Mga Sukdanan sa Pamatasan nga Mohatag Kalipay
UNSAY buhaton sa usa ka bata kon pasagdan atubangan sa usa ka lamesang punog makapaayo-sa-lawas nga pagkaon ug mga dulse? Kon walay magagiya kaniya, lagmit nga pilion niya ang pagkaon sa gusto niya kaayo—kalagmitan ang dulse—hangtod nga siya magsakit.
Kon bahin sa pamatasan, giatubang sa tawo ang mga kapilian. Unsay gusto niya kaayo? Malipayon pamilyahanong kinabuhi ug kaugmaong may kasegurohan o, bisan unsay sangpotanan, inadlaw nga pagkinabuhi nga gisentro sa kalingawan? Kon unsay pilion niya, ang iyang gipili mag-umol sa iyang kinabuhi ug mag-apektar sa iyang kaugmaon—sa kaayohan o sa kadaotan.
Ang Sangpotanan
Ang mga bunga sa rebolusyon sa sekso ug walay-rendang kagawasan maoy dili maayo. Ang mga tawo nga naglihok sumala sa ilang gusto nakaatubang sa labihan ka daghang wala-kagustohing mga suliran: bungkag nga mga panimalay, wala-kagustohing mga pagmabdos, kamatayon gumikan sa AIDS ug ubang sakit nga ipasa sa sekso, nadaot nga mga kinabuhi tungod sa pag-abusar sa droga, ug ubang daotang sangpotanan. Kining daotang sangpotanan mohaom sa kabatbatan nga giingon sa Bibliya sa Proverbio 16:25: “Adunay usa ka dalan nga matarong atubangan sa usa ka tawo, apan ang kataposan niana mao ang mga dalan sa kamatayon.”—Tan-awa usab ang Galacia 5:19-21.
Ang kaylap nga kahakog ug kagawasan nga walay tulubagon mohaom usab sa kabatbatan sa atong panahon nga hikaplagan sa 2 Timoteo 3:1-4: “Sa kataposang mga adlaw moabot ang lisod nga mga panahon. Kay ang mga tawo mahimong mahigugmaon sa ilang kaugalingon, mga mahigugmaon sa salapi, tigpagawal, mapahitas-on, mga tampalasan, masukihon sa mga ginikanan, dili mapasalamaton, dili maunongon, walay gugma nga kinaiya, dili ikasabot, tigbutangbutang, walay pagpugong-sa-kaugalingon, mabangis, walay gugma sa maayo, mga mabudhion, gahig-ulo, tigpaburot, mga mahigugmaon sa kalingawan inay sa Diyos.”
Ang Patukoranan sa Labing Maayong Pamatasan
Kining tanan nagapakita sa panginahanglan sa usa ka tinubdan sa mga sukdanan nga labaw kay sa iya sa tawo aron kita makalakaw nga maalamon niining lisod nga mga panahon. Si Jeremias, usa sa mga manunulat sa Bibliya, nag-ila niini sa dihang siya miingon: “Nahibalo ako, Oh Jehova, nga dili iya sa yutan-ong tawo ang iyang dalan.”—Jeremias 10:23.
Apan kinsay makapahimutang sa patukoranan alang sa labing maayong mga sukdanan sa pamatasan? Sa iyang librong Cours de philosophie, ang Pranses nga propesor si Armand Cuvillier nagsaysay nga siya, sama sa kadaghanang pilosopo, nagdawat sa “tawo ingong pasukaranang sukdanan.” Bisan pa niana, siya nagapahinumdom kanato nga ang tanang kalagdaan sa pamatasan nga gipasukad sa tawo maoy huyang ug lagmit pulihan sa uban sa ulahi.
Ang tagbuhat sa usa ka makina kasagaran mao ang labing kuwalipikadong tawo sa pagpaandar nga labing maayo niana. Sama usab sa Diyos ug sa tawo. Ingong Maglalalang sa tawo, si Jehova anaa sa labing maayong kahimtang sa pagpakita kaniya sa mga sukdanan nga angay niyang huptan, ug kon ngano. Sa Bibliya, si Jehova nagatawag sa iyang kaugalingon ang Usang ‘nagtudlo kanato sa pagpahimulos sa atong kaugalingon, ang Usang nagapalakaw kanato sa dalan nga angay natong pagalaktan.’—Isaias 48:17.
Kinaraang mga Sukdanan?
