Kabangisan—Ang Kataposan Haduol Na!
ANG mga tawo dunay daghang panahon aron mapugngan ang kabangisan, apan misamot lang hinoon kini. Dili ba tataw nga dili kini mahimo sa mga tawo? Nan, unsay paglaom nga matapos ang kabangisan?
Sa pagkamatuod, sa ilang Maglalalang nga ang mga tawo kinahanglan modangop alang sa kasulbaran sa problema, ug maingon man sa ubang mga problema. Ang iyang tubag mao ang iyang Gingharian, nga usa ka matarong langitnong kagamhanan. Gigugol ni Jesu-Kristo ang iyang buluhaton sa pagsangyaw sa yuta dinhi sa pagsulti sa mga tawo bahin niining kagamhanang Gingharian. Ikaw nag-ampo niana nga kagamhanan sa dihang ikaw moingon: “Umanhi ang imong gingharian. Matuman ang imong kabubut-on sa yuta, maingon man sa langit.”—Mateo 6:9, 10, King James Version.
Apan sa unsang paagi wagtangon sa Gingharian sa Diyos ang kabangisan? Nagtagna sa mismong mga adlaw nga atong gikinabuhian, ang Bibliya nag-ingon: “Sa mga adlaw niadtong mga haria ang Diyos sa langit magatukod ug usa ka gingharian nga dili gayod malumpag. Ug kining ginghariana . . . magadugmok ug magaut-ot sa tanang mga gingharian, ug kini molungtad sa walay kataposan.” (Daniel 2:44) Oo, ang kagamhanan sa Gingharian sa Diyos bug-os molumpag sa presenteng mga kagamhanan sa yuta ug sa mga katilingban nga ilang ginamandoan, uban sa tanan nilang kabangisan ug krimen.
Apan kanus-a kini mahitabo? Ang katumanan sa tagna sa Bibliya nagpakita nga sulod sa atong panahon sa kinabuhi. Nganong makaingon kita niini? Tungod kay “ang ilhanan” nga giingon ni Jesus nga magtimaan sa “konklusyon sa sistema sa mga butang” nagakatuman na. Kining “ilhanan” nag-apil sa “pagdaghan sa pagkadaotan.” (Mateo 24:3-14, 34) Pagkadakong kahupayan unya sa dihang hinloan sa Diyos kining napuno sa kabangisang kalibotan! Apan, aron makatagamtam sa mga kaayohan unya, kinahanglang atong buhaton ang kabubut-on sa Diyos karon.—1 Juan 2:17.
Ang tagna sa Bibliya nga girekord sa karaang manalagnang Isaias nag-asoy bahin sa imbitasyon sa Diyos sa pagpasakop sa Iyang mga pahamangno ug sa “paglakaw sa iyang mga alagianan.” Kadtong mosanong, ang tagna nag-ingon, “magahimo sa ilang mga espada nga mga punta sa daro” ug dili na gayod “makakat-on pa sa gubat.” (Isaias 2:3, 4) Laing tagna nga girekord ni Isaias nag-asoy sa resulta: “Dili na hidunggan pa ang kabangisan sa imong yuta, ang kasub-anan ni ang pagkalaglag sa sulod sa imong utlanan.” Ngano? Tungod kay “si Jehova mahimong imong kahayag nga walay kataposan.”—Isaias 60:18-20.
Bisan pa nga dunay pakigdait nga gitagamtam karon pinaagi sa pagtuon sa kabubut-on ni Jehova nga Diyos ug nagapasakop niana, handurawa lang kon unsa unyay kahimtang sa dihang paphaan sa Diyos ang yuta sa tanang pagkadili-matarong. Nan wala na unyay hinungdan sa kahadlok, walay katarongan nga mahadlok diha sa mga dalan o sa pag-adto sa parke magabii. Wala na unyay kinahanglan pa nga kandadohan ang inyong mga pultahan, walay angay kabalak-an bahin sa pagpanalipod sa imong kaugalingon.—2 Pedro 3:13.
Gusto ka bang mopuyo diha sa usa ka bag-ong kalibotan nga walay kabangisan? Mahimo kining imong malipayong palaabuton, kay kini gipasukad sa tinong Pulong sa atong Maglalalang mismo. Ang mga Saksi ni Jehova malipay sa pagtabang nimo sa pagsabot niining maayong palaabuton nga gitanyag sa atong Maglalalang sa tanan kanato. Nganong dili nimo kini susihon? Ikaw usab malipay, sa kasayoran nga matapos ang kabangisan—sa dili madugay!