Ang Hunahuna sa Bibliya

Maayo na ba ang Imong Relihiyon Alang sa Diyos?

“ANG tanan dinhi maluwas sa iyang kaugalingong paagi,” nanghambog si Frederick ang Bantogan sa Prussia bahin sa relihiyosong pagtugot sa iyang nasod. Karon, duha ka siglo sa ulahi, gikutlo sa mga Aleman ang iyang mga pulong nga daw kana Balaang Sinulat, sa pagpamatuod nga ang tanang relihiyon mao lamay lainlaing dalan ngadto sa mao rang Diyos.

‘Kon buot sabton,’ sila nangatarongan, ‘usa lang ang Diyos, dili ba?’ Apan kon mao man, nganong kining lainlaing paagi kono ngadto sa mao rang Diyos nagatudlog nagkasumpaking mga butang bahin kaniya? Sa unsang paagi kini nahiuyon sa iyang pagka “Diyos, dili sa kagubot, kondili sa pakigdait”?—1 Corinto 14:33.

Daghang “mga Diyos” ug Daghang “mga Ginoo”?

Matuod, miingon ang Kristohanong apostol Pablo: “Nahibalo kita nga . . . usa lamang ang Diyos.” Apan matikdi ang iyang katin-awan: “Apan bisan pa anaa kadtong gitawag ‘mga diyos,’ kon kaha sa langit o sa yuta, maingon nga adunay daghang ‘mga diyos’ ug daghang ‘mga ginoo,’ sa pagkamatuod alang kanato adunay usa lamang ka Diyos ang Amahan.” (1 Corinto 8:4-6) Tin-aw, ang pangatarongan ni Pablo mao nga ang pila ka tawo nagasimba sa mga diyos nga wala maglungtad. Apan ang mga Kristohanon nagaisip sa usa lang ka Diyos nga takos simbahon, ang usa “kansang ngalan mao si Jehova.”—Salmo 83:18.

“Usa ka Diyos ang Amahan”

Ang usa ka tawhanong amahan nga interesado sa kaayohan sa iyang mga anak ug matinguhaon sa pagpanalipod kanila batok sa kapeligrohan nagabutang ug mga giya ug mga prinsipyo aron ilang pagasundon. Bisan pag mahigugmaong nagatagad sa ilang tinagsa ka panginahanglan ug limitasyon, apan iyang ginapangayo nga silang tanan mosunod sa samang hugpong sa mga sukdanan.

Bisan tuod nagaisip sa matag tawo ingong laing indibiduwal, ang langitnong Amahan sa katawhan nagabaod nga ang tanan niyang linalang magsunod sa samang mga balaod ug magkinabuhi uyon sa samang mga prinsipyo. Kining mga prinsipyoha magkalainlain gikan sa tawo ngadto sa tawo o gikan sa nasod ngadto sa nasod. Kon buot sabton, kon sala nga ang usa ka Katoliko magbatog aborsiyon, dili ba sala usab kana alang sa usa ka membro sa liberal nga Protestanteng iglesya? O kon usa ka sala sa usa ka Amerikanong pundamentalista ang pag-inom ug alkoholikong ilimnon, dili ba usab sala kana alang sa Uropanhong Katoliko nga nagainom ug serbesa o bino panahon sa pagpangaon?

Mga Bunga Magatino sa Matuod nga Relihiyon

Tapos sa pagkahulog sa napulog-tribong amihanang gingharian sa Israel ngadto sa Asirya sa ikawalong siglo W.K.P., ang katawhan gikan sa ubang mga bahin sa Asiryanhong dominyo gibalhin ngadto sa Samaria. Ang maong bag-ong mga molupyo nagpadayon “sa pagbuhat sumala sa ilang kanhing mga relihiyon.” Apan ang mao bang mga relihiyon lainlaing mga dalan sa pagduol sa matuod nga Diyos si Jehova? Dili, kay ang teksto yanong nagaingon: “Walay mausa ang nahadlok kang Jehova ug walay nagbuhat sumala sa iyang kalagdaan ug iyang hudisyal nga mga hukom.”—2 Hari 17:34.

