pagdala sa basura sa gawas, mouli sa balay sa usa ka tinong oras, magbansay sa piano, o bisan unsa, akong paningkamotan ang pagsugot kutob sa akong mahimo. Ako dili gayod moretobar.”

Ang mga ginikanan ni Kay wala gayod makatuo usab sa iyang mga pagtuo. Bisan pa niana, tungod sa iyang pagkamasinugtanon, siya nakaarang sa pagtuman sa iyang pagtuo nga walay pagsupak, nga nahimong bawtismadong Kristohanon sa edad 19.

Pakigkomunikar sa Imong mga Ginikanan

Matud sa makinaadmanong si Haring Solomon: “Ako nahimong usa ka tinuod nga anak sa akong amahan, malumo ug ang bugtong nga anak atubangan sa akong inahan.” (Proverbio 4:3) Oo, ang kamatuorang ang imong mga ginikanan wala magtuo usab sa imong pagtuo wala maghimo kanila nga imong mga kaaway. Angay gihapon nga ikaw manlimbasog nga mahimong “usa ka tinuod nga anak lalaki” o babaye. Sulayi ang pagsabot sa ilang dulot nga kasakit tungod sa imong pagbaton ug pagtuo nga daw katingad-anan alang kanila. Sa samang panahon, ipakig-ambit nga walay pagpanagana ang imong mga pagbati ug mga kabalaka kanila. Matuod, tungod kay ang imong mga hunahuna karon giniyahan na sa mga prinsipyo sa Bibliya, tingali ikaw mosukwahi sa imong mga ginikanan bahin sa pila ka isyu.—1 Corinto 2:14.

Ang usa ka batan-ong lalaki nga ginganlag Alan, pananglitan, buot mogugol ug dugang panahon sa Kristohanong ministeryo. Ugaling, buot sa iyang mga ginikanan nga humanon ang iyang edukasyon sa kolehiyo. Si Alan nahinumdom: “Sa akong hunahuna ako may diyutayng kahadlok sa pag-atubang sa akong amahan bahin sa maong dakong desisyon. Mao nga mihukom ako sa pag-undang sa pagtungha sa sekreto—ug kana nagpahinabog daghang suliran. Kinahanglang ako maningkamot pag-ayo human niadto sa pag-ugmad sa among pagsalig sa usag usa, samtang kon ako pang gipatin-aw ang akong mga plano, bisan pag tingali kadto lisod sa sinugdan, sa akong hunahuna siya motahod sa dugang kanako, ug nakalingkawas unta kaming duha sa daghang kaguol.”

Apan unsay nagpahinabo nga si Alan maukon-ukonon kaayo bahin sa pagpakigsulti sa iyang mga ginikanan? Siya misugid: “Posible ang pag-ugmad sa pagbating gilutos dihang ang mga ginikanan mobabag sa butang buot tingali natong buhaton. Kita tingali maghunahuna: ‘Kini mao ang akong nakat-onan! Ang usa ka tawo batok sa iyang amahan; ang iyang mga kaaway, mga tawong sakop sa iyang panimalay!’” (Mateo 10:35, 36) Nahibaloan ni Alan sa lisod nga paagi nga ang mga ginikanan dili kinahanglang isipong mga kaaway. Siya karon nagatambag: “Pakigkomunikar! Ipahibalo kanila ang imong mga pagbati. Sa akong hunahuna ang kadaghanang ginikanan mamati—kon ilang makita nga tinuod anaa ang sinseridad.”

Bisan pag ikaw kinahanglang malig-on dapig sa diyosnong mga prinsipyo, “kon mahimo, samtang nagaagad kaninyo, magmadaiton sa tanang tawo.” (Roma 12:18) Pinaagi sa pagpahibalo sa imong mga ginikanan kon unsa gayod ang imong pagbati bahin sa pila ka butang, kadaghanang ang mga sukmatay malikayan o mamenosan. Hinuon, kon mopugos ang imong mga ginikanan nga imong subayon ang usa ka dalan, sa tanang paagi sugta sila basta kanang dalana dili supak sa mga prinsipyo sa Bibliya. Inay mahimong dili makapailin-ilin, “ipadayag ang inyong pagkamakataronganon.”—Filipos 4:5.

