Ang Kalag ba Mamatay?

KANANG pangutanaha tingali ang misantop sa usa ka tawo nga nagbasa sa magasing Time sa Hulyo 30, 1990. Naghisgot bahin sa nagdugang nga trapiko sa dalan sa Silangang Alemanya sa wala pa mausa ang duha ka Alemanya sa Oktubre 3, 1990, ang magasin nagtaho diha sa artikulo niini nga “Kusog nga Padagan Diha sa mga Bukid-bukid”: “Mga kamatayon sa dalan diha sa Silangan misaka sa 60% sa unang unom ka bulan sa 1990, nakapildi ug 1,078 ka mga kalag.”

Ang artikulo dayag nga nagpasabot nga 1,078 ka tawo ang nangamatay sa mga aksidente sa sakyanan; sila namatay. Apan ang 1,078 ka kalag ba namatay? Ang Time nasayop ba sa paggamit niini sa terminong “mga kalag” alang sa mga tawo nga unod ug dugo? Unsa ba gayod ang kalag?

Sa tibuok kasaysayan, adunay daghan nagkalainlaing mga ideya mahitungod sa kalag. Daghang karaang mga tawo nagtuo nga usa ka dili-lawasnon nga kalag magpadayong buhi inigkamatay, nga ang kamatayon, sa pagkamatuod, maoy usa ka ganghaan sa laing kinabuhi. Ipapatay pa gani sa ubang mga magmamando sa karaang panahon ang ilang mga ulipon inigkamatay nila sa pagtuo nga ang mga kalag niining mga tawhana magpadayon sa pagsilbi kanila.

Bisag daghan karon ang nagtuo usab nga ang kalag nagkahulogan sa usa ka dili-lawasnon, o espiritu, nga bahin sa usa ka tawo nga magpabilin inigkamatay sa pisikal nga lawas, ang Bibliya wala magtudlo niini. Sa pagkamatuod, ang Deuteronomio 6:​6, naghisgot mahitungod sa “bisan unsang patay nga kalag.” Dili, ang kalag dili maoy usa ka dili-lawasnon nga butang diha kanimo. Ikaw mao ang kalag. Ang kalag mamatay, sumala sa gitaho sa magasing Time.

Ang The Jewish Encyclopedia sa (1910) nag-ingon: “Ang pagtuo nga ang kalag magpadayon sa paglungtad human madugta ang lawas maoy usa ka pangagpas sa pilosopiya o teolohiya inay kay sa yanong pagtuo, ug busa wala gayod itudlo sa Balaang Kasulatan.”​—Tomo VI, panid 564.