Makataronganon, ang mga relihiyon nga dili manumbaling sa mga balaod sa Diyos dili mahimong kahimut-anan sa Diyos. Kini nagaapil sa prinsipyong gipahayag ni Jesus: “Pinaagi niini ang tanan mahibalo nga kamo akong mga tinun-an, kon kamo adunay gugma sa inyong taliwala.” Sa unsang paagi ang usa ka relihiyon makahawas sa “Diyos [kinsa] maoy gugma” kon ang mga membro niini wala makabaton niining ilhanang bunga sa matuod nga relihiyon?—Juan 13:35; 1 Juan 4:8.

Ang usa ka relihiyon nga tinuod nagahawas sa usa ka matuod nga Diyos kinahanglang magpatunghag mga tawong sama kaniya: mahigugmaon, malipayon, makigdaiton, hataas ug pailob, maluluton, maayo, malumo, ug may pagpugong-sa-kaugalingon. (Galacia 5:22, 23) Kinahanglang kini magpatunghag mga tawo nga may lig-ong pagtuo nga lig-ong nagalaban sa iyang mga sukdanan sa kagawian ug moralidad. “Pinaagi sa ilang mga bunga inyong mailhan sila,” matud ni Jesus, nga migamit sa panig-ingnan sa usa ka kahoy. ‘Kadtong nagabuhat sa kabubut-on sa Diyos makasulod sa gingharian sa mga langit.’ Kon ang usa ka relihiyon magpatunghag mga tawo nga nagabunga sa daotang mga bunga, unsay magarekomendar niana nga kana maayo?—Mateo 7:16-23.

Suknaa ang imong kaugalingon: Ang kadaghanang relihiyon nagatudlo nga daotan ang pagpatay, apan unsay ginabuhat sa ilang mga membro sa panahon sa gubat? Ang kadaghanan nagatudlo nga ang kaminyoon maoy usa ka sagradong institusyon, apan unsa ang rekord sa ilang mga membro kon bahin sa diborsiyo ug sa unaunang sekso ug pangerida?

Mga Pulong Batok mga Aksiyon

Niadtong 1982 ang usa ka propesor sa pisika sa usa ka unibersidad sa Silangang Uropa miingon sa pagkahimong usa sa mga Saksi ni Jehova: “Akong nasayrang adunay usa lamang ka relihiyosong organisasyon sa yuta nga takos makahubit sa tin-aw sa mga utlanan sa relatibong kagawasan. Ang nakapakombinsir ilabina kanako sa panahon sa akong pagtuon uban sa mga Saksi ni Jehova mao ang kamatuorang kining organisasyona dunay kusog sa pagbaod sa mga membro niini nga sila magpabilin sulod nianang maong mga utlanan.”

Ang uban bang relihiyon makaingon niana? Pananglitan, panahon sa iyang 1986 nga mensahe sa Pasko, si Papa Juan Paulo II miawhag nga taposon ang pagdumot, nga miingon nga “gugma lamang ang makabag-o sa nawong sa atong planeta.” Apan malamposon ba ang Iglesya Katolika sa paghimo niini taliwala sa iyang mga membro? Ug kon ang tanang relihiyon mao lamay lainlaing dalan padulong sa “Diyos sa pakigdait,” nganong gamay kaayong pakigdait ang hikaplagan taliwala sa mga membro niini?—Filipos 4:9.

Nakaplagan Nila ang Tubag

Si Kurt nawad-ag gana sa iyang relihiyon kay kini “nagkonsentir sa halos tanang butang ug nagpasagad sa seryosong pagtuon sa Pulong sa Diyos.” Si Dieter nakurat sa pagkasayod nga ang iyang pastor dili gani motuo sa Bibliya. Si Günter mibati nga “ang pag-alagad sa Diyos nagalangkit sa labaw pa kay sa pagpamati sa mga wali ug sa pag-awit ug mga himno.” Silang tulo karon nakakaplag ug katagbawan pinaagi sa pag-apil sa dakong programa sa pagbansay sa Bibliya nga gihimo sa mga Saksi ni Jehova.

Ayaw itugot nga ang kalibotanong panghunahuna makapahisalaag kanimo sa pagtuo nga ‘ang tanan maluwas sa iyang kaugalingong paagi.’ Ang pagtuon sa Bibliya motabang nimo nga makakat-on sa dugang bahin kang Jehova, ang bugtong matuod nga Diyos, ug kang Jesu-Kristo, ang iyang Anak. Kini motultol usab kanimo ngadto sa bugtong matuod nga relihiyon nga nagahawas Kaniya sa angay nga paagi.