Mga Milagro ug mga Aparisyon—Kagahapon ug Karon

Sinulat sa koresponsal sa “Pagmata!” sa Pransiya

GUADALUPE, Fátima, ug Lourdes—unsay kahulogan niining mga ngalana alang kanimo? Alang sa daghan sila maoy mga lungsod lamang sa Mexico, Portugal, ug Pransiya. Apan alang sa minilyon nga sinserong mga Katoliko, sila maoy mga sangtuwaryo, tulo sa labing bantog nga mga balay-alampoanan o halaran ni Maria sa tibuok kalibotan. Ang debosyon sa mga Katoliko nianang mga dapita wala gayod molubad niining ika-20ng siglo. Sama pananglitan, sa 1982 4,500,000 ka bisita ang mihugop sa Lourdes, samtang dagkong mga panon pa nianang grupoha ang mipuno sa Guadalupe.

Alang sa Katolikong Simbahan, kining mga halarana maoy mga dapit sa milagrosong mga pagpang-ayo. Kini ilabinang tinuod kon bahin sa Lourdes nga gihubit ni Papa Pio X ingong “sentro sa pagsimba kang Maria ug ang trono sa Eukaristikong misteryo, nga daw milabaw ang iyang kahimayaan sa tanang susamang mga sentro sa Katolikong kalibotan.” Linibong katawhan miangkon nga siya nangaayo panahon o pagkatapos sa ilang pagduaw sa Lourdes. Bisan pa niana, ang simbahan miila nga 65 lamang ka “mga milagro” ang nahitabo hangtod ning adlawa.

Bisan kon motuo ka sa Diyos o dili, aduna kay katungod nga mangutana. Unsa man ang bahin sa mga aparisyon nga kadaghanan kang Maria, sa tibuok kalibotan? Ang milagrosong mga pagpangayo ba ug ubang hitabo duyog kanila maoy pamatuod sa balaanong pagkainuyonan? Sa usa ka komperensiya nga gihimo sa Lourdes niadtong 1986, ang obispo sa Tours midasig sa iyang mamiminaw sa ‘pagpalandong sa kahulogan sa mga aparisyon’ aron sa ‘pagtino sa dagkong mga kalainan tali sa bakak ug sa matuod nga mga aparisyon.’ Kon ikaw Katoliko, lagmit ikaw usab interesado nga tukion pa kining ulohana.

Mga Aparisyon—Matuod o Bakak?

Ang Romano Katolikong Simbahan sa opisyal wala magpahayag sa dayag mahitungod sa mga aparisyon, ni nag-obligar nga tuohan kana sa iyang mga membro. Apan unsay ikahinapos sa sinserong mga Katoliko sa dihang ilang nakit-an nga si Papa Juan Paulo II miinom ug tubig gikan sa gruta sa Lourdes o nakigsulti kang Lucie, ang bugtong tawo nga buhi nga nakakita sa aparisyon sa Fátima? Dili ba kini tin-aw nga pagpadayag sa iyang opisyal nga pag-uyon (ug sa iya sa simbahan)? Dugang pa, sa iyang mga biyahe, ang papa wala magpakyas sa pagduaw sa mga sangtuwaryo ni Maria, sama nianang halaran sa Itom nga Birhen sa Czestochowa sa Polandiya.

Ang ubang mas kasarangang mga halaran giuyonan usab sa simbahan, sama sa Beauraing ug Banneux sa Belgium. Usahay ang pagsimba ginatugotan lamang diha sa lokal nga mga dapit, sama pananglit sa Tre Fontane, Italya, ug Marienfried, Alemanya.

Sukad sa kataposan sa ika-19ng siglo, hinunoa, daghan ang nangangkon nga nakakita silag mga aparisyon. Ang librong Vraies et fausses apparitions dans l’Église (Matuod ug Bakak nga mga Aparisyon sa Simbahan) nagbanabana nga adunay labaw sa 200 ka kaso gikan sa 1930 ngadto 1976. Nganong pipila lamang ang ginaila, sa dihang, matud pa sa awtor, “ang mga mensahe, gawas lamang sa pila ka eksepsion, dili man binakak ug, sa gisusi, misangpot nga popareho man”?

Ang magasing L’Histoire sa Pransiya naghatag katin-awan diha sa usa ka artikulong naghisgot sa ika-19ng siglong mga aparisyon ni Maria sa Loire nga dapit sa silangang sentral sa Pransiya. Sumala sa awtor, ang simbahan wala moutingkay niining mga hitaboa ug gipasagdan silang dili maila aron malikayan ang “kompetisyon” sa nailado nang mga halaran.

Karong adlawa, ang pipila naghunahuna nga ang presenteng pagkamahilomon sa simbahan, maoy tungod sa iyang bag-ong kaikag sa “siyentipikanhong” pagkatukma. Ang Katolikong Pranses nga awtoridad niining mga butanga, si René Laurentin, ngani miingon nga ang mga aparisyon sama niadtong sa Lourdes adunay diyutay nga purohan nga ilhong opisyal karong adlawa. Apan dili ba ang mga ilhanan—kon kini matuod nga gikan sa Diyos—pagadawatong ingon niana sa tanang panahon sa kasaysayan?

Dugang Modernong mga Aparisyon

Ang mga aparisyon nagapadayon pa. Sa San Damiano, Italya, panonpanon sa mga peregrino nagapunsisok sa dapit diin si Mama Rosa (kinsa namatay niadtong 1981) miangkon nga nakakita sa “Birhen.” Ang simbahan nagapabilin sa pagpakahilom niining ulohana, apan ang pipila sa mga matinuohon nagalaom sa kausaban sa panghunahuna human nga nahitabo kono didto ang mga pagkakabig.

Sa gamayng balangay sa Medjugorje, Yugoslavia, ang mga bata ug mga tin-edyer nagtaho sa dili pa dugay sa labaw sa usa ka libong aparisyon sa “Birhen.” Dinhi na usab, bisan pa sa kagawasan sa simbahan sa paghukom, may pila ka grupo nga nakigbisog aron ilhong opisyal ang mga kahibulongan. Bisan pa niana, ang mga Katoliko mahibulong kon unsang panghunahuna ang angayng dawaton samtang nagapaabot sa desisyon sa eklesiastikal nga awtoridad. Kasamtangan, angay ba nilang tuohan ang maong mga pamahayag?

Sa pagbug-os sa hulagway, adunay mga aparisyon usab nga gisalikway sa simbahan, sama nianang sa Palmar de Troya, Espanya. Kon bahin nianang butanga, ang obispo sa Seville nagpasidaan sa mga matinuohon nga dili “agdahon ang pagkamatuotuohon sa publiko bahin nianang katingad-anang butang nga wala ilha ug gisalikway gani sa Simbahan.” Bisan pa sa pasidaan, ang pagkabahinbahin nahitabo, nga misangpot sa pag-ekskomunikar sa usa ka arsobispo ug daghang mga pari, kinsa, nga misukol sa simbahan, nangupot nga ang mga aparisyon tinuod.

Sa unsang paagi mahukman kon ang mga aparisyon tinuod o dili? Ang sunod nga artikulo mohisgot nga detalyado niining pangutanaha.