Ang Hunahuna sa Bibliya

Unsa ang Katuyoan sa Kinabuhi?

ANG daghan nga nakakab-ot sa kabantog ug bahandi nakadiskobre nga ang ilang “kalamposan” wala makagarantiya sa kalipay. May butang nakulang sa ilang kinabuhi, apan unsa man?

Kadtong puliki kaayo sa pagpangitag pangabuhi o paghimog ngalan sa ilang kaugalingon nga dili na mabalaka nganong kita ania dinhi, mahikurat sa pagkakab-ot sa ilang giagpas nga tumong. Uban sa bag-ong-kaplag nga dungog, ang kinabuhi hinanali mahimong makalibog ug makapuol kon kini walay hamiling katuyoan. Kining puntoha nasilsil sa bahandianong si Haring Solomon: “Ako, bisan ako, mitan-aw sa tanan . . . nga akong gihagoan sa pagbuhat, ug, tan-awa! ang tanan kakawangan ug paghakop sa hangin, ug walay butang makaayo.”—Ecclesiastes 2:11.

Daghan kanato ang malipay nga makabuhat sa tipik lamang sa mga proyekto nga nahimo sa maong maalamon ug abtik nga hari. (Ecclesiastes 2:4-9) Hinunoa, kalagmitan nga bisan karong adlawa ang atong personal nga kalamposan “wala malangkit nga lig-on sa katibuk-ang kalipay,” sumala sa mga tigdukiduki sa Columbia University (U.S.A.). Unsay makatabang? “Pagsalig sa giyang mga prinsipyo sa usa,” mao ang kaplag sa ilang pagtuon, “pagtuo nga ang kinabuhi may kahulogan.” Ikasubo, daghan kaayong tawo ang mohunong sa pagpangita sa maong kahulogan ug maghunahuna na hinuon sa pagtapos sa ilang kinabuhi.

Sa pagkatinuod, ang mga hunahuna sa paghikog naghasol sa usa sa matag tulo ka hawod Amerikanhong mga estudyante, sumala sa usa ka 1987 nga surbi. Ngano? Kay lagmit gibati niining daw malamposong mga estudyanteng lider nga sila walay pulos, napugos nga molampos, o nahilain ug mamingawon. Oo, aron mobatig kalipay sa atong kaugalingon, kinahanglan nato ang pagbati sa kaugalingong bili—ang usa ka makahuloganong kinabuhi, ang usa ka superyor nga tumong sa kinabuhi, o ang yanong maayong katarongan sa pagkinabuhi.

Kita Ania Dinhi Tungod sa Maayong Katarongan

Dili na kinahanglang motan-aw kag layo alang sa pamatuod nga ang kinabuhi dili sulagma. Hunahunag maayo ang kasagarang mga butang—ang maartihong desinyo sa usa ka dahon, ang pagkahimugso sa usa ka bata, ang kahibulongang uniberso. Dili kalikayan ang kinaiyanhong panapos nga may usang nagdesinyo niining mga butanga alang sa usa ka katarongan. “Ang iyang mga hiyas nga dili makita sa tin-aw makita . . . tungod sa mga butang nabuhat, bisan ang iyang walay-kataposan nga gahom ug Pagkadiyos.”—Roma 1:20.

Busa mangutana ang mga tawo, “Nganong ania kita dinhi?” Ang Canadianhong doktor si William Osler nakaigo sa pangunang tubag sa miingon siya: “Kita ania dinhi aron makadugang kon unsay atong mahimo sa kinabuhi, dili aron makakuha kon unsay atong mahimo gikan niana.” (Italiko amoa.) Ang usa ka Kristohanon, nga gipugos sa pagtubag sa 25 ka pulong o menos, mitubag: “Sa akong pagtuo makaingon ka nga kita ania dinhi aron himoong paraiso ang yuta.”a (Genesis 1:28; 2:8, 15) Apan—mohimog paraiso? Kita bang mga tawo makaarang nianang buluhatona?

Bag-o pa Lang Kitang Nagsugod!

