Napulo ka Paagi sa Paghunong sa Pagtabako

1. Magbatog tinuod nga pandasig. Magbatog maayo lig-ong mga katarongan sa pagtinguha nga mohunong—pagpabili-sa-kaugalingon; kabalaka sa imong panglawas, karon ug ugma-damlag; kabalaka sa mga minahal nga apektado sa imong peligrosong batasan; tinguha nga mahimong hinlo, sa lawas ug sa moral, sa imong kaugalingon ug atubangan sa Diyos.

2. Pagbutang ug usa ka petsa sa paghunong, ug sunda kana. Kalita ang paghunong; tulin ang pagpaantos niini, apan tulin ang pagkaayo.

3. Lihok nga positibo sa pagputol sa bisyo. Dugmoka ang mga sigarilyo diha sa balay, ug buboig tubig. Labhi ang tanan nimong sinina nga nanimahong sigarilyo. Pagsugod nga bag-o, batia nga presko!

4. Likayi ang dapit nga punog-aso ug mga higalang hinabako samtang nagatapos sa bug-os nga pagkagiyan sa nikotina. Duawa ang mga dapit diin gidili ang pagtabako, sama sa mga musiyo ug mga librarya.

5. Tigoma ang salapi nga imo untang magasto sa tabako ug ihapa kana tapos sa usa ka bulan! Pagpalit ug butang nga gikinahanglan pag-ayo nimo. O pagpalit ug regalo alang sa usa ka minahal nga malipay usab sa imong kadaogan.

6. Magmapuliki sa imong kaugalingon ug sa imong mga kamot sa mga gutlo nga kasagarang mokab-ot kag sigarilyo. Pag-usap ug tseklets (dili ang may nikotina) o pagsupsop sa mga kending halang kon ang pangandoy sa pagsigarilyo mosamok kanimo. Inay mosigarilyo, panepilyo sa ngipon human sa pagpangaon. Paglakawlakaw, pagsulat, panahi, paghardin, pag-ayoayog mga butang, panglimpiyo sa kotse, ug uban pa.

7. Kon mobatig pangurog o kaapeke, ginhawag lalom ug hinay. Inay mokab-ot ug sigarilyo, inom ug daghang tubig ug duga sa prutas. Ang mga likido makahinlo.

8. Pag-ehersisyo sumala sa itugot sa imong lawas. Pakigkita una sa imong doktor kon unsay makataronganong ehersisyo. Ang imong moarang-arang nga kondisyon sa lawas modasig nimo.

9. Menosi ang imong mainom nga alkohol. Ang alkohol ug sigarilyo kadaghanan “magkauban,” sanglit ang alkohol makabikil sa pangandoy sa pagtabako. Kunhori ang sosyal nga mga okasyon sa dihang kini mahitabo. Isipang masawayon ang mga anunsiyo sa tabako—analisaha ang ilang pagkamabaw ug pagkamalansison. Ayaw pagpatonto pag-usab.

10. Kon nagapalandong kang mahimong usa sa mga Saksi ni Jehova, pag-ampong tim-os sa Diyos alang sa tabang ug unya lihok sumala sa imong mga pag-ampo. Ayaw pagdahom ug milagro; ipahinabo lamang kini.