Pagsanta sa Pagsugmat sa Daotang mga Batasan

“NAKADAOG KO! Tapos na gayod ang pakigbisog!”

Kanang mga pulonga nagpahayag sa pagbati sa kadaogan nga nasinati sa usa ka tawong nakigbugno sa dili-maayong batasan ug nga nakapukgo niana.

Bisan pa niana, makapalagot gayod nianang tawhana ang usa ka pagsugmat! Makapahiubos gayod sa pagdiskobre nga ang daotang batasan, nga gituohan nga nawagtang na sa walay kataposan, nakahimog katingad-an ug gamhanan nga pagsugmat!

Tingalig ikaw nakasinati sa pagsugmat sa usa ka daotang batasan nga gusto gayod nimong masumpo. Kon kanay kahimtang, basin magsugod ka sa pagduda sa katakos nimo sa pagbulag nga permanente sa wala-kagustohing batasan. Ug mahimong daghan ang wala-kagustohing batasan: sobrang pagkaon, “pagkagiyan” sa tam-is, sobrang pag-inom, mapahinaykong pagpalit, naandang pagkaulahi, pagsugal, pagtabako, ug daghan pang ubang batasan.

“Nganong Mibalik Ako sa Dihang Natapos Na ang Labing Daotan?”

Mopatim-aw nga sa dihang nakalabang ka na sa unang mga ang-ang sa pag-undang sa daotang bisyo, mahimong mas sayon ang paglikay niana. Bisan pa niana, gipadayag sa nagkalainlaing mga pagtuon nga kasagaran dili kini mao ang kahimtang.

Sa basahong Selfwatching, ang mga awtor nga si R. Hodgson ug P. Miller mipatin-aw: “Ang pagsugmat lagmit kaayong mahitabo sa unang tulo ka bulan human sa pagtambal. Sa pagkamatuod, gipaila sa usa ka pagtuon nga mga 66 porsiento sa mga tigtabako, mga alkoholiko ug mga giyanon sa droga mahibalik sa ilang daang batasan sulod sa 90 ka adlaw sa ilang unang hukom sa pagbag-o. Bisan pa niana, kadtong nakapukgo sa ilang pagkagiyan sa unang tulo ngadto unom ka bulan dunay dako kaayong purohan nga makapadayon sa maong pagpugong.”

Nganong ang pagsugmat sa daotang mga batasan usa ka kapeligrohan sa mga bulan​—o usahay katuigan​—tapos sa unang yugto sa paglikay? Ang usa ka hinungdan mao nga tingali motungha na usab ang pila ka suliran sa kinabuhi, ug ang daotang mga bisyo maoy mga tinubdan sa temporaryong kahupayan sa nangaging panahon. Busa bisan pag tapos nga gibati nimo nga nasumpo ang dili-maayong bisyo, kon ikaw matensiyon​—sama sa ipahinabo sa kapit-os sa salapi, mga suliran sa panglawas, lainlaing mga kahiubos​—pagbantay sa usa ka pagsugmat! Kon gilaayan o gimingaw ka, ayaw katingala kon ang imong kanhing bisyo mosulay sa pagbalik.

Ang ubang mga hinungdan sa pagsugmat mahimong mao ang sosyal nga mga kapit-osan, mga pakigbingkil batok sa mga tawo, negatibong mga emosyon, ug pagkaanaa sa mga kahimtang diin kusog ang tentasyon.

Pagsanta sa Pagsugmat

Bisan tapos sa unang yugto sa malamposong pagbuntog sa wala-kagustohing batasan, kinahanglan nga ipadayon nimo ang paggamit ug mga estratehiya nga nakatabang nimo sa paghunong sa bisyo sa unang bahin. Ang maong mga estratehiya magamit nga mapinadayonon, o sa pila ka kaso basin igo na ang pagbalik niana nila matag karon ug unya, sama sa diha sa mga yugto sa kapit-osan o kusog nga tentasyon.

Pananglitan, tingali ikaw naghupot ug sinulat nga mga rekord sa pagsunod sa imong pag-uswag, sama sa inadlaw o senemanang mga pagbasa samtang ikaw magsulay sa pagpaniwang. Kini mapuslanon sa paghunong sa usa ka bisyo ug angay dili pagabiyaan bisan pag nagtuo ka nga miagi na ang kapeligrohan.

