Nagabaligya sa Kamatayon

Samtang ang kalibotan nagagastog duolan sa usa ka trilyong dolyar sa usa ka tuig alang sa armamento:

800,000,000 ka tawo ang nagailaid sa kakabos

770,000,000 walay igong pagkaon alang sa aktibong panarbaho

100,000,000 walay puloy-anan

1,300,000,000 walay luwas nga ilimnong tubig

14,000,000 bata ang mamatay kada tuig tungod sa mga epekto sa gutom

SILA gitawag mga Negosyante sa Kamatayon, mga Tiglubong sa Sibilisasyon, Kanserosong Tumor sa Lawas sa Katilingban. Kinsa man? Ang mga negosyante sa armas sa kalibotan. Ngano?

Sa kanhiay, sila ang nagsangkap kanunay sa mga sundalo sa mga espada, mga bangkaw, mga atsa, ug mga sima alang sa tawo-sa-tawo nga pinatyanay diha sa natad-panggubatan. Niining sigloha, sila nagbuhat ug naghatod sa mga pusil, mga bomba, mga tangke, mga bapor de guerra, mga ayroplano, makahilong gas, ug himan sa gubat alang sa pagpatay ug tinagpulo ka milyong tawo sa duha ka gubat sa kalibotan samtang miguba sa binilyong dolyar sa materyal nga kahinguhaan, sama sa mga siyudad, mga balay, ug ubang propiedad. Sila ang nagsugnod sa kapin sa 120 ka gubat nga gibugno sukad sa pagkatapos sa Gubat sa Kalibotan II.

Nagapadayon sila sa pagsugnod sa dugoong mga gubat sa lainlaing mga bahin sa kalibotan. Nagabansay sila sa kasundalohan sa Ikatulong Kalibotan alang sa mas epektibong paggamit sa ilang mga armas. Gisangkapan nila ang mga nasod nga gamhanan sa militaryo sa kalibotan sa nagtipun-og nukleyar nga armas nga makapabuto sa tawhanong pamilya sa daghang beses ug maghimo sa yuta nga planeta nga dili na kapuy-an. Sila daw sa bug-os walay konsensiya. Ang ilang pagya mao: “Inyong kamatayon—among ganansiya.”

Walay negosyo ang dulot nakaapektar sa tawhanong pamilya kay sa negosyo sa armas. Tin-aw ang mga ebidensiya. Ang sunod nga artikulo mopadayag sa pila ka makapabalaka nga kasayoran.