Unsa ka Luwas ang mga Video Display Terminal?

ANG mga kompiyoter nga video display terminal (VDT’s), sama nianang gigamit sa word processing, maoy nagapuli na sa mga makinelya ug ubang mga gamit sa opisina diha sa daghang mga negosyo. Ang mga terminal samag hitsura sa iskren sa telebisyon nga dunay keyboard. Sama sa mga iskren sa telebisyon, sila nagabugag diyutayng nonionizing nga radyasyon. Ingong resulta, ang pagkaluwas gikan sa kadaot niini giduhaduhaan, ilabina kay ang gumagamit nagalingkod nga duol niini.

Ang kabalaka sa kadaghanan gibangon na usab dili pa dugay tungod sa mga resulta sa usa ka pagtuon sa 1,583 ka babayeng mabdos diha sa California. Nakita sa pagtuon nga ang mga babaye nga tiggamit ug VDT kapin sa 20 ka oras sa usa ka semana sa panahon sa sayo nga pagsabak miabot ug hapit duha ka pilo nga nakuhaan kon itandi sa ubang mga trabahante sa opisina nga wala mogamit niini. Sa prangka, wala mapamatud-i sa pagtuon nga ang radyasyon gikan sa VDT mao ang responsabli sa pagtaas sa gidaghanon sa mga nakuhaan. Sa pagkatinuod, ang usa ka awtoridad miingon: “Mopatim-aw nga ang suliran mao ang samag-pabrikang palibot nga ginatrabahoan sa daghang tiggamit sa VDT, dili ang makina mismo.”

Hinunoa, ang ubang mga awtoridad mirekomendar ug panagana. Si Michael Polen, usa sa mga tigdukiduki nga nalangkit sa pagtuon sa California, maoy usa kanila. Iyang gipunting ang kamatuoran nga ang unang mga pagtuon diha sa mga gisabak sa mga hayop nagpakita nga ang matang sa radyasyon nga ginabuga gikan sa VDT’s nakabalda sa pagtubo sa selula.

Ang editor sa VDT News maoy lain kinsa nagpasidaan sa mga babayeng nagsabak nga mag-amping. Siya miingon: “Nagtuo ako nga ang bisan kinsa nga nagsabak, o gustong mamabdos, kinahanglang magbantay ug mohunong sa pagtrabaho diha sa usa ka VDT.”