Ang moral bang mga sukdanan sa Bibliya ikapadapat sa atong panahon? Kapig 1,900 ka tuig kanhi, gihatag ni apostol Pablo ang talaan sa mga hiyas nga gikinahanglan sa mga alagad sa Diyos. Gihisgotan niya ang “gugma, kalipay, pakigdait, hataas-nga-pailob, kalulot, pagkamaayo, pagtuo, kalumo, pagpugong-sa-kaugalingon.” Kini bang mga hiyasa dili kaayo bililhon karong adlawa? Dili gayod ingon! Bisan pag nausab ang mga kahimtang, kining hatag-as nga mga prinsipyo sa gihapon mao ang labing maayo.—Galacia 5:22, 23.
Ang sama ikaingon mahitungod sa mga butang ginadili sa Bibliya. Pananglitan, nganong gilaglag sa Diyos ang mga siyudad sa Sodoma ug Gomora? Gisaysay sa disipulong si Judas nga tungod kay ang ilang mga molupyo “nagtugyan sa ilang kaugalingon ngadto sa kahilayan ug kahiwian sa sekso.” Sanglit kining asoya ug ubang susama “gisulat alang sa atong pagtudlo,” “ingon nga pasidaan kanato,” ang moral nga mga pagtulon-an nga gikan kanila balido gihapon.—Judas 7, Phillips; Roma 15:4; 1 Corinto 10:11.
Mga Sukdanan nga Makapalipay Kanimo
Hinumdomi nga ang Bibliya maoy linain. Tuohi kini, “dili ingon nga pulong sa mga tawo, kondili, sumala sa pagkamatuod mao kini, ingon ang pulong sa Diyos.” (1 Tesalonica 2:13) Sa tanang milyonmilyong basahon sa kalibotan, ang Bibliya lamang ang ‘dinasig sa Diyos, ug kini makatul-id sa mga butang.’ (2 Timoteo 3:16) Kini lamang ang makatagana kanato sa labing maayong mga sukdanan ug makapakita kon sa unsang paagi motultol kini sa kinabuhing dayon sa usa ka bag-ong kalibotan. Sa pagkamatuod, ang dalan nga maalamon mao nga susihon kini.
Kana gayod ang gibuhat sa usa ka batan-ong lalaki nga ginganlag si Joël. Pila ka tuig nga miagi, gilatas niya ang kadalanan sa iyang natawhang lungsod sa Pransiya kauban sa ubang mga batan-on—nga sangkap sa armas. Ilado siya sa iyang pagkadaling masuko, ug siya namaligyag droga ug bugaw. Nakatuon si Joël bahin sa Bibliya ug sa paglaom nga ginahatag niini, ug, sa wala madugay, siya bug-os nga nabag-o, nga naghiklin sa mga buhat nga gitunglo sa Bibliya. Ang ubay-ubay niyang kanhing mga higala nakombinsir nga nakaplagan niya ang kamatuoran, busa sila mihimo usab ug dagkong mga kausaban sa ilang kinabuhi ug nabawtismohan ingon nga mga Saksi ni Jehova.
Hinuon, kadaghanan niadtong nahimong mga Saksi ni Jehova wala magkinabuhi nga halayo sa mga prinsipyo sa Bibliya sama ni Joël ug sa iyang mga kauban. Apan ang tanan nga nahimong mga Saksi mouyon sa pagpalandong pag-usab sa mga sukdanan nga nagagiya sa ilang mga kinabuhi—bisan pag sila dili daotan sa ilang kaugalingon—ug sila kombinsido nga ilang nakaplagan ang usa ka kahikayan sa mga sukdanan nga makapalipay kanila.
Sa tibuok nga kalibotan, halos upat ka milyong Saksi naningkamot sa pagsunod sa maong mga prinsipyo kada adlaw, bisan unsang nasod o matang sa katilingban ang ilang gipuy-an. Sila nagabutang usab nga una sa intereses sa Gingharian sa Diyos, nga nagapalabi sa espirituwal nga mga sukdanan diha sa ilang mga kinabuhi. Nganong dili dawaton ang ilang pagdapit sa pagtabang nimo sa pagsusi sa mga kaayohan nga mahimong mabatonan usab nimo gikan sa maong mga sukdanan? Ang “dagayang kalinaw” gisaad sa tanan nga nagapili niini.—Salmo 119:165; Mateo 6:33.
[Hulagway sa panid 9]
Gikinahanglan sa mga tawo ang mga sukdanan nga labaw pa sa tawhanong mga pilosopiya