Basin usab ikaw may pila ka paagi sa pagganti sa imong kaugalingon sa dihang nagmalamposon ka sa pagsukol sa bisyo nga gisingkamotan nimong mabuntog. Ang usa ka gibag-ong sistema sa pagganti basin makatabang sa pagsanta sa usa ka pagsugmat. O, sa paghunong sa usa ka bisyo, nagpatabang ka ba sa usa ka higala? Itugot nga kini siya motabang nimo sa pagpadayon nga mabulag sa imong nangaging daotang bisyo.

Unsang ubang mga estratehiya ang motabang nimo sa pagsanta sa sugmat, ilabina sa mga yugto sa kapit-osan?

Pagsukol Pinaagi sa Kapuli

Si Dr. R. Stuart, sikolohikanhong direktor sa Weight Watchers International, Inc., misugyot sa mosunod alang sa mga naningkamot sa pagpaniwang: “Himoang puliki kanunay ang imong hunahuna sa nagkadaiyang makalingawng mga buluhaton. Mosaler gayod ang pakamot nga mga buhat, ug ang mga pasatiempo usab. Kon mahimo, andama ang mga suplay ug ipatindog ang dapit nga trabahoan, aron makabuhat ka sa imong buluhaton sa dihadiha.” Tingalig ang maong teknik makatabang nimo.

Oo, pulihig maayong buluhaton ang imong daotang bisyo kanhi. Hinumdomi, lagmit gihatagan kag diyutayng kahupayan sa maong bisyo sa dihang ang kinabuhi pit-os kaayo, busa pilia ang mga kapuli nga epektibong moalagad sa samang katuyoan. Ikaw makabasa, makaehersisyo, makatugtog sa usa ka musikal nga instrumento, makadibuho, o makaduaw ug mga higala. Pagsugod karon pinaagi sa pagsulat sa usa ka listahan sa lagmit kapuling mga buluhaton. Ipasiugda kadtong imong gihukom nga ipadayon. Balikbalika sa pagbansay kining bag-ong mga buluhaton sama sa gihimo nimo sa imong kanhing bisyo. Kini mohimo nga kini mas sayon nga buhaton inigbati nimo sa kapit-osan. Sa pagkamatuod, kining kapuling mga buluhaton mahimong mga batasan​—maayong mga bisyo!

Ang Kahinungdanon sa Pagsumpo sa Pagkawala sa Kadasig

Sanglit ang tentasyon sa pagbalik sa daotang mga bisyo tingali kusog ilabina sa dihang ikaw mapit-osan, mapasibo ba nimo ang mga kahimtang sa imong kinabuhi aron makunhoran ang kapit-osan? Bisan pag dili malikayan ang pila ka suliran, ikaw makatuon sa pagpugong sa imong mga emosyon aron dili nimo bation nga nabug-atan sa pagkanawad-an sa kadasig.

Ang gahom sa pagkanawad-an sa kadasig kasagarang pakamenosan. Nagaingon ang usa ka proverbio sa Bibliya: “Ang espiritu sa usa ka tawo makaantos sa iyang [lawasnong] sakit; apan mahitungod sa usa ka naguol nga espiritu, kinsay makaantos niana?” (Proverbio 18:14) Pagkatinuod! Kasagaran dili ang suliran apan ang misangpot nga pagkanawad-an sa kadasig makapaluya kanato.

Gipahayag kini sa laing proverbio sa Bibliya niining paagiha: “Ikaw ba naluya sa adlaw sa kasakitan? Ang imong kusog diyutay ra.” (Proverbio 24:10) Ang dili-mapugngang negatibong mga emosyon makapaluya kanimo. Kana mohimo kanimo nga daling madutlan sa sugmat, nga tingali magpugos nimo nga mobalik sa daotang bisyo alang sa kahupayan. Nan, pagkabililhon nga buntogon ang pagkanawad-an sa kadasig!