Batoni ang Pagpaluyo sa Kaubang mga Kristohanon

“Pamati sa imong amahan nga nanganak kanimo, ug ayaw pagtamaya ang imong inahan,” nagaingon ang Proverbio 23:22. Hinuon, may panahong ang imong dili-magtutuo nga mga ginikanan tingali malisdan sa pagsabot sa imong mga kabalaka. Pananglitan, ang bayong nga ginganlag si John misulay sa pagpakighisgot sa usa ka prinsipyo uban sa iyang amahan. Ang tubag sa iyang amahan? “Dili ko buot magsalig sa usa ka Bibliya o usa ka organisasyon, busa bahala ka na sa imong kaugalingon!”

Apan ikaw wala gayod magkinaugalingon. Gisaad ni Jesus ang pagpaluyo sa espirituwal nga “mga igsoong lalaki ug babaye” sulod sa Kristohanong kongregasyon. (Marcos 10:30) Si Kay, nga gihisgotan ganina, nakakaplag nga kini matuod sa iyang bahin. “Ang akong Kristohanong mga igsoong lalaki ug babaye,” siya nahinumdom, “nahimong sama sa akong pamilya.” Dili hinuon nga si bisan kinsang laing tawo, bisan unsa ka minahal, makapuli sa tanang bahin sa tinuod nga ginikanan. Bisan pa niana, sulod sa kongregasyon kita makakaplag niadtong mahimong minahal nato—sama sa mga amahan ug mga inahan—ug makahatag kanatog bililhong pahimangno ug tambag.—1 Corinto 4:15.

Hupti ang Positibong Tinamdan!

Tinuod, bisan uban sa tabang sa nahaunang tambag, pihong makaplagan mong lisod gayod ang imong kahimtang. Apan hinumdomi: Mahimong mausab ang mga tawo ug mga kahimtang! Ang tulo ka Indian nga managsoong babaye nga gihisgotan sa sinugdan nagtaho: “Tungod sa among kalig-on ug matinahorong tinamdan, amo na karong gipahimuslan ang malipayong relasyon sa tibuok pamilya.” Ang usa ka babayeng Ingles nga ginganlag Jane susamang misulat: “Kinahanglang ako manlimbasog sa makadaghan ug makigbisog dapig sa kamatuoran, apan karon ang akong mga ginikanan mas daling nagadawat sa akong mga pagtuo ingong matuod nga Kristohanon, ug ako nagapanglantaw nga mabawtismohan sa dili madugay.”

Sa pila ka kahimtang ang mga ginikanan, kay natandog sa maayo kaayong panig-ingnan sa ilang kaugalingong mga anak, nangahimong dedikadong mga alagad ni Jehova mismo! Busa posible nga imong maangkon ang pagtahod sa imong diyosnong dalan sa panlihok ug mahimong panig-ingnan dili lamang ngadto sa “mga matinuohon” kondili alang usab niadtong gimahal nimo pag-ayo sa panimalay. (1 Timoteo 4:12) Ayaw paghunong sa imong determinasyon sa pag-alagad sa Diyos. Mainampoong sunda ang mga sugyot nga gihimo dinhi, ug salig kang Jehova. Nagpasalig ang salmista: “Itugyan mo kang Jehova ang imong dalan, ug sumalig ka kaniya, ug siya mismo molihok.”—Salmo 37:5.

[Blurb sa panid 20]

Kining tulo ka batan-ong babaye nagpabiling malig-on sa ilang Kristohanong pagtuo bisan pa sa pagsupak sa pamilya