Ang gitas-on sa kinabuhi nato karon nagatugot lang kanato nga makakaras sa ibabaw sa butang nga gilaraw nga atong buhaton. Hunahunaa ang 100 bilyon o kapin pang selula sa nerbiyos ug sa ubang selula diha sa imong utok. Ang gidaghanon sa mga koneksiyon nga mahimo sa maong mga selula sa usag usa maoy gibanabana nga 10⁸⁰⁰. Kining numeroha maoy makalilisang nga 10⁷⁰⁰ pilo sa gidaghanon sa mga atomo sa uniberso! Hunahunaa kon unsay imong makat-onan ug mabuhat kon makabiyahe ka nga dili magdali, makagugol sa panahong walay kataposan aron tun-an ang mga ulohan nga makaikag kanimo, ug makaugmad sa mga hiyas o mga kahanas nga gusto nimo. Unsang natagong kagahom alang sa tawhanong katugob ang tingali nagapahipi nga wala magamit diha sa matag usa kanato?

Apan kon ikaw may way-kinutobang panahon ug katigayonan nga pinaagi niana maugmad ang imong mga katakos, malikayan ba nimo ang pagkapuol? Oo—pinaagi sa pagkasabot, sama sa nasabtan sa kataposan ni Solomon, nga ang pagtagbaw-sa-kaugalingon daling makapuol!

Ang solusyon ni Solomon? “Hinumdomi, karon, ang imong Dakong Maglalalang,” siya mitambag. Kay kon dili, ang mga adlaw tinong moabot sa dihang ikaw magaingon: “Ako walay kalipay kanila.” Sa susama, si Jesus miingon: “Adunay labaw nga kalipay sa paghatag kay sa pagdawat.”—Ecclesiastes 12:1, 13; Buhat 20:35.

Ang Yawi sa Katagbawan

Busa, si Jesus nangatarongan nga ang kinabuhi dunay duha ka dagkong butang pagaunahon, nahauna ang “higugmaa si Jehova nga imong Diyos” ug ikaduha ang higugmaa “ang imong silingan sama sa imong kaugalingon.” Kini nahiuyon sa tanang butang atong nahibaloan mahitungod sa pagsaliganay sa kahayopan ug talamnon. Sanglit kining tanang ubos nga mga matang sa kinabuhi gibuhat aron magsaliganay sa usag usa, dili ba makataronganon nga kitang mga tawo uban sa atong dako kaayong natagong-kagahom gibuhat aron mokooperar sa usag usa ug mag-alagad sa Tinubdan mismo sa kinabuhi, si Jehova?—Mateo 22:37-39; Salmo 36:9.

Ang walay-kataposang mahigugmaong mga kahimoan—nga magabugkos sa atong relasyon uban sa mga tawo ug sa Diyos—maghupot sa atong mga kinabuhi nga makahuloganon sa walay kataposan. Kining malipayong pagpanghatag mao ang yawi sa matagbawong kinabuhi karon ug sa umaabot nga “bag-ong yuta.”—Isaias 65:17, 18.

[Mga footnote]

[Kahon sa panid 27]

Kinabuhing Walay Kataposan—Panalangin o Tunglo?

Ang pisiko-awtor si Dr. Robert Jastrow gisukna, “Ang kinabuhing walay kataposan mahimo kahang panalangin o tunglo sa katawhan?” Iyang tubag? “Mahimong panalangin alang niadtong may mausisaong mga kaisipan ug dili-matagbaw nga gana sa pagkakat-on. Ang hunahuna nga nabatonan nila ang panahong walay kataposan sa pagsuhop sa kahibalo makapalipay kaayo alang kanila. Apan alang sa uban nga mobati nga nakat-onan na nila ang tanan nga angay matun-an ug kansang mga kaisipan sirado na, kana mahimong makalilisang nga tunglo. Wala silay gamitan sa ilang panahon.”—“Times-Advocate,” Escondido, California, Pebrero 19, 1984.

[Hulagway sa panid 26]

Ang utok sa tawo gidesinyo aron moalagad kanato sa walay kataposan