Ang Alemang mga Luterano Nameligro Bang Kaliwatan?

Sinulat sa koresponsal sa Pagmata! sa Pederal nga Republika sa Alemanya

ANG pipila sa mga tumatan-aw tingali nakurat sa pagkabati sa mosunod nga mga pulong diha sa telebisyon sa Alemanya: “Ang Luteranong Iglesya wala gayoy kaugmaon.” Labi pang makapakurat mao ang kamatuorang kana naggikan sa rehiyon mismo nga natawhan ni Martin Luther, ang magtutukod nianang iglesyaha ug amahan sa Repormasyon.a

Matuod, ang United Evangelical Lutheran Church sa Alemanya dunay mga 25 milyong membro, nga, sumala sa kataposang opisyal nga senso, maoy mga 45 ka pilo kay sa nahisakop sa iponon ang tanang ubang Protestanteng pundok sa Alemanya. Bisan pa niana, naguba ang iglesya, nga gisimbolohan sa tukma diha sa atong hapin sa kagun-oban sa Kaiser Wilhelm Memorial nga Simbahan sa West Berlin.

Niadtong 1961, kapin ug 50 porsiento sa tanang Aleman maoy Luterano. Sa pagka 1970, ang numero 49 porsiento, pagka 1980, 46 porsiento. Dayon ang kahimtang daw naarang-arang. Ang usa ka inadlawng Alemang mantalaan mitaho sa sinugdan sa 1981: “Ang Luteranong Iglesya sa Alemanya naulian sa mga kakulian niini sa napulo ka tuig kanhi. . . Ang pagbulag sa mga membro sa iglesya . . . ang gidaghanon niini dili na kahadlokan.”

Apan ang mga numero sa mga membro alang sa 1984 nagpadayag nga ahat ang maong kamalaomon. Ang mga banabana karon mao nga ang iglesya mawad-an sa laing 4,500,000 ka membro sulod sa pulo ka tuig. Busa sa pagkatuig 2030, un-tersiya lamang o menos sa populasyon ang Luterano.

Nganong Sila Nagabiya?

Bahin sa gihisgotan nang 1986 nga programa sa telebisyon, pito ka kanhi membro sa iglesya mihatag sa ilang mga hinungdan sa pagbagutbot: ang pagsupak sa iglesya sa mga dula sa ma-Dominggo, pagsuportar niini sa panalapi sa mga kalihokan sa komunistang mga gerilya, baroganan niini bahin sa mga polisa sa depensa sa gobyerno, pagpuwera sa duha ka bayot nga pastor, ug pagpabaya niini sa pag-atiman sa kahayopan. Ang lain pa nayugot sa kahikayan diin ang buhis sa simbahan ikidan sa kinitaan sa mga membro. Makahuloganon, duha lang ang naghisgot ug Diyos. Ug ngani dili ba ang relihiyon kabahin man niana?

Bisag seryoso, labi pang makadisturbo kay sa pag-us-os sa mga numero, matud ni Johannes Hansen, usa ka iladong Luteranong teologo, mao “ang mingaw kaayong relihiyosong kahimtang sa mga membro sa iglesya.” Kini ang hinungdan sa kamatuoran nga sa kasagarang Dominggo walay 6 porsiento kanila ang nagatambong sa mga serbisyo sa simbahan, mas diyutay pa diha sa dagkong mga siyudad. Usa lamang sa upat nagaisip nga Kristohanong mga kinahanglanon ang pagtambong sa simbahan o pagbasa sa Bibliya. Ngani, mga walo sa napulo nagaingon nga aron mahimong maayong Luterano ang usa ka tawo kinahanglan bawtismado ug kompirmado, ug unya magkinabuhing ligdong ug kasaligan. Dili katingad-ang ang Frankfurter Allgemeine Zeitung mipahayag diha sa usa ka editoryal: “Ang kapeligrohan alang sa Luteranong Iglesya wala magagikan sa gidaghanon kondili nagagikan sa kakulang niini sa espirituwal nga kusog!”

Ang mga membro sa iglesya nga kulang ug espirituwal nga kusog nagaisip sa ilang iglesya sumala niana. Ilang gidayeg ang tugob niining kasaysayan, gipasigarbo ang matahom nga mga simbahan niini, ug gipahimuslan ang sosyal nga mga benepisyong ginahatag niini. Apan, kon bahin sa “pagkaplag sa Diyos,” palabihon sa daghan ang pagpangita kaniya diha sa kinaiyahan inay kay diha sa iglesya. Kini mitultol sa pagsukna sa usa ka lider sa iglesya nga makantalitahon nganong sila dili man lang mopadayon ug ipadumala ang serbisyo sa paglubong sa Departamento sa Panglasang inay sa iglesya.

“Ang butang daw nakulang,” mikomento ang usa ka magasing U.S. ubay-ubayng mga tuig kanhi, “mao ang dakong gugma alang sa Diyos ug sa iyang kamatuoran nga nagtimaan sa unang mga Luterano.” Nganong daghan kaayong Luterano nagaisip sa ilang iglesya nga sama lamag kombenyenteng gambalay alang sa bawtismo sa bata, kompirma sa tin-edyer, ug seremonyas sa kasal sa hamtong? Nganong sila nagapangita sa Diyos diha sa kinaiyahan ug mobalik lamang sa simbahan sa pagkamatay alang sa “desenteng paglubong”? Nganong adunay kakulang sa espirituwal nga kusog?

[Mga footnote]