“Ang Yawi sa Katalagman”

SUKAD pa sa akong pagkabata nakagunit na ako ug mga posil, apan bisan kanus-a dili na ako manag-iya pa ug usa. Kami may gamay nga uma, ug gibati ko nga nagkinahanglan ug posil aron sa pagkontrolar sa mga ilaga. Usa ka adlaw ang akong asawa ug ako nagtrabaho sa uma, nangandam alang sa pagtanom. Init kaayo kadtong adlawa, busa gibilin namo ang among duha ka anak nga lalaki sa balay kay mas bugnaw didto. Mga usa ka gatos ka piye lamang ang among gilay-on ug mibating luwas sila nga magdula. Diha ako sa traktora sa dihang ang magulang midagan paingon nako ug naghilak: “Tay, tingali naposilan ang bata!” Midagan ako sa balay ug nakaplagan ko ang akong asawa sa hagdan sa luyo nga naghatag CPR (cardiopulmonary resuscitation) sa bata. Samtang akong gidayal ang 911, nangaliyopo ako kang Jehova nga tabangang mabuhi ang akong anak, apan kon dili palihog hinumdoman siya sa pagkabanhaw. Namatay siya sa mga bukton sa iyang inahan.

Duha ug tunga ka tuig ang iyang panuigon. Pagkalumo niya ug inosente. Ang opisyal nga report nagtala sa pagkaposil nga aksidente. Gikuha sa magulang nga lalaki ang riple gikan sa among lawak katulganan, gikargahan, ug gidulaan kini. Ang kamatayon sa among anak, ilabina niining paagiha, maoy usa ka hampak nga bation namo hangtod sa adlaw nga ibalik siya ni Jehova kanamo.

Ang pagbilin sa mga bata nga silasila ra usa ka sayop, apan ang pagbaton ug posil sa balay mao ang yawi sa katalagman. Ang posil maoy usa ka yanong galamiton sa kalaglagan. Bisan kanus-a dili ako makapamatarong nga nagbaton ug usa.—Sulat nga nadawat niadtong miaging Disyembre gikan sa usa ka Saksi sa Arizona.