Nagadayeg Kang Jehova Diha sa Nahiusang Koro
‘MAKAHIHILAP sa pagbati ang pag-awit ug nakapatubod sa akong mga luha—matahom kaayo kadto. Wala na kinahanglana ang uban pang musikal nga mga instrumento, ug ang daw malisod nga bahin sa pag-awit nahimo nga may katingalahang kasayon. Matahom kaayo ang pagkaangay.’
Kini ang gipahayag sa presidente niadto sa Watch Tower Society, si Nathan H. Knorr, human nakatambong ug asembliya sa mga Saksi ni Jehova sa Zambia. Maayo kaayong pagkahubit niadto ang makatandog nga tunog sa ginatos ka Aprikanong mga tingog nga gipatugbaw diha sa mananoy nga awit.
Ang pag-awit maoy bahin sa Aprikanong kultura. Diha sa tipikanhong baryo sa Aprika, komun ang pagkakitag mga babaye nga nagalaylay sa kumpas sa lumad nga mga awit, mga batan-on nagakanta sa ilang paboritong mga awit samtang naggatas sa mga baka, ug ang mga lalaki nagaawit sa balikbalik nga tuno nga daw nagdasig sa ilang mga baka sa pagbira sa ilang mabug-at nga karga. Dunay awit ang halos tanang kalihokan sa baryo.
Diha sa kadaghanang mga eskuylahan sa Aprika, ang mga bata ginatudloan sa pag-awit pinaagi sa sistema sa tonic sol-fa. Unsa kining tonic sol-fa? Sa tinuod, kini mao ang “do, re, mi” nga paagi nga nahimong popular sa usa ka iladong musikal nga salida sa mga tuig nga milabay. Ang do, re, mi, fa, sol, la, ti, do katugbang sa walo ka nota sa iskala nga ginatugtog sa mga musikal nga instrumento sa Kasadpan. Kining letter-notation nga sistema nagagamit ug mga colon, mga kudlit, mga koma, ug mga linya sa pagpaila sa gidaghanon sa kumpas diha sa bara sa musika ug sa gidugayon sa mga nota. Ang upat ka tingog (soprano, alto, tenor, ug bas) gihan-ay sa ubos sa usag usa, ug niini nga panagduyog sa mga tingog nga motungha ang makapatandog nga musika. Daghan ang miuyon nga kining paagiha mas sayon nga tun-an ug makanta kay sa gigamit sa kadaghanan nga staff notation.
Busa, ang mga awit diha sa songbook nga gigamit sa mga Saksi ni Jehova, Mag-awit ug mga Pagdayeg Kang Jehova, gihulad sa sinulat ngadto sa tonic sol-fa alang sa tanang Aprikanong mga edisyon. Una, daghang oras ang ginagugol diha sa piano aron mapasibo ang mga honi sa naandang upat ka bahin nga harmoniya. Unya, ang matag tingog sa baylo usbon ngadto sa letter-notation nga tonic sol-fa. Sunod, ang usa nga pamilyar sa sistema sa sol-fa mao ang itudlo sa pag-awit sa matag tingog sa matag kanta aron matino ang kasibo sa matag nota. Gigamit na niadto ang mga kompiyuter aron malinyahan ang tonic sol-fa uban ang mga pulong sa matag awit. Sa kataposan posible na ang pag-andam alang sa pagprinta ang sayon nga mabasang musika nga imong makita nga gihulad dinhi ning panira.
Ang resulta? Ang mga Saksi ni Jehova sa Aprika makapaangay sa ilang mga tingog diha sa masadyang pagdayeg kang Jehova. Ang mga pulong sa usa sa mga awit maayong pagkapahayag sa ilang mga pagbati: “Kami nagasinggit sa kalipay, nagapakpak sa among mga kamot. Daghan ang nahimo sa Diyos kanato! Nanglanog ang among mga tingog sa masadyaong pagdayeg diha sa nahiusang koro.”
[Diagram sa awit sa metodong sol-fa sa panid 27]
(Alang sa aktuwal nga pagkahan-ay, tan-awa ang publikasyon)