Apan unsa man kon, bisan pa sa imong panlimbasog, imong nadiskobrehan nga ikaw nagsugod sa pagbalik?

Temporaryong Kapakyasan Kontra Bug-os nga Sugmat

Pagkasayon ang paghunahuna: ‘Napakyas ako, busa maayo pang moundang na ako.’ Buntoga kanang pagbatia. Ayaw itugot nga ang temporaryong kapakyasan, o bisan ubay-ubayng kapakyasan, magkahulogan sa kapildihan alang kanimo.

Tagda kining ilustrasyona: Kon ikaw nagsaka sa hagdanan ug nadalus-os sa usa o duha ka ang-ang tungod kay natumba, mangatarongan ka ba, ‘Maayo pag mobalik ako sa paglakaw ngadto sa tiilan sa hagdanan ug magsugod na usab’? Siyempre dili! Nan, nganong imong ipadapat kining palsong pangatarongan sa pagbugno sa daotang mga bisyo?

Ang mga pagbati sa sala kasagarang mosunod sa usa ka kapakyasan. Basin pasobrahan nimo kining mga pagbatia pinaagi sa paghinapos nga ikaw dili maayo, nga ikaw huyang ug kinaiya ug dili takos sa bisan unsang maayo. Ayaw itugot nga magpasobra ka sa maong pagbati sa sala. Kana makapakubos sa imong kusog nga imong gikinahanglan aron ipadayon ang bugno. Ug hinumdomi kini: Ang labing bantogang tawo nga sukad naglakaw niining yutaa, si Jesu-Kristo, mianhi aron sa paglukat sa mga makasasala, dili sa hingpit nga mga tawo. Busa walay mausa kanato ang magbuhat sa hingpit sa mga butang karong panahona.

Ang laing punto nga palandongon mao nga ang pagbati sa sala basin maoy kombenyenteng pag-ikyas aron magtugot nato sa pagbuhat nga balikbalik sa samang butang. Sa ilang basahong You Can’t Afford the Luxury of a Negative Thought, si P. McWilliams ug J. Roger misaysay niining posibleng sangpotanan: “Ang pagbati sa sala . . . nagatugot kanato sa pagbuhat niini pag-usab. Sa dihang atong ‘nabayran na ang bili’ sa atong ‘krimen,’ kita libre nang mobuhat niana pag-usab basta andam kitang mobayad sa bili. Ang bili? Labaw nga pagbati sa sala.”

Dili kinahanglan nga tugotan nimong ang temporaryong kapakyasan mahimong bug-os nga lunop sa sugmat. Hinumdomi nga, sa kataposan, ang pagbuntog sa bisyo mao ang hinungdanon, dili kon kaha nasinati nimo ang pila ka sugmat sa paningkamot nimo sa pagbuntog niana.

Niining bahina maalamon ang paghukom daan kon unsang estratehiya ang imong gamiton kon hisakpan nimo ang imong kaugalingon nga mibalik sa daan nimong batasan. Ang maong magpaluyong plano magsangkap nimo sa pagbugno sa sugmat sa kinasayohang gutlo.

Posible​—Ug Takos Niana!

Nan, ang bugno batok sa usa ka daotang batasan molapaw pa sa pag-antos sa unang yugto sa masakit nga mga simtoma sa pag-undang sa bisyo. Malangkit niini ang pag-antos sa mga pagbati sa kapakyasan nga dili mobalik nga permanente sa daotang batasan.

Lisod ba? Oo, apan posible gayod. Ang estratehiya nga nakatabang nimo sa paghunong sa bisyo sa unang bahin, kon ipadayon motabang sa pagsanta o pagpukgo sa mga sugmat. Ang labing dakong kaayohan? Pagtahod-sa-kaugalingon​—usa ka mapuslanong ganti sa kaugalingon. Ug lagmit ikaw labi pa usab nga tahoron niadtong nakaila kanimo.

[Hulagway sa panid 14]

Ang pagdalus-os sa pila ka ang-ang wala magkinahanglan nga mosugod na usab sa sinugdanan

[Hulagway sa panid 15]

Ang hulga sa sugmat makunhoran pinaagi sa pagpabiling puliki sa makalingawng mga